1. Elavoko lipi Yehova a tu ĩha?

 YEHOVA wa tu ĩha elavoko limue li komõhisa liomuenyo ko pui. Vamue va kuete elavoko lioku kala komuenyo kilu, ndoviluvo ka vi fi. (1 Va Kor. 15:50, 53) Pole, omanu valua va kuete elavoko lioku kala komuenyo otembo ka yi pui palo posi, luhayele wa lipua kuenda lesanju. (Esit. 21:3, 4) Ci kaile okuti elavoko lietu lioku kala komuenyo kilu, ale palo posi, olio li kuete esilivilo lialua kokuetu.

2. Pi kua kunamẽla elavoko lietu, kuenda momo lie tu ci popela?

² Ondaka “elavoko” ndomo ya tukuiwa Vembimbiliya, yi pondola oku lomboloka ‘ovina viwa vi lavokaiwa, vi ka pita kovaso yoloneke.’ Tu pondola oku kolela okuti, elavoko lietu lio kovaso yoloneke li ka tẽlisiwa muẽle, momo li tunda ku Yehova. (Va Rom. 15:13) Tua kũlĩha eci eye a likuminya kuenda tua kũlĩhavo okuti, Yehova otembo yosi o tẽlisa olohuminyo viaye. (Ate. 23:19) Tua kolela okuti Yehova o kuete onjongole kuenda unene woku tẽlisa ovina viosi a popia okuti, o ka vi linga. Elavoko lietu ka li tundi kovisimĩlo vietu muẽle, ale kovina tu yongola okuti ovio vi ka kalako; olio lia kunamẽla kuvangi tua kũlĩha okuti wocili.

3. Nye tu konomuisa vocipama cilo? (Olosamo 27:14)

³ Isietu wo kilu o tu sole kuenda o yongola okuti, tu kolela kokuaye. (Tanga Olosamo 27:14.) Nda elavoko tu kuetele Yehova lia pama, tu ka tẽla oku pandikisa kuenda kovaso yoloneke, tu ka lekisa utõi lesanju kovitangi viosi tu ka liyaka lavio. Tu kũlĩhĩsi ndomo elavoko lietu li tu teyuila. Omo liaco, tete tu konomuisa ndomo elavoko lietu li sokisiwa lonjundo  kuenda locikoko. Noke tu kũlĩhĩsavo ndomo tu pamisa elavoko lietu.

4. Elavoko li sokisiwa ndati lonjundo? (Va Heveru 6:19)

⁴ Upostolo Paulu vukanda a sonehela va Heveru, wa sokisa elavoko lietu lonjundo. (Tanga Va Heveru 6:19.) Omo okuti Paulu olonjanja vialua wa enda oku linga ovongende vokalunga, wa kũlĩhĩle okuti onjundo ya enda oku kuatisa koku teyuila onaviyu oco ka yi ka yapukile kuiñi. Onjanja yimue eci a kala oku endela vonaviyu yimue, kua molẽha ehunguhungu limue linene. Vokuenda kuehunguhungu liaco, eye wa mola vakuanayu oku imba onjundo vovava, oco va teyuile onaviyu okuti ka yi li tusula kovawe. (Ovil. 27:29, 39-41) Ndeci ci linga onjundo yi kuatisa onaviyo, elavoko lietu li pamisa ukamba wetu la Yehova okuti, ka tu yapuisiwa poku liyaka lovitangi vi sokisiwa lehunguhungu linene. Elavoko lietu li tu kavuluisa eci tu pita lovitangi, momo tua kolela okuti, ndopo tu ka kuata ekalo liwa. Ivaluka elungulo lia Yesu liokuti, tua laikele oku lambalaliwa. (Yoa. 15:20) Pole, eci tu sokolola kolohuminyo via Yehova vio kovaso yoloneke, ci tu kuatisa oku amamako oku u vumba.

