Helie o Sukila Oku Longisa Omãla Ovina Viatiamẽla ku Suku?

“Ondonge ka yi velipo okuti ulongisi wayo o sule, puãi wosi wa longisiwa ocili o linga ndulongisi waye.”​—LUKA 6:40.

OLONJALI vimue vi liyeva ndu okuti ka vi kuete epondolo lioku longisa omãla vavo ocili catiamẽla ku Suku. Ovo va sima okuti ka va lilongisile calua, ale ka va kũlĩhĩle ovina vialua viatiamẽla ketavo oco va linge alongisi vawa. Omo liaco, va likala ocikele caco kuenje va ceca ku umue ukuepata ale kasongui vetavo.

Helie o kuete epondolo lioku longisa omãla ovina viatiamẽla ketavo kuenda olonumbi viovituwa viwa? Kũlĩhĩsa eci Embimbiliya li popia catiamẽla kondaka eyi, kuenda ci sokisa lakonomuiso a siata oku lingiwa lolonoño.

Cipi Ocikele ca Isia?

Ceci Embimbiliya li longisa: “A vaisia, ko ka wenguli onyeño yomãla vene, puãi va longisi loku va pindisa lovilongua via Ñala.”​—Va Efeso 6:4.

Ceci olonoño via limbuka: Ndamupi va isia va pondola oku kuatisiwa poku pamisa ekolelo liavo ketavo? Ocipama cimue ca sandekiwa kunyamo wo 2009 losapi hati, “O Envolvimento Religioso do Pai e o Comportamento Dos Filhos na Primeira Infância,” ca popia hati: “Oku tiamẽla ketavo lio pocitumãlo ci kuatisa alume oku  kala olonjali viwa. Etavo li kuatisa omunu oku kuata ovituwa viwa kuenda oku kũlĩha olonumbi vioku songuila ciwa omuenyo.”

Embimbiliya li lombolola esilivilo liocikele colonjali coku tekula omãla kuenda oku va pindisa. (Olosapo 4:1; Va Kolosai 3:21; Va Heveru 12:9) Anga hẽ elungulo liaco li kuetevo esilivilo koloneke vilo? Kunyamo wo 2009 Osikola yelilongiso lia velapo ko Florida, ya sandeka ocipama cimue ca lombolola esilivilo liolonjali komãla vavo. Olonoño via limbuka okuti omãla vana va pindisiwa ciwa lolonjali viavo, va kuete ocikembe kuenda va li kuetele esumbilo. Omãla vakuenje, ka va kuete ovituwa vĩvi, kuenda omãla vafeko, va kuete ovisimĩlo via sunguluka. Ocili okuti olonumbi Viembimbiliya vi kuete esilivilo lia velapo.

Anga hẽ Ocikele ca Ina ci Kuete Esilivilo?

Ceci Embimbiliya li longisa: “Amõlange, tava kalungulo aso, ku ka sinile okulonga kua nyoho.”​—Olosapo 1:8.

Ceci olonoño via limbuka: Kunyamo wo 2006 elivulu limue losapi hati, Psicologia Infantil, lia popia hati: “Olonjali viakãi ovio via siata oku pesela vali otembo yalua oku kala lomãla kuenda oku sapela lavo okuti olonjali vialume ci sule. Ocitangi eci ci kasi oku pita kolofeka vialua.” Omo lioku pesela otembo yalua lomãla, upopi wolonjali viakãi, lovilinga viavo, kuenda ovituwa viavo, vi vetiya calua ekalo liomãla.

Eci olonjali vi likolisilako oku longisa omãla vavo ocili catiamẽla ku Suku, vi eca kokuavo olombanjaile vivali viwa. Catete, vi eca komãla epuluvi lioku kuata ukamba la Isiavo wo kilu, ukamba una u va kuatisa vokuenda kuomuenyo wavo wosi. Cavali, omãla va lilongisa ndomo ulume lukãi va likuatisa pokati poku tẽlisa ovimãho vimue via velapo. (Va Kolosai 3:18-20) Ndaño okuti omanu vakuavo va pondola oku kuatisa isia la ina, pole olonjali ovio vi kuete ocikele ca velapo coku longisa omãla vavo ovina viatiamẽla ku Suku kuenda kocipango caye lepata ndomo li songuiwa.

Ndamupi olonjali vi longisa omãla vavo? Olonjila vipi olonjali vi sukila oku kuama poku va longisa?