Vhurifhi Ha U Thoma Vhu Yaho Kha Vhakorinta 12:1-31
12 Vhahashu, ndi ṱoḓa ni tshi ḓivha nga ha zwifhiwa zwi bvaho kha Mudzimu.+
2 Ni a zwi ḓivha uri musi ni tshi kha ḓi vha vhathu vha dzitshaka,* no vha ni tshi gwadamela midzimu ya zwifanyiso,+ ni tshi i tevhela hoṱhe hune ya ni isa.
3 Ndi ṱoḓa ni tshi ḓivha uri a hu na ane a nga ri: “Yesu o semiwa!” a tshi thusiwa nga muya wa Mudzimu. A hu na ane a nga ri: “Yesu ndi Murena!” a sa thusiwi nga muya mukhethwa.+
4 Hu na zwifhiwa zwo fhambanaho, fhedzi hu na muya muthihi;+
5 hu na mishumo minzhi ine ra i itela Mudzimu,+ fhedzi yoṱhe ri i itela Murena muthihi;
6 muya mukhethwa u ṱuṱuwedza vhathu nga nḓila dzo fhambanaho uri vha ite zwithu zwinzhi, fhedzi hu na Mudzimu muthihi ane a ita zwenezwi zwoṱhe nga vhathu vhoṱhe.+
7 Zwine muya mukhethwa wa vha thusa u zwi ita zwi a vhonala, Mudzimu u vha ṋea wonoyo muya uri vhathu vha vhuyelwe.+
8 Muya wo ṋea muṅwe tshifhiwa tsha u amba nga vhuṱali, wa ṋea muṅwe nḓivho ya u amba,
9 wa ita uri muṅwe a vhe na lutendo,+ muṅwe a vhe na tshifhiwa tsha u fhodza,+
10 muṅwe a ite mishumo ya maanḓa,+ muṅwe a porofite, muṅwe a pfesese mafhungo o hevhedzwaho,+ muṅwe a ambe nga nyambo dzo fhambanaho,+ muṅwe a ṱalutshedzele nga nyambo dzo fhambanaho.+
11 Fhedzi yeneyo mishumo yoṱhe i itwa nga wonoyo muya muthihi, u tshi kovhela muṅwe na muṅwe nga nḓila ine wa funa.
12 Muvhili u na miraḓo minzhi. Naho miraḓo yoṱhe ya muvhili i minzhi, ndi muvhili muthihi,+ na muvhili wa Kristo wo tou ralo.
13 Roṱhe ro lovhedzwa nga muya kha muvhili muthihi, hu sa londwi uri ri Vhayuda kana Vhagerika, ri vhalanda kana ro vhofholowa, roṱhe ro wana wonoyo muya muthihi.
14 Ngauri muvhili u na miraḓo minzhi, hu si muthihi.+
15 Arali mulenzhe wa ri, “A thi muraḓo wa muvhili ngauri a thi tshanḓa,” zwenezwo a zwi ambi uri a si muraḓo wa muvhili.
16 Arali nḓevhe ya ri, “A thi muraḓo wa muvhili ngauri a thi ḽiṱo,” zwenezwo a zwi ambi uri a si muraḓo wa muvhili.
17 Arali muvhili woṱhe wo vha u ḽiṱo, ro vha ri tshi ḓo pfa nga mini? Arali wo vha u nḓevhe, ro vha ri tshi ḓo nukhedza nga mini?
18 Mudzimu o vhea miraḓo ya muvhili washu nga nḓila ine a funa.
19 Arali miraḓo yoṱhe yo vha i tshi fana, muvhili wo vha u tshi ḓo vha wo tou itisa hani?
20 Hu na miraḓo minzhi, fhedzi muvhili ndi muthihi.
21 Ḽiṱo ḽi nga si ambe na tshanḓa ḽa ri, “A thi u ṱoḓi,” kana ṱhoho i nga si ambe na milenzhe ya ri, “A thi ni ṱoḓi.”
22 Zwo fhambanaho na zwenezwo, miraḓo ya muvhili ine ya nga a i na nungo ndi yone ya ndeme,
23 miraḓo ine ra humbula uri a si ya ndeme ndi yone ine ya huliswa vhukuma,+ na miraḓo ine ya vhonala i songo naka i a ṱhonifhiwa vhukuma,
24 ngeno miraḓo yo nakaho i sa ṱoḓi tshithu. Mudzimu o vhumba muvhili nga yeneyo nḓila, a tshi hulisa vhukuma miraḓo ine ya si huliswe,
25 uri miraḓo i si fhandekane, fhedzi i ṱhogomelane.+
26 Arali muraḓo muthihi u tshi pfa vhuṱungu, na miṅwe miraḓo yoṱhe i ḓo pfa vhuṱungu;+ arali muṅwe muraḓo u tshi huliswa, na miṅwe miraḓo yoṱhe i ḓo takala nawo.+
27 Ni muvhili wa Kristo,+ noṱhe ni miraḓo ya muvhili wawe.+
28 Mudzimu o nanga miraḓo ya tshivhidzo, a i ṋea mishumo i sa fani: vha u thoma ndi vhaapostola;+ vha vhuvhili ndi vhaporofita;+ vha vhuraru ndi vhane vha funza;+ ha vha na vhane vha ita mishumo ya maanḓa,+ na vhane vha vha na tshifhiwa tsha u fhodza,+ vhane vha thusa vhaṅwe, vhane vha vha na vhukoni ha u livhisa+ na vhane vha amba nyambo dzo fhambanaho.+
29 Naa vhoṱhe ndi vhaapostola? Naa vhoṱhe ndi vhaporofita? Naa vhoṱhe ndi vhane vha funza? Naa vhoṱhe vha ita mishumo ya maanḓa?
30 Naa vhoṱhe vha na tshifhiwa tsha u fhodza? Naa vhoṱhe vha amba nga nyambo dzo fhambanaho?+ Naa vhoṱhe vha a ṱalutshedzela?+
31 Dzulani ni tshi lwela u wana zwifhiwa zwi bvaho kha Mudzimu.+ Fhedzi ndi ḓo ni sumbedza tshine tsha fhira zwoṱhe.+
Ṱhaluso dzi re magumoni a siaṱari
^ Ndi vhathu vhane vha si vhe vhatendi.
