Ẹyano 6:1-30
6 Ọtiọyena Jihova da ta kẹ Mosis: “Asaọkiephana wọ cha mrẹ obo ri mi che ru Fero. Obọ ọgangan yen cha gba vwo siobọnu ayen, obọ ọgangan yen je cha gba vwọ djẹ ayen nẹ otọ rọyen.”
2 Ọtiọyena Ọghẹnẹ da ta kẹ Mosis: “Mẹvwẹ yen Jihova.
3 Me vwomaphia kẹ Ebraham, Aizik, kugbe Jekọp kerẹ Ọghẹnẹ ro Me Vwo Ẹgba na, ẹkẹvuọvo vwọ kpahen odẹ mẹ Jihova, me nabọ dje oma mẹ fiotọ vwọ kẹ ayeen.
4 Me vẹ ayen je re ọphọ re me vwọ kẹ ayen otọ ri Kenan, otọ rẹ ayen diare kerẹ erhorha.
5 Asaọkiephana mẹvwẹ komobọ nyo enuebro rẹ ihwo rẹ Izrẹl rẹ ihwo rẹ Ijipt vwo ruẹ eviẹn na, me je karophiyọ ọphọ mẹ.
6 “Ọtiọyena, ta kẹ ihwo rẹ Izrẹl: ‘Mẹvwẹ yen Jihova, me cha reyọ ovwan vwo nẹ otọ rẹ oghwa rẹ ihwo rẹ Ijipt, mi che sivwin ovwan vwo nẹ eviẹn, me cha vwẹ obọ re me cha riẹn phia* kugbe ẹdjọeguo ọgangan vwọ rhoma reyọ ovwan.
7 Kẹ ovwan cha dia ihwo mẹ, ke me cha dia Ọghẹnẹ rẹ ovwan, kẹ ovwan cha ghene riẹn nẹ mẹvwẹ yen Jihova Ọghẹnẹ rẹ ovwan, ro che sivwin ovwan vwo nẹ oghwa rẹ Ijipt.
8 Ke me cha reyọ ovwan vwo kpo otọ ri mi duvwun iyorin nẹ* me cha vwọ kẹ Ebraham, Aizik, kugbe Jekọp; ke me cha vwọ kẹ ovwan kerẹ ughwẹ. Mẹvwẹ yen Jihova.’”
9 Ọke vwọ yanran na, Mosis da vwẹ ovuẹ nana vwọ kẹ ihwo rẹ Izrẹl, ẹkẹvuọvo ayen kerhọ ri Mosisii fikirẹ ofudjevwe kugbe ojaẹriọ ọgangan rayen kerẹ eviẹn.
10 Ọtiọyena Jihova da ta kẹ Mosis:
11 “Yanran bru Fero ovie rẹ Ijipt rere wọ vuẹ nẹ o siobọnu ihwo rẹ Izrẹl vwo nẹ otọ rọyen.”
12 Ẹkẹvuọvo Mosis da kpahen kẹ Jihova: “Nighere! Ihwo rẹ Izrẹl rhọnvwe kerhọ mẹẹ; kẹ mavọ yen Fero vwọ kerhọ mẹ, rọ vwọ dianẹ me ghwa riẹn ota ta naa?”*
13 Ẹkẹvuọvo Jihova da rhoma vuẹ Mosis vẹ Erọn iji rẹ ayen cha vwọ kẹ ihwo rẹ Izrẹl kugbe Fero ovie rẹ Ijipt rere ayen sa vwọ reyọ ihwo rẹ Izrẹl vwo nẹ otọ rẹ Ijipt.
14 Enana yen igbuyovwin rẹ uwevwin rẹ esẹ rayen: Emọ ri Rubẹn rọ dia ọmọkpako rẹ Izrẹl yen Henọk, Palu, Hẹzrọn, kugbe Kamai. Enana yen erua ri Rubẹn.
15 Emọ ri Simiọn yen Jemuẹl, Jemin, Ohad, Jekin, Zoha, kugbe Sheọl, ọmọ rẹ aye ri Kenan ọvo. Enana yen erua ri Simiọn.
16 Enana yen edẹ rẹ emọ ri Livae, vwo nene orua rẹ ayen nurhe: Gẹshọn, Kohat, kugbe Mẹrerai. Uchọke ri Livae dia akpọ te yen ikpe 137.
17 Emọ ri Gẹshọn yen Libnai kugbe Shimiai, vwo nene erua rayen.
18 Emọ ri Kohat yen Amram, Izha, Hẹbrọn, kugbe Ọziẹl. Uchọke ri Kohat dia akpọ te yen ikpe 133.
19 Emọ ri Mẹrerai yen Malai kugbe Mushai.
Enana yen erua rẹ ihwo ri Livae, vwo nene orua rẹ ayen nurhe.
20 Asaọkiephana Amram da reyọ Jọkibẹd, oniọvo rẹ ọsẹ rọyen vwo ru aye. O de vwiẹ Erọn vẹ Mosis vwọ kẹ. Uchọke rẹ Amram dia akpọ te yen ikpe 137.
21 Emọ rẹ Izha yen Kora, Nifẹg, kugbe Zikrai.
22 Emọ rẹ Ọziẹl yen Mishaẹl, Ẹlzefan, kugbe Sitrai.
23 Asaọkiephana Erọn da reyọ Elaishẹba, ọmọtẹ rẹ Aminadab, oniọvo ri Nashọn vwo ru aye. O de vwiẹ Nedab, Abaihu, Ẹlieza, kugbe Itama vwọ kẹ.
24 Emọ ri Kora yen Asiẹ, Ẹlkena, kugbe Abayasaf. Enana yen erua rẹ ihwo ri Kora.
25 Ẹlieza ọmọ rẹ Erọn da reyọ ọvo usun rẹ emetẹ ri Putiẹl vwo ru aye. O de vwiẹ Finihas vwọ kẹ.
Enana yen igbuyovwin rẹ iwevwin rẹ esẹ rẹ ihwo ri Livae, vwo nene erua rayen.
26 Ọnana yen Erọn vẹ Mosis rẹ Jihova ta kẹ nẹ: “Reyọ ihwo rẹ Izrẹl vwo nẹ otọ rẹ Ijipt ẹkuẹko.”*
27 Ayen ihwo re ta kẹ Fero ovie rẹ Ijipt nẹ, o jẹ ayen reyọ ihwo rẹ Izrẹl vwo nẹ Ijipt. Mosis vẹ Erọn nana.
28 Vwẹ ẹdẹ yena rẹ Jihova vwọ ta ota kẹ Mosis vwẹ otọ rẹ Ijipt,
29 Jihova da ta kẹ Mosis: “Mẹvwẹ yen Jihova. Vuẹ Fero ovie rẹ Ijipt kemu kemu re me vuẹ wẹ na.”
30 Ọtiọyena Mosis da ta kẹ Jihova: “Nighere! me ghwa riẹn ota taa,* kẹ mavọ yen Fero vwọ kerhọ mẹ?”
Eta rehẹ obotọ na
^ Yẹrẹ “obọ ọgangan.”
^ Vwẹ Hibru, “otọ re me kpare obọ mẹ nẹ.”
^ Vwẹ Hibru, “rọ vwọ dianẹ e bru ẹrẹnvwe mẹ naa?”
^ Vwẹ Hibru, “vwo nene ituofovwin rayen.”
^ Vwẹ Hibru, “e bru ẹrẹnvwe mẹẹ.”
