Ove Hẽ Wa Iñila Ale Vepuyuko Lia Suku?

“Ondaka ya Suku yi kasi lomuenyo, haiyo yi kasi loku talavaya.”—VA HEV. 4:12.

1. Koloneke vilo, nye ci tu kuatisa oku iñila vepuyuko lia Suku, pole momo lie ca lelukila oku ci popia okuti oku ci linga ca tĩla?

 VOCIPAMA ca pita, tua lilongisa okuti tu pondola lika oku iñila vepuyuko lia Suku nda tua pokola kokuaye kuenda kocipango caye. Ocili okuti, oku ci popia ca leluka pole, oku ci linga ca tĩla. Eci tu lilongisa okuti Yehova o nyale ovina vimue tu sole, pamue kefetikilo ka ci leluka oku pokola kokuaye. Eci ci lomboloka okuti, tu sukila oku lilongisa ‘oku pokola.’ (Tia. 3:17) Vocipama cilo tu konomuisa ovina vimue vi tu ĩha epuluvi lioku lekisa epokolo ku Suku lutima wosi eci tu setekiwa.

2, 3. Nye tu sukila oku linga oco tu kale ovina via velapo kovaso a Yehova?

² Eci o lilongisa Vembimbiliya okuti, o sukila oku linga apongoloko komuenyo wove, wa siata hẽ oku lekisa epokolo? Ocipango ca Suku, oku “ongolola ovina via velapo vi tunda kolofeka viosi.” (Hag. 2:7) Valua pokati ketu eci tua fetika oku lilongisa Embimbiliya, ka tua kaile ovina via velapo. Pole, ocisola tu kuetele Suku kuenda Omõlaye wa soliwa, ca tu vetiya oku linga apongoloko kovisimĩlo kuenda kovituwa vietu oco tu U sanjuise. Noke yolohutililo lalikolisilo alua, Yehova wa tu sumũlũisa kuenje tua papatisiwa.—Tanga Va Kolosai 1:9, 10.

 ³ Omo okuti ka tua lipuile, noke yepapatiso tu sukila oku amamako oku linga apongoloko komuenyo. Osimbu ka tua lipuile, uyaki wetu woku linga eci ciwa, wa amamako. Pole, Yehova wa likuminya oku tu sumũlũisa nda tua likolisilako oku kala ovina via velapo kovaso Aye.

Ceci tu Sukila Elungulo

4. Volonepa vipi vitatu tu pondola oku tambula elungulo Liovisonehua?

⁴ Osimbu ka tua lingile apongoloko, tu sukila oku kũlĩha ovituwa tu sesamẽla oku pongolola. Ohundo yimue tu yeva Vonjango Yusoma ale ocipama cimue ciyilila valivulu etu, vi pondola oku situlula ovituwa vietu vĩvi. Handi vali, nda ka tua kuatele ciwa etosi lia lomboluiwa vohundo ale ka tua kapeleko elungulo limue lia sonehiwa valivulu, Yehova o tuma manji umue oco a situlule ovisimĩlo vietu.—Tanga Va Galatia 6:1.

5. Kolonepa vipi tu pondola oku sumua poku tambula elungulo? Momo lie akulu vekongelo va sukilila oku amamako oku tu kuatisa?

⁵ Ka ca lelukile oku tava kelungulo liomunu ka li puile, ndaño okuti lia eciwa lolondunge kuenda locisola. Pole, kelivulu lia va Galatia 6:1, Yehova wa handeleka akulu vekongelo oco va tu ‘tiule lutima womboka.’ Nda tua tava kekuatiso liavo, tu soliwa calua la Suku. Poku likutilila, tua siata oku sapuila Yehova hati, ka tua lipuile. Pole, eci umue a tu sapuila okuti tua lueya, tu lisandela esunga, loku sepula ekandu liaco, ale tu pisa ovisimĩlo viomunu wa tu lungula, kuenda ndomo elungulo liaco lia eciwa. (2 Olos. 5:11) Handi vali, nda elungulo liaco lia veta calua kokuetu ndeci, kovilinga viepata, kuwalo wetu, kuenda kocituwa cetu coku wala, konjelo yetimba, ale kovitalukilo vina tu sole calua, okuti Yehova o vi nyãle, tu sumua loku popia ovina vĩvi! Pole, noke yoku tulumũha tu limbuka okuti elungulo tua tambula li kuete esilivilo.

