Vhurifhi Ha U Thoma Vhu Yaho Kha Vhakorinta 4:1-21
4 Ri ṱoḓa vhathu vha tshi ri dzhia sa vhaḓinḓa vha Kristo na vhalanda vha Mudzimu vha zwiphiri zwikhethwa.+
2 Zwi lavhelelwaho kha vhalanda ndi uri vha ite mushumo wavho nga u fhulufhedzea.
3 Ndi vhona zwi si zwa ndeme u sengiswa nga inwi kana nga khothe. Ngauri na nṋe a thi ḓisengisi.
4 Ngauri ndi ḓivha ndi si na mulandu. Fhedzi a thi khou amba uri ndo luga, ngauri ndi Yehova* ane a ntsengisa.+
5 Ni songo haṱula+ muthu tshifhinga tsho vhewaho tshi sa athu u swika, ni lindele Murena a tshi ḓa. U ḓo bvisela khagala zwiphiri zwi re swiswini na zwi re mbiluni dza vhathu. Mudzimu u ḓo kona u khoḓa muṅwe na muṅwe u ya nga zwe a zwi ita.+
6 Vhahashu, nṋe na Apolo+ ri khou ni vhudza zwenezwi zwithu uri ni vhuyelwe, ni kone u guda hoyu mulayo, une wa ri: “Itani zwo ṅwaliwaho fhedzi,”* uri ni si ḓikukumuse,+ na vho takalela muṅwe u fhira muṅwe.
7 Ndi mini zwine na vha nazwo zwine zwa ita uri ni humbule uri ni khwine kha vhaṅwe? Naa a no ngo tou ṋewa zwoṱhe zwine na vha nazwo?+ Arali no tou ṋewa, ndi ngani ni tshi zuwa u nga a no ngo tou ṋewa?
8 Naa no no fushea? Naa no no pfuma? Naa no no vha mahosi?+ Ndi tou tama arali ni vhe no no vha mahosi, uri na riṋe ri vhuse na inwi.+
9 Ndi vhona u nga Mudzimu o ita uri riṋe vhaapostola ri vhe tshigwada tsha u fhedzisela u dzhena tshiṱediamu, uri ri vhonwe nga vhoṱhe+ ngauri ro haṱulelwa lufu.+ Ri khou vhonwa nga vharuṅwa na vhathu.
10 Ri matsilu+ ngauri ri tevhela Kristo, fhedzi inwi no ṱalifha ngauri ni na vhuthihi na Kristo. Riṋe a ri na nungo, fhedzi inwi ni na maanḓa; inwi ni a huliswa, ngeno riṋe ri tshi nyadziwa.
11 U swika zwino ri tshee na nḓala+ na ḓora,+ a ri na zwiambaro, ri khou rwiwa,+ a ri na haya,
12 ri khou shuma nga maanḓa.+ Musi ri tshi semiwa, ri a fhaṱutshedza;+ musi ri tshi tovholwa, ri konḓelela ri sa fheli mbilu;+
13 musi ri tshi tshinywa dzina, ri amba navho nga vhulenda;+ u swika zwino vhathu vha ri dzhia sa mathukhwi, sa zwithu zwo laṱiwaho.
14 Ndi ni ṅwalela zwenezwi zwithu, hu si uri ndi ni shonise, fhedzi uri ndi ni ṱuṱuwedze sa vhana vhanga vhane nda vha funa.
15 Naho ni na vhadededzi vha 10 000 vhane vha ni gudisa u tevhela Kristo, a ni na vhokhotsi vhanzhi. Nṋe ndo vha khotsi aṋu nga u ni funza mafhungo maḓifha ngauri ndi na vhuthihi na Kristo Yesu.+
16 Ndi a ni humbela uri ni edzise nṋe.+
17 Ndi ngazwo ndi tshi khou ruma Timotheo kha inwi, samusi a tshi tou nga ṅwananga ane nda mu funa, ane a shumela Murena nga mbilu yoṱhe. U ḓo ni humbudza nḓila ine nda shumela ngayo Kristo Yesu,+ samusi ndi tshi funza fhethu hoṱhe zwivhidzoni zwoṱhe.
18 Vhaṅwe vha a ḓikukumusa, vha vhona u nga a thi nga ḓi kha inwi.
19 Arali Yehova* o zwi funa, ndi ḓo ḓa kha inwi hu si kale, ndi hone ndi tshi ḓo vhona vhaḽa vhane vha ḓikukumusa arali vha na maanḓa a Mudzimu, hu si u pfa zwine vha amba.
20 Ngauri Muvhuso wa Mudzimu u vhonala nga u vha na maanḓa a Mudzimu, hu si nga zwine muthu a zwi amba.
21 Ni ṱoḓa ndi tshi ḓa na ṱhamu+ kana ndi tshi ḓa nga lufuno na u vuḓa?
Ṱhaluso dzi re magumoni a siaṱari
^ Kana “Ni songo pfuka zwo ṅwaliwaho.”
