Hai. Ri huwelela misi yoṱhe nnḓu nga nnḓu, fhedzi a ri iti wonoyo mushumo u itela uri ri kone u tshidzwa. (Vha-Efesa 2:8) Ndi ngani?

 Kha zwi vhambedze nga nḓila i tevhelaho: Kha ri ri muṅwe munna a re na mafunda u fulufhedzisa u ṋea vhathu vhoṱhe tshifhiwa tsha thengokhulu arali vha ya huṅwe fhethu nga tshifhinga tshee a tshi vhea. Arali zwa vhukuma ni tshi tenda nga mbilu yoṱhe fulufhedziso ḽa onoyo munna, naa ni ḓo tevhela nyeletshedzo dzawe? A zwi timatimisi uri ni ḓo dzi tevhela! Zwi vhonala uri ni ḓo vhudza na khonani dzaṋu na vha muṱani nga ha tshenetsho tshibuli, u itela uri na vhone vha vhuyelwe ngatsho. Naho zwo ralo, onoyo munna ha nga ni ṋei tshenetsho tshifhiwa nge na tou tshi shumela. U ni ṋea ṅwambo wa uri ndi zwe a vha o ḓiimisela u zwi ita.

 Nga hu fanaho, Ṱhanzi dza Yehova vha tenda uri Mudzimu u ḓo ṋea vhathu vhoṱhe vhane vha mu thetshelesa vhutshilo vhu sa fheli he a vha fulufhedzisa hone. (Vha-Roma 6:23) Ri lwela u vhudza vhaṅwe zwine ra zwi tenda, ri tshi fulufhela uri vha ḓo vhuyelwa nga mafulufhedziso a Mudzimu. Fhedzi a ri tendi uri ri nga shumela u tshidzwa nga ṱanganela kha mushumo wa vhuḓinḓa. (Vha-Roma 1:17; 3:28) Vhukuma, a hu na muthu ane a nga vhuya a ita zwithu zwine zwa nga ita uri a fanelee u ṋewa phaṱhutshedzo i swayeaho nga u rali i bvaho ha Mudzimu. “Ho ngo ri tshidzela mishumo ya u lugani ye riṋé ra i ita, o ri tshidza nge a ri khathutshela.”—Tito 3:5.