Poku liyaka lovitangi vioku vela, tu pondola oku tambula elembeleko li tunda kepata lietu, kakamba, kuenda ku vamanji.

Olondaka vielembeleko vi eciwa lakamba vetu vi sokisiwa lowiki u tu sakula, kuenda vi tu pamisa. (Olosap. 16:24; 18:24; 25:11) Ndaño okuti Akristão vocili va kapako elembeleko va siata oku tambula, pole, va velisapo ovina vikuavo. Momo ‘va siata oku lembeleka vana va tala ohali, poku va pamisa lelembeleko li tunda ku Suku.’ (2 Va Kor. 1:4; Luka 6:31) Manji Antonio, o nyula akongelo kofeka yo Mesiku, wa lilongisa oku linga ovina viaco.

Eci a kuatiwa luvei wo kanser vosonde, wa sumuile calua. Pole, wa likandangiya oco a yuvule esumuo liaco. Wa cilinga ndati? Wa ci linga poku ivaluka loku imba ovisungo Viusoma, kuenda oku sokolola olondaka viaco. Eye, wa enda oku likutilila lolukandi loku tanga Embimbiliya, oco a kuate elembeleko.

Cilo, manji Antonio wa limbuka okuti ekuatiso a tambula, lia tunda ku vamanji. Eye wa popi hati: “Eci ame kumue lukãi wange tua limbuka okuti tua kuata esakalalo, tua pinga ku manji umue ukuepata lietu okuti ukulu wekongelo, oco eye oku tu lingilako ohutililo. Ohutililo yaye, ya tu kuatisa calua, kuenje, ka tua kuatele vali esakalalo. Tu eca olopandu kepata lietu, kuenda ku vamanji, momo tua tẽla oku yuvula ovisimĩlo ka via sungulukile.” Manji Antonio, wa eca olopandu omo liocisola akamba vaye va lekisa kokuaye!

Espiritu sandu li pondolavo oku tu kuatisa poku liyaka lovitangi. Upostolu Petulu wa popia hati: Espiritu sandu, ‘ombajaile’ yimue ya tunda ku Suku. (Ovil. 2:38) Espiritu sandu lia kuatisa Akristão olombuavekua va kala kocipito co Pendekoste ca lingiwa kunyamo wa 33 K.K. Ndaño okuti Petulu wa tiamisila olondaka viaco kolombuavekua, pole, tu pondolavo oku kuatisiwa lespiritu sandu. Omo okuti li pondala oku tu kuatisa, momo lie ka tu pingila ombanjaile yaco vohutililo?—Isa. 40:28-31.

Upostolo Paulu wa pandikisa kovitangi vialua okuti olonjanja vimue wa puluka oku pondiwa. (2 Va Kor. 1:8-10) Pole, ka kuatele usumba woku pondiwa. Eye wa tambula elembeleko momo wa kũlĩhĩle okuti, Suku o pondola oku u kuatisa. Omo liaco, wa soneha ndoco: “Suku, Isia ya Ñala yetu Yesu Kristu, a sivayiwe! Eye Isia yohenda, haeye Suku ukuakulembeleka pokati kovina viosi. [Eye] o tu lembeleka kohali yetu yosi.” (2 Va Kor. 1:3, 4) Paulu ka ecelele oku yapuisiwa lovitangi a liyaka lavio. Pole, ovitangi viaco vio kuatisa oku lekisa ohenda komanu, oco a lembeleke vana va sukila ekuatiso.

Manji Antonio, noke yoku kaya, wa tiukila kupange waye woku nyula akongelo. Ndaño okuti wa siata oku kapako vamanji, pole, eye kumue lukãi waye, va kasi oku likolisilako oku nyula vana va vela loku va pamisa. Onjanja yimue, eci manji Antonio a nyula manji umue wa kala oku vela calua, wa limbuka okuti, manji yaco ka kuatele onjongole yoku endaenda kolohongele. Kuenje, manji Antonio wa popia hati: “Ndaño okuti ka kuatele onjongole yoku endaenda kolohongele, pole, ka ci lomboloka okuti, ocisola a kuetele Yehova, kuenda vamanji ca tepuluka. Pole, uvei waco owo nenela esumuo loku sima okuti, ka kuete vali esilivilo.”

Eteke limue eci manji Antonio a kala kovitalukilo la vakuavo, omo okuti wa yonguile oku pamisa manji wa kala oku vela, osimbu ka va fetikile oku lia, wa pinga kokuaye oco a linge ohutililo. Ndaño manji yaco wa simĩle okuti ka pondola oku likutilila, pole, wa tava oku ci linga. Noke, manji Antonio wa popia hati: “Eye wa linga ohutililo yimue yiwa, kuenje wa kuata esanju. Noke, wa limbuka okuti, o pondola oku linga vali ovina vikuavo.”

Ocili okuti, vosi yetu tu kuete ovolandu a pondola oku tu kuatisa poku liyaka lovitangi via litepa. Pole, ndomo Paulu a ci popia, ovitangi tu liyaka lavio, vi tu kuatisa oku lembeleka vana va sukila ekuatiso. Omo liaco, tu amamiko oku kuama ongangu ya Yehova Suku yoku kuatisa vamanji vana va tala ohali, kuenda oku lembeleka omanu vakuavo.