Afendeli vamue va Yehova okuti ka va kuelele, va siatavo oku popia olondaka evi. Ovo va kũlĩha okuti Yehova o yongola okuti afendeli vaye va kuelela “lika vu Ñala,” ci lomboloka oku kuela lika omunu una okuti Ukristão wocili. (1 Va Korindo 7:39) Momo lie Akristão vamue va siatela oku popia ovina viaco?

Akristão vana va siata oku popia ovina viaco, pamue va sima okuti etendelo lia vamanji akãi ka va kuelele olio lialua, okuti lia vamanji alume ci sule. Kolofeka vialua ovisimĩlo viaco viocili. Kofeka yo Korea, kuli eci ci soka 57 porsendu ya vamanji akãi ka va kuelele, kuenda eci ci soka 43 porsendu ya vamanji alume. Kofeka yo Kolombia kuli eci ci soka 66 porsendu ya vamanji akãi ka va kuelele, kuenda eci ci soka 34 porsendu ya vamanji alume.

Kovitumãlo vimue olonjali vina okuti Halombangiko Via Yehova pamue via siata oku kisika kalume va yongola oku kuela omãla vavo vakãi oco va fete olombongo ale oku eca olombanjaile via tĩla. Vamanji vamue alume okuti ka va kuelele, pamue ka va pondola oku feta olombanjaile viaco. Omo liaco, vamanji vamue akãi va siata oku kuata esakalalo nda okuti eteke limue va ka sanga ulume umue Ukristão. a​—Tala etosi pombuelo yemẽla.

Nda wa siata oku kuata ovisimĩlo viaco, o pondola oku kolela okuti Yehova wa kapako ekalo liove kuenda wa kũlĩha ovisimĩlo viove.​—2 Asapulo 6:29, 30.

Vembimbiliya mu sangiwa olonumbi via Yehova vi tu vetiya oku kuelela lika vu Ñala. Momo lie? Momo wa kũlĩha ovina viwa kokuetu kuenda o yongola oku tu teyuila. Eye ka yongola okuti tu nõla onjila yimue ka ya sungulukile okuti yi tu sumuisa. Koloneke via Nehemiya, va Yudea valua va kuelele akãi ka va kalele afendeli va Suku. Nehemiya wa lombololavo  ongangu yĩvi ya Salomone. Eye “wa soliwa la Suku yaye kuenje Suku wo kapa Soma ya va Isareli vosi. Puãi ndaño eye muẽle wa tambiwa lakãi va vakualofeka ha lingi ekandu.” (Nehemiya 13:23-26) Yehova wa kũlĩha okuti olonumbi viaye viwa calua kokuetu. Eli olio esunga lieci a yonguila okuti Akristão vocili va kuelela lika vu Ñala. (Osamo 19:7-10; Isaya 48:17, 18) Tu eca olopandu kokuaye omo lioku tu ĩha alungulo ocisola okuti a sunguluka. Eci tu pokola ku Yehova omo okuti eye Ombiali yetu, tu tava kovina viesunga a tu sapuila loku linga ovina a yongola.​—Olosapo 1:5.

Ocili okuti ove ku yongola oku kutiwila “kokanga ka ya lisokele” okuti, yi lomboloka oku kuela omunu umue ka kuetele ocisola Yehova. Momo omunu waco o pondola oku ku vetiya oku liwekapo oku vumba Suku. (2 Va Korindo 6:14) Olonumbi via Yehova vi tu kuatisa kuenda Akristão valua koloneke vilo, va siata oku lekisa olondunge poku nõlapo oku pokola kokuaye. Pole, vamue va siata oku kuama onjila ya litepa.

Manji umue ukãi kofeka yo Australia o tukuiwa hati Maggy, wa fetika oku namũlala lulume umue okuti, ka kalele Ukristão wocili. b (Tala etosi pombuelo yemẽla.) Eye wa popia hati: “Nda pumba olohongele vialua oco ndi kale laye. Ekolelo liange lia tepulukile.” Manji ukuavo ufeko wo kofeka yo India o tukuiwa hati Ratana, wa kala oku namũlala lekamba liaye lio kosikola okuti lia fetikile oku lilongisa Embimbiliya. Pole, ukuenje waco wa kala oku lilongisa lika Embimbiliya, oco a namulãle laye. Noke Ratana wa liwekapo oku vumba Yehova, kuenje wa fetika oku endaenda ketavo likuavo oco a kueliwe lukuenje waco.