6. Ndamupi ondaka ya Suku “yi limbuka ovisimilo lovipango viutima”?

⁶ Ocinimbu Cembimbiliya kua kunamẽla osapi yocipama cilo, ci tu ivaluisa okuti ondaka ya Suku ‘yi kuete unene.’ Eci ci lomboloka okuti Embimbiliya li kuatisa omanu oku pongolola omuenyo wavo. Olio li tu kuatisa oku linga apongoloko a sukiliwa osimbu ka tua papatisiwile. Paulu vukanda a sonehela va Heveru, wa lekisa okuti, ondaka ya Suku “yi toma toke yi tepa omuenyo locilelembia, kuenda asokoluilo lupuma, haiyo yi limbuka ovisimilo lovipango viutima.” (Va Hev. 4:12) Vocinimbu eci, ondaka ocilelembia yi lomboloka eci tua tuwa kilu, ndomo tu molẽha kovaso omanu. Ondaka omuenyo, yi lomboloka eci tua tuwa vutima. Eci ci lomboloka okuti, eci tu kuata elomboloko liovina Suku a tu yonguila, ovilinga vietu ovio vi situlula ndomo tua tuwa vutima. Anga hẽ, ndomo omanu va tu lete kilu, leci tua tuwa vutima, pali etepiso? (Tanga Mateo 23:27, 28.) Sokolola eci o sukila oku linga kovitangi vimue tu konomuisa cilo.

Amamako Oku Endela Vocisoko ca Yehova

7, 8. (a) Nye ca vetiya Akristão vamue va Yudea oku amamako oku pokola koviholo Viocihandeleko ca Mose? (b) Momo lie tu popela okuti Akristão vaco va kala oku sinila ocipango ca Yehova?

⁷ Valua pokati ketu tua kũlĩha ciwa olondaka vi sangiwa kelivulu Liolosapo 4:18 vi popia hati: “Onjila yolondingesunga ya soka ndocinyi congula, camamako kokutua toke ca linga utanya.” Eci ci lomboloka okuti vokuenda kuotembo tu kuata elomboloko liokaliye liovina Yehova a tu yonguila kuenda oku linga ovina viu sanjuisa.

⁸ Ndomo tua ci lilongisa vocipama ca pita, noke yoku fa kua Yesu ca tĩlile calua  Kakristão vamue va Yudea oku siapo Ocihandeleko ca Mose. (Ovil. 21:20) Ndaño Paulu wa lomboluile okuti Akristão ka va kasi vali vemẽhi Liocihandeleko ca Mose, vamue ka va tavele kondaka yaco. (Va Kol. 2:13-15) Ovo va simĩle okuti nda va amamako oku pokola koviholo vimue Viocihandeleko caco, ka va lambalaliwa lomanu. Pole, Paulu wa sapuilile Akristão vaco okuti nda ka va pokuile kocipango ca Suku, ka va iñila vepuyuko Liaye. a (Va Hev. 4:1, 2, 6; tanga va Heveru 4:11.) Oco va taviwe la Yehova, va sukilile oku limbuka okuti, cilo Yehova o yongola okuti omanu vaye vo fendela lonjila yimue yikuavo.

9. Ocituwa cipi tu sukila oku kuata eci ku lingiwa apongoloko kelomboloko lietu Liovisonehua?

⁹ Koloneke vilo kua siata oku lingiwa apongoloko kelomboloko lietu lialongiso amue Embimbiliya. Eci ka ci tu komõhisa, pole, ci vokiya ekolelo lietu kocisoko ‘cukuenje wa kolelua haeye wa lunguka.’ Eci Osungu Yolombangi Via Yehova yi kũlĩhĩsa alongiso amue Embimbiliya loku limbuka okuti ci sukila oku linga apongoloko amue, ovo ka va kuata ohele yoku ci linga. Ndaño vamue va popia ovina vĩvi omo liapongoloko aco, ukuenje wa lunguka wa velisapo oku tẽlisa ocipango ca Suku. Ndamupi ove wa siata oku liyeva eci ku lingiwa apongoloko amue kelomboloko lietu Liovisonehua?—Tanga Luka 5:39.

10, 11. Nye vamanji vamue va linga eci va kuata elomboloko liokuti va sukila oku kuama olonjila viokaliye vioku kunda? Nye tu lilongisa kulandu owu?

¹⁰ Tu konomuisi ulandu ukuavo. Kocita 19 kuenda 20, vamanji vamue okuti va loñolohele calua koku linga olohundo viowiñi, va simĩle okuti omo lioku linga olohundo viaco vakongelo, va kasi oku tẽlisa upange woku kunda. Ovo va solaile calua oku vanguila kovaso owiñi kuenda oku pandiyiwa lomanu. Noke kua eciwa elomboluilo liokuti omanu va Suku va sukila oku litumbika kolonepa vialua viupange woku kunda, oku kongelamo oku kundila konjo lanjo. Vamanji vana va loñolohele koku linga olohundo viowiñi, ka va tavele kondaka yaco. Ovo va molẽhele ndu okuti va loñoloha kespiritu, haivo va litumbika ku Ñala. Pole, eci ku eya elomboloko liocipango ca Suku catiamẽla kupange woku kunda, ovisimĩlo kuenda ovilinga viavo, via tukuluka. Yehova wa tendele ndati ovilinga viavo? Eye ka va sumũlũisile. Kuenje va siapo ocisoko Caye.—Mat. 10:1-6; Ovil. 5:42; 20:20.

