Zakariyo 1:1-21
1 Doro* hukmronligining ikkinchi yili+, sakkizinchi oyida, Iddoning nevarasi Barxiyo o‘g‘li Zakariyo* payg‘ambarga+ Yahova quyidagi so‘zlarni ayon qildi:
2 «Yahova ota-bobolaringizdan qattiq g‘azablangan edi+.
3 Ularga ayt: “Qo‘shinlar Sarvari Yahova demoqda: “Menga qaytinglar,— deb aytmoqda Qo‘shinlar Sarvari Yahova, — shunda Men ham sizlarga qaytaman”+,— deb aytmoqda Qo‘shinlar Sarvari Yahova”.
4 Ota-bobolaringiz singari bo‘lmanglar. O‘tmishda payg‘ambarlar: “Qo‘shinlar Sarvari Yahova demoqda: “Iltimos, yomon yo‘llaringizdan qaytib, yovuz ishlaringizni tashlanglar”,— deb ularga e’lon qilishgan+.
“Ammo ular Menga quloq ham solmadilar, e’tibor ham bermadilar”+,— demoqda Yahova.
5 “Hozir ota-bobolaringiz qayerda?! Payg‘ambarlar abadiy yashaganmi?!
6 Xizmatkorlarim bo‘lmish payg‘ambarlar orqali aytgan so‘zlarim va farmonlarim amalga oshganini ota-bobolaringiz ko‘rmadimi?!+ Shunda ular Menga qaytib: “Qo‘shinlar Sarvari Yahova yurgan yo‘llarimiz va qilgan ishlarimizga yarasha qanday yo‘l tutishini aytgan bo‘lsa, shunday qildi”+,— deb tan olishdi».
7 Doro hukmronligining ikkinchi yili+, 11- oyi, ya’ni shebat* oyining 24- kunida Iddoning nevarasi Barxiyo o‘g‘li Zakariyo payg‘ambarga Yahovaning so‘zlari ayon bo‘ldi:
8 «Men kechasi vahiy ko‘rdim. Vahiyda qizil otga mingan kishi daradagi mirta daraxtlari orasida turgan ekan. Uning orqasida qizil, qizg‘ish-jigarrang va oq otlar bor edi.
9 Shunda men: “Taqsirim, bular kim?” — deb so‘radim.
Men bilan gaplashayotgan farishta javoban dedi: “Ular kimligini senga ko‘rsataman”.
10 So‘ng mirta daraxtlari orasida turgan kishi dedi: “Yahova bu odamlarni yer yuzini aylanib chiqishga yuborgan edi”.
11 Shunda ular mirta daraxtlari orasida turgan Yahovaning farishtasiga: “Biz yerni aylanib chiqdik. Butun yer yuzida tinchlik va osoyishtalik hukm surmoqda”+,— deyishdi.
12 Yahovaning farishtasi shunday dedi: “Ey, Qo‘shinlar Sarvari Yahova, qachongacha Quddus va Yahudo shaharlaridan rahm-shafqatingni darig‘ tutasan?+ Mana 70 yildirki, Sen ulardan g‘azablanyapsan!+”
13 Yahova men bilan gaplashayotgan farishtaga mehr va tasalli beruvchi so‘zlar ila javob qaytardi.
14 Keyin men bilan gaplashayotgan farishta menga dedi: “E’lon qil: “Qo‘shinlar Sarvari Yahova demoqda: “Quddus va Sionni qattiq sevib, ular uchun qayg‘uryapman+.
15 Beparvo xalqlardan qattiq g‘azablanyapman+. Men xalqimni ozgina jazolamoqchi edim+, ular esa xalqimni ko‘p qiynashdi+”.
16 Shu sababli Yahova aytmoqda: “Men Quddusga rahm-shafqat ko‘rsatish uchun qaytaman+ va uyim o‘sha yerda qayta quriladi+,— demoqda Qo‘shinlar Sarvari Yahova, — o‘lchov ipi Quddus ustidan tortiladi”+.
17 Yana bunday deb e’lon qil: “Qo‘shinlar Sarvari Yahova demoqda: “Mening shaharlarim yana yaxshilik bilan to‘lib-toshadi. Yahova Sionni yana yupatib+, Quddusni yana tanlaydi”+».
18 So‘ng yuqoriga qaradim va to‘rtta shoxni+ ko‘rdim.
19 Keyin men bilan gaplashayotgan farishtadan so‘radim: «Bu shoxlar nimani bildiradi?» Farishta esa: «Bu — Yahudo+, Isroil+ va Quddusni+ to‘zg‘itib yuborgan shoxlar»,— deb javob qaytardi.
20 So‘ng Yahova menga to‘rtta ustani ko‘rsatdi.
21 Men esa: «Ular nima qilish uchun kelishyapti?» — deb so‘radim.
U: «Shoxlar Yahudoni shu darajada to‘zg‘itib yuborgan ediki, hech kim boshini ko‘tara olmadi. Bu ustalar Yahudoni to‘zg‘itib yuborish uchun shoxlarini ko‘targan xalqlarni qo‘rqitgani va uloqtirib tashlagani kelishyapti»,— deb javob qaytardi.
