Ove o Kuete Esunga Lioku Sanjuka

OKU upisa kovina vitito ndeci o selula, toke koviengele vinene violombungululu, ovina viosi vi sangiwa voluali vio ongotiyiwa ciwa. Eci ceca uvangi wokuti Ululiki ‘heyeko Suku yombuanja.’ (1 Va Kor. 14:33) Eliangiliyo lia Suku liatiamẽla kefendelo liaye, li komõhisavo calua. Kũlĩhĩsa eci Yehova a linga. Eye wa kongela vocisoko cimosi oviluvo viaye vio kilu viespiritu levi vio posi, okuti vi kuata elianjo kuenda vi tiamẽla kefendelo liocili. Eci ci komõhisa calua!

Kotembo ya va Isareli, o Yerusalãi kuna kua tungiwile onembele ya Yehova haiko kua kala osoma ya nõliwa laye, oyo ya kala ocindekaise cocisoko ca Suku palo posi. Umue u Isareli wa kala kumandekua ko Bavulono, wa lekisa esumuo liaye liatiamẽla kolupale luaco lu kola eci a popia hati: “Elimi liange li lamelele kuliakusu nda siu ku ivaluka, nda si velisapo Yerusalãi, okuti esanju liange lia velapo li sule.”—Osa. 137:6.

Anga hẽ eci oco ocisimĩlo o kuete catiamẽla kocisoko ca Suku koloneke vilo? Anga hẽ wa velisapo ocisoko caco okuti ovina vikuavo ci sule? Omãla vove va kũlĩha ciwa ulandu wocisoko ca Suku kuenda va kuete elomboloko ndomo ci talavaya palo posi? Anga hẽ va kũlĩha eci ci lomboloka oku kala Olombangi Via Yehova, kuenda esilivilo lioku tiamẽla kongongela ya vamanji koluali luosi? (1 Pet. 2:17) Momo lie Kefendelo liene Liepata koñolosi, ka vu kuamẽla olonumbi vi kuãimo, oco epata li kũlĩhe kuenda li sanjukile ocisoko ca Yehova?

Lombolola “Oloneke Viosiahulu”

Unyamo lunyamo, apata a va Isareli va enda oku liongolola oco va linge ocipito co Paskoa. Eci kua tumbikiwa ocipito caco, Mose wa sapuila omanu hati: “Eci omõla a pula hati, Eci ca lomboloka ndati? ove unjali u lomboluila huti, Yehova wa tupa Vegito, vonjo yupika, leka lia pama.” (Etu. 13:14) Ulandu wovina Yehova a lingila va Isareli, ka ca tavele oku wivala. Omo liaco, olonjali vialua via va Isareli via pokola kocihandeleko ca Mose. Noke yoku pita ovitumbulukila vialua, umue u Isareli wa likutilila hati: “A Suku, tua yeva lovatui etu. Olosekulu vietu via tu sapuila upange wa linga koloneke viavo, koloneke vionahulu.”—Osa. 44:1.

Koloneke vilo, umalẽhe umue poku yeva ulandu Wolombangi Via Yehova wa pita vokuenda kueci ci soka 100 kanyamo, kokuaye ci kala “ndoloneke viosiahulu.” O pondola oku kuatisa ndati omãla vove oku kũlĩha ovolandu aco? Olonjali vimue poku kuatisa omãla vavo, via siata oku kuama alivulu ndeci, Testemunhas de Jeová —Proclamadores do Reino de Deus, Anuário das Testemunhas de Jeová, ovolandu a vamanji a sandekiwa volorevista, lasapulo akuavo a sangiwa valivulu, oku kongelamo olo DVD viokaliye, vi lekisa upange womanu va Suku koloneke vilo. Handi vali, olovideo vina vi lekisa ndomo vamanji va lambalaliwa ko União Sovietika, kuenda kuviali wo lo Nazista ko Alemanya, vi pondola oku longisa apata oku kolela ku Yehova eci ku iya ovitangi. Omo liaco, kongela ovipama viaco Vefendelo liene Liepata koñolosi. Oku ci linga ci pamisa ekolelo liomãla vove okuti eci va liyaka lovitangi va amamako lepandi.

