1, 2. Ocitumasuku cipi catiamẽla koloneke via sulako okuti ca komohisa olondonge via Yesu, kuenda momo lie?

 VEPULUVI LIMUE, Yesu wa kala kumue lolondonge viaye ndeci: Petulu, Tiago, Yoano, kuenda Andereu. Ovio via komoha calua eci Yesu a vi sapuila catiamẽla kenyõleho lionembele. (Mar. 13:1-4) Kuenje, via pula ndoco: ‘Tu sapuileko, Eteke lipi ovina evi vi ka tẽlisiwa? Ondimbukiso yoku tukuluka kuove ye? Londimbukiso yesulilo lioluali ye?’ (Mat. 24:1-3) Yesu wa va sapuila eci catiamẽla kovina via laikele oku pita okuti, ka vi nena lika ovitangi komanu, pole, vi situlula ovina vi lekisa oloneke via sulako violuali lulo lua vialiwa la Satana. Cimue pokati kovina viaco Yesu a tukula, ca yokokisa olondonge viaye. Noke yoku sapuila olondonge ovina vimue ndeci, uyaki, onjala, kuenda oku tomba ovihandeleko, wa tukulavo ocina cimue ciwa ci panga onepa kondimbukiso yoloneke via sulako. Eye wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.”—Mat. 24:7-14.

² Olondonge via kuata esanju poku kundila kumue la Yesu Kristu olondaka viwa Viusoma. (Luka 8:1; 9:1, 2) Ovio via ivaluka olondaka Yesu a va sapuila hati: “Oku ungula kua lua, puãi olondingupange viñamiñami. . . . Pingi ku Ñala yoku ungula oco a tume olondingupange koku ungula kuaye.” (Luka 10:2) Olondonge nda via tẽla ndati oku ‘kundila voluali luosi’ loku eca “uvangi kolofeka viosi”? Pi nda kua tunda olondingupange viaco? Ovio, nda via kuata lika elomboloko liaco, nda osimbu via kala la Yesu via sokoluile ovina via laikele oku iya kovaso yoloneke! Olondonge ka via kuatele atatahãi poku ­limbuka oku tẽlisiwa kuolondaka tu tanga kelivulu lia Mateo 24:14.

3. Olondaka vielivulu lia Luka 21:34, vi kasi oku tẽlisiwa ndati koloneke vilo? Ovina vipi omunu lomunu a sukila oku kũlĩhĩsa?

³ Ocitumasuku ca Yesu ci kasi oku tẽlisiwa koloneke vietu.  Vamanji valua, va kasi oku kundila kumosi olondaka viwa Viusoma voluali luosi. (Isa. 60:22) Yesu wa lombolola okuti, koloneke via sulako, afendeli vamue va Yehova, va ka liyaka locitangi coku pitisa kovaso upange woku kunda. Momo va ka sakalala calua lovina violuali, kuenje, oku kunda olondaka viwa ku va lingila ‘ocilemo.’ (Tanga Luka 21:34.) Koloneke vilo, tua siata oku mola oku tẽlisiwa kuolondaka viaco. Vamue pokati kafendeli va Yehova, va pitisa lika kovaso ovina viomuenyo. Ocituwa caco tu ci limbukila poku nõla ovina va yongola oku linga ndeci: Upange woku sanda eteku, elilongiso lia velapo kosikola, oku sanda ovokuasi, otembo va pesila kombunje, kuenda kolomapalo. Omanu vakuavo va kava omo liasakalalo omuenyo. Omo liaco, o sukila oku lipula ndoco: ‘Nye ndi kasi oku linga? Ovina nda siata oku linga, vi lekisa hẽ okuti nda pitisa kovaso ocipango ca Yehova?’

4. (a) Ovina vipi Paulu a tukula vohutililo viatiamẽla Kakristão vo ko Filipoi, kuenda momo lie? (b) Nye tu konomuisa vocipama cilo, leci ci kuãimo? Ovina viaco vi tu kuatisa ndati?

