“Citava hẽ Oku tu Upa Elitalatu?”

Noke yoku tunda keteke liavali liohongele yofeka, manji umue o tukuiwa hati, Josué o kasi ko Betele yo ko Mesiku, wa kala oku ñuala ñuala volupale luo Querétaro. Kuenje, ulume umue ukuakulinga ovongende o tukuiwa hati, Javier kumue lukãi waye Maru, va pinga ku Josué oco a vope elitalatu. Omo okuti manji Josué kumue la vamanji vakuavo va walele uwalo wa posoka, kuenda va kuata otuikanda tuohongele yofeka, olohueli viaco via va pulisa nda va kala oku tunda kocipito cimue cilikasi. Manji Josué, wa va sapuila hati, va tunda kohongele yofeka Yolombangi Via Yehova. Kuenje, va laleka olohueli viaco, oco Calumingu vi ende lavo kohongele yofeka.

Olohueli viaco via lombolola okuti, ka vi kuete uwalo wa posoka, kuenje, vi ka kuata osõi oku kala kohongele yofeka. Pole, manji Josué wa va sapuila onduko yaye, kuenda wa va ĩha etendelo liotelefone yo filiale kuna va kasi.

Noke yolosãi vikuãla, manji Josué wa komõha calua eci a yeva ulandu wa Javier. Eye kumue lukãi waye va endele kohongele yofeka kuenje, va pinga oco Olombangi Via Yehova vi ende Kolupale luo Mesiku kuna va kala. Noke Javier kumue lukãi waye Maru, va fetika oku lilongisa Embimbiliya loku endaenda kolohongele. Noke yolosãi ekũi, va linga akundi. Ndaño okuti veya oku ilukila volupale luo Toronto, kofeka yo Kanada, va kula kespiritu, kuenje, va papatisiwa.

Noke, manji Josué wa tambula ukanda wa manji Javier, u lombolola ovina vio vetiya oku lilongisa Embimbiliya. Eye wa popia hati: “Osimbu ka tua endele kohongele yofeka, nda sapela lukãi wange ndomo tu sukila oku kapako olonumbi via Suku. Eci tua mola ndomo wa wali ciwa, tua sima okuti, wa kali oku tunda kohongele yimue yilikasi. Eci tua endele kohongele yofeka, tua komõha calua ocisola vamanji va lekisa kokuetu poku tu ĩha olomangu, loku tu kuatisa oku kuama oku tangiwa Kuembimbiliya. Tua komõhavo ovituwa viomanu vosi va kala kohongele yaco. Lomue wa tu vanja lãvi omo liuwalo wetu woku linga ungende.”

Manji Josué wa limbuka okuti, olondaka via Soma Salomone via tẽlisiwa kokuaye! Salomone wa soneha ndoco: “Omẽle imba ombuto yove, oñolosi eka ka li ka lembuke; momo kua kũlĩhĩle nda ombuto ye nda ombuto ye yima ciwa, nda yeyi nda yoyo, ale nda viosi vi eca ciwa.” (Uku. 11:6) Ove hẽ, o pondola oku imba ombuto poku sandiliya apuluvi osi oku sapela la vakuene catiamẽla kohongele yofeka yi laika oku iya ale kohundo yimue yi ka lingiwa vekongelo? Yehova o pondola oku ku songuila komanu vana va kasi lonjala kuenda enyona liespiritu ndeci a kuatisa manji Javier kumue lukãi waye Maru.​—Isa. 55:1.

[Elitalatu kemẽla 32]

Oku upisa kepĩli toke kondio: Manji Alejandro Voeguelin, Maru Pineda, Alejandro Pineda, Javier Pineda, kuenda manji Josué Ramírez ko filiale yo ko Mesiku