سن 33ء میں یسوع مسیح نے آسمان پر جانے سے پہلے وعدہ کِیا کہ وہ دوبارہ آئیں گے۔‏ اُنہوں نے خود کو ایک ایسے امیر آدمی سے تشبیہ دی جو ایک لمبے عرصے کے لئے کسی دُوردراز ملک چلا گیا اور پھر بادشاہ بن کر واپس آیا۔‏ یسوع مسیح اِس لئے دوبارہ آئیں گے تاکہ وہ زمین پر ایک اچھی حکومت قائم کریں۔‏‏—‏لوقا 19:‏11،‏ 12 کو پڑھیں۔‏

یسوع مسیح کس طرح کے جسم کے ساتھ واپس آئیں گے؟‏ خدا نے یسوع مسیح کو روحانی جسم کے ساتھ مُردوں میں سے زندہ کِیا۔‏ (‏1-‏پطرس 3:‏18‏)‏ پھر یسوع مسیح آسمان پر چلے گئے اور خدا کے دہنے ہاتھ بیٹھ گئے۔‏ (‏زبور 110:‏1‏)‏ اِس کے کافی عرصے بعد یسوع مسیح کو ”‏قدیم‌الایّام“‏ یہوواہ خدا کے حضور لایا گیا جس نے یسوع مسیح کو اِنسانوں پر حکومت کرنے کا اِختیار بخشا۔‏ لہٰذا یسوع مسیح اِنسان کے طور پر نہیں بلکہ ایک بادشاہ کے طور پر روحانی جسم کے ساتھ آئیں گے اور اِس وجہ سے اِنسان اُنہیں دیکھ نہیں سکیں گے۔‏‏—‏دانی‌ایل 7:‏13،‏ 14 کو پڑھیں۔‏

جب یسوع مسیح فرشتوں کے ساتھ آئیں گے تو وہ اِنسانوں کا اِنصاف کریں گے۔‏ وہ بُرے لوگوں کو ختم کر دیں گے اور اُن لوگوں کو ہمیشہ کی زندگی دیں گے جو اُنہیں بادشاہ کے طور پر تسلیم کرتے ہیں۔‏‏—‏متی 25:‏31-‏33؛‏ زبور 37:‏9-‏11 کو پڑھیں۔‏

یسوع مسیح اپنی حکومت میں پوری زمین کو فردوس بنا دیں گے۔‏ وہ مُردوں کو زندہ کریں گے تاکہ وہ سب زمین پر فردوس میں ہنسی‌خوشی رہ سکیں۔‏‏—‏زبور 37:‏29؛‏ یوحنا 5:‏28 کو پڑھیں۔‏