⁴ Akristão va kala kocita catete, va enda oku likolisilako oku pitisa kovaso upange wa Yehova. Upostolo Paulu wa limbuka esilivilo lioku kongela volohutililo Akristão vo ko Filipoi, oco ‘va limbuke ovina vi kuete esilivilo lia velapo.’ (Tanga Va Filipoi 1:9-11.) Kuenje, Akristão valua va lekisa ‘utõi woku kunda ondaka ya Suku,’ ndeci upostolo Paulu a linga. (Va Fil. 1:12-14) Cimuamue haico ci kasi oku pita letu koloneke vilo okuti, vosi yetu tu vetiyiwa oku kunda Ondaka ya Suku. Ovina vi kasi oku lingiwa vocisoko ca Yehova koloneke vilo, vi tu kuatisa hẽ oku limbuka okuti upange woku kunda owo u kuete esilivilo lia velapo? Vi tu kuatisa! Vocipama cilo, tu konomuisa ndomo eliangiliyo Yehova a siata oku linga li kasi oku kuatisa koku tẽlisiwa kuolondaka vielivulu lia Mateo 24:14. Upange upi u kasi oku lingiwa locisoko ca Yehova, kuenda u tu vetiya ndati kumue lepata lietu? Vocipama ci kuãimo, tu ka konomuisa ovina vi pondola oku tu kuatisa oku pandikisa kupange wa Yehova, kuenda oku amamako oku kala vocisoko caye.

5, 6. (a) Momo lie Yehova a ecela ovinjonde viatiamẽla kocisoko caye kilu? (b) Ovina vipi Esekiele a mola vocinjonde?

⁵ Kuli ovina vialua Yehova a nõla okuti, ka via kongeliwile Vembimbiliya. Eye ka situluile ndomo owoño womunu u talavaya, ale ndomo oluali lu talavaya, ndaño okuti alomboluilo aco nda a tu komohisa! Pole, wa tu ĩha olonumbi vi tu kuatisa oku kuata elomboloko liocipango caye, kuenda oku pokola kokuaye. (2 Tim. 3:16, 17) Oku limbuka ndomo Yehova a siata oku tu lomboluila ovina viatiamẽla kocisoko caye cokilu, ci kuete esilivilo! Tu sanjuka calua poku tanga ovolandu a sonehiwa la Isaya, la Esekiele, la Daniele, kuenda Yoano, a lekisa ndomo Yehova a sokiya ovina kilu. (Isa. 6:1-4; Esek. 1:4-14, 22-24; Dan. 7:9-14; Esit. 4:1-11) Ci kasi ndu okuti, Yehova wopa ongumbo loku ecelela okuti, tu mola ovina vi kasi kilu. Momo lie Yehova a tu situluila ovina viaco?

⁶ Yehova wa siata oku tu ivaluisa oco tu limbuke okuti, tua tiamẽla kocisoko caye. Kuli ovina vikuavo vi tu kuatisa oku linga ocipango ca Yehova okuti, ka tu pondola oku vi mola. Esekiele vocinjonde a kuata, wa mõla ekãlu limue okuti li lomboloka ocisoko ca Yehova kilu. Ekãlu liaco, li pondola oku ñualela oku li yongola oku enda. (Esek. 1:15-21) Omo okuti ekãlu liaco li kuete alola, li pondola oku linga ungende unene. Vocinjonde caco, Esekiele wa molavo umue Endela vekãlu liaco poku popia hati:  “Nda mõla cimue ca soka ndosipi yi nina pamue ndondalu yo ñuala . . . Oco ca kala emolẽhẽlo liocisetahãi culamba wa Yehova.” (Esek. 1:25-28) Esekiele wa komoha calua poku mola ocinjonde caco! Eye wa mola Yehova wa kala oku songuila ocisoko caye lekuatiso liespiritu sandu liaye. Oku enda kuekãlu liaco li komohisa, ku lekisa ndomo ocisoko ca Yehova cokilu ci talavaya!

7. Ocinjonde Daniele a mola ci tu pamisa ndati?

⁷ Daniele wa molavo ovina vialua vi pamisa ekolelo lietu. Eye wa kuata esumũlũho lioku mola Yehova nda umue “Ukuasimbu” okuti, wa tumala kocalo cimue ca ñualiwa londalu. Ocalo caco ci kuete alola. (Dan. 7:9) Yehova wa lekisa ku Daniele oco a limbuke okuti, ocisoko Caye ci kasi oku amamako loku ­tẽlisa ocipango Caye. Daniele wa molavo ‘umue o kasi ndomõla womunu’ okuti, Yesu o kasi oku songuila ocisoko ca Yehova palo posi. Uviali wa Kristu wa lipua, ka u ka kala lika anyamo amue. Momo ‘uviali waye ka u pui, kuenda usoma waye ka u nyõliwa.’ (Dan. 7:13, 14) Omo liaco, tu vetiyiwa oku kolela ku Yehova, kuenda kovina a kasi oku tẽlisa. Eye wa eca ku Yesu “uviali ­lulamba ­kuenda usoma.” Omo okuti ­Yehova wa kolela Omõlaye, etu tu pondolavo oku kolela ku Yesu, momo usongui umue uwa.

