Uviali wovitukiko u lomboloka oku endisa lãvi unene woku viala oco va punde olombongo viomanu. Ocituwa caco ca tunda kosimbu. Vembimbiliya mu sangiwa ocihandeleko ci pisa oku tambula ovitukiko vekanga. Eci ci lekisa okuti ocituwa caco ca kũlĩhiwile ale kosimbu ci pitahãla 3.500 kanyamo. (Etundilo 23:8) Voku tambula ovitukiko ka mua kongelele lika oku tambula olombongo. Olonalavayi viombiali vana okuti vakuavitukiko, olonjanja vimue va siata oku punda ovokuasi omanu, loku linga ovopange amue a va ecelela oku tambula olombongo komanu ndaño ka va kuete omoko yaco, ale va nyana olombongo viombiali. Vakuavo omo lioku kala polomangu vinene, va kuatisa lika akamba kuenda vakuepata liavo.

Ndaño okuti ocituwa coku tambula ovitukiko ci sangiwa kovisoko viosi viomanu, pole, ocituwa caco ci sangiwa vali enene kolombiali. Kunyamo wo 2013 ukanda umue wasapulo u tukuiwa hati, Global Corruption Barometer, wa sandekiwa lo Transparência Internacional, wa lombolola okuti omanu valua voluali va limbuka okuti, kuli ovisoko vitãlo via piãla koku tambula ovitukiko ndeci: Ovisoko viopulitika, akuenje velombe, olonalavayi viombiali, a palanga olombiali kuenda olonganji. Kũlĩhisa ovolandu amue a lekisa uvangi wocitangi caco.

• AFRIKA: Kunyamo wo 2013, kofeka yo Afrika do Sul ci soka 22.000 kolonalavayi viombiali, va lundiliwa okuti va linga upange wavo loku tambula ovitukiko.

• AMERIKA: Kunyamo wo 2012, kofeka yo Brasil, ci soka 25 komanu va kapiwa vokayike omo lioku nyana olombongo viombiali locimãho coku sanda ekuatiso kovisoko viopulitika. Pokati komanu va kapiwa vokayike, pa kala mitavaso yoseketa yombiali yimue ya vialele ofeka, okuti eye wa kala omunu wavali wa velapo vofeka.

• ASIA: Ko Seoul, kunyamo wo 1995 kofeka yo Korea do Sul, ci soka 502 komanu va fila vovenda yimue ya kupuka. Oloñonomuisi viocitangi caco, via limbuka okuti, asongui vovolupale va tambula ovitukiko oco va ecelele okuti, vana va tunga ovenda yaco va talavaya losimendu ka yi silivila kuenda ka va kuamele ovihandeleko viatiamẽla koku tunga lonjila yimue ya kolapo.

• EUROPA: Cecilia Malmström Usongui Wocisoko ci Konomũisa Ovina vi Sukiliwa Vofeka ko Europa, wa popia hati: “Ocitangi coku tambula ovitukiko ca livokiya calua ko Europa.” Eye wa vokiyako hati, “onjongole yolombiali yoku malako ovitukiko, yi mõleha okuti yitito.”

Ocili okuti, ka ca lelukile oku kuata ombiali yimue ka yi kuete ovitukiko. Ulongisi Susan Rose-Ackerman, una wa kũlĩha ciwa olonumbi vioku mãlako ovitukiko, wa soneha okuti oco ku maliwe ocituwa coku tambula ovitukiko, olombiali vi sukila oku linga apongoloko kolonjila viavo vioku linga olomĩlu.” Ndaño komanu ci mõleha ndu okuti ka kuli elavoko lioku malako ovitukiko, pole Embimbiliya li lekisa okuti, ku ka kala apongoloko kuenda ci ka tẽlisiwa.