Vembimbiliya mu sangiwa ovitumasuku vialua via lomboluiwa. Kakuli omunu o tẽla oku lombolola ovina vi keya kovaso yoloneke. Oku tẽlisiwa kuovitumasuku Viembimbiliya ku eca uvangi wokuti olio ondaka ya Suku.—Tanga Yehosua 23:14; 2 Petulu 1:20, 21.

Ovitumasuku via tẽlisiwa ale, vi tu kuatisa oku kolela ku Suku. (Va Heveru 11:1) Ovio vi tu kuatisa oku kolela okuti ohuminyo yoku kala voluali luokaliye yi ka tẽlisiwa. Omo liaco, ovitumasuku Viembimbiliya vi tu ĩha elavoko liasuapo.—Tanga Osamo 37:29; Va Roma 15:4.

Ovitumasuku vimue Viembimbiliya vi vetiya afendeli va Suku oku kapako ovina va siata oku li longisa. Eci Akristão kocita catete va limbuka oku tẽlisiwa kuovitumasuku, va tunda ko Yerusalãi. Noke eci olupale lua nyoliwa omo omanu valua va likala Yesu, Akristão va puluka momo va kala kocitumãlo cimue ocipãla lo Yerusalãi.—Tanga Luka 21:20-22.

Koloneke vilo, oku tẽlisiwa kuovitumasuku ku lekisa okuti ndopo Usoma wa Suku u ka kundula olosoma kuenda ovoviali osi oluali. (Daniele 2:44; Luka 21:31) Omo liaco, eyi oyo otembo yoku kapako ovina tua siata oku li longisa, oco tu taviwe la Yesu Kristu o Soma ya noliwa la Suku.—Tanga Luka 21:34-36.