¹¹ Eci ka ci lomboloka okuti, ku vana va amamako lekolelo ca lelukile oku linga upange woku kunda. Valua va kuatelevo ocitangi caco, ca piãla enene kefetikilo. Pole, va lekisa epokolo. Vokuenda kuotembo va yula ocitangi caco, kuenje Yehova wa va sumũlũisa. Ndamupi ove wa siata oku liyeva eci ukuenje wa kolelua a eca onumbi yoku litumbika kolonepa vimue viupange woku kunda vocikanjo cove? Wa siata oku pokola konumbi yaco yokaliye?

Ceci Umue tu Sole a Siapo Oku Vumba Yehova

12, 13. (a) Cipi ocipango ca Yehova catiamẽla komanu va tundisiwa vekongelo? (b) Ocitangi cipi olonjali Akristão va pondola oku liyaka cayo?

¹² Tua kũlĩha okuti oco tu sanjuise Yehova, tu sukila oku pokola konumbi yoku liyelisa kovina viosi. (Tanga Tito 2:14.) Pole, kuli apuluvi amue okuti ka ca lelukile oku pokola konumbi yaco. Sokolola ndeci okuti, manji umue lukãi waye, omõlavo ulume wa siapo oku vumba Yehova. Omo lioku velisapo oku “sanjukila asanju akandu, hao asanju a pua pua” okuti ukamba waye la Yehova kuenda lolonjali viaye ci sule, o tundisiwa vekongelo.—Va Hev. 11:25.

 ¹³ Ocitangi caco ci sumuisa calua olonjali! Ovo va kũlĩha onumbi Yembimbiliya yatiamẽla komunu wa tundisiwa vekongelo yi popia hati: “Nda kuli umue ukuẽle ketavo wa pia kukahonga, pamue kocipululu, pamue koku fendela oviteka pamue koku imbula, pamue koku kolua, pamue kundiandia, ndaño oku lia laye koka li laye.” (1 Va Kor. 5:11, 13) Ovo va kũlĩhavo okuti, vocinimbu eci vondaka yoku popia hati, “umue,” mua kongelavo omunu ukuepata ndaño ka kasi vonjo. Pole, ovo va sole calua omõlavo! Ocikembe va kuatele omõlavo, pamue ci va vetiya oku sokolola ndoco: ‘Tu pondola oku kuatisa ndati omõla wetu oku tiuka ku Yehova nda ka tua kuatele ukamba laye? Nda tua liwekapo oku sapela laye, ka tu u kuatisa oku tiuka ku Yehova.’ b

14, 15. Ocina cipi olonjali Akristão vi sukila oku ivaluka poku nolapo oku sapela lomõlavo wa tundisiwa vekongelo?

¹⁴ Ovitima vietu vi sumua calua poku mola ohali yolonjali viaco. Omo okuti omõlavo wa kuata elianjo lioku li nõlela onjila a yongola, wa kuama omuenyo ũvi kuenje wa litepa lolonjali viaye kuenda la vamanji. Ndaño olonjali vi seteka oku kuatisa omõlavo, pole, ka viu tateka oku linga eci a yongola. Eli olio esunga lieci va yevela esumuo lialua!

¹⁵ Nye olonjali viaco vi sukila oku linga? Anga hẽ va pokola konumbi ya Yehova? Ale va kuata ovisimĩlo viokuti olonjanja vimue va sukila oku sapela lomõlavo wa tundisiwa vekongelo kuenda oku u vilikiya “kovitangi vimue viepata”? Poku kuama onjila va nõlapo, va sukila oku ivaluka ndomo Yehova a tenda ovilinga viavo. Onjongole ya Yehova, oku yelisa ekongelo loku kuatisa omanu va lueya oku limbuka ovilinga viavo vĩvi. Ndamupi olonjali Akristão vi lekisa okuti vi kuete ovisimĩlo ndevi via Yehova?

16, 17. Nye tu lilongisa kulandu wa Arone?

¹⁶ Arone, manji a Mose, wa liyaka locitangi comãla vaye vavali valume. Sokolola ndomo a liyeva eci omãla vaye valume Nadava la Avihu va lumbila Yehova ondalu ka ya sungulukile kuenje Wa va ponda. Elinga liaco, lia imula ukamba wosi nda va kuata lolonjali viavo. Pole, kua kala vali ocina cikuavo. Yehova wa sapuila Arone lomãla vaye vakuavo valume hati: “Ko ka futululi kovitue viene ndaño oku kesula uwalo wene [omo liesumuo], sanga vu fa, kuenje onyeño [ya Yehova] yi wengukila omanu vosi.” (Ovis. 10:1-6) Onumbi eyi ya lomboloka ciwa. Ocisola tu kuetele Yehova ci sukila oku pamisiwa calua okuti cina tu kuetele vangandietu vakuesino ci sule.

