Olondotolo vina via lilongisa uloño woku kũlĩhĩsa ekalo liolondunge viomanu, va tu sapuila okuti, oco omunu a kuate esanju o sukila oku kapako ovina viespiritu. Ocili okuti omanu va kuete onjongole yoku tẽlisa ocimãho cimue ale oku vumba umue wa va velapo. Vamue poku seteka oku tẽlisa onjongole yaco, va pesila otembo yavo yolomapalo koku tala ovina via lulikiwa, koku lilongisa ovoloño, koku sika ovisikilo kuenda kovina vikuavo. Pole, valua poku linga ovina evi ka va siatele oku sanga esanju va yongola.

Vana va tanga Embimbiliya ka va komõha eci va lilongisa okuti omanu va citiwa lonjongole yoku kũlĩha Suku. Ovipama viatete vielivulu Liefetikilo vi lekisa okuti Suku noke yoku lulika Adama la Heva, wa enda oku vangula lavo kuenje ca va ecelela oku kuata ukamba laye. (Efetikilo 3:8-10) Suku ka lulikile omanu oco va li songuile ovo muẽle pole, va sukila oku sapela Lululiki wavo. Embimbiliya li lombolola esilivilo liaco.

Yesu wa popia ndoco: “Vakuosuke wovutima va sumũlũha.” (Mateo 5:3) Olondaka evi vi tu kuatisa oku limbuka okuti oco tu kuate esanju komuenyo tu sukila oku tẽlisa onjongole yetu yoku kũlĩha Suku. Tu ci linga ndati? Yesu wa eca etambululo liaco poku popia hati: “Omunu ka muila omuenyo kombolo lika, te kondaka yosi yi tunda vomẽla wa [Yehova].” (Mateo 4:4) Olondaka via Suku kuenda olonumbi viaye vina vi sangiwa Vembimbiliya, vi tu kuatisa ndati oku kuata esanju komuenyo? Tu kũlĩhĩsi atosi atatu a velapo.

Tu Sukila Olonumbi Viwa

Koloneke vilo, kuli olonoño vialua via siata oku eca olonumbi viatiamẽla koku kuata ukamba, oku li sola pokati, komuenyo wepata, oku tetulula ovitangi, koku kuata esanju komuenyo, kuenda kolonepa vikuavo. Oco hẽ, helie wa loñoloha calua kokueca olonumbi viatiamẽla kolonepa evi okuti Yehova Suku, Ululiki womanu ci sule?

Kũlĩhĩsa ocindekaise eci: Poku landa ocikuata cimue ndeci omakina yokupa alitalatu ale o ­komputador, ove o lavoka okuti ocikuata caco ciya locicapa ale lokalivulu kamue kolonumbi ka lekisa ndomo o talavaya layo ciwa. Embimbiliya li sokisiwa lokalivulu kaco kolonumbi. Olio li kasi ndokalivulu ka pongiyiwa la Suku Ululiki womanu oco ka songuile omuenyo wavo. “Okalivulu kaco ka lekisa” esilivilo liomuenyo kuenda ndomo wendisiwa ciwa.

Ndeci ci kasi alivulu alua olonumbi via sonehiwa lomanu, Embimbiliya li lungula omanu oco va yuvule ovituwa vi pondola oku nyõla omuenyo wavo. Ocili okuti, omanu valua va siata oku eca olonumbi vi moleha okuti via leluka oku vikuama. Anga hẽ, ka ca sungulukile oku sima okuti oku kuama olonumbi Viululiki wetu oco lika ci tu kuatisa oku yuvula ovitangi komuenyo?

Ndaño okuti Yehova Suku o tu ĩha olonumbi vioku tu songuila, eye ka tu kisika oku vi kuama. Omo okuti eye o tu sole kuenda o yongola oku tu kuatisa, o tu vetiya hati: “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila. Nda wa pokuile kovihandeleko viange, ombembua yove nda ya linga ndolui, kuenda esunga liove ndakimba okalunga.” (Isaya 48:17, 18) Ocili okuti, oku kuama olonumbi via Suku, ci tu kuatisa oku kuata ekalo liwa komuenyo. Eci ci lomboloka okuti, oco tu kuate esanju, tu sukila Suku.

