نیک کام کرنے میں ہمت نہ ہاریں

پطرس رسول نے نصیحت کی کہ ”‏غیرقوموں میں اپنا چال‌چلن نیک رکھو۔‏“‏ (‏۱-‏پطرس ۲:‏۱۲‏)‏ جس یونانی لفظ کا ترجمہ ”‏نیک“‏ کِیا گیا ہے وہ کسی ”‏خوبصورت،‏ عظیم،‏ قابلِ‌احترام اور عمدہ چیز کی طرف اشارہ کرتا ہے۔‏“‏ آجکل،‏ عام طور پر لوگوں کی طرف سے اچھے اور قابلِ‌احترام چال‌چلن کی توقع کرنا شاید غیرحقیقت‌پسندانہ اور ناممکن لگے۔‏ تاہم،‏ مجموعی طور پر یہوواہ کے گواہ پطرس کی اس مشورت پر عمل کرنے میں کامیاب رہے ہیں۔‏ درحقیقت،‏ وہ اپنے نیک چال‌چلن کے لئے پوری دُنیا میں مشہور ہیں۔‏

یہ بات خاص طور پر،‏ اُس وقت اہم بن جاتی ہے جب ہم اس ”‏اخیر زمانہ“‏ میں بُرے دنوں کے باعث مشکلات اور آزمائشوں کا سامنا کرتے ہیں۔‏ (‏۲-‏تیمتھیس ۳:‏۱‏)‏ مسیحی طرزِزندگی میں مخالفت کا سامنا کرنا عام سی بات ہے کیونکہ مشکلات ہماری روزمرّہ زندگی کا حصہ ہیں۔‏ علاوہ‌ازیں،‏ بعض آزمائشیں بہت کم عرصے کے لئے ہوتی ہے جبکہ دیگر ختم ہونے کا نام نہیں لیتی بلکہ شدت اختیار کرتی جاتی ہیں۔‏ اس کے باوجود،‏ پولس رسول تاکید کرتا ہے:‏ ”‏نیک کام کرنے میں ہمت نہ ہاریں کیونکہ اگر بےدل نہ ہوں گے تو عین وقت پر کاٹیں گے۔‏“‏ (‏گلتیوں ۶:‏۹‏)‏ نیک کام کرتے رہنے کے لئے تکلیف‌دہ آزمائشوں اور سخت نفرت کا مقابلہ کرنا ہمیشہ کیسے ممکن ہوتا ہے؟‏

نیک کاموں میں مشغول رہنے کے لئے مدد

کسی شخص کے ”‏عظیم،‏ قابلِ‌احترام اور نیک“‏ کام اُس کی دلی حالت کو ظاہر کرتے ہیں۔‏ لہٰذا،‏ آزمائشوں اور پریشانیوں میں نیک چال‌چلن برقرار رکھنا وقتی طور پر اُٹھایا جانے والا کوئی جذباتی قدم نہیں۔‏ بلکہ یہ ہماری روزمرّہ زندگی کے ہر حلقے میں بائبل اصولوں کے اطلاق کا نتیجہ ہوتا ہے۔‏ کونسی بعض باتیں اس سلسلے میں مددگار ہو سکتی ہیں؟‏ درج‌ذیل نکات پر غور کریں۔‏

یسوع مسیح جیسا ذہنی رُجحان پیدا کریں۔‏ ناانصافی کو برداشت کرنے کے لئے فروتنی کی ضرورت ہوتی ہے۔‏ ایسا شخص جو خود کو بہت کچھ سمجھتا ہے اُس کے لئے بدسلوکی برداشت کرنا مشکل ہوتا ہے۔‏ یسوع مسیح نے ”‏اپنے آپ کو پست کر دیا اور یہاں تک فرمانبردار رہا کہ موت بلکہ صلیبی موت گوارا کی۔‏“‏ (‏فلپیوں ۲:‏۵،‏ ۸‏)‏ یسوع مسیح کی نقل کرنے سے ہم بھی اپنی پاک خدمت میں کبھی ”‏بےدل ہوکر ہمت“‏ نہیں ہاریں گے۔‏ (‏عبرانیوں ۱۲:‏۲،‏ ۳‏)‏ اپنی مقامی کلیسیاؤں میں ذمہ‌دار اشخاص کے ساتھ خوشی سے تعاون کرنے سے فروتنی کے ساتھ تابعداری کرتے رہیں۔‏ (‏عبرانیوں ۱۳:‏۱۷‏)‏ دوسروں کو اپنے سے ”‏بہتر“‏ سمجھتے ہوئے اُن میں اپنی ذات سے زیادہ دلچسپی لیں۔‏—‏فلپیوں ۲:‏۳،‏ ۴‏۔‏

یاد رکھیں کہ یہوواہ آپ سے محبت رکھتا ہے۔‏ ہمیں اس بات کا پورا یقین ہونا چاہئے کہ یہوواہ خدا ”‏موجود ہے اور اپنے طالبوں کو بدلہ دیتا ہے۔‏“‏ (‏عبرانیوں ۱۱:‏۶‏)‏ وہ واقعی ہماری فکر رکھتا اور یہ چاہتا ہے کہ ہم ہمیشہ کی زندگی حاصل کریں۔‏ (‏۱-‏تیمتھیس ۲:‏۴؛‏ ۱-‏پطرس ۵:‏۷‏)‏ یاد رکھیں کہ کوئی بھی چیز یہوواہ خدا کی محبت کو آزمائش کے تحت بھی نیک کام کرتے رہنے میں ہماری مدد کرنے سے روک نہیں سکتی۔‏—‏رومیوں ۸:‏۳۸،‏ ۳۹‏۔‏

