Omanu vamue va sima okuti oku likutilila ka ku kuete esilivilo, momo lomue o pondola oku vi yevelela. Vakuavo va seteka oku likutilila, pole va sima okuti lomue o va tambulula. Ulume umue okuti ka tava ku Suku, wa kuata ocisimĩlo coku limbuka ndomo Suku a tuwa, kuenje wa likutilila ndoco: “Ndi loñuile ondaka yimue.” Pole, eye wa popia okuti Suku “ko tambuluile.”

Embimbiliya li tu sapuila okuti kuli Suku umue ukuakuyevelela olohutulilo. Embimbiliya li lombolola ulandu waco komanu tunde kosimbu lekisa okuti: “[Suku] u lingi ohenda eci vu vilikiya. Eci a yeva okuvilikiya kuene o u kumbululi.” (Isaya 30:19) Ocinimbu cikuavo ci lekisa okuti: “Ohutililo yukuesunga oyo a sole.” —Olosapo 15:8.

Vembimbiliya mu sangiwavo ovolandu omanu okuti olohutililo viavo via yeviwa. Ocinimbu cimue ci lekisa okuti Yesu wa “liyula . . . oku u popela kokufa, kuenje wa yeviwa.” (Va Heveru 5:7) Ovolandu akuavo a sangiwa kelivulu lia Daniele 9:21 kuenda 2 Asapulo 7:1.

Momo lie omanu vamue va simĩla okuti olohutililo vimue ka vi tambuluiwa? Oco vi yeviwe tu sukila oku likutilila ku Suku wa situluiwa Vembimbiliya, Yehova, a okuti ko suku yikuavo ale ku vakukululu, sio. Suku o yongolavo okuti “tu pinga cimue ca sungulukila ocipango caye” kovina eye a tava. Nda tua likutilila lonjila yimue yi li kuata locipango ca Suku, eye “o tu yeva.” (1 Yoano 5:14) Omo liaco oco olohutililo vietu vi yeviwe tu sukila oku kũlĩha Suku wa tukuiwa Vembimbiliya kuenda oku li longisa ocipango caye.

Omanu valua va tava okuti ohutililo ka yi pangi lika onepa ketavo pole, Suku o yevelela olohutililo viavo loku vi tambulula. Isaac, kofeka yo Kenya, wa popia hati: “Nda likutilila oco ndi kuate elomboloko Liembimbiliya. Ka pa pitile otembo yalua, kua molẽha umue kuenje wa nyiha ekuatiso nda sukilile.” Hilda kofeka yo Filipina wa yonguile oku liwekapo oku sipa. Noke yoku ci seteka olonjanja vialua, ulume waye wo sapuila hati, “Momo lie ku likutilila ku Suku oco a ku kuatise?” Eye wa kapako elungulo liaco kuenje wa popia hati: “Nda komoha ndomo Suku a ñuatisa. Nda limbuka okuti onjongole yange yoku sipa ya tepuluka. Omo liaco nda liwekapo oku sipa.”

Anga hẽ Suku o kuete onjongole yoku ku kuatisa oco omuenyo wove u likuate locipango caye?