 ¹⁷ Koloneke vilo, Yehova ka yambula vocipikipiki vana va lueya ovihandeleko viaye. Eye omo liocisola, eca kokuavo epuluvi lioku likekembela ovilinga viavo vĩvi. Pole, nye Yehova a yeva vutima nda olonjali ka vi pokola konumbi Yaye yoku tepa ukamba lomõla wavo wa tundisiwa vekongelo?

18, 19. Asumũlũho api a pondola oku iya kepata li pokola kolonumbi via Yehova viatiamẽla komanu va tundisiwa vekongelo?

¹⁸ Omanu valua va tundisiwile vekongelo okuti cilo va tiuka, va popia hati, va ci linga omo okuti akamba kuenda epata liavo va pokola kolonumbi via Yehova. Akulu vamue vekongelo eci va tambula ufeko umue wa tundisiwile vekongelo, va soneha hati, ufeko waco wa pongolola ekalo liomuenyo waye omo okuti va manjaye alume “va kapeleko onumbi yoku yuvula oku kuata ukamba lomunu wa tundisiwa vekongelo.” Ufeko waco wa lombolola okuti, “epokolo lia vangandiaye kolonumbi Viovisonehua, lio vetiya oku tiuka vekongelo.”

¹⁹ Ocisimĩlo cipi tu sukila oku kuata? Tu sukila oku tamãlala lovisimĩlo viutima wetu vioku sinila olonumbi Viovisonehua. Tu sukila oku kolela okuti, onjila ya Suku yoku tetulula ovitangi vietu, oyo lika ya velapo.

“Ondaka ya Suku yi Kasi Lomuenyo”

20. Volonepa vipi vivali tu pondola oku kuata elomboloko lielivulu lia va Heveru 4:12? (Tala pombuelo yemẽla.)

²⁰ Eci Paulu a soneha okuti, “ondaka ya Suku yi kasi lomuenyo,” eye ka popele catiamẽla Kembimbiliya. c Ulandu waco u lekisa okuti eye wa tukula olohuminyo via Suku. Paulu wa lekisa okuti, Suku ka lingi ohuminyo yimue kuenje ivalako oku yi tẽlisa. Vonduko yuprofeto Isaya Yehova wa popia hati: “Ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlisa, leci nda yi tumĩla.” (Isa. 55:11) Omo liaco, nda Suku ka kasi oku tẽlisa lonjanga olohuminyo viaye ndeci tu yongola, tu sukila oku kuata epandi. Yehova o kasi ‘oku linga upange’ oco a tẽlise ocipango caye.—Yoa. 5:17.

21. Elivulu lia va Heveru 4:12, li lembeleka ndati akulu vendamba vana va kasi oku amamako oku vumba Yehova?

²¹ Omanu valua vakuekolelo va tiamẽla ‘kowiñi wakahandangala’ va kasi oku fendela Yehova vokuenda kuanyamo alua. (Esit. 7:9) Valua ka va lavokaile okuti va ka kukila vali voluali lulo. Pole, ka va puile elavoko. (Osa. 92:14) Ovo va kũlĩha okuti, ohuminyo yondaka ya Suku yi kasi lomuenyo, kuenda Yehova o ka tẽlisa olohuminyo viaye. Omo okuti Suku wa velisapo ocipango caye, o sanjuka calua poku limbuka ndomo tua kapako ocipango caco. Vokuenda kueteke lilo liepanduvali liepuyuko, lacimue ci tateka Yehova oku tẽlisa ocipango caye. Eye wa kũlĩha okuti omanu vaye va ka amamako oku pokola kocipango caye. Nye ci popiwa kokuove? Ove hẽ wa iñila ale vepuyuko lia Suku?

[Atosi pombuelo yamẽla]

O ci Ivaluka?

• Koloneke vilo, nye tu sukila oku linga oco tu iñile vepuyuko lia Suku?

• Elitokeko lipi li sangiwa pokati kocipango ca Suku lonjongole yetu yoku tava kalungulo Ovisonehua?

• Kolonepa vipi ca tĩla oku pokola kolonumbi Viovisonehua, pole momo lie tu sukilila oku pokola?

• Volonepa vipi vivali tu pondola oku kuata elomboloko lielivulu lia va Heveru 4:12?

[Apulilo Elilongiso]

[Elitalatu kemẽla 31]

Olonjali vi sumua calua!