Ufeko umue wo kofeka yo Kamarões o tukuiwa hati Ndenguè eci a kuata ci soka 19 kanyamo, wa kueliwa lulume umue ka fendela Yehova. Osimbu handi ka va tokekisile olohuela, ulume waco wo likuminyile hati, wa laikele oku amamako oku kala Ombangi ya Yehova. Pole, eci pa pita olosemana vivali noke yoku tokekisa olohuela viavo, wa sapuila ukãi oco ka ka endaende vali kolohongele. Ufeko waco wa popia hati: “Nda enda oku kala lika liange loku lila. Nda limbuka okuti nda nõla onjila ka ya sungulukile komuenyo wange. Nda livela vokuenda kuotembo yalua.”

Ocili okuti vamanji vamue va siata oku li kuela lomanu vamue okuti ka va fendela Yehova, pole, va sunguluka kuenda vakuahenda. Ndaño okuti ohueli yove ka yi fendela Yehova ya kala ukuahenda, ci nyõla ndati ukamba wove la Yehova? Ovisimĩlo vipi o kuata omo lioku yuvula oku pokola kalungulo a ecele kokuove oco o kuate esanju? Ovisimĩlo vipi Yehova a kuata omo lionjila wa nõlapo?​—Olosapo 1:33.

Vamanji va sangiwa voluali luosi okuti va siata oku pokola konumbi ya Yehova yoku “kuelela lika vu Ñala,” va kũlĩha okuti eyi oyo onjila ya velapo va nõla. Omo liaco, vamanji akuenje lafeko, va nõlapo oku sanjuisa Yehova poku li kuela lomunu umue okuti ufendeli waye. Manji umue ukãi wo kofeka yo Japãu, o tukuiwa hati Michiko wa nõlapo oku pokola ku Suku ndaño okuti, vakuepata liaye vo vetiyile oku kuela omunu umue ka kuetele ocisola Yehova. Ka ca lelukile kokuaye oku mola vamue pokati kakamba vaye va kala oku kueliwa Lakristão vocili, osimbu amamako okuti ka kuelele. Eye wa popia hati: “Nda enda oku popia ndoco, omo okuti Yehova o ‘Suku yesanju,’ nda limbuka okuti ka tu kuata lika esanju nda tua kuela ale sio. Nda kolelavo okuti, [Yehova] o ka tẽlisa olonjongole viutima wetu. Omo liaco, nda ka tua sangele omunu tu yongola oku kuela, ca sunguluka oku kevelela toke eci tu sanga omunu wa sunguluka.” (1 Timoteo 1:11) Noke manji Michiko wa kueliwa la manji umue uwa, kuenda o kuete esanju omo lioku pokola kelungulo lia Yehova.

Kulivo vamanji vamue va siata oku kevelela okuti va sanga omunu wa sunguluka oco va tokekise laye olohuela. Manji Bill wo kofeka yo Australia wa popia hati, otembo yimue wa solele oku kuata ukamba lakãi vamue ka va kalele Olombangi Via Yehova. Pole, wa yuvula oku linga ukamba walua la umue pokati kavo, momo ka yonguile oku namulãla kuna okuti ku sulila voku “kutiwila kokanga ka ya lisokele” lava ka va tavele ku Suku. Vokuenda kuanyamo amue wa solelevo vamanji vamue akãi, pole ovo ka va kuatele ovisimĩlo vimuamue. Manji Bill wa kevelela toke eci a tẽlisa 30 kanyamo, noke wa sanga ukãi umue Ukristão okuti wa kuata ovimãho ndevi viaye. Eye wa popia hati: “Si liveli. Ndi kuete esumũlũho momo tua siata oku endela kumosi kupange woku kunda, oku  lilongisila kumosi, kuenda oku fendelela kumosi [Yehova]. Ndi kuetevo esanju omo lioku li sanga lakamba vukãi wange momo vosi yavo afendeli va Yehova. Tua siata oku likolisilako oku kapako olonumbi Viembimbiliya volohuela vietu.”