Oku lombolola ulandu umue komãla ci va kuatisa oku kũlĩha ovina vialua. Omo liaco, velilongiso liene kongelamo omãla. Citava okuti o pinga komõla wove oco a lekise vomapa ofeka yimue a yongola, loku sandiliya ulandu wa  Vamanji vo vofeka yaco, kuenda oku lomboluila epata eci a lilongisa kulandu waco. Vekongelo liene pamue muli vamanji valua va kasi ale oku vumba Suku lekolelo vokuenda kuanyamo alua, okuti va pondola oku kongeliwa vefendelo liene liepata. Citava okuti omõlove ufeko, o va pulisa oco va lombolole ulandu womuenyo wavo. Ale omõlove ulume citava okuti o taya oviluvialuvia vimue vi lekisa ovolandu a pita vesapulo Liolombangi Via Yehova, ndeci oku tungiwa kuofiliale yimue, ohongele yimue yolofeka, ale oviluvialuvia vi lekisa ndomo upange woku kundila konjo lanjo wa enda oku lingiwa lo logramafone.

Limbuka Ndomo Ovimatamata Vietimba vi “Lingila Pamosi Ovopange”

Upostolo Paulu wa sokisa ekongelo Liakristão ndeci ‘etimba liosi lia tokekisua loku sokekiwa lasokoluilo alio, [okuti] ovimatamata vialio vi lingila pamosi ovopange locisola, oco kokualio ku tunde eci ci kulisa etimba loku li amisako locisola.’ (Va Efe. 4:16) Oku lilongisa ndomo etimba liomunu li talavaya, ci vokiya oku eca olopandu Kululiki wetu loku lekisa esumbilo kokuaye. Handi vali, eci tu konomuisa ndomo ocisoko ca Yehova ci kasi oku talavaya koluali luosi, tu komõha “olondunge vi likasi kasi via Suku.”—Va Efe. 3:10.

Yehova o lekisa ndomo ocisoko caye kilu lo posi ci talavaya. Eye o tu lomboluila okuti tete wa eca esituluilo ku Yesu Kristu una wa “tuma ungelo waye oku vi situluila kukuenje waye Yoano . . . [una] wa vi imbila uvangi.” (Esit. 1:1, 2) Nda Suku o tu situluila ovina viatiamẽla kocisoko caye, anga hẽ ka yongola okuti tu kũlĩha ndomo ocisoko caco “ci lingila pamosi upange” palo posi?

Nda u kasi oku lavoka epasu lia mitavaso o nyula akongelo, momo lie ku lomboluila kepata liove ovikele kuenda asumũlũho olomitavaso viaco? Ndamupi va siata oku kuatisa omunu lomunu pokati ketu? Citava okuti vu kũlĩhĩsavo ovina vimue ndeci: Momo lie ci kuetele esilivilo oku eca o relatoriu yupange woku kunda? Pi kua siata oku tunda olombongo vi kuatisa ocisoko ca Yehova? Osungu Yakulu Yolombangi Via Yehova ya sokiyiwa ndati, kuenda ndamupi ya siata oku pongiya okulia kuespiritu?

Eci tu kuata elomboloko liatiamẽla komanu va Yehova ndomo va sokiyiwa ciwa, tu kuatisiwa volonepa vitatu ndeci: Tu eca olopandu ku vana va kasi oku likolisilako oku tu kuatisa. (1 Va Tes. 5:12, 13) Tu eca ekuatiso kaliangiliyo osi a lingiwa locisoko ca Suku. (Ovil. 16:4, 5) Ekolelo lietu ku vana va tu songuila, li pamisiwa, eci tu limbuka ndomo asokiyo va linga, a li kuata lolonumbi Viovisonehua.—Va Hev. 13:7.

‘Piti Piti Volombonge Vialio’

“Ñuali ñuali Siono, li tokeki. Tendi olombonge vialio. Kũlĩhisi ciwa ovimbaka vialio. Piti piti vovikolo vialio okuti vu lombolola kocitumbulukila ci kuamamo.” (Osa. 48:12, 13) Vovinimbu evi, ukualosamo wa vetiya va Isareli oku kũlĩhĩsa lutate o Yerusalãi. Ove hẽ o pondola oku sokolola esanju apata a va Isareli va kuataile poku enda kovipito via lingawaile unyamo lunyamo volupale luaco lu kola loku mola eposo lionembele? Ovo va vetiyiwile oku vi “lombolola kocitumbulukila ci kuamamo.”