8. Ovinjonde Yehova a situluila Esekiele la Daniele via va kuatisa ndati? Tu kuatisiwa ndati lovinjonde viaco?

⁸ Ovinjonde vi lekisa onepa yocisoko ca Yehova kilu vi tu vetiya ndati? Tu komoha calua poku mola ovina Yehova a siata oku linga, ndeci ca pita la Esekiele.  (Esek. 1:28) Oku sokolola ovina viatiamẽla kocisoko ca Yehova, ci tu vetiya oku pokola kokuaye, ndeci ca pita la Isaya. Momo eci a kuata epuluvi lioku sapuila omanu ovina Yehova a kasi oku linga, wa ci linga lutõi. (Tanga Isaya 6:5, 8.) Isaya wa kũlĩhĩle okuti, lekuatiso lia Yehova, o pondola oku yula ovitangi viosi a laikele oku liyaka lavio. Omo liaco, ocinjonde ci lekisa onepa yocisoko ca Yehova kilu, ci tu komohisa calua, kuenda ci tu vetiya oku linga upange waye. Ci tu vetiyavo oku limbuka okuti, tua tiamẽla kocisoko ca Yehova, kuenda tu kasi oku linga ocipango caye!

9, 10. Momo lie kua lingiwila esokiyo liokuti, ku kala ocisoko ca Yehova palo posi?

⁹ Yehova lekuatiso Liomõlaye, wa linga eliangiliyo liokuti, ovopange a lingiwa palo posi, a li kuata locisoko caye kilu. Momo lie kua lingiwila eliangiliyo oco ku tẽlisiwe olondaka vi sangiwa kelivulu lia Mateo 24:14? Tu konomuisi atosi atatu.

¹⁰ Liatete, Yesu wa fetika upange woku kunda kuenda wa sapuila olondonge viaye oco vi ‘kundile olondaka viwa kolonepa viosi violuali.’ (Ovil. 1:8) Liavali, kua lingiwa eliangiliyo liaco oco ku eciwe ovina vi pamisa ekolelo lia vana va linga upange waco. (Yoa. 21:15-17) Liatatu, aliangiliyo aco a siata oku kuatisa vana va kunda olondaka viwa okuti, va vumbila kumosi Yehova, oco va longisiwe ndomo va linga upange waco. (Va Hev. 10:24, 25) Oco ovimãho viaco vi tẽlisiwe, olondonge via Kristu vi sukila oku kuama olonumbi vimuamue.

11. Tu pondola ndati oku eca ekuatiso lietu kaliangiliyo a lingiwa vocisoko ca Yehova?

¹¹ Tu pondola ndati oku eca ekuatiso lietu kaliangiliyo a lingiwa vocisoko ca Yehova? Tu ci linga poku kolela ku vamanji vana Yehova kumue la Yesu va ĩha ocikele coku tu songuila kupange woku kunda. Koloneke vilo, kuli ovopange alua a sukila oku kapiwako la vamanji va kuete omoko yoku tu songuila. Ovina vipi ocisoko ca Yehova palo posi ca siata oku pitisa kovaso?

12, 13. Akulu vekongelo va siata oku tẽlisa ndati ovikele viavo? Momo lie upange wavo u ku vetiyila?

¹² Akulu vekongelo va loñoloha va sangiwa voluali luosi, va siata oku nõliwa oco va kuatise koku songuila upange woku kunda Usoma wa Suku volofeka va kasi. Poku nõla onjila va sukila oku kuama, va pokola kolonumbi Viembimbiliya okuti, vi kasi ‘ndovela yi tuila vonjila yavo,’ kuenda va likutilila ku Yehova oco a va songuile.—Osa. 119:105; Mat. 7:7, 8.

¹³ Koloneke vilo, akulu vekongelo va kasi oku songuila upange woku kunda, va litumbika “koku kunda ondaka” ya Suku, ndeci Akristão vo kocita catete va linga. (Ovil. 6:4) Ovo va kuete esanju lia piãla poku mola ndomo upange woku kunda u kasi oku amamako vofeka yavo, kuenda voluali luosi. (Ovil. 21:19, 20) Ovo, ka va tumbika ovihandeleko viavo, kuenda ka va lekisa ndomo ovina vi sukila oku lingiwa.  Pole, va kuama Ovisonehua, kuenda va songuiwa lespiritu sandu poku linga aliangiliyo a sukiliwa, oco a kuatise kupange woku kunda. (Tanga Ovilinga 15:28.) Poku ci linga, va siata oku lekisa ongangu yiwa ku vamanji va sangiwa vakongelo osi vofeka yavo.—Va Efe. 4:11, 12.

