Kolela Yehova Osimbu Esulilo Li Kasi Ocipepi

“Koleli Yehova oloneke viosi.”—ISA. 26:4.

1. Etepiso lipi li kasi pokati kafendeli va Suku kuenda omanu vo voluali?

 TU KASI voluali lumue okuti omanu ka va kũlĩhĩle u va sukila oku kolela ale koku va sesamẽla oku kolela. Momo citava okuti va kembiwile, ale va sumuisiwile olonjanja vialua. Pole eci ca litepa lafendeli va Yehova! Omo lioku songuiwa lolondunge vio kilu, va kũlĩha okuti ka va sukila oku kolela koluali lulo lo ‘kolombiali’ vialuo. (Osa. 146:3) Ovo va tumbika omuenyo wavo kuenda elavoko liavo ku Yehova, momo va kũlĩha okuti va soliwe laye kuenda olonjanja viosi o tẽlisa Ondaka yaye.—Va Rom. 3:4; 8:38, 39.

2. Yehosua wa imba ndati uvangi wocili Condaka ya Suku?

² Yehosua wa imba uvangi wocili Condaka ya Suku. Osimbu a kala oku panda kolofa, wa sapuila va manjaye va Isareli hati: “Ene vosi wa kũlĩhi vovitima viene lovolonulo viene, okuti polondaka viosi viwa Yehova Suku yene o popeleli, layimue ya kambapo. Viosi muẽle vio suisiluipo.”—Yeh. 23:14.

3. Nye onduko ya Suku yi situlula catiamẽla kokuaye?

³ Yehova ka tẽlisile lika olohuminyo viaye omo lioku sola afendeli vaye, pole wa ci lingila omo lionduko yaye. (Etu. 3:14; 1 Sam. 12: 22) Catiamẽla konduko ya Suku, olondaka viatete vi sangiwa Vembimbiliya li tukuiwa hati, The Emphasized Bible lia sonehiwa la J. B. Rotherham, vi popia ndoco: “Onduko yaco yi lomboloka ohuminyo yocili; unene wa Suku woku tẽlisa cosi a yongola ndaño ku iya ovitangi . . . onduko yaco ocisila, . . . esituluilo, onjivaluko, uvangi. . . ” Omo lionduko yaye, Suku o ka amamako oku kala ukuacili, kuenda lalimue eteke a ka kutisiwa osõi.

4. (a) Elivulu lia Isaya 26:4 li tu vetiya oku linga nye? (b) Nye tu konomuisa vocipama cilo?

⁴ Lipula ndoco: “Anga hẽ nda kũlĩha ciwa Yehova okuti ndi kolela kokuaye? Si kuete usumba leci ciya kovaso, omo lioku kolela okuti Suku o kuete unene?’ Elivulu lia Isaya 26:4, li popia ndoco: “Koleli Yehova oloneke viosi momo Yehova Suku eye Ewe li tumãla hũ.” Koloneke vilo Suku ka litengi vovitangi viomanu ndeci a lingaile kosimbu. Pole, omo okuti eye “Ewe li tumãla hũ,” tu sukila oku kolela kokuaye “oloneke viosi.” Oco hẽ, ndamupi Suku yetu wa koleliwa a siata oku kuatisa afendeli vaye koloneke vilo? Tu kũlĩhĩsi olonepa vitatu: Eye o tu pamisa eci tu sandiliya ekuatiso kokuaye lioku tamãlala layonjo, leci tu sumua omo okuti omanu ka va lekisa onjongole kupange wetu woku kunda, ale lelambalalo, kuenda o tu ĩha ongusu yoku pandikisa lasakalalo omuenyo. Osimbu tu konomuisa ovina evi, sokolola ndomo o pondola oku pamisa ekolelo liove ku Yehova.