5. Elavoko lia kuatisa ndati Yesu eci a kala oku panda kolofa?

⁵ Kũlĩhĩsa ndomo elavoko lia kuatisa Yesu oku amamako oku lekisa ekolelo ndaño wa kũlĩhĩle okuti, wa laikele oku pondiwa lonjila yimue yungangala. Keteke lio Pendekoste kunyamo 33 K.K., upostolo Petulu wa tukula ocitumasuku celivulu Liolosamo lia lombolola ndomo oku tula utima kuenda ekolelo via kuatisa Yesu, poku popia hati: “Ame ndi ka tunga loku kolela kokuove; momo ove ku ka ndi sia Vonjembo kuenda ku ka ecelela okuti ukuenje wove ukuekolelo o futa. . . . O ka ndi yukisa lesanju lialua kovaso yove.” (Ovil. 2:25-28; Osa. 16:8-11) Ndaño Yesu wa kũlĩhĩle okuti wa ponduile oku fa, eye wa kuatele ekolelo liokuti Suku wa laikele oku u pindula, loku kuata esanju lioku kala vali la Isiaye wo kilu.—Va Hev. 12:2, 3.

6. Nye manji umue a popia catiamẽla kelavoko?

⁶ Elavoko lietu lia siata oku kuatisa vamanji valua oku pandikisa. Kũlĩhĩsa ulandu wa manji umue ukuekolelo o tukuiwa Leonard Chinn, wa kala kofeka yo Inglaterra. Vokuenda Kuyaki Watete wa Pita Voluali, eye wa kapiwile vokayike omo lioku likala oku panga onepa kusualali. Vokuenda kuolosãi vivali eye wa kapiwa vohondo yimue lika liaye, noke wa kisikiwa oku linga upange umue wa tĩla calua. Eye wa soneha ndoco: “Ulandu wange wa ñuatisa oku limbuka okuti, tu sukila elavoko oco tu tẽle oku pandikisa. Tu kuete ongangu ya Yesu, yovapostolo, yovaprofeto kuenda tu kuete olohuminyo vi sanjuisa vi kasi Vembimbiliya. Ovina viosi evi, vi tu ĩha elavoko liocili kuenda vi tu pamisa oco tu pandikise kovitangi.” Elavoko lia kala ndonjundo ku manji Leonard kuenje li pondola oku kalavo ndonjundo kokuetu.

7. Ovitangi vi pamisa ndati elavoko lietu? (Va Roma 5:3-5; Tiago 1:12)

⁷ Eci tu pandikisa kovitangi loku mola ndomo Yehova a tu kuatisa, tu limbuka okuti tua taviwa laye kuenje eci ci pamisa ekolelo lietu. (Tanga Va Roma 5:3-5; Tiago 1:12.) Elavoko lietu, cilo lia pama vali calua okuti, eci tua tava kolondaka viwa ci sule. Satana o yongola okuti tu yuliwa lovitangi, pole lekuatiso lia Yehova tu tẽla oku pandikisa.

8. Elavoko li sokisiwa ndati locikoko? (1 Va Tesalonike 5:8)

⁸ Embimbiliya li sokisavo elavoko lietu  locikoko. (Tanga 1 Va Tesalonike 5:8.) Esualali li wala ocikoko oco li teyuile utue waye okuti, ka lemẽhiwa lunyãli waye. Kuyaki wetu tu linga la Satana, tu sukila oku teyuila ovisimĩlo vietu. Eye o kuama olonjila vialua vioku seteka oku yapuisa ovisimĩlo vietu. Ndeci ocikoko ci teyuila utue wesualali, elavoko lietu li teyuilavo ovisimĩlo vietu oco tu amameko lekolelo ku Yehova.