14, 15. (a) Aliangiliyo api a siata oku lingiwa vofeka yene oco a kuatise kupange woku kunda? (b) Nye wa siata oku yeva vutima omo lioku kuatisa kupange woku kunda Usoma?

¹⁴ Kuli vamanji valua va litumbika kupange woku pongiya ulandu walivulu, wolohongele viekongelo, kuenda wolohongele viofeka. Kulivo vamanji valua va lieca olumue kupange woku pongolola alivulu kueci ci soka 600 kalimi, oco omanu valua va lilongise ‘ovina vi komohisa via Suku,’ kelimi liavo. (Ovil. 2:7-11) Vamanji amalẽhe, va siata oku talavaya kupange woku panga alivulu lekuatiso liolomakina. Noke, alivulu aco a tumiwa kakongelo osi voluali, oku kongelamo ana a kasi ocipãla.

¹⁵ Kua siata oku lingiwa aliangiliyo alua a tu kuatisa oku kunda olondaka viwa vakongelo etu. Kuli vamanji valua va litumbika kupange ndeci: Oku tunga Olonjango Viusoma, Violohongele vinene, oku semulula olonjo via teyiwa lovilunga, ale oku kuatisa vana va lemehĩwa, oku sokiya olohongele vimbo levi viofeka, olosikola viupange Wakristão, kuenda ovopange akuavo a kasi oku lingiwa. Upange waco u kuete ocimãho cipi? U kuatisa koku kunda olondaka viwa, loku pamisa vana va linga upange waco, kuenda oku amamako lefendelo liocili. Omo liaco, ocisoko ca Yehova palo posi, ca siata oku pitisa kovaso ovina vi kuete esilivilo lia velapo!

16. Ovina vipi o sukila oku kũlĩhĩsa oco o vi kongele vefendelo liepata, ale velilongiso lio pokolika?

¹⁶ Tua siata hẽ oku sokiya otembo yoku sokolola upange u kasi oku lingiwa vocisoko ca Yehova? Vamanji vamue vefendelo liavo liepata, ale velilongiso lio pokolika, va siata oku kongelamo ovina va konomuisa viatiamẽla kocisoko ca Yehova, kuenje va sokolola ovina va lilongisa. Nda velilongiso liove wa kongelamo ovinjonde via eciwa ku Isaya, ku Esekiele, ku Daniele, kuenda ku Yoano, ci vokiya esanju liove. Elivulu Testemunhas de Jeová—Proclamadores do Reino de Deus, kuenda alivulu akuavo, ale Olovideo vina via pongoluiwa kelimi liove, vi ku kuatisa oku kũlĩha ciwa ocisoko ca Yehova.

17, 18. (a) Ovina tua konomuisa vocipama cilo via ku kuatisa ndati? (b) Apulilo api tu sukila oku konomuisa?

¹⁷ Oku sokolola ovina Yehova a siata oku linga vocisoko caye, ci tu nenela esanju. Ovina viaco vi komohisa, vi tu vetiya oku pitisa kovaso ovina vi kuete esilivilo lia velapo. Nda tua ci linga, ci tu kuatisa oku kuama ongangu ya Paulu wa soneha ndoco: “Omo [okuti] tu kasi lupange ulo lohenda ya Suku, . . . ka tu konyoha.” (2 Va Kor. 4:1) Eye wa vetiyavo akamba vaye kupange hati: ‘Ka tu ka kavi koku linga eci ciwa, momo kotembo yaco tu kongula, nda ka tua puile epandi.’—Va Gal. 6:9.

¹⁸ Kuli hẽ apongoloko amue ove ale epata liove u sukila oku linga oco u pitise kovaso ovina vi kuete esilivilo lia velapo? Tu pondola hẽ oku leluisa omuenyo wetu, ale oku tepulula ovina ka vi kuete esilivilo oco tu pitise kovaso upange woku kunda? Vocipama ci kuãimo, tu ka konomuisa ovina vitãlo vi ka tu kuatisa oku amamako oku lekisa ombili vocisoko ca Yehova.