MO okuti “Suku Espiritu,” kamuiwa lovaso omanu. (Yoano 4:24) Pole, Embimbiliya li popia okuti omanu vamue, va mõla Suku. (Va Heveru 11:27) Vo mola ndati? Ove hẽ o pondola oku mõla “Suku ka muiwa lovaso”?—Va Kolosai 1:15.

Ekalo lietu li sokisiwa lomunu wa citiwa lupeke. Anga hẽ, upeke waye u tateka oku limbuka ovina viosi vio ñuala? Sio, ka u tateka. Omunu omeke o pondola oku tambula esapulo volonjila via litepa okuti, o limbuka omanu, ovikuata kuenda ovina vikuavo vio ñuala. Ulume umue omeke wa popia hati, “oku vanja ka ku kasi vovaso, pole ku kasi vutima.”

Cimuamue haico ci pita love okuti, ndaño ku pondola oku mola Suku lovaso ove ositu, o pondola oku u mola “lovaso utima.” (Va Efeso 1:18) Kũlĩhĩsa olonjila vitatu vi ku kuatisa oku ci linga.

Olonjanja vimue, oku yeva kuomeke kuenda oku limbuka ovina ka lete, ku pondola oku livokiya. Cimuamue haico ci pita love okuti, o pondola oku kũlĩhĩsa ovina vi sangiwa voluali loku kũlĩha Suku wa ku lulika okuti, ka muiwa lovaso. Embimbiliya li lekisa okuti, “tunde kokululikiwa kuoluali, unu waye, una ko muiwa muiwa lovaso, okuti unene waye ko pui, kuenda okukola kuaye, u molehela ciwa vovina a lulika.”—Va Roma 1:20.

Tu kũlĩhĩsi eci catiamẽla koluali luetu. Oluo, ka lua lulikiwile lika oco tu kalemo, pole lua lulikiwa oco tu kuate esanju. Eci tu yeva oku sika kuofela, oku yotela utanya, oku lia epako limue tu sole, ale oku yevelela oku imba kuolonjila, tu kuata esanju. Olombanjaile viaco ka vi lekisa hẽ okuti, Ululiki wetu wa tu kapako, womboka kuenda ukuahenda?

Poku mola ovina vi kasi voluali, nye o lilongisa catiamẽla ku Suku? Handi vali, ilu li situlula unene wa Suku. A konomuiso a lingiwa lolonoño, ka a lekisa lika okuti oluali lu kasi oku lisandula, pole u kasi oku linga epongoloko liaco lonjanga! Poku vanja kilu luteke, citava okuti o lipula ndoco: ‘Pi kutunda ongunsu yi songuila ilu kuenda ovina vi kasi voluali?’ Embimbiliya li tu sapuila okuti, Ululiki “ongusu yaye ya lua cimue.” (Isaya 40:26) Ovina Suku a lulika vi lekisa okuti, eye “Tõlo” okuti, “unene waye wa tu pitãhala.”—Yovi 37:23.

Onjali yimue yukãi yi kuete omãla vavali olomeke, ya popia ndoco: “Oku sapela oyo onjila ya velapo yi va kuatisa oku lilongisa ovina. Va sapuila ovina viosi o lete levi o yevite, kuenda nda wa endele kumue, poku tiuka, o sukila oku va sapuila ovina viosi wa mola. Ove wa linga ovaso avo.” Cimuamue haico okuti, ndaño “lomue wa la mola Suku,” Omõla a Suku Yesu, “u o kasi vonete ya Isia, Eye wo situlula.” (Yoano 1:18) Ndocilulikilo catete ca Suku, Yesu Omõla uveli, wa linga “iso” lietu li tu kuatisa oku mola ovina vio kilu. Eye ono ya velapo yovolandu atiamẽla ku Suku ka muiwa lovaso.

Kũlĩhisa ovina vimue Yesu wa kala otembo yalua la Isiaye a lombolola:

• Suku o talavaya calua. “Toke cilo Tate o linga upange.”—Yoano 5:17.

