YESU olonjanja vialua wa longisa ndomo omanu va likutilila. Kotembo yaco, asongui vetavo lia va Yudea, va enda oku likutilila “panyaha aluwa.” Momo lie? Ovo va yonguile “oku muiwa lomanu.” Ocili okuti, ovo va yonguile oku sivayiwa lomanu. Vakuavo poku linga olohutililo va enda oku pitolola “olondaka vioku patekela” oco va yeviwe. (Mateo 6:​5-8) Yesu wa pisa ocituwa caco, kuenda wa kuatisa omanu oku yuvula olohutililo viaco. Pole, eye ka longisile lika ndomo va yuvula oku linga olohutililo ka via sungulukile.

Yesu wa lekisa okuti poku likutilila, tu sukila oku pinga oco onduko ya Suku yi sivayiwe, Usoma waye wiye, kuenda oco ocipango Caye ci tẽlisiwe. Eye wa longisavo okuti citava oku pinga ku Suku ovina tu sukila. (Mateo 6:​9-13; Luka 11:​2-4) Volusapo Yesu a ta, wa lekisa okuti tu sukila oku amamako oku pinga lekolelo kuenda lumbombe, oco olohutililo vietu vi yeviwe. (Luka 11:​5-13; 18:​1-​14) Eye ka longisile lika lolondaka, wa longisavo longangu yaye.​—⁠Mateo 14:23; Marko 1:⁠35.

Olonumbi viaco via kuatisa olondonge via Yesu oku kuata ovituwa viwa vioku likutilila. Vuteke Yesu eya oku kuatiwa, wa lekisa kolondonge viaye esilivilo liohutililo.

Yesu wa pamisa calua ovapostolo vaye vuteke eya oku kuatiwa. Kuenje ca sukilile oku va longisa ocina cimue cokaliye. Yesu wa va sapuila hati, “Ame ndinjila, haime ndicili, haime ndimuenyo. Lomue iya ku Isia, te lame.” Noke wa va likuminya hati: “Cosi vu pingila vonduko yange ndi ci linga, okuti Isia o muisua ulamba ku Mõla. “Nda vu pingila cimue vonduko yange ndi ci linga.” Poku sulako wa popia hati: “Toke cilo ka wa pingilili cimue vonduko yange. Pingi, kuenje vu ci tambula, oco onjolela yene yi suepo.”​—⁠Yoano 14:​6, 13, 14; 16:⁠24.

Olondaka evi via kuata esilivilo lialua. Elivulu limue li tenda olondaka viaco “ndepongoloko lia lingiwa vohutililo.” Eci ka cilomboloka okuti Yesu wa yonguile oku tambula ku Suku omoko yoku yevelela olohutililo. Pole, wa yikula onjila yokaliye yoku amela ku Yehova Suku.

Yehova wa siata oku yevelela olohutililo viafendeli vaye vakuekolelo. (1 Samuele 1:​9-19; Osamo 65:⁠2) Tunde eci Suku a linga ocisila la va Isareli, wosi wa yonguile okuti ohutililo yaye yi yeviwa, wa sukilile oku limbuka okuti o Isareli oyo ofeka Suku a nõla. Noke, tunde kotembo ya Salomone, omanu va sukilile oku tenda onembele ndocitumãlo coku ecela ovilumba ku Suku. (Esinumuĩlo 9:29; 2 Asapulo 6:​32, 33) Pole, efendelo liaco ka lia kaile otembo yalua. Upostolo Paulu wa soneha okuti Ocihandeleko ca eciwile ku va Isareli coku eca ovilumba vonembele, ca kala “undembo wovina viwa vi laika oku iya, okuti ka vi lekisa uwa wavio wocili.” (Va Heveru 10:​1, 2) Undembo wa piñanyiwa lovina viocili. (Va Kolosai 2:​17) Tunde kunyamo wo 33 O.K., omanu ka va sukilile vali oku kuama Ocihandeleko ca Mose oco va kuate ukamba la Yehova. Ovo, va sukilile oku pokola ku Kristu Yesu​—⁠una Ocihandeleko ca tukuile.​—⁠Yoano 15:​14-16; Va Galatia 3:​24, 25.

Yesu wa tumbika onjila ya velapo yoku amẽla ku Yehova, poku li tukula eye muẽle ndekamba liwa, lia yulula onjila oco olohutililo vietu vi yeviwe kuenda oku tambuluiwa la Suku. Nye ca vetiya Yesu oku tu yuluila onjila yaco?