Tu Sukila Atambululo Ovitangi Viomuenyo

Valua va sima okuti ka va sukila Suku momo ovina vĩvi va siata oku mola ka vi li kuata locisimĩlo cokuti Suku ukuacisola. Ovo pamue va li pula ndoco: ‘Momo lie vakuesunga va talela ohali?’ ‘Momo lie oloñaña vina ka vi kuete eko vi citiwa okuti via lemãla?’ ‘Momo lie voluali mue yukila ekambo liesunga?’ Apulilo ava a kuete esilivilo kuenda atambululo aco, a tu kuatisa oku sanga esanju komuenyo. Pole, oco ka tu ka kuati lonjanga ocisimĩlo coku vetela evelo Suku, tu kũlĩhĩsi eci Ondaka Yaye, Embimbiliya li lombolola catiamẽla kondaka eyi.

Kelivulu Liefetikilo kocipama catatu, tu sangako ulandu watiamẽla ku Satana una wa vanguila vonyoha oco a vetiye Adama la Heva oku lueya vocihandeleko ca Yehova Suku coku yuvula oku lia kepako liuti woku kũlĩha eci ciwa leci cĩvi. Satana wa sapuila Heva hati: “Mbu, okufa ka vu fi. Momo Suku wa kulĩha okuti eteke vu liako, ovaso ene haico a letuluka kuenje vu linga nda Suku, vu kulĩha eci ciwa leci cĩvi.”—Efetikilo 2:16, 17; 3:4, 5.

Lolondaka evi, Satana ka popele lika okuti Suku ohembi, pole, wa lekisavo okuti onjila ya Suku yoku viala ka ya sungulukile. Eliapu lia lekisavo okuti, nda omanu va tavele kovisimĩlo viaye, ovina nda vi enda ciwa. Ovitangi viaco nda via potoluiwa ndati? Yehova wa ecelela okuti ovitangi viaco vi potoluiwa vokuenda kuotembo oco omanu va kũlĩhĩse nda Eliapu lia vangula ocili ale uhembi. Suku wa eca ku Satana kuenda koloñuatisi viaye epuluvi lioku lekisa nda omanu va pondola oku kala ciwa ndaño ka va kuatisiwa la Suku.

Etambululo lipi nda wa eca kalundi a Satana? Omanu hẽ, va pondola oku kala ciwa kuenda oku liviala ovo muẽle ndaño ka va kuatisiwa la Suku? Ohali, ekambo liesunga, ovovei, olofa, ungangala, ovituwa vĩvi, ovoyaki, oku liponda, kuenda ovitangi vikuavo via siata oku kala voluali vokuenda kuanyamo alua, vieca uvangi wokuti, omanu ka va tẽla oku lisonguila ovo muẽle, te lika lekuatiso lia Suku. Embimbiliya ka li lekisa okuti Suku eye wa siata oku nena ovitangi komanu, pole, li tu sapuila ono yovitangi viaco poku popia hati: “Omunu poku kangisa ukuavo o li linga eye muẽle cĩvi.”—Ukundi 8:9.

Eci hẽ ka ci lekisa okuti tu sukila ekuatiso lia Suku oco tu kũlĩhe esunga lieci tu talela ohali, kuenda ndomo ovitangi viaco vi ka sulila? Nye Suku a ka linga?

Tu Sukila Ekuatiso Lia Suku

Tunde kosimbu omanu va siata oku kuata onjongole yoku malako ovovei, oku kuka kuenda olofa. Ovo va pesela otembo yalua, ongunsu kuenda olombongo oco va tẽlise onjongole yaco, pole ka va siatele oku kuata onima. Vakuavo va siata oku sima okuti, poku nyua ovihemba vialua via litenga, oku nyua ovava amue a tatiwa, ale oku kala pocitumãlo cimue ciwa, ci va kuatisa oku kala amalẽhe. Pole, ovisimĩlo viaco via siata oku va nenela lika esumuo.

