Vwo Rhe Ihwo ri Rom 1:1-32
1 Pọl, odibo ri Kristi Jesu re seri nẹ ọ rhe dia ọyinkọn, ra sanere vwọ kẹ iyẹnrẹn esiri rẹ Ọghẹnẹ,
2 ro ve ive rọyen rhabae womarẹ emraro rọyen vwevunrẹ Isiesi Ọfuanfon na.
3 Iyẹnrẹn esiri na shekpahen Ọmọ rọyen ro nẹ uvwiẹ* ri Devid rhe vwọrẹ ugboma,
4 ra reyọ ogangan rẹ ẹwẹn ọfuanfon na vwo djephia nẹ ọyen Ọmọ rẹ Ọghẹnẹ womarẹ evrẹnushi rọyen—ọyen Jesu Kristi Ọrovwavwanre.
5 Wan oma rọyen ọyen me vwọ mrẹ ẹse re muwan rọye-en, ọyen a je vwọ reyọ ovwẹ vwo mu ọyinkọn rere mi se vwo nyẹme womarẹ esegbuyota vwẹ ohri rẹ ẹgborho na ejobi fikirẹ odẹ rọyen,
6 ohri rẹ ẹgborho nana yen e se ovwan nurhe nẹ ovwan rhe dia idibo ri Jesu Kristi—
7 vwo rhe ihwo eje re pha ghanghanre kẹ Ọghẹnẹ vwẹ Rom, re seri nẹ e rhe dia ihwo efuanfon:
E jẹ ẹse re muwan rọye-en kugbe ufuoma ro nẹ obọ rẹ Ọghẹnẹ rọ dia Ọsẹ rẹ avwanre kugbe Ọrovwori Jesu Kristi rhe, nene ovwan dia.
8 Ẹsosuọ eje, me kpẹvwẹ Ọghẹnẹ mẹ womarẹ Jesu Kristi fikirẹ ovwan eje, kidie a ta ota kpahen esegbuyota rẹ ovwan vwẹ akpọ na eje.
9 Ọghẹnẹ re me vwẹ ẹga ọfuanfon kẹ vẹ ẹwẹn mẹ ejobi, ri mi vwo ghwoghwo iyẹnrẹn esiri ro shekpahen Ọmọ rọyen na, oseri mẹ kpahen obo ri mi se odẹ rẹ ovwan vwẹ ẹrhovwo mẹ ọkieje,
10 re me vwọ rẹ nẹ ọ da dia ọhọre rọyen, o gbe rhie idjerhe na phiyọ rere mi se vwo bru ovwan rhe.
11 Kidie urhuru rẹ ovwan si vwe me vwọ vwẹ okẹ evo ri nẹ obọ rẹ Ọghẹnẹ rhe* vwọ kẹ ovwan rere ovwan sa vwọ nabọ mudia gan;
12 yẹrẹ avwanre sa vwọ bọn esegbuyota rẹ ohwohwo gan, te ọ rẹ ovwan kugbe ọmẹ.
13 Ẹkẹvuọvọ me guọnọre nẹ ovwan riẹn ọnana iniọvo, nẹ ọke buebun yen mi vwo vwo ẹwẹn mi vwo bru ovwan rhe rere me vwọ mrẹ erere rẹ iruo rẹ aghwoghwo mẹ vwẹ ohri rẹ ovwan kirobo me je mrẹ vwẹ ẹgborho ri chekọ na, ẹkẹvuọvo a dobọ mẹ ji te ọke na.
14 Me riosa rẹ ihwo ri Grik kugbe erhorha,* evwaghwanre kugbe ihwo ri jẹ aghwanre evwo;
15 ọtiọyena, mi vwo owenvwe mi ji vwo ghwoghwo iyẹnrẹn esiri na vwọ kẹ ovwan rehẹ Rom.
16 Kidie oma rẹ iyẹnrẹn esiri na vo ovwẹ-ẹ; vwọrẹ uyota, ọyen ẹgba rẹ Ọghẹnẹ vwo sivwin kohwo kohwo ro vwo esegbuyota, ẹsosuọ ihwo ri Ju tavwen a ke rhe mrẹ ihwo ri Grik.
17 Kidie vwẹ evun rọyen e vwo dje ophiọnphiọn rẹ Ọghẹnẹ phia womarẹ esegbuyota je vwọ kẹ esegbuyota, kirobo re siro nẹ: “Ọvwata cha rhọ womarẹ esegbuyota.”
