Саҳрода 35:1–34
35 Яҳова Мўаб даштларида, Иордан бўйида+, яъни Ерихо яқинида Мусога шундай деб айтди:
2 «Исроил ўғилларига буюр, ўзларига теккан меросдан левиларга яшаш учун шаҳарларни ва уларнинг атрофидаги яйловларни+ беришсин+.
3 Левилар бу шаҳарларда яшашади, яйловлар эса уларнинг уй ҳайвонлари, чорвалари ва бошқа ҳайвонлари учун хизмат қилади.
4 Сизлар левиларга берадиган шаҳарларнинг яйловлари, шаҳар девори атрофи бўйлаб 1 000 тирсак* масофани ўз ичига олсин.
5 Шаҳар атрофи бўйлаб, шаҳар ташқарисининг шарқ томонидан 2 000 тирсак, жануб томонидан 2 000 тирсак, ғарб томонидан 2 000 тирсак ва шимол томонидан 2 000 тирсак ўлчаб чиқинглар. Бу ерлар шаҳарларнинг яйловлари бўлади.
6 Одам ўлдирган киши қочиб бориши учун+, левиларга 6 та паноҳ шаҳар+, бундан ташқари яна 42 та шаҳар ажратиб беринглар.
7 Уларга жами бўлиб 48 та шаҳарни яйловлари билан бирга беринглар+.
8 Бу шаҳарларни Исроил ўғилларининг мулкидан бўлиб беринглар+. Каттароқ қабиладан кўпроқ, кичикроғидан эса камроқ олинглар+. Ҳар бир қабила ўзига теккан меросга яраша, шаҳарларидан баъзиларини левиларга берсин».
9 Яҳова Мусога гапиришда давом этиб, деди:
10 «Исроил ўғилларига бундай деб айт: “Сизлар Канъон юртига+ кириш учун Иордан дарёсидан ўтяпсизлар.
11 Ўзларингиз учун қулай бўлган шаҳарларни танланглар. Улар паноҳ шаҳарлар сифатида хизмат қилиб, атайин одам ўлдирмаган киши ўша ерга қочиб боради+.
12 Бу шаҳарлар қон учун қасос олувчидан паноҳ бўлиб хизмат қилади+. Шунда қотил жамоа олдида ҳукм қилинмасидан олдин ўлдирилмайди+.
13 Сизлар тақдим этадиган мана шу олтита шаҳар паноҳ шаҳарлар бўлади.
14 Паноҳ шаҳарларнинг учтасини Иорданнинг шу тарафидан+, қолган учтасини эса Канъон юртидан ажратиб беринглар+.
15 Бу олтита шаҳар Исроил ўғиллари, орангиздаги мусофирлар+ ва келгиндилар учун паноҳ шаҳарлар бўлиб хизмат қилади. Атайин одам ўлдирмаган киши ўша ерга қочиб боради+.
16 Агар бир киши бошқасини темир асбоб билан уриб ўлдирса, у қотил ҳисобланади. Қотил албатта ўлдирилсин+.
17 Борди-ю, кимдир бошқа одамни тош билан уриб ўлдирса, у қотилдир. Қотил албатта ўлдирилсин.
18 Агар бир киши бошқасини ёғоч асбоб билан уриб ўлдирса, у қотил ҳисобланади. Қотил албатта ўлдирилсин.
19 Қотилни қон учун қасос олувчи ўлдирсин. Уни учратиши биланоқ ўлдирсин.
20 Мабодо бирон киши бошқани ёмон кўргани дастидан итариб ёки ёвуз ниятда* унга бирон нарса отиб ўлдириб қўйса+,
21 ё бўлмаса, нафратдан мушт тушириб ўлдирса, мушт туширган одам албатта ўлдирилсин. У қотилдир. Қотилни қон учун қасос олувчи киши учратиши биланоқ ўлдирсин.
22 Борди-ю, бирон киши бошқани ёмон кўргани учун эмас, балки бехосдан итариб юборса ёки ҳеч қандай ёвуз ниятсиз унга бирон нарса отиб юборса+,
23 ёхуд уни кўрмасдан тош отиб юборса ёки тошни устига тушириб юборса ва у ўлиб қолса, лекин унга нисбатан ҳеч қандай душманлиги ёки зарар етказиш нияти бўлмаган бўлса,
24 жамоа келтирилган бу йўл-йўриқларга асосланиб, одам ўлдирган киши билан қон учун қасос олувчи ўртасидаги масалани ҳал қилсин+.
25 Жамоа одам ўлдирган кишини қон учун қасос олувчининг қўлидан халос этиб, у қочиб борган паноҳ шаҳарга қайтариб юборсин. У ўша ерда, муқаддас мой билан мойланган олий руҳоний вафот этгунга қадар яшасин+.
26 Мабодо одам ўлдирган киши ўзи қочиб борган паноҳ шаҳарнинг ташқарисига чиқса
27 ва қон учун қасос олувчи киши паноҳ шаҳарнинг ташқарисида уни ушлаб олиб ўлдирса, у қон тўкилишида айбдор бўлмайди.
28 Чунки одам ўлдирган киши олий руҳонийнинг вафотигача паноҳ шаҳарда яшаши лозим. Олий руҳонийнинг ўлимидан кейингина, у ўз ерига қайтиб бора олади+.
29 Булар — барча турар жойларингиз бўйлаб авлодларингиз оша амал қилишингиз керак бўлган қонунлар.
30 Одам ўлдирган ҳар қандай киши гувоҳларнинг кўрсатмалари бўйича+ қотил сифатида ўлдирилсин+. Лекин биттагина гувоҳнинг кўрсатмаси асосида ҳеч бир киши ўлдирилмасин.
31 Ўлимга лойиқ бўлган қотилнинг ҳаёти* учун тўлов олманглар. У албатта ўлдирилсин+.
32 Шунингдек, паноҳ шаҳарга қочиб борган, аммо олий руҳонийнинг вафотига қадар ўз ерига қайтиб бориб яшамоқчи бўлган киши учун ҳам тўлов олманглар.
33 Яшаётган юртингизни булғаманглар, чунки қон тўкиш юртни булғайди+. Қон тўкилган юртни қон тўккан одамнинг қони билангина ювиш мумкин+.
34 Ўзингиз яшайдиган юртни булғаманглар, чунки Мен ҳам шу юртда яшайман. Мен Яҳова, Исроил халқи орасида яшайман”+».