Eci o Setekiwa Oku Linga Eci Cĩvi Kolela Suku

5. Catiamẽla kekolelo lietu ku Suku, oseteko yipi tu pondola oku pita layo?

⁵ Etu ci tava okuti tu kolela kohuminyo ya Yehova yatiamẽla Koluali luokaliye kuenda kepinduko. Pole, ca litepa loku kolela kolonumbi viaye vioku yuvula ovituwa vĩvi loku tava okuti oku vi pokola oco lika ca sunguluka haico ci nena esanju. Soma Salomone wa soneha hati: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.” (Olosap. 3:5, 6) Kũlĩhĩsa ondaka ya popia hati, ‘kolongenda’ vietu, kuenda “olonjila.” Ekalo liosi liomuenyo wetu, li sukila oku eca uvangi wekolelo tu kuetele Suku. Eci tu liyaka layonjo, ndamupi tu lekisa okuti tua kolela Suku?

6. Tu pamisa ndati ohuminyo yetu yoku yuvula ovisimĩlo vĩvi?

⁶ Oku yuvula ovina vĩvi, ku fetikila vutima. (Tanga Va Roma 8:5; Va Efeso 2:3.) O pondola ndati oku pamisa onjongole yove yoku yuvula ovina vĩvi vutima? Kũlĩhĩsa ovina evi vitãlo: (1) Sandiliya ekuatiso lia Suku vohutililo. (Mat. 6:9, 13) (2) Sokolola ovolandu Embimbiliya atiamẽla komanu vana va silepo oku yevelela ondaka ya Yehova kuenda vana va pokuile kokuaye. Noke kũlĩhĩsa onima va kuata. a (1 Va Kor. 10:8-11) (3) Sokolola  esumuo liyilila koku linga ekandu kuenda ndomo elinga liaco li sumuisa vakuene. (4) Sokolola esumuo Suku a yeva eci umue pokati kafendeli vaye a linga ekandu. (Tanga Osamo 78:40, 41.) (5) Ivaluka esanju Yehova a yeva poku mola umue ufendeli waye o yuvula ovina vĩvi loku linga eci ciwa, ci kale powiñi ale pokolika. (Osa. 15:1, 2; Olosap. 27:11) O pondolavo oku lekisa ekolelo liove ku Yehova.

Eci o Liyaka Lowesi Womanu Kuenda Elambalalo Kolela Suku

7. Oloseteko vipi Yeremiya a liyaka lavio, kuenda weya oku liyeva ndati vokuenda kuotembo?

⁷ Vamanji valua va kasi oku kundila olondaka viwa kovikanjo vina via tĩla. Uprofeto Yeremiya wa liyakavo locitangi caco eci a kundila ko Yuda vokuenda kuoloneke via sulako viuviali wavo wovitangi. Ekolelo liaye ku Yehova lia enda oku setekiwa eteke leteke omo lioku kunda esapulo lieyambulo Suku a laikele oku nena. Ndaño muẽle usonehi waye Baruki, weyavo oku lisiõsiõla omo liekavo. (Yer. 45:2, 3) Anga hẽ Yeremiya weya oku sumua? Ocili okuti otembo yimue wa sumuile. Eye wa popia hati: “Eteke nda citiwa li siñaliwe! Eteke mãi a nyita ka li ka sivayiwe!” Noke wamisako hati: “Nye nda tundila vimo oku mõla upange lupongo, okuti oloneke viange vi pita ño losõi?”—Yer. 20:14, 15, 18.

8, 9. Ndomo ca lekisiwa kelivulu lia Yeremiya 17:7, 8, kuenda Osamo 1:1-3, nye tu sukila oku linga oco tu amameko oku ima apako awa?

⁸ Yeremiya ka liwekelepo oku vumba Yehova. Eye wa amamako oku kolela kokuaye. Uprofeto omo liekolelo wa mola oku tẽlisiwa kuolondaka via Yehova vina eye muẽle a soneha kelivulu lia Yeremiya 17:7, 8, vi popia ndoco: “Omunu o kolela Yehova, kuenda Yehova o linga elavoko liaye, eye wa sumũlũha. Momo wa linga nduti wa kũlĩwa konele yovava, kuenje u yandisa olombombo viawo kolui. Ko kuata ohele nda ku iya owuya, omo emẽla liawo haimo li talalela. Unyamo wocitenya ko u lingi cimue, omo ko liweka oku ima epako.”

