Anga hẽ ci Kuete Esilivilo Oku Kũlĩha Atambululo?

“Vu kũlĩha ocili, kuenda ocili cu yovola.”​—YOANO 8:32.

VEMBIMBILIYA mu sangiwa ocili ci pondola oku tu yovola katatahãi ale kalongiso uhembi atiamẽla ku Yesu. Anga hẽ ci kuete esilivilo oku konomuisa ciwa ovina tua kũlĩha viatiamẽla ku Yesu? Ocili okuti, ci kuete. Ci kuete esilivilo ku Yehova. Ku Yesu. Kuenda kokuetu.

● Momo lie ci kuetele esilivilo ku Yehova? Momo “Suku eye ocisola.” (1 Yoano 4:8) Yehova o yongola okuti tu kuata esanju otembo ka yi pui. Yesu wa popia hati: “Omo Suku a sola ndoco oluali [okuti omanu], oco a ecela Omõlaye wongunga okuti wosi u kolela . . . o mola omuenyo ko pui.” (Yoano 3:16) Suku wa tuma Omõlaye oco a linge Onjovoli yetu kuenda oku yulula onjila yoku kuata omuenyo ko pui Voluali Luokaliye palo posi, ndomo ca kala ocipango Caye catete. (Efetikilo 1:28) Suku o kuete onjongole yoku eca omuenyo ko pui ku vana va lilongisa ocili catiamẽla Komõlaye loku ambata omuenyo u litava locili caco.​—Va Roma 6:23.

● Momo lie ci kuetele esilivilo ku Yesu? Yesu o solevo omanu. Eye wa lekisa ocisola cocili poku tu fila. (Yoano 15:13) Yesu wa kũlĩhĩle okuti omanu va popeliwa lika vonduko yaye. (Yoano 14:6) Anga hẽ oku kũlĩha okuti Yesu o yongola oku mola ndomo omanu va kuatisiwa locilumba caye cocisembi, ci tu komohĩsa? Eli olio esunga lieci eye a handelekela olondonge viaye oku longisa omanu koluali luosi ocili catiamẽla kocipango ca Suku.​—Mateo 24:14; 28:19, 20.

● Momo lie ci kuetele esilivilo kokuetu? Sokolola ovina vimue o tenda okuti vi kuete esilivilo lialua kokuove ndeci, uhayele kuenda epata liove. Ove hẽ o yongola oku kuata uhayele uwa kuenda ekalo liwa komuenyo kumue lepata liove? Yehova vonduko ya Yesu wa eca kokuove kuenda kepata liove elavoko lioku kuata uhayele uwa kuenda omuenyo ko pui voluali luokaliye, muna ka mu ka kala evalo lohali. (Osamo 37:11, 29; Esituluilo 21:3, 4) Anga hẽ o yongola oku kala voluali luaco luokaliye? Nda oco, kuli ocina cimue o sukila oku linga.

Tanga vali ocisonehua Cembimbiliya kuopiwa osapi yocipama cilo. Ocisonehua caco ci popia hati: “Vu kũlĩha ocili, kuenda ocili cu yovola.” Ocili catiamẽla ku Yesu kuenda kocikele caye coku tẽlisa ocipango ca Suku, ci tu yovola kupika wekandu kuenda kolofa. Pole, oco o mole eyovo liaco o sukila oku “kũlĩha ocili.” Momo lie ku lilongisila ovina viatiamẽla kocili caco oco o kuatisiwe kumue lepata liove? Olombangi Via Yehova vi pondola oku ku kuatisa.