خدا کا نام کیا ہے؟‏

لوگ اکثر اِس سوال کا جواب یوں دیتے ہیں:‏

▪ ”‏خدا تو خدا ہی ہے۔‏“‏

▪ ”‏خدا کے بہت سے نام ہیں۔‏“‏

یسوع مسیح نے اِس موضوع پر کیا تعلیم دی؟‏

▪ ”‏تُم اِس طرح دُعا کِیا کرو کہ اَے ہمارے باپ تُو جو آسمان پر ہے تیرا نام پاک مانا جائے۔‏“‏ (‏متی ۶:‏۹‏)‏ یسوع مسیح مانتا تھا کہ خدا کا ایک ذاتی نام ہے۔‏

▪ ”‏مَیں نے اُنہیں تیرے نام سے واقف کِیا اور کرتا رہوں گا تاکہ جو محبت تجھ کو مجھ سے تھی وہ اُن میں ہو اور مَیں اُن میں ہوں۔‏“‏ (‏یوحنا ۱۷:‏۲۶‏)‏ یسوع مسیح نے لوگوں کو خدا کے ذاتی نام سے واقف کرایا۔‏ لہٰذا اُس نے اِس نام کو خود بھی استعمال کِیا۔‏

خدا نے اپنا ذاتی نام یوں بتایا:‏ ”‏یہوؔواہ مَیں ہوں۔‏ یہی میرا نام ہے۔‏“‏ * (‏یسعیاہ ۴۲:‏۸‏)‏ یہ نام عبرانی زبان سے لیا گیا ہے۔‏ شاید آپ یہ سُن کر حیران ہوں کہ بائبل کے قدیم عبرانی نسخہ‌جات میں یہ نام ہزاروں بار پایا جاتا ہے۔‏ بائبل میں کسی دوسرے شخص کے نام کا اتنی بار ذکر نہیں آتا جتنا کہ خدا کے نام یہوواہ کا ذکر آتا ہے۔‏

جب آپ لوگوں سے پوچھتے ہیں کہ ”‏خدا کا نام کیا ہے؟‏“‏ تو کئی لوگ کہیں گے کہ ”‏اُس کے بہت سے نام ہیں مثلاً مجید،‏ غفور،‏ رحیم وغیرہ۔‏“‏ البتہ یہ نام خدا کی صفات کو ظاہر کرتے ہیں لہٰذا یہ اُس کے ذاتی نام نہیں ہیں۔‏ بعض لوگ کہتے ہیں کہ ”‏خدا کا نام اللہ ہے۔‏“‏ لیکن لفظ ”‏اللہ“‏ عربی زبان میں اُردو لفظ ”‏خدا“‏ کا مترادف ہے اور ایک لقب ہے۔‏ اِن الفاظ میں سے کوئی بھی خدا کے ذاتی نام کی طرف اشارہ نہیں کرتا کیونکہ یہ سب خدا کے القاب ہیں۔‏

خدا نے اپنا ذاتی نام ہم پر اس لئے ظاہر کِیا تاکہ ہم اُس کو بہتر طور پر جان پائیں۔‏ مثال کے طور پر ایک ہی آدمی کو مختلف القاب سے پکارا جاتا ہے جیسے صاحب،‏ جناب،‏ ابو،‏ دادا وغیرہ۔‏ یہ القاب اُس آدمی کی حیثیت کو واضح کرتے ہیں۔‏ لیکن جب ہم ایک شخص کا ذاتی نام سنتے ہیں تو ہم اُس نام سے وہ تمام باتیں وابستہ کرتے ہیں جو ہم اُس کے بارے میں جانتے ہیں۔‏ اسی طرح جب ہم قادرِمطلق،‏ باپ اور خالق جیسے القاب استعمال کرتے ہیں تو اِس سے ہم خدا کے کسی خاص پہلو کی طرف اشارہ کرتے ہیں۔‏ لیکن خدا کے ذاتی نام سے ہم وہ تمام باتیں وابستہ کرتے ہیں جو ہم اُس کے بارے میں جانتے ہیں۔‏ خدا کے ذاتی نام کو جاننے سے ہی ہم اُس سے بہتر طور پر واقف ہو سکتے ہیں۔‏

لیکن یہ کافی نہیں کہ ہم خدا کے ذاتی نام کو جانیں بلکہ ہمیں اِس نام کو استعمال بھی کرنا چاہئے۔‏ اِس کی اہمیت پاک صحائف میں یوں بتائی گئی ہے:‏ ”‏جو کوئی [‏یہوواہ]‏ کا نام لے گا نجات پائے گا۔‏“‏—‏رومیوں ۱۰:‏۱۳؛‏ یوایل ۲:‏۳۲‏۔‏

‏[‏فٹ‌نوٹ]‏

‏[‏صفحہ ۶ پر عبارت]‏

جب ایک شخص کو صاحب،‏ جناب،‏ ابو،‏ دادا جیسے القاب سے پکارا جاتا ہے تو یہ اُس کی حیثیت کو واضح کرتا ہے۔‏ لیکن اُس کے ذاتی نام سے ہم وہ تمام باتیں وابستہ کرتے ہیں جو ہم اُس کے بارے میں جانتے ہیں