⁹ Yeremiya wa kala “nduti wa kũlĩwa konele yovava” ale vocumbo ca tapelua, momo lalimue eteke a ‘liwekelepo oku ima epako.’ Eye ka ecelele oku yapuisiwa la vakuakupembula. Pole, wa amamako oku kolela lutima wosi ku Yehova, Ono ‘yovava’ omuenyo kuenda oku kapako olondaka viosi O sapuila. (Tanga Osamo 1:1-3; Yer. 20:9.) Ocili okuti Yeremiya wa tu sila ongangu yiwa, capiãla enene ku vamanji va kasi oku vumba Suku kovikanjo vina via tĩla! Nda ove o kasi oku liyakavo locitangi caco, amamako oku kolela Yehova, una wa likuminya oku ku ĩha epandi osimbu eca kokuaye “ocilumba cesivayo haico epako liovimela via tava konduko yaye.”—Va Hev. 13:15.

10. Asumũlũho api tu kuete, kuenda nye tu sukila oku lipula?

¹⁰ Oco tu pandikise lovitangi vio koloneke vilo via sulako, Yehova o tu kuatisa laliangiliyo alua ovina viespiritu. Pokati kovina viaco, pa sangiwa Ondaka Yaye yina ya pongoluiwa valimi alua. Eye wa siata oku tu ĩha okulia kualua kuespiritu lekuatiso liocisoko ‘cukuenje wa kolelua haeye wa lunguka.’ Handi vali, wa siatavo oku tu ĩha ekuatiso lia vamanji kolohongele vekongelo kuenda kolohongele vinene. Ove hẽ, wa siata oku upa esilivilo kaliangiliyo aco? Omanu vana va ci linga, ‘va ka imba ovisungo omo ovitima viavo via sanjuka.’ Pole, vana va likala oku yevelela ondaka ya Suku, ‘va ka lila omo ovitima viavo via sumua, kuenda omo ovitima viavo via teka, va ka liyula.’—Isa. 65:13, 14.

Eci o Liyaka Lasakalalo Kolela Suku

11, 12. Omo liovitangi vi kasi voluali, olondunge vipi tu sukila oku kuata?

¹¹ Ndomo ovitumasuku via ci popele, cilo omanu va kasi oku liyaka lovitangi vialua vi sokisiwa letande. (Mat. 24:6-8; Esit. 12:12) Eci ku iya etande, omanu va siata oku tilila  kolomunda, kilu liolonjo, ale kolonumbuko. Cimuamue haico okuti, osimbu ovitangi violuali lulo vi amamako oku livokiya, omanu valua va sandiliya ocivundilo kovokuasi, kopulitika, vovisoko viatavo, kuenda kukũlĩhĩso wolonoño. Ocili okuti, ovina evi ka vi eci ekuatiso lia kolapo. (Yer. 17:5, 6) Pole, afendeli va Yehova va kuete ocivundilo ca koka okuti, “Ewe li tumãla hũ.” (Isa. 26:4) Ukualosamo wa popia hati: “[Yehova] eye, lika . . . ewe liange, eye eyovo liange, haeye ombonge yange.” (Tanga Osamo 62:6-9.) Ndamupi Ewe liaco li pondola oku kala ocivundilo cetu?

