ایک ناآشنا خدا پر ایمان رکھنا

جرمنی میں تین میں سے دو اشخاص خدا پر ایمان رکھتے ہیں۔‏ تاہم جب ایک ہزار سے زیادہ لوگوں سے کہا گیا کہ جس خدا پر وہ ایمان رکھتے ہیں اُسکی بابت بیان کریں تو تقریباً تمام لوگوں کے جوابات مختلف تھے۔‏ ”‏خدا کی بابت جرمن لوگوں کے انفرادی نظریات اتنے ہی مختلف ہیں جتنے کہ یہاں کے لوگ،‏“‏ نیوزمیگزین فوکس رسالہ رپورٹ دیتا ہے۔‏ اگر خدا پر ایمان رکھنا قابلِ‌تعریف امر ہے تو کیا ایک ناآشنا خدا پر ایمان رکھنا قابلِ‌افسوس امر نہیں ہے؟‏

خدا کی ذات کی بابت ایسی بےیقینی جرمنی کی سرحدوں کے پار یورپ کے دیگر علاقوں میں بھی پائی جاتی ہے۔‏ آسٹریا،‏ برطانیہ اور نیدرلینڈز میں کئے جانے والے ایک سروے نے اس عام نظریے کو آشکارا کِیا کہ خدا ”‏ایک بڑی طاقت یا ناقابلِ‌بیان بھید ہے۔‏“‏ بالخصوص نوجوانوں کے نزدیک،‏ حتیٰ‌کہ جو اُس پر ایمان رکھتے ہیں،‏ اُن کے نزدیک بھی خدا ایک بھید ہے۔‏

کیا آپ ذاتی طور پر خدا کو جانتے ہیں؟‏

ایک شخص کو جاننے اور اُسے ذاتی طور پر جاننے میں بہت فرق  ہے۔‏ کسی  شخص کو جاننے—‏ایک ناقابِل‌رسائی حاکم،‏ ایک مشہور کھلاڑی،‏ کسی فلمی ستارے—‏کا مطلب محض اُسکے وجود کو تسلیم کرنا ہے۔‏ تاہم،‏ کسی شخص کو ذاتی طور پر جاننا اس سے زیادہ کا تقاضا کرتا ہے۔‏ اس میں اُسکے کردار،‏ چال‌چلن،‏ احساسات،‏ پسند،‏ ناپسند اور مستقبل کیلئے اُسکے منصوبوں سے واقف ہونا شامل ہے۔‏ کسی کو ذاتی طور پر جاننا اُس کیساتھ ایک قریبی رشتہ اُستوار کرنے کی راہ ہموار کرتا ہے۔‏

لاکھوں اشخاص اس نتیجے پر پہنچے ہیں کہ خدا کی بابت ایک مبہم نظریہ رکھنا—‏یا محض اُسکے وجود کو تسلیم کرنا—‏کافی نہیں ہے۔‏ وہ خدا کو قریب سے جاننے کیلئے بہت آگے نکل گئے ہیں۔‏ کیا اُنکی کاوشیں کارگر ثابت ہوئی ہیں؟‏ شمالی جرمنی میں رہنے اور خدا پر عام ایمان رکھنے والے پال نے اُسے ذاتی طور پر جاننے کی مزید کوشش کرنے کا فیصلہ کِیا۔‏ پال بیان کرتا ہے:‏ ”‏خدا کو اچھی طرح جاننے کیلئے وقت اور کوشش درکار ہے لیکن اسکا اَجر اس سے کہیں زیادہ ہے۔‏ خالق کیساتھ قریبی رشتہ روزمرّہ زندگی کو قدرے بہتر بنا دیتا ہے۔‏“‏

کیا خدا کو بہت قریب سے جاننے کیلئے درکار وقت اور کوشش کارآمد ثابت ہوتی ہے؟‏ براہِ‌مہربانی اگلا مضمون پڑھیں۔‏

‏[‏صفحہ ۳ پر تصویر کی عبارت]‏

ایک شخص کو جاننے اور  اُسے ذاتی طور پر جاننے میں  بہت فرق ہے