Baibol na djerephia nẹ oshephiyọ, tobọ obo re ghanre rẹ wo vwo vwo ẹguọnọ rẹ oma wẹn vwo te ẹdia. Ẹguọnọ tiọyena churobọ si wọ vwọ vwẹrote oma wẹn, muọghọ kẹ, vẹ wo vwo jẹ oma wẹn eno kueku. (Matiu 10:31) Ukperẹ e vwo titi oma rẹ ohwo, Baibol na phi ẹguọnọ romobọ phiyọ ẹdia ro foro.

Ono yen avwanre ke vwo ẹguọnọ rọyen?

1.   Ọghẹnẹ yen ofori nẹ avwanre ke vwo ẹguọnọ rọyen. Baibol na yonori nẹ urhi rọ ma rho kparobọ yen: “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi.”—Mak 12:28-30; Urhi Rivẹ 6:5.

2.   Urhi rivẹ rọ vwọ kpahọn yen: “Wọ mẹ guọnọ ọrivẹ wẹn kirobo wọ guọnọ oma wẹn.”—Mak 12:31; Livitikọs 19:18.

3.   Dede nẹ Baibol na ghwe jurhi ọvo phiọgun nẹ wo vwo ẹguọnọ rẹ oma wẹ-ẹn, jẹ urhi rẹ “guọnọ ọrivẹ wẹn kirobo wọ guọnọ oma wẹn” djerephia nẹ oshephiyọ e vwo vwo ẹguọnọ romobọ, ji muọghọ kẹ oma vwo te ẹdia, erere je herọ.

Ẹguọnọ rẹ ono yen Jesu vwọ kobaro?

 Jesu dje obo re vwo phi ẹguọnọ rẹ Ọghẹnẹ, ẹguọnọ rẹ ọrivẹ, vẹ ọ romobọ phiyọ ẹdia rẹ abavo, ọ da vuẹ idibo rọyen nẹ ayen nene udje rọyen.—Jọn 13:34, 35.

1.   Ẹguọnọ rẹ Jihova Ọghẹnẹ yen Jesu vwọ kobaro, ọ da vwẹ oma kpahotọ kẹ orugba rẹ iruo rẹ Ọghẹnẹ. Ọ da ta: “Mi ruẹ kirobo rẹ Ọsẹ na ji urhi kẹ vwẹ, rere akpọ na vwọ sa riẹn nẹ me guọnọ Ọsẹ na.”—Jọn 14:31.

2.   Jesu vwo ẹguọnọ rẹ irivẹ rọyen, o dje ẹguọnọ na phia rọ vwọ vwẹrote ọdavwẹ rẹ ihwo efa tobọ te ẹdia rọ vwọ vwẹ arhọ rọyen kpahotọ kẹ ayen.—Matiu 20:28.

3.   Jesu dje ẹguọnọ kẹ oma rọyen te ẹdia, womarẹ ọ vwọ ghwọrọ ọke vwo rovwonma, riemu, je riakpọ vẹ idibo rọyen kugbe ihwo re kerhọ rọyen.—Mak 6:31, 32; Luk 5:29; Jọn 2:1,2; 12:2.

Wọ vwọ vwẹ ẹguọnọ rẹ ihwo efa kobaro cha nẹrhẹ omavwerhovwẹn vẹ ọghọ romobọ wẹn shekpotọ?

 Ẹjo, kidie a ma avwanre vwẹ uhoho rẹ Ọghẹnẹ, jẹ uruemu rọyen rẹsosuọ yen ẹguọnọ. (Jẹnẹsis 1:27; 1 Jọn 4:8) Kọyen a ma avwanre vwẹ idjerhe re vwo dje ẹguọnọ kẹ ihwo efa. O ghini fo nẹ e vwo ẹguọnọ romobọ, jẹ obo re ma kẹ ohwo omavwerhovwẹn yen e vwo vwo ẹguọnọ rẹ Ọghẹnẹ vrẹn emu eje, ji ru emu esiri kẹ ihwo efa. Kirobo rẹ Baibol na tare, “ẹrhovwo herọ kẹ ọkokẹ nọ ohwo ra kẹ.”—Iruo Rẹ Iyinkọn Na 20:35.

 Nonẹna, ihwo buebun tare nẹ a da vwẹ ọdavwẹ romobọ kobaro, ọyena yen kẹ ohwo omavwerhovwẹn. Ayen vwẹ iji na, “guọnọ oma wẹn” vwo wene “guọnọ ọrivẹ wẹn.” Ẹkẹvuọvo, obo re rhiẹromrẹ vwẹ ọke avwanre na djerephia nẹ ihwo ri nene uchebro rẹ Baibol rọ tare nẹ, “E jẹn ohwo ọvuọvo guọnọ erhuvwu rẹ oma rọye-e, ẹkẹvuọvo erhuvwu rẹ ọrivẹ rọye,” vwo uvi rẹ omavwerhovwẹn kugbe oma kpokpọ.—1 Kọrẹnt 10:24.