سوالات از قارئین

حالانکہ خدا کی شریعت میں اسکی اجازت نہیں تھی پھربھی داؤد اور اُسکے ساتھیوں نے نذر کی روٹیاں کھائی تھیں۔‏ کیا اسکا مطلب ہے کہ مشکل صورتحال کا سامنا کرتے وقت ہم خدا کے احکام کی خلافورزی کر سکتے ہیں؟‏—‏۱-‏سموئیل ۲۱:‏۱-‏۶‏۔‏

ہر سبت کے روز نذر کی پُرانی روٹیاں ہٹا دی جاتی تھیں اور انکے بدلے میں نئی روٹیاں یہوواہ کیلئے پیش ہوتی تھیں۔‏ احبار ۲۴:‏۵-‏۹ کے مطابق نذر کی پُرانی روٹیاں پاک تھیں اور صرف کاہنوں کو انہیں کھانے کی اجازت تھی کیونکہ وہ خدا کی خدمت میں مصروف تھے۔‏ نذر کی روٹیوں کو عام روٹیوں کی طرح نہیں سمجھا جانا تھا اور نہ ہی کسی عام شخص کو انہیں کھانے کی اجازت تھی۔‏ لیکن جب اخیملک کاہن نے داؤد کو یہ روٹیاں دیں تو اُس نے کوئی غلط کام نہیں کِیا۔‏

اخیملک کاہن نے کئی باتوں کو مدِّنظر رکھتے ہوئے داؤد کو یہ روٹیاں دی تھیں۔‏ داؤد اور اُسکے ساتھیوں کو بھوک ستا رہی تھی۔‏ داؤد نے دعویٰ کِیا تھا کہ بادشاہ ساؤل نے اُسے ایک خاص کام کیلئے روانہ کِیا ہے یعنی کہ وہ خدا کے نمائندے کی خدمت میں مصروف تھا۔‏ اسکے علاوہ اخیملک نے اس بات کا یقین کر لیا کہ داؤد اور اُسکے ساتھی پاک تھے۔‏ یہ سچ تھا کہ صرف کاہنوں کو ان روٹیوں کو کھانے کی اجازت تھی۔‏ لیکن کیا اس حکم کا بنیادی اصول یہ نہ تھا کہ جو شخص خدا کی خدمت میں مصروف ہے وہ اِن روٹیوں کو کھا سکتا تھا؟‏ یسوع نے اس واقعے کی مثال دے کر فریسیوں کو سمجھایا کہ اُنہیں خدا کے احکام کے بنیادی اصولوں کو سمجھنے کی ضرورت ہے۔‏ اسکی وجہ یہ تھی کہ فریسیوں نے سبت کے دن کو پاک ماننے کے حکم پر طرح طرح کی روایتیں قائم کی تھیں۔‏ لیکن انہیں ایسا نہیں کرنا چاہئے تھا۔‏—‏متی ۱۲:‏۱-‏۸‏۔‏

اسکا مطلب یہ نہیں کہ ہم مشکل صورتحال کا سامنا کرتے وقت خدا کے احکام کو نظرانداز کر سکتے ہیں۔‏ ایک بار جب اسرائیلی فوج فلستیوں کے خلاف لڑ رہی تھی تو بادشاہ ساؤل نے یہ حکم عائد کِیا:‏ ”‏جبتک شام نہ ہو اور مَیں اپنے دشمنوں سے بدلہ نہ لے لوں اُس وقت تک اگر کوئی کچھ کھائے تو وہ ملعون ہو۔‏“‏ اسرائیلی سپاہی سارا دن ’‏فلستیوں کو مارتے‘‏ رہے۔‏ آخرکار وہ بہت تھک گئے اور اُنہیں سخت بھوک لگ رہی تھی۔‏ اس مشکل میں پھنس کر اُنہوں نے ”‏بھیڑبکریوں اور بیلوں اور بچھڑوں کو لیکر اُنکو زمین پر ذبح کِیا اور خون سمیت کھانے لگے۔‏“‏ (‏۱-‏سموئیل ۱۴:‏۲۴،‏ ۳۱-‏۳۳‏)‏ خون کے واحد استعمال کے بارے میں خدا کا حکم یہ تھا:‏ ”‏مَیں نے مذبح پر تمہاری جانوں کے کفارہ کیلئے اُسے تُم کو دیا ہے۔‏“‏ (‏احبار ۱۷:‏۱۰-‏۱۲؛‏ پیدایش ۹:‏۳،‏ ۴‏)‏ لہٰذا جب اسرائیلی سپاہیوں نے اپنی مشکل کو آسان کرنے کیلئے خون کھایا تو اُنہوں نے سخت گُناہ کِیا۔‏ جب اُنہوں نے اِس گُناہ کی وجہ سے یہوواہ کیلئے خاص قربانیاں چڑھائیں تو یہوواہ نے اُنہیں معاف کر دیا۔‏—‏۱-‏سموئیل ۱۴:‏۳۴،‏ ۳۵‏۔‏

جی‌ہاں،‏ یہوواہ خدا اپنے خادموں سے توقع کرتا ہے کہ وہ ہمیشہ اور ہر صورتحال میں اُسکے حکموں پر عمل کریں۔‏ یوحنا رسول نے اس سلسلے میں کہا:‏ ”‏خدا کی محبت یہ ہے کہ ہم اُسکے حکموں پر عمل کریں اور اُسکے حکم سخت نہیں۔‏“‏—‏۱-‏یوحنا ۵:‏۳‏۔‏

‏[‏صفحہ ۳۰ پر تصویر]‏

ہر سبت کے روز نذر کی نئی روٹیاں یہوواہ کیلئے پیش ہوتی تھیں