یہوواہ پر مکمل بھروسا رکھیں۔‏ یہوواہ خدا پر بھروسا کرنا خاص طور پر اُس وقت بہت ضروری ہوتا ہے جب ہمیں مسلسل آزمائشوں کا سامنا کرنا پڑتا ہے۔‏ ہمیں پورا یقین ہے کہ یہوواہ کبھی کسی ایسی آزمائش کے آنے کی اجازت نہیں دے گا جو ہماری ”‏برداشت سے باہر ہو“‏ اور اس سے ”‏نکلنے کی راہ بھی پیدا“‏ کر دے گا۔‏ (‏۱-‏کرنتھیوں ۱۰:‏۱۳‏)‏ جب ہم یہوواہ خدا پر  توکل رکھتے ہیں تو موت جیسے خطرے کا بھی دلیری سے سامنا کر سکتے ہیں۔‏—‏۲-‏کرنتھیوں ۱:‏۸،‏ ۹‏۔‏

دُعا میں مشغول رہیں۔‏ دلی دُعا نہایت اہم ہے۔‏ (‏رومیوں ۱۲:‏۱۲‏)‏ یہوواہ خدا کے قریب جانے کا ایک طریقہ مخلصانہ دُعائیں ہیں۔‏ (‏یعقوب ۴:‏۸‏)‏ ہم اپنے ذاتی تجربے سے سیکھتے ہیں کہ ”‏اگر اُس کی مرضی کے موافق کچھ مانگتے ہیں تو وہ ہماری سنتا ہے۔‏“‏ (‏۱-‏یوحنا ۵:‏۱۴‏)‏ اگر یہوواہ خدا ہماری راستی کو پرکھنے کے لئے مشکلات آنے کی اجازت دیتا ہے تو ہمیں برداشت کرنے کے لئے اس سے دُعا میں مدد مانگنی چاہئے۔‏ (‏لوقا ۲۲:‏۴۱-‏۴۳‏)‏ دُعا ہمیں اس بات کا احساس دلاتی ہے کہ ہم تنہا نہیں بلکہ یہوواہ ہماری طرف ہے اس لئے ہم ہمیشہ کامیابی حاصل کریں گے۔‏—‏رومیوں ۸:‏۳۱،‏ ۳۷‏۔‏

نیک کام‏—‏تعریف اور عزت کا باعث

تمام مسیحی وقتاًفوقتاً ”‏طرح طرح کی آزمایشوں کے سبب سے غم‌زدہ“‏ ہوتے ہیں۔‏ تاہم،‏ ہمیں ”‏نیک کام کرنے میں ہمت“‏ نہیں ہارنی چاہئے۔‏ جب دباؤ آتے ہیں تو یہ جانکر مضبوط اور قائم رہیں کہ آپ کی وفاداری ”‏تعریف اور جلال اور عزت کا باعث“‏ ٹھہرے گی۔‏ (‏۱-‏پطرس ۱:‏۶،‏ ۷‏)‏ یہوواہ خدا کی تمام روحانی فراہمیوں سے فائدہ اُٹھائیں جو آپ کے ایمان کو مضبوط کرنے کے لئے کی گئی ہیں۔‏ جب آپ کو ذاتی طور پر توجہ کی ضرورت ہو تو مسیحی کلیسیا میں چرواہوں،‏ اُستادوں اور مشیروں کے طور پر خدمت کرنے والے بھائیوں کے پاس جائیں۔‏ (‏اعمال ۲۰:‏۲۸‏)‏ تمام کلیسیائی اجلاسوں پر باقاعدہ حاضر ہوں جو ہمیں ”‏محبت اور نیک کاموں کی ترغیب“‏ دیتے ہیں۔‏ (‏عبرانیوں ۱۰:‏۲۴‏)‏ روزانہ بائبل پڑھائی اور ذاتی بائبل مطالعے کا پروگرام آپ کی روحانی طور پر مضبوط اور قائم رہنے میں مدد کرے گا۔‏ نیز منادی کے کام میں باقاعدہ شرکت بھی ایمان کی مضبوطی کا باعث بنتی ہے۔‏—‏زبور ۱:‏۱-‏۳؛‏ متی ۲۴:‏۱۴‏۔‏

آپ جس قدر یہوواہ کی محبت اور فکرمندی پر بھروسا رکھیں گے ”‏نیک کاموں میں سرگرم“‏ رہنے کے لئے آپ کو اتنی ہی زیادہ تحریک ملے گی۔‏ (‏ططس ۲:‏۱۴‏)‏ اس بات کو یاد رکھیں،‏ ”‏جو آخر تک برداشت کرے گا وہ نجات پائے گا۔‏“‏ (‏متی ۲۴:‏۱۳‏)‏ جی‌ہاں،‏ نیک کام کرنے میں ہمت نہ ہارنے کا عزم کریں!‏

‏[‏صفحہ ۲۹ پر تصویر کی عبارت]‏

ہمیں اس بات پر مکمل بھروسا ہے کہ یہوواہ کسی ایسی آزمائش کے آنے کی اجازت نہیں دے گا جو ہماری ”‏برداشت سے باہر ہو“‏ اور وہ ہمیشہ ”‏نکلنے کی راہ بھی پیدا کر دے گا۔‏“‏

‏[‏صفحہ ۳۰ پر تصویر]‏

خدائی کاموں میں مصروف رہنے سے ہم آزمائشوں کا مقابلہ کرنے کے قابل ہو سکتے ہیں