9. Nye ci pondola oku pita lomanu nda ka va kuete elavoko?

⁹ Elavoko lietu lioku kuata omuenyo ko pui, li ka tu kuatisa oku nõla lolondunge onjila tu kuama. Pole, nda elavoko lietu lia hongua kuenda tu ecelela oku yuliwa lovisimĩlo vietu muẽle, tu pondola oku ivalako elavoko lietu liomuenyo ko pui. Kũlĩhĩsa ulandu wa pita Lakristão vamue vo ko Korindo yosimbu. Ovo va pumba ekolelo liavo kohuminyo ya velapo ya Suku okuti, lielavoko liepinduko. (1 Va Kor. 15:12) Paulu wa soneha okuti, omanu vana ka va tava kepinduko, va kasi lika komuenyo oco va tẽlise olonjongole viavo muẽle. (1 Va Kor. 15:32) Koloneke vilo, valua ka va kuete elavoko kolohuminyo via Suku, va sanjukila lika oku linga ovina via cilo. Pole, etu tua litepa omo okuti tua kolela kohuminyo ya Suku yo kovaso yoloneke. Elavoko lietu li kasi ndocikoko ci teyuila ovisimĩlo vietu kuenda li tu kuatisa oku yuvula oku li sokolola lika etu muẽle okuti, nda ca nyõla ukamba wetu la Yehova.—1 Va Kor. 15:33, 34.

10. Elavoko li tu teyuila ndati kovisimĩlo ka via sungulukile?

¹⁰ Ocikoko cetu celavoko ci pondolavo oku tu teyuila kovisimĩlo ka via sungulukile viokuti, lalimue eteke tu ka sanjuisa Yehova. Ndeci, vamue va pondola oku kuata ovisimĩlo viokuti: ‘Ame lalimue eteke ndi ka kala pokati ka vana va ka kala otembo ka yi pui. Ame simunuko uwa. Lalimue eteke ndi ka tẽla oku linga eci Suku a yongola okuti oco ndi linga.’ Ivaluka okuti, ekamba liesanda lia Yovi o tukuiwa Elifasi, wa lekisa ovisimĩlo vimuamue poku sapela la Yovi. Elifasi wa popia hati: ‘Helie pokati komanu okuti, wa yela kovaso a Suku”? Handi vali, eye wa popia eci catiamẽla ku Suku hati: “Tala! Eye ka kolelele olosandu viaye, kuenda ndaño muẽle ovailu, ka a yelele kovaso aye.” (Yovi 15:14, 15) Owu wa kala uhembi umue unene! Ivaluka okuti, Satana eye o yongola okuti ove o kuata ovisimĩlo viaco. Eye wa kũlĩha okuti nda ove wamamako oku kuata ovisimĩlo viaco, o fetika oku ivalako elavoko liove. Pole, eci o sukila oku linga, oku yuvula ovohembi aco kuenje tiamisila utima kolohuminyo via Yehova. Kolela okuti, Yehova o yongola okuti o kala otembo ka yi pui kuenda eye o ka ku kuatisa oco o mole oku tẽlisiwa kuohuminyo yaco.—1 Tim. 2:3, 4.

11. Momo lie tu sukilila oku kala vakuepandi osimbu tu talamẽla oku tẽlisiwa kuelavoko lietu?

¹¹ Ocili okuti, ka ca lelukile oku amamako oku pamisa elavoko lietu. Pamue ka tu lekisa epandi osimbu tu kevelela oco Suku a tẽlise olohuminyo viaye. Pole, omo okuti Yehova o kasi komuenyo otembo yosi, onjila ndomo a tenda otembo, ya litepa leyi yetu. (2 Pet. 3:8, 9) Eye o ka tẽlisa ocipango caye ndomo co sungulukila, pole, ka ci lingi vepuluvi lina tu yongola. Nye ci tu kuatisa oku amamako oku pamisa elavoko lietu osimbu tu talamẽla lepandi oco Suku a tẽlise olohuminyo viaye?—Tia. 5:7, 8.

12. Ndomo ca lekisiwa ku Va Heveru 11:1, 6, elavoko li kuete elitokeko lipi lekolelo?

¹² Tu pamisa elavoko lietu nda tu amamako oku kuata ukamba la Yehova, momo eye o ka tẽlisa elavoko lietu. Embimbiliya li lekisa ciwa elitokeko li kasi pokati kelavoko lekolelo liokuti,  Yehova o kasiko muẽle kuenda “eca onima kuava vo sanda lutima wosi.” (Tanga Va Heveru 11:1, 6.) Nda tu tava lutima wosi okuti Yehova o kasiko muẽle, tu ka kolela vali calua kokuaye loku tava okuti eye o ka tẽlisa olohuminyo viaye viosi. Tu kũlĩhĩsa olonjila vimue vi tu kuatisa oku pamisa ukamba wetu la Yehova, oco elavoko lietu liamameko oku pama.