• Suku wa kũlĩha ovina tu sukila. “Isiene wa kũlĩha ovina vio sesameli osimbu ka wa vi pingili.”—Mateo 6:8.

•  Suku o tu ĩha ocali ovina tu sukila. “Isiene o kasi kilu . . . o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.”—Mateo 5:45.

• Suku wa kapako omunu lomunu. “Olongungu vivali hẽ, ka vi landiwa lolusendu? Kuenje layimue yavio yi lokila posi te Isiene wa ci panga. Puãi ndaño esinga liovovitue viene lia tendiwa. Oco ko ka kuati ohele, momo wa velipo olongungu via lua.”—Mateo 10:29-31.

Omanu vana okuti olomeke olonjanja vimue oku kuata kuavo elomboloko liovina kua litepa lomanu va lete. Omunu omeke, o pondola oku limbuka ulembo, kuenda ka u tendi ndocitumãlo cimue ci kuete owelema okuti, ka ci kuete olosongo viekumbi. Pole, kokuaye ocitumãlo caco ca talala, kuenda ka ci kuete olosongo viekumbi. Ndeci omunu ka pondola oku mola ulembo ale ocinyi, letuvo ka tu pondola oku kuata elomboloko lia suapo liatiamẽla ku Yehova. Omo liaco, Yehova wa eca omunu umue wa situlula ovituwa Viaye kuenda ekalo liaye.

Omunu waco, Yesu. (Va Filipoi 2:7) Eye, ka tu sapuilile lika catiamẽla ku Isiaye, pole, wa tu situluilavo ndomo Suku a tuwa. Filipe ondonge ya Yesu wa pinga hati: “A Ñala, tu lekise Isia.” Poku u tambulula, Yesu wo sapuila hati: “U wa mola ame haeye wa mola Isia.” (Yoano 14:8, 9) Nye o pondola oku “mola” catiamẽla ku Isia lekuatiso liovina Yesu a linga?

Yesu wa sanjukile, wa kala embombe kuenda wa lianjele. (Mateo 11:28-30) Ovituwa viaye via vetiya omanu oku amẽla kokuaye. Yesu wa yeva evalo lava vayeva evalo, kuenda wa enda oku sanjuka lava va sanjuka. (Luka 10:17, 21; Yoano 11:32-35) Eci o tanga ovolandu Embimbiliya, ale ceci o yeva ovina viatiamẽla ku Yesu, li kapa vulandu waco, kuenda sokolola ndu okuti o kasi oku panga onepa kovolandu aco. Nda wa kũlĩhĩsa lutate ndomo Yesu a tata omanu, o kũlĩha ciwa ekalo likomõhisa lia Suku kuenda oku vetiyiwa oku amẽla Kokuaye.

Catiamẽla komunu omeke ndomo a sanda oku kũlĩha ovina, usonehi umue wa popia hati: “Eye o tambula esapulo volonepa vialitepa ndeci, oku limbuka eci co lamba, oku yeva elemba, oku yevelela kuenda ovina vikuavo, kuenje o kongela esapulo liaco liosi.” Cimuamue haico o pondola oku linga okuti, nda o kũlĩhisa ovina Suku a lulika, loku tanga ovina Yesu a popia viatiamẽla ku Isiaye, kuenda oku konomuisa ndomo a situlula ovituwa via Suku, o ka kuata elomboloko lia suapo lia Yehova. Nda wa ci linga, o ko kũlĩha ciwa.

Yovi wa kala kosimbu wa pita lulandu umuamue. Kefetikilo, wa popia ovina ‘ka vio lombolokele.’ (Yovi 42:3) Pole noke yoku kũlĩhĩsa ovina vi komohisa Suku a lulika, wa vetiyiwa oku popia hati: “Oku ku yeva letũi nda ku yeva yeva, cilo puãi iso liange lia ku mõla.”—Yovi 42:5.

Cimuamue haico ci pondola oku pita love. “Nda . . . o sanda [Yehova], eye o tava oku sangiwa love.” (1 Asapulo 28:9) Olombangi Via Yehova vi sanjukila oku ku kuatisa oku sanda Suku ka muiwa lovaso.