Omo okuti vosi yetu tua citiwila vekandu, ka tu tẽla oku eca ocilumba ci yelisa akandu  etu ndaño oku kuata ukamba la Yehova, Suku yetu o kola. (Va Roma 3:​20, 24; Va Heveru 1:​3, 4) Pole, Yesu wa eca etimba liaye lia lipua oco a yovole omanu kakandu. (Va Roma 5:​12, 18, 19) Cilo, omanu vosi va kuete epondolo lioku liyelisa kakandu avo, oku kuata ukamba la Yehova, kuenda oku amela kokuaye ‘volohutililo.’ Pole, o tẽla lika oku ci linga nda wa kolela kocisembi ca Yesu.​—⁠Va Efeso 3:​11, 12.

Eci tu likutilila vonduko ya Yesu, tu lekisa ekolelo kovikele vitatu eye a kuete vocipango ca Suku: (1) Eye “Kameme ka Suku” upa akandu oluali vonduko yocisembi caye. (2) Wa pinduiwa la Yehova kuenda cilo wa linga “ocitunda cinene” ceca asumũlũho eyilila kocisembi caye. (3) Eye lika “onjila” yoku amẽla ku Yehova volohutililo.​—⁠Yoano 1:29; 14:6; Va Heveru 4:​14, 15.

Oku likutilila vonduko ya Yesu ceca esivayo kokuaye. Ca sunguluka oku eca esivayo liaco, momo Yehova o yongola okuti, “konduko ya Yesu ku kekamela olongolo viosi . . . kuenda okuti alimi osi a tava okuti Yesu Kristu eye Ñala, loku muisa Suku Tate ulamba.” (Va Filipoi 2:​10, 11) Eci ca velapo vali ceci okuti oku likutilila vonduko ya Yesu ceca ulamba ku Yehova una wa eca Omõlaye oku tu fila.​—⁠Yoano 3:⁠16.

Embimbiliya li tukula olonduko vikuavo via Yesu vi tu kuatisa oku kuata elomboloko liocikele caye. Olonduko viaco vi tu kuatisa oku limbuka eci Yesu a linga kosimbu, eci a kasi oku linga cilo, kuenda eci aka linga kovaso yoloneke. (Tala vokakasia losapi hati, “ Ocikele Cinene ca Yesu”.) Yesu wa tambula “onduko ya piãla olonduko vikuavo viosi.” * Unene wosi wokilu kuenda wa palo posi wa eciwa kokuaye. ​—⁠Va Filipoi 2:9; Mateo 28:⁠18.

Oco olohutililo vietu vi yeviwe la Yehova tu sukila oku likutilila vonduko ya Yesu. (Yoano 14:​13, 14) Pole tu yuvula oku pitolola ondaka “vonduko ya Yesu,” ndocituwa caño. Momo lie?

Konomuisa ocindekaise cimue. Kesulilo liukanda womunu umue ukualomĩlu, ku sangiwa olondaka vi popia hati, “tambula ovilamo viwa.” Anga hẽ olondaka viaco, via tunda muẽle vutima, ale vi kasilili ño ndocituwa co pocitumãlo? Omo liaco, tu sukila oku lekisa esumbilo eci tu tukula onduko ya Yesu kesulilo liohutililo. Ka tu pitulula ño onduko ya Yesu kesulilo liohutililo, ndolondaka vakualomĩlu va kapa kesulilo liukanda. Olonjanja viosi eci tu “likutilila,” ka tu ci lingi ndocituwa caño, pole, tu ci linga “lutima wosi.”​—⁠1 Va  Tesalonike 5:17; Osamo 119:145.

O yuvula ndati oku tukula ondaka “vonduko ya Yesu” ndocituwa caño? Momo lie ku sokoluila ovituwa via Yesu? Sokolola eci eye a siata oku ku lingila cilo, kuenda eci aka linga kovaso yoloneke. Poku likutilila, eca olopandu kuenda sivaya Yehova omo liovina a siata oku tu lingila vonduko Yomõlaye. Nda wa ci linga, oka kolela kohuminyo Yesu a linga eci a popia hati: “Nda vu pinga cimue ku Isia, u cihili onduko yange.”​—⁠Yoano 16:⁠23.