Suku o yongola okuti omanu va kala ciwa loku kuata esanju. Eci oco ca kala ocipango caye catete eci a lulika omanu, kuenda ocipango caco ka co limbile. (Efetikilo 1:27, 28; Isaya 45:18) Tua kolela okuti Yehova Suku o ka tẽlisa ovina viosi a likuminya. (Isaya 55:10, 11) Embimbiliya li tu sapuila ohuminyo ya Suku yoku tumbulula Ocumbo Celau cina Adama la Heva va pumba. Kelivulu lia sulako Liembimbiliya tu sangako olondaka evi: “Eye, [Yehova Suku] o ka puenya asuelẽla osi vovaso omanu. Oku fa ka ku ka kalako vali, ndaño oku lila loku liyula lupongo laviovo ka vi ka kalako vali. Momo ovina viatete vi ka pita.” (Esituluilo 21:4) Suku o ka nena ndati ekalo liaco liwa kuenda tu kuatisiwa ndati lohuminyo yaco?

Yesu Kristu omõla a Suku, wa longisa olondonge viaye oku likutilila oco ocipango ca Suku ci lingiwe. Omanu valua va kũlĩha ciwa ohutililo yaco ale va yi pitolola olonjanja vialua, kuenda vamue va yi tukula hati Ohutililo ya Ñala. Ohutililo yaco yi fetika ndoco: “A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:9, 10) Usoma wa Suku owo lika u ka malako ovitangi viosi via kokiwa luviali womanu kuenda oku nena oluali luokaliye luesunga Suku a likuminya. a (Daniele 2:44; 2 Petulu 3:13) Nye tu sukila oku linga oco tu kuatisiwe lolohuminyo via Suku?

Yesu Kristu wa lombolola ovina tu sukila oku linga poku popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.” (Yoano 17:3) Lekuatiso lia Suku, tu pondola oku kuata omuenyo ko pui voluali luokaliye a likuminya. Elavoko liaco ka li ku ĩha ekolelo lioku tambulula hati oco, kepulilo liokuti: Anga hẽ tu sukila Suku?

Otembo Yoku Sokolola Catiamẽla ku Suku

Ci soka olohulũkãi vivali kanyamo konyima, Upostolo Paulu poku sapela lomanu Polusenje ale Powulu wo ko Atenai, wa va sapuila hati: “[Suku] eca eca komanu vosi omuenyo lefuimo lovina viosi. Momo vokuaye, omo tu muila omuenyo loku lisengasenga, haimo tu kasilili lomuenyo. Ndeci ca popia umue kolonduvikiyi viene hati, ‘Ocili etu tumãla vaye.’’’—Ovilinga 17:25, 28.

Ovina Paulu a sapuila va Atenai, viocili. Ululiki wetu wa eca ofela tu fuima, okulia tu lia kuenda ovava tu nyua. Ovina viwa Yehova a siata oku tu ĩha ovio vi kasi oku tu kuatisa oku kala lomuenyo. Oco hẽ, momo lie Suku a siatela oku eca ovina viaco komanu vosi, ndaño muẽle ku vana ka va tava kokuaye? Paulu wa popia hati, wa cilingila okuti “va sanda Suku, lelavoko liokuti, nda vo sandiliya loku papayata, vo sanga. Haimo lumue ka kasi ocipãla letu vosi omunu omunu.”—Ovilinga 17:27.

Ove hẽ, o yongola oku kũlĩha ciwa Suku poku lilongisa ovina vialua viatiamẽla kocipango caye kuenda olonumbi viaye vi tu kuatisa oku kala ciwa cilo kuenda otembo ka yi pui? Nda oco, vangula lomunu wa ku ĩha orevista eyi ale lakundi vakuavo. Ovo va ka sanjukila oku ku kuatisa.