Sokolola nasoma wo ko Seva, una okuti tete wa kuatele atatahãi eci vo sapuila eposo liuviali kuenda olondunge via piãla via Salomone. Nye co vetiya oku tava okuti ovina a yevele via kala muẽle viocili? Eye wa popia hati: “Ame sia kolelele olondaka toke ndeya, kuenje ovaso ange a ci limuila.” (2 Asa. 9:6) Ocili okuti ovina tu mola ‘lovaso etu’ vi pondola oku tu vetiya calua.

O pondola oku kuatisa ndati omãla vove oku mola ‘lovaso avo muẽle’ eposo liocisoko ca Yehova? Nda o kasi ocipepi lofiliale Yolombangi Via Yehova, linga esokiyo lioku nyulako. Mandy la Bethany va kulila pocitumãlo cimue ci kasi ocinãla ci soka 1.500 kolokilometulu lo Betele yofeka yavo. Pole olonjali viavo, via enda oku linga esokiyo lioku nyula o Betele, ca piãla enene eci omãla vavo va kala oku kula.  Omãla vaco va popia vati: “Osimbu ka tua nyulile o Betele, tua simĩle okuti ku sangiwa lika akulu vendamba. Pole, tua mola amalẽhe va likolisilako oku lingila upange Yehova haivo va sanjukila upange waco! Tua limbuka okuti ocisoko ca Yehova, ci sangiwa kolonepa viosi violuali kuenda onjanja lonjanja tua nyula o Betele tua pamisiwa kespiritu.” Oku mola ndomo ocisoko ca Suku ci talavaya, ca vetiya Mandy la Bethany oku iñila kupange wakundi votembo yosi, kuenje va lalekiwa oku talavaya ndoloñuatisi vio ko Betele vokuenda kuotembo yimue.

Kuli vali onjila yikuavo yoku “mola” eposo liocisoko ca Yehova okuti ko Isareli yosimbu ka ca kaileko. Koloneke vilo, omanu va Suku va siata oku tambula olo video kuenda olo DVD vialua, ndeci: “Testemunhas de Jeová—Organizadas Para Pregar as Boas Novas, Nossa Associação Inteira de Irmãos, Até aos Confins da Terra, kuenda Unidos pelo Ensino Divino, vi lekisa ndomo ocisoko ca Suku ci talavaya palo posi. Eci ove kumue lepata liove vu mola upange wo ko Betele, loku mola vana va lieca koku kuatisa vamanji, olomisionaliu, kuenda vamanji vana va pongiya loku sokiya olohongele viofeka, utima wove u ka vetiyiwa oku eca olopandu kupange wa vamanji koluali luosi.

Akongelo osi omanu va Suku, a kuete onepa ya velapo koku kuatisa kupange woku kunda olondaka viwa kuenda oku kuatisa Akristão povitumãlo va sangiwa. Omo liaco, sandiliya otembo kumue lepata liove oco wivaluki ‘vamanji koluali luosi.’ Poku ci linga, vu ka pamisa ‘ekolelo’ liomãla vene loku limbuka okuti, vu kuete esunga lioku kuata esanju.—1 Pet. 5:9.

 [Okakasia Lelitalatu kemẽla 18]

Atosi a Sukiliwa Oku Lilongisa Atiamẽla Kocisoko ca Suku

Tu kuete aliangiliyo alua oku kuatisa omanu vosi oku lilongisa ulandu watiamẽla kocisoko ca Yehova kuenda ndomo ci talavaya. Apulilo a kuãimo a ku kuatisa oku fetika oku ci linga:

☞ Upange wolomitavaso vi nyula akongelo koloneke vilo, wa fetika ndati?—Testemunhas de Jeová—Proclamadores do Reino de Deus, kemẽla 222-227.

☞ Ocina cipi ca kuata esilivilo Kohongele yinene ya lingiwa kunyamo wo 1941 “Keteke Liomãla”?—Testemunhas de Jeová—Proclamadores do Reino de Deus, kemẽla 86-88.

☞ Osungu Yakulu Volombangi Via Yehova yi nõla ndati onjila yosi yi kuamiwa?—‘Dê Testemunho Cabal’ Sobre o Reino de Deus, kemẽla 108-114.