18 Ọghẹnẹ rọhẹ obodjuvwu dje ophu rọyen phia kpahen ihwo ri jẹ ẹme rọyen enyo kugbe ihwo ri jẹ evwata ẹdia. Ayen ruẹ erọnvwọn re dia ọsoso-o rere ihwo vwo jẹ uyota na ẹriẹn,
19 kidie obo ra sa riẹn kpahen Ọghẹnẹ nabọ teyenphia phephẹn vwẹ ohri rayen, Ọghẹnẹ djere kẹ ayen phephẹn.
20 Kidie iruemu rọyen re jẹmrẹ na vwomaphia gbonozẹ vwo nẹ ọtonphiyọ rẹ emama rhe, a mrẹ ayen womarẹ erọnvwọn rọ mare, tobọ te ẹgba ri bẹdẹ rọyen kugbe ẹdia rọ hepha kerẹ Ọghẹnẹ, ọtiọyena ayen rhe che se gun riase-e.
21 Kidie dede nẹ ayen riẹn Ọghẹnẹ, jẹ ayen vwẹ urinrin kẹ kerẹ Ọghẹnẹ-ẹ, yẹrẹ vwẹ akpẹvwẹ kẹ-ẹ, ẹkẹvuọvo iroro da rhe kanre ayen, ubiudu rẹ ẹkpa rayen na de ji rhi mu ebri.
22 Dede nẹ ayen tanẹ ayen vwo aghwanre, ayen da rhe dia ẹkpa,
23 re rhẹriẹ urinrin rẹ Ọghẹnẹ ro jeghwo na phiyọ orọnvwọn kerẹ oma rẹ ohworakpọ ro ghwẹ kugbe emephran vẹ eranvwe ri vwo awọ ẹne kugbe i ri kpono.
24 Ọtiọyena, fikirẹ urhurusivwe rẹ ubiudu rayen, Ọghẹnẹ da vwẹ uphẹn kẹ ayen, ayen vwo ru uruemu ri jẹfuọn rere ayen vwọ phọphọ oma rayen.
25 Ayen vwẹ efian vwo wene uyota rẹ Ọghẹnẹ, ayen muọghọ je vwẹ ẹga ọfuanfon vwọ kẹ emama ukperẹ Ọmemama na, rọ dia ohwo re jiri rhirin bẹdi bẹdẹ. Isẹ.
26 Kọyensorọ Ọghẹnẹ vwọ kpairoro vrẹ ayen vwọ kẹ urhurusivwe rẹ ehware rẹ ophọphọvwe, kidie eya rehẹ ohri rayen vwẹ oma rayen vwo ruẹ obo re chọre dede nẹ Ọghẹnẹ ma ayen rẹ ayen vwo ru ọtiọye-en;
27 ọtiọyen eshare na je yanjẹ eya rẹ ayen nene vwerhẹn vwo, kẹ ayen vwo urhurusivwe ọgangan rẹ ehware kpahen omoma rayen, eshare vẹ eshare ri ruẹ emu rẹ ẹgua, ayen je mrẹ osa rẹ oruchọ rayen vọnvọn.
28 Rọ vwọ dianẹ ayen guọnọ vwo erianriẹn ọgbagba rẹ Ọghẹnẹ-ẹ na, Ọghẹnẹ da yanjẹ ayen vwo vwẹ ẹdia rẹ iroro ọchọchọ rayen, ayen vwo ru obo ri je fo.
29 Vwẹ kidjerhe kidjerhe ayen muomaphiyọ uruemu ri jẹ ọsoso enene, umwemwu, urhuru, umiovwo, omaẹriọ ọgangan, ohwekufia, ozighi, ophiẹnvwe, kugbe ẹghwọ; ayen guẹn iguegun,
30 miovwo ihwo, vwo utuoma kpahen Ọghẹnẹ, yinvwaro, kparoma, yonma, hworo ona rẹ obo re sua omaẹwan, muọghọ kẹ esẹ vẹ ini-i,
31 vwo ẹruọ-ọ, ku ihwo phiyotọ, vwo ẹguọnọ rẹ ihwo rẹ orua-a, gbe arodọnvwẹ-ẹ.
32 Dede nẹ ayen nabọ riẹn orhiẹn-ebro ọsoso rẹ Ọghẹnẹ nẹ ihwo ri ruẹ erọnvwọn tiọyena fo ughwu, jẹ ayen ruẹ ayen, ọ dia ọyena ọvo-o, ayen je teyen abọ kẹ ihwo ri ruẹ ayen.
Eta rehẹ obotọ na
^ Vwẹ Grik, “ubi.”
^ Vwẹ Grik, “okẹ rẹ ẹwẹn na.”
^ Yẹrẹ “otu re dia ihwo rẹ Griki-i.” Vwẹ Grik, “ihwo re riẹn emuọvo-o.”