Sokolola ndeci okuti isia umue o kasi oku sapela lomõlaye o kuete anyamo epanduvali. Eye u sapuila hati, “Kosimbu Suku wa lulika ongongo lovina viosi vi kasimo, wa lulika utanya, osãi kuenda olombungululu.” Vokuenda kuotembo yimue, omõla o sokolola eci catiamẽla kovina viaco, pole, noke o pula ndoco: “A tate, helie wa lulika Suku”?

Isia u tambulula hati, “Lomue wa lulika Suku. Eye ka kuate efetikilo.” Osimbu omõla a kasi vutila, etambululo liaco lia teta onimbu citava okuti li u lomboloka. Pole, eci a kula, amamako latatahãi. Eye ka kuate elomboloko liokuti kuli umue ka kuatele efetikilo. Momo oluali lua kuata efetikilo. Eye o fetika oku lipula ndoco: ‘Suku wa tunda pi?’

Embimbiliya li tambulula ndati? Li tambulula ndeci isia una wa tukuiwa kefetikilo a tambulula. Mose wa soneha ndoco: “A Yehova, . . . tunde kovitumbulukila viosi. Eci olomunda ka via citiwile handi; osimbu kua lulikile handi ongongo loluali; tunde ka ku ci toke ka ku ci, ove muẽle Suku. (Osamo 90:1, 2) Uprofeto Isaya wa popiavo hati: “Kua ci kũlĩhĩle? Kua ci yevele? Yehova eye Suku ka pui haeye Usovoli wilu lieve liosi”! (Isaya 40:28) Cimuamue haico ukanda wa Yuda wa tukula Suku hati, o kasi “tunde konahũlũlua.”—Yuda 25.

Ovisonehua evi vi lekisa okuti, Suku eye “Soma yonahũlũlua” ndeci upostolo Paulu a ci lombolola. (1 Timoteo 1:17) Eci ci lomboloka okuti Suku o kasi tunde osimbu, ndaño tua sanda oku sokolola konahũlu. Kuenda eye o ka amamako oku kala. (Esituluilo 1:8) Ekalo liaye liokuti ka kuete efetikilo, li tiamisiwila kocituwa caye okuti eye Tõlo.

Momo lie ka ca lelukilile oku kuata elomboloko liaco? Momo otembo yetu yitito yomuenyo yi tu ĩha ovisimĩlo via litepa viatiamẽla kotembo yomuenyo wa Yehova. Omo okuti Suku o kala otembo ka yi pui, kokuaye ohulukãi yanyamo ya soka ndeteke limuamue. (2 Petulu 3:8) Kũlĩhĩsa ocindekaise eci: Epange li kala lika komuenyo ci soka 50 koloneke. Anga hẽ li pondola oku kuata elomboloko liotembo yomuenyo wetu yi soka 70 ale 80 kanyamo? Sio ka li pondola oku kuata elomboloko liaco! Embimbiliya li lombolola okuti etu tu kasi ndapange kovaso Ululiki wetu wa Velapo. Ndaño muẽle epondolo lietu lioku sokolola lia li tepa leli liaye. (Isaya 40:22; 55:8, 9) Omo liaco, ka ci tu komõhisa oku kũlĩha okuti, omanu ka va pondola oku kuata elomboloko lia suapo liekalo lia Yehova.

Ndaño okuti ka ca lelukile oku kuata elomboloko lia suapo liekalo lia Suku, ca sunguluka kokuetu. Nda kua kaile omunu umue wa lulika Suku, omunu waco nda eye ululiki. Pole, Embimbiliya li lombolola okuti Yehova eye wa “sovola ovina viosi.” (Esituluilo 4:11) Handi vali tua kũlĩha okuti otembo yimue ka kua kale oluali. (Efetikilo 1:1, 2) Oluali lua tunda pi? Ululiki waluo, eye wa kala tete. Eye wa kalako ale osimbu Yesu kuenda ovangelo ka va lulikiwile. (Yovi 38:4, 7; Va Kolosai 1:15) Eye wa kalako likaliaye. Eye ka kuatele ululiki; momo kotembo yaco lacimue ca kalako okuti nda oco co u lulika.

Ekalo lietu kilu lieve kuenda oluali, vi lekisa okuti kuli Suku umue ukuatembo ka yi pui. Una wa lulika ovina viosi, haeye wa tumbika ovihandeleko vioku teyuila oluali luaco, ka kuete efetikilo. Eye lika wa tẽla oku eca omuenyo kovina viosi.—Yovi 33:4.