¹² Tu kakatela ku Yehova poku yevelela Ondaka yaye, yina ya litepa lolondunge viomanu. (Osa. 73:23, 24) Omanu vana va yapuisiwa lolondunge violuali va popia hati: ‘Nda o kasi komuenyo liako, momo omuenyo umosi lika.’ ‘Litumbika kupange wa kemãla.’ ‘Sandiliya olombongo.’ ‘Landa cosi o yongola.’ ‘Linga ovongende; sandiliya cosi ci sanjuisa omuenyo.’ Pole, olondunge via Suku vi lungula ndoco: “Ava va sakalala lovina violuali va linge ndava ka va kuete cimue laluo. Momo, oluali ndomo lu kasi cilo, lu kasi [oku pongoloka].” (1 Va Kor. 7:31) Yesu wa tu vetiyavo oku pitisa kovaso Usoma wa Suku olonjanja viosi kuenda oku ‘lisiliyila ukuasi kilu’ kuna kua koka.—Mat. 6:19, 20.

13. Lelungulo li sangiwa kelivulu lia 1 Yoano 2:15-17, nye tu sukila oku lipula?

¹³ Anga hẽ ocituwa cove ‘loluali’ kuenda “ovina vi kasi voluali,” ceca uvangi wekolelo o kuetele Suku? (1 Yoa. 2:15-17) Wa velisapo hẽ ukuasi wespiritu kuenda asumũlũho oku linga upange wa Yehova okuti ovina violuali ci sule? (Va Fil. 3:8) O kasi hẽ oku likolisilako oku kuata ‘iso li yela’? (Mat. 6:22) Suku ka yongola okuti ove o kamba olondunge capiãla enene nda o kuete ocikele coku tekula epata. (1 Tim. 5:8) Pole, eye o kevelela okuti afendeli vaye va kolela kokuaye kuenda va yuvula oluali lulo lua Satana.—Va Hev. 13:5.

14-16. Omanu vamue va siata oku kuatisiwa ndati omo lioku amamako oku kuata “iso li yela” loku pitisa kovaso Usoma?

¹⁴ Kũlĩhĩsa ulandu wa Richard la Ruth olonjali vimue vi kuete omãla vatatu. Richard wa popia hati: “Utima wange wa enda oku ndi sapuila okuti, ndi kuete epondolo lioku talavaya calua kupange wa Yehova. Nda kuata omuenyo uwa, pole, nda limbuka okuti sia kaile oku eca ku Suku ovina via velapo. Noke yoku likutilila catiamẽla kocitangi caco kumue la Ruth, loku kũlĩhĩsa ovina viosi via kongelelemo, tua nõlapo okuti, ndi pinga ku cime cange oco ndi talavaye lika oloneke vikuãla vosemana, ndaño okuti vofeka mua kala ocitangi cuhukũi. Epingilo liange lia taviwa kuenje vokuenda kuosãi yimosi nda fetika oku talavaya lesokiyo liokaliye.” Cilo nye Richard a yevite vutima waye?

¹⁵ Eye wa popia hati: “Kofeto yange kua tepuluiwa 20 koloporcentu, pole, vokuenda kunyamo ndi kuete 50 koloneke vioku kala lepata liange kuenda oku pindisa omãla. Otembo yange yupange woku kunda, lalilongiso Embimbiliya, via livokiya, kuenda ndi kuete ocikele coku songuila ekongelo. Handi vali, omo okuti ndi kuete otembo yoku tata  omãla, Ruth olonjanja vimue wa siata oku talavaya ndukundi wasokamo. Nda otembo yecelela, ndi yongola oku amamako lesokiyo liaco.”

¹⁶ Roy kuenda Petina, vana okuti handi va kasi lomõlavo ufeko konjo, va nõlapo oku talavaya oloneke vitito kupange woku sanda eteku oco va litumbike kupange wotembo yosi. Roy, wa popia hati: “Vokuenda kuosemana, ndi talavaya lika oloneke vitatu, kuenda Petina o talavaya lika oloneke vivali. Tua ilukila vonjo yimue yitito ya leluka oku yi tata. Osimbu ka tua citile omõletu ulume kuenda ukãi, tua talavaya kupange wakundi votembo yosi kuenda lalimue eteke tua silepo onjongole yaco. Eci omãla vetu va kula, tua litumbika vali kupange waco. Ka kuli olombongo vi sokisiwa lesumũlũho tua siata oku tambula.”

