Sa Ṱhanzi dza Yehova, ri shuma vhukuma u fhaṱa miṱa yashu u katela na ya vhahura vhashu. Ri ṱhonifha Mudzimu samusi hu ene o itaho uri hu vhe na miṱa. (Genesi 2:21-24; Vhaefesa 3:14, 15) A tshi shumisa Bivhili, u ri ṋea vhulivhisi vhune ha thusa vhathu vhoṱhe uri vha vhe na mbingano dzo khwaṱhaho na dzi takadzaho.

 Ri ita zwoṱhe zwine ra nga kona u tevhela zwine Bivhili ya amba, samusi i yone ine ya ri thusa u vha vhanna, vhafumakadzi na vhabebi vha khwine. (Mirero 31:10-31; Vhaefesa 5:22–6:4; 1 Timotheo 5:8) Vhuṱali vhu re Bivhilini vhu thusa na miṱa ine miraḓo yayo ya ṱanganela kha vhurereli vhu sa fani. (1 Petro 3:1, 2) Vhonani nḓila ye vhaṅwe vha ḓipfa ngayo musi miraḓo ya miṱa yavho i tshi vha Ṱhanzi dza Yehova:

•   “Miṅwaha yashu ya u thoma ya rathi yo vha yo ḓala u ṱavhelana mikosi na dziphambano. Naho Ivete o vha e muthu wa lufuno na u sa fhela mbilu, musi a tshi vha Ṱhanzi ya Yehova, o ita tshanduko dze dza phulusa mbingano yashu.”​—Clauir wa Brazil.

•   “Ndo vha ndi sa zwi tikedzi musi munna wanga Chansa a tshi thoma u guda Bivhili na Ṱhanzi dza Yehova ngauri ndo vha ndi tshi zwi dzhia uri vha kwasha miṱa. Nga tshenetsho tshifhinga, ndo mbo ḓi thoma u vhona nḓila ye Bivhili ya thusa ngayo mbingano yashu.”​—Agness wa Zambia.

 Musi ri tshi huwelela, ri sumbedza vhahura vhashu uri arali ra shumisa vhuṱali vhu bvaho Bivhilini zwi ḓo ri thusa u

•   Nanga mufarisi wa mbingano nga vhuṱali

•   Sedzana na ṅwaha wa u thoma wa mbingano

•   Tshilisana na vhomazwale na vhomakhulu

•   Shumisa tshelede nga vhuṱali

•   Fhelisa u ṱaṱisana

•   Guda u hangwela

•   Gudisa vhana

 Ngoho ndi ya uri, tshiṅwe tshifhinga zwi a itea. Sa tsumbo, ṱhoḓisiso yo itwaho nga khamphani ya Sofres nga 1998 yo sumbedza uri mbingano nthihi kha dza 20 dzo vha na thaidzo khulwane musi muṅwe mufarisi a tshi vha Ṱhanzi ya Yehova.

 Yesu o dzula o amba uri vhane vha tevhela zwine a funza vho vha vha tshi ḓo vha na thaidzo mbinganoni. (Mateo 10:32-36) Muḓivhazwakale Will Durant o amba uri nga fhasi ha Muvhuso wa Vharoma, “Vhakriste vho vhonwa mulandu wa u kwasha miṱa,” a vhaṅwe vha Ṱhanzi dza Yehova vha khou vhonwa mulandu u fanaho na ṋamusi. Fhedzi naa zwenezwi zwi amba uri Ṱhanzi ndi dzone dzo itaho uri hu vhe na u sa anḓana?

 Musi European Court of Human Rights i tshi dzhia phetho kha mulandu wa u pomokiwa ha Ṱhanzi dza Yehova uri vha kwasha miṱa, yo amba uri kanzhi miraḓo ya muṱa i si Ṱhanzi i thoma dzikhakhathi nga u hana “u ṱanganedza na u ṱhonifha vhurabeli vhuswa ha muraḓo wa muṱa.” Ya dovha ya amba uri “zwenezwi a zwi itei kha Ṱhanzi fhedzi, zwo ḓowelea na kha mbingano dzine dza vha na vhurereli ho fhambanaho.” b Naho vho sedzana na u pikiswa nga ṅwambo wa vhurereli havho, Ṱhanzi dza Yehova vha lwela u tevhela zwine Bivhili ya amba: “Ni songo lifhedza vhuvhi nga vhuvhi.  . . Itani zwoṱhe zwine na nga kona uri ni vhe na mulalo na vhathu vhoṱhe.”​—Vharoma 12:17, 18.

 Ṱhanzi dzi ita zwine Bivhili ya amba musi i tshi ri ‘ni vhingwe Murenani fhedzi,’ zwine zwa amba u vhinga muthu ane wa vha kha vhurereli vhuthihi nae. (1 Vhakorinta 7:39) Yeneyi ndaela i tshimbidzana na zwine Bivhili ya amba nahone i a shuma. Sa tsumbo, iṅwe thero i re kha Journal of Marriage and Family ya 2010 yo amba uri “kanzhi vhavhingani vhane vha vha kha vhurereli vhuthihi, vhane vha ita na u tenda zwithu zwi fanaho” vha vha na mbingano yavhuḓi. c

 Naho zwo ralo, Ṱhanzi a dzi ṱuṱuwedzi vhane vha vha kha vhuṅwe vhurereli uri vha ṱutshele mufarisi a si Ṱhanzi. Bivhili i ri: “Arali wahashu e na mufumakadzi ane a si vhe mutendi, o tenda u dzula nae, a songo mu ṱutshela; arali mufumakadzi e na munna ane a si vhe mutendi, o tenda u dzula nae, a songo mu ṱutshela.” (1 Vhakorinta 7:12, 13) Ṱhanzi dza Yehova vha tevhela yeneyi ndaela.