Vhurifhi Ha U Thoma Vhu Yaho Kha Vhathesalonika 2:1-20
2 Vhahashu, ni a zwi ḓivha uri u ni dalela hashu a ho ngo vha ha fhedzi.+
2 Vhunga ni tshi zwi ḓivha uri ro tambula na u sa farwa zwavhuḓi ngei Filipi,+ Mudzimu o ri ṋea tshivhindi tsha uri ri ni ḓivhadze mafhungo maḓifha a Mudzimu+ ri tshi pikiswa zwihulu.
3 Ngauri zwe ra ni eletshedza zwone zwo vha zwi songo khakhea kana u vha na zwiṱuṱuwedzi zwivhi kana u vha na vhufhura,
4 nṱhani hazwo, ri amba sa vho nangiwaho nga Mudzimu uri ri huwelele mafhungo maḓifha. A ri zwi iteli u takadza vhathu, fhedzi ri zwi itela u takadza Mudzimu, ane a ṱolisisa mbilu dzashu.+
5 Ni a zwi ḓivha uri a ro ngo ni fhura nga maipfi a kungaho, kana u ḓiita vhavhuya uri ri wane zwiṅwe zwithu.+ Ṱhanzi yashu ndi Mudzimu!
6 A ro ngo ṱoḓa u huliswa nga vhathu, nga inwi kana nga vhaṅwe, naho ro vha ri tshi nga vha ro ni humbela uri ni ri thuse nga zwiṅwe zwithu samusi ri vhaapostola vha Kristo.+
7 Zwo fhambanaho na zwenezwo, ro ni fara nga vhulenda, u fana na mme a mamisaho, ane a funa vhana vhawe.
8 Ngauri ri a ni funa nga maanḓa,+ ro ḓiimisela* u ni ḓivhadza mafhungo maḓifha a Mudzimu na u ḓikumedzela uri ri ni thuse.+
9 Vhahashu, ndi ngoho uri a no ngo hangwa uri ro shuma nga maanḓa zwi tshi konḓa. Musi ri tshi ni ḓivhadza mafhungo maḓifha a Mudzimu, ro shuma vhusiku na masiari uri ri wane zwine ra zwi shaya, uri ri si vhe muhwalo kha inwi.+
10 Inwi na Mudzimu no zwi vhona uri ri a fhulufhedzea, ro luga na uri a ri solei kha zwe ra ni thusa ngazwo.
11 Ni a zwi ḓivha uri ro ni ṱuṱuwedza, u ni khuthadza na u ni eletshedza noṱhe kha zwine na fanela u zwi ita,+ sa zwine khotsi+ a zwi ita kha vhana vhawe,
12 uri ni dzule ni tshi tshila nga nḓila ine Mudzimu a i takalela,+ ene ane a ni vhidzela Muvhusoni wawe+ na vhugalani hawe.+
13 Ndi ngazwo ri tshi dzula ri tshi livhuwa Mudzimu,+ ngauri ri tshi ni vhudza ipfi ḽa Mudzimu, no ḽi ṱanganedza sa ipfi ḽa Mudzimu, hu si ḽa vhathu. Ḽeneḽo ipfi ḽa Mudzimu ḽi thusa inwi ni tendaho.
14 Vhahashu, no edzisa zwivhidzo zwa Mudzimu zwa Yudea zwi re na vhuthihi na Kristo Yesu, ngauri no tambudzwa nga vhathu vha shangoni ḽa haṋu+ nga nḓila i fanaho na ine vhahashu vha Yudea vha khou tambudzwa ngayo nga Vhayuda,
15 vhe vha vhulaya Murena Yesu+ na vhaporofita na u ri tovhola.+ Zwiṅwe hafhu, zwine vha zwi ita a zwi takadzi Mudzimu, a zwi vhuyedzi muthu,
16 musi vha tshi lingedza u ri thivhela u amba na vha dzitshaka uri vha tshidzwe.+ Vha tshi ita zwenezwo, vha engedza zwivhi zwavho. Fhedzi mbiti dzawe dzi tsini na u vha ḓela.+
17 Vhahashu, musi ro fhambanywa na inwi lwa tshifhinganyana (ro vha ri tshi ni humbula naho ri sa ni vhoni), ro ita zwoṱhe uri ri dovhe ri ni vhone, ngauri ro vha ro ni ṱuvha nga maanḓa.
18 Ndi ngazwo ro vha ri tshi ṱoḓa u ḓa kha inwi. Nṋe Paulo ndo lingedza u ḓa luvhili; fhedzi Saṱhane a ri thivhela nḓila.
19 Musi Murena Yesu a tshi vhuya, naa a ni nga ḓo vha fhulufhelo ḽashu, dakalo na khare yashu ine ya ḓo ita uri ri takale?+
20 Ngangoho ni vhugala na dakalo ḽashu.
Ṱhaluso dzi re magumoni a siaṱari
^ Thevhedz., “takalela.”