Ecelela Okuti “Ombembua ya Suku” yi Lava Utima Wove

17. Omo lomue wa kũlĩha eci ciya hẽla, ndamupi Ovisonehua vi pondola oku ku lembeleka?

¹⁷ Pokati ketu, lomue wa kũlĩha eci ciya hẽla, momo “cosi ciya ño ci veta ño” komanu vosi. (Uku. 9:11) Pole ohele yovina viya hẽla ka citava okuti yi nyola ombembua yetu yetaili ndeci ca siata oku pita lomanu vana ka va kuete ukamba la Suku. (Mat. 6:34) Upostolo Paulu wa soneha hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene lovisimilo viene vu Kristu Yesu.”—Va Fil. 4:6, 7. 

18, 19. Volonepa vipi Suku a tu lembeleka? Tukula ocindekaise cimue.

¹⁸ Vamanji valua va kasi oku liyaka lovitangi, va siata oku kuata utima wa tula kuenda ombembua yi tunda ku Yehova. Manji umue ukãi wa popia hati: “Ndotolo wa enda oku ndi kisika oku tambula osonde. Ondaka yaye yatete yoku ndi lama yeyi: ‘Uveke we u kasi vutima wove okuti ku yongola oku tambula osonde?’ Nda enda oku likutilila ku Yehova kuenje ndi yeva ombembua yaye vutima. Kuenje ca ndi pamisa. Ndaño ndahonguele omo lioku kambela osonde vetimba, nda lombolola esunga Liovisonehua liatiamẽla kekolelo liange.”

¹⁹ Suku olonjanja vimue, o tu kuatisa poku lembelekiwa la vamanji ale poku tu ĩha okulia kuespiritu votembo ya tukuiwa. Ove pamue wa yevele ale manji umue wa popia hati: “Ocipama eci oco nda sukilile. Ci kasi ndu okuti ame va ci ndi sonehela!” Ocili okuti, ndaño tu liyaka lovitangi, Yehova o ka lekisa ocisola caye kokuetu nda tu amamako oku u kolela. Etu “tulomeme” viaye, kuenda wa tu ĩha onduko yaye.—Osa. 100:3; Yoa. 10:16; Ovil. 15:14, 17.

20. Momo lie afendeli va Yehova va kolelapo osimbu oluali lua Satana lu panda kesulilo?

²⁰ Vokuenda ‘kueteke lionyeño ya Yehova’ lina li kasi ocipepi, ovina viosi vi molẽha okuti via koleliwa voluali lulo lua Satana, vi ka nyõliwa. Ulu, opalata, kuenda ovina vikuavo via velapo, ka vi ka popela omunu. (Sof. 1:18; Olosap. 11:4) “Ewe li tumãla hũ,” olio lika li ka tu popela. (Isa. 26:4) Omo liaco, tu amamiko oku lekisa ekolelo lietu ku Yehova poku endela volonjila viaye viesunga, loku kunda esapulo Liusoma ndaño omanu ka va tava ale tu lambalaliwa. Tu eci asakalalo etu kokuaye. Nda tua ci linga, tu ka “kala ciwa, utima u tula, usumba wevĩho mbu.”—Olosap. 1:33.

[Atosi pombuelo yamẽla]

O Tẽla Oku Lombolola?

Tu pondola ndati oku kolela Suku

• eci tu yonjila oku linga eci cĩvi?

• poku liyaka locitangi comanu ka va tava kesapulo lietu ale lelambalalo?

• poku liyaka lasakalalo omuenyo?

[Apulilo Elilongiso]

[Elitalatu kemẽla 13]

Oku kakatela kolonumbi via Suku, ci nena esanju

[Elitalatu kemẽla 15]

“Yehova Suku eye Ewe li tumãla hũ”