Shohlar birinchi kitob 26:1-25
26 Bir muncha vaqtdan keyin, Zif+ aholisi Givoga+, Shoulning oldiga borib: «Dovud Yishmon* qarshisidagi Xaxilo tepaligida yashirinib yuribdi»+,— deb aytishdi.
2 Shunda Shoul Zif sahrosiga yo‘l oldi. U Dovudni qidirib topish uchun Isroilning 3 000 ta sara askarini olib, Zif sahrosiga qarab ketdi+.
3 Shoul Yishmon qarshisidagi Xaxilo tepaligida, yo‘l bo‘yida qarorgoh qurdi. Dovud sahroda yashab yurgan edi va Shoul uni qidirib kelganidan xabar topdi.
4 Shunda Dovud, Shoul chindan ham kelganini aniqlash uchun ayg‘oqchilarni jo‘natdi.
5 So‘ng Dovud, Shoul qarorgoh qurgan joyga bordi va Shoul bilan uning lashkarboshisi Nir o‘g‘li Abnur+ uxlab yotgan joyni ko‘rdi. Shoul qarorgohning o‘rtasida uxlab yotgandi, askarlar esa uning atrofida joylashgan edi.
6 Dovud xetiy+ Oximalekdan va Zeruya+ o‘g‘li Yo‘abning akasi Abushaydan+: «Kim men bilan Shoulning qarorgohiga tushadi?» — deb so‘radi. Abushay: «Men siz bilan tushaman»,— dedi.
7 Kechasi Dovud bilan Abushay askarlar tomonga yo‘l olishdi. Shoul qarorgohning o‘rtasida yotgan bo‘lib, bosh tomonida nayzasi yerga sanchib qo‘yilgan edi. Abnur bilan askarlar esa uning atrofida yotishgan edi.
8 Abushay Dovudga: «Bugun Xudo dushmaningizni qo‘lingizga berdi+. Ruxsat bersangiz, nayza bilan bitta urib uni yerga qadab qo‘yaman. Ikkinchi marta urishga hojat bo‘lmaydi»,— dedi.
9 Dovud esa Abushayga: «Unga ziyon yetkazma. Yahovaning moylanganiga+ qo‘l ko‘targan odam aybsiz qolishi mumkinmi?»+ — deb aytdi.
10 Dovud gapini davom ettirib dedi: «Barhayot Xudo Yahova haqqi qasam ichaman, uni yo Yahovaning O‘zi uradi+, yo kuni bitib+ olamdan o‘tadi yoki jangga borib halok bo‘ladi+.
11 Yahovaning haqqi-hurmati Yahovaning moylanganiga qo‘l ko‘tarishni hatto aqlimga ham sig‘dira olmayman!+ Kel, uning bosh tomonidagi nayzasi bilan suvdonini olib, keta qolaylik».
12 Shunday qilib, Dovud Shoulning bosh tomonidan nayza bilan suvdonni oldi va ular ketishdi. Ularni hech kim ko‘rmadi ham+, payqamadi ham. Yahova ularni qattiq uyquga mubtalo qilgani uchun, ularning bari qotib uxlab yotardi.
13 Keyin Dovud qarama-qarshi tomonga o‘tdi-da, tog‘ning tepasiga chiqib, o‘sha yerda turdi. Ularni katta masofa ajratib turardi.
14 Dovud askarlarga va Nir o‘g‘li Abnurga+: «Abnur, meni eshityapsizmi?» — deb baqirdi. Abnur: «Shohni chaqirayotgan kim?» — deb javob qaytardi.
15 Dovud unga shunday dedi: «Abnur, siz dovyurak kishi emasmisiz?! Isroilda sizga teng keladigani topilmaydi-ku! Unda nima uchun shoh hazratlarini qo‘riqlamadingiz? Bir askar kelib, shoh hazratlarini o‘ldirmoqchi bo‘ldi+.
16 Siz yaxshi ish qilmadingiz. Barhayot Xudo Yahova haqqi qasam ichib aytamanki, siz o‘limga loyiqsiz. Chunki siz taqsiringizni, Yahovaning moylanganini+ qo‘riqlamadingiz. Atrofga bir qarang-chi, shohning bosh tomonidagi nayzasi bilan suvdoni qani?»+
17 Shunda Shoul Dovudni ovozidan tanib qolib: «Dovud, o‘g‘lim, bu sening ovozingmi?»+ — dedi. Dovud: «Ha, bu mening ovozim, shoh hazratlari»,— deb javob berdi.
18 Keyin shunday dedi: «Taqsirim, nega xizmatkoringizning orqasidan quvyapsiz?+ Men nima qildim? Mening aybim nimada?+
19 Shoh hazratlari, o‘tinaman, xizmatkoringizning so‘zlariga quloq soling. Bordi-yu, menga qarshi chiqishga sizni Yahova undagan bo‘lsa, unda U don nazrimni qabul qilsin*. Lekin sizni odamlar menga qarshi qo‘zg‘atgan bo‘lsa+, ular Yahovaning oldida la’nati bo‘lsin. Chunki ular bugun meni haydab chiqarib, Yahova meros qilib bergan yerda+ yashashimga yo‘l qo‘yishmayapti. Ular go‘yo: “Bor, boshqa xudolarga xizmat qil!” — deb aytishyapti.
20 Qonim Yahovaning huzuridan yiroqda to‘kilishiga yo‘l qo‘ymang. Kaklikni tog‘ma-tog‘ quvib yurgan kishi kabi Isroil shohi ham bir burgani izlab yuribdilar»+.
21 Unga javoban Shoul: «Men gunoh qildim+. Dovud, o‘g‘lim, ortingga qayta qol. Endi senga boshqa ziyon yetkazmayman. Chunki bugun hayotim* sen uchun qimmatbaho ekanini ko‘rdim+. Men ahmoqona yo‘l tutganimni va katta xato qilganimni tan olaman»,— deb aytdi.
22 Dovud quyidagicha dedi: «Shohning nayzasi menda. Yigitlaringizdan birortasi kelib, uni olib ketsin.
23 Yahova har bir kishining odilligi hamda sadoqatiga yarasha taqdirlaydi+. Yahova bugun sizni mening qo‘limga topshirgan edi, ammo men Yahovaning moylanganiga qarshi qo‘l ko‘tarishni istamadim+.
24 Bugun sizning hayotingiz men uchun qimmatbaho bo‘lganidek, mening hayotim ham Yahovaning nazarida qimmatbaho bo‘lsin va U meni barcha balo-qazolardan asrasin»+.
25 Shoul unga: «Dovud, o‘g‘lim, Xudo senga baraka bersin. Sen albatta buyuk ishlarni qilasan va albatta g‘alaba qozonasan»+,— dedi. So‘ng Dovud o‘z yo‘lidan ketdi. Shoul esa uyiga qaytdi+.