Nye o pondola oku linga osimbu o pokola konumbi ya Yehova yoku kuela omunu umue okuti ufendeli waye? O pondola oku sokolola esunga lieci kua kuelele handi. Nda o sima okuti kua ci lingile omo lioku pokola kolonumbi via Yehova, ivaluka okuti o kasi oku u sanjuisa. (1 Samuele 15:22; Olosapo 27:11) Amamako oku likutilila ku Yehova olonjanja viosi, kuenda situlula ovisimĩlo viove kokuaye. (Osamo 62:8) Osimbu o likolisilako oku pandikisa kayonjo, loku liyaka lolonjongole ka via sungulukile, ukamba wove la Yehova u pamisiwa eteke leteke. Kolela okuti Yehova o pondola oku ku tata ciwa, wa kapako olonjongole viove, kuenda ovina o sukila, momo o kuete esilivilo kokuaye. Eye ka likuminya oku tu ĩha ulume umue ale ukãi tu kuela. Pole, nda o yongola oku kuela, Yehova wa kũlĩha onjila ya sunguluka o sukila oku kuama oco a tẽlise olonjongole viove.​—Osamo 145:16; Mateo 6:32.

Olonjanja vimue citava okuti o kuata ovisimĩlo ndevi via Daviti wa popia hati: “A Yehova, yayulako oku nambulula. Espiritu liange li kasi oku konyõha. Ku ka mbundisile ocipala cove.” (Osamo 143:5-7, 10) Ku ka liwekepo. Ecelela okuti Yehova oku lekisa ovina o sukila oku linga. Yevelela Yehova poku tanga Embimbiliya kuenda oku sokolola lutate kovina o tanga. Nda wa ci linga ci ku kuatisa oku limbuka ovina Yehova a ku yonguila kuenda ndomo a kuatisa afendeli vaye kosimbu. Nda wa yevelela Yehova, o pondola oku kolela okuti o ka amamako oku pokola kokuaye.

Nye o sukila oku linga oco amameko lesanju poku linga upange umue osimbu kua kuelele? O pondola oku likolisilako oku pamisa ukamba wove la Yehova kuenda oku lekisa ovituwa viwa. O pondolavo oku lilongisa oku kala ukuahenda, oku kala onalavayi, oku linga ukamba la vakuene, loku kala ukuacili kovaso a Yehova. Ovituwa viaco vi kuete esilivilo, momo vi nena esanju volohuela. (Efetikilo 24:16-21; Ruti 1:16, 17; 2:6, 7, 11; Olosapo 31:10-27) Sandiliya tete Usoma poku litumbika kupange woku kunda kuenda oku tẽlisa ovikele viove vekongelo. Ovina viaco, vi ka ku teyuila oku yuvula oku nõla onjila ka ya sungulukile. Manji Bill wa popia hati: “Anyamo nda kala okuti sia kuelele, a pita lonjanga! Momo nda pesila otembo yange kupange wa Yehova omo lioku kala Ukundi wotembo yosi.”

Onumbi ya Yehova yoku kuelela “lika vu Ñala” yi kuete esilivilo toke koloneke vilo. Nda tua ñolapo oku kuela omunu umue okuti Ukristão wocili, tu eca esivayo ku Yehova kuenda tu kuata esanju. Embimbiliya li popia ndoco: “Sivayi Yehova. Omunu o sumbila Yehova haeye o yolela calua ovihandeleko viaye, eye wa sumũlũha. Vonjo yaye mu li ovikuata lukuasi. Esunga liaye li enda ño-o hũ, ka li pui.” (Osamo 112:1, 3) Omo liaco, nõlapo oku pokola konumbi ya Yehova yoku kuelela “lika vu Ñala.”