13. Tu kuata ndati ukamba la Suku?

¹³ Likutilila ku Yehova kuenda tanga Ondaka yaye. Ndaño ka tu tẽla oku mola Yehova, tu pondola oku kuata ukamba laye. Tu vangula laye pocakati cohutililo, loku kolela okuti eye o tu yeva. (Yer. 29:11, 12) Tu pondola oku yevelela Suku poku tanga Ondaka yaye kuenda oku sokolola ovina tua tanga. Osimbu tu tanga ndomo Yehova kosimbu a tata vana vo kolelele, elavoko lietu li amamako oku pama. Ovina viosi vi sangiwa Vondaka ya Suku, “via sonehiwila oku tu longisa okuti, omo liepandi lietu kuenda elembeleko li tunda Kovisonehua, tu kuata elavoko.”—Va Rom. 15:4.

14. Momo lie tu sukilila oku sokolola kovina Yehova a siata oku lingila vakuetu?

¹⁴ Sokolola ndomo Yehova a siata oku tẽlisa olohuminyo viaye. Kũlĩhĩsa eci Eye a lingila Avirahama la Sara. Ovo va kukile ale okuti, ka va ponduile oku kuata vali omãla. Pole, Suku wa va likuminyile okuti va laikele oku kuata omõla umue. (Efet. 18:10) Nye Avirahama a linga? Embimbiliya li popia hati: “Omo liekolelo, wa lavokaile oku kala isia yolofeka vialua.” (Va Rom. 4:18) Ndaño okuti Avirahama ka kũlĩhĩle ndomo olohuminyo via Yehova Suku via laikele oku tẽlisiwa, pole, wa kolelele okuti wa ponduile oku tẽlisa ohuminyo Yaye. Ulume waco ukuekolelo, ka sumuisiwile. (Va Rom. 4:19-21) Ovolandu aco a tu longisa okuti, tu pondola oku kolela okuti Yehova olonjanja viosi o tẽlisa olohuminyo  viaye, ndaño kokuetu ci molẽha ndu okuti ka ci tẽlisiwa.

15. Momo lie tu sukilila oku sokolola kovina Suku a siata oku tu lingila?

¹⁵ Sokolola kovina Suku a siata oku ku lingila. Sokolola ndomo wa kuatisiwa ale poku tẽlisiwa kuolohuminyo vi sangiwa Vondaka ya Suku. Ndeci, Yesu wa likuminyile okuti Isiaye, wa laikele oku ku ĩha ovina viosi o sukila eteke leteke. (Mat. 6:32, 33) Yesu wa likuminyilevo okuti, Yehova wa laikele oku ku ĩha espiritu sandu eci u pinga. (Luka 11:13) Yehova o kasi oku tẽlisa olohuminyo viaco. Citava okuti o sokololavo olohuminyo vikuavo eye a siata oku ku tẽlisila oco vi ku kuatise. Ndeci, eye wa likuminya oku ku ecela, oku ku lembeleka kuenda oku ku tekula konepa yespiritu. (Mat. 6:14; 24:45; 2 Va Kor. 1:3) Eci o sokolola kovina Suku a ku lingila ale, o pamisa elavoko liove lieci a ka ku lingila kovaso yoloneke.

16. Momo lie tu popela okuti elavoko ombanjaile yimue yi kuete esilivilo lialua?

¹⁶ Elavoko lietu liomuenyo ko pui, ombanjaile yimue yi kuete esilivilo lialua, yi tunda ku Suku. Tu lavoka ekalo limue liwa lio kovaso yoloneke, lina tua kolela okuti li ka tẽlisiwa muẽle. Elavoko lietu li kasi ndonjundo, yi tu kuatisa oku pandikisa kovitangi, kelambalalo kuenda poku liyaka lolofa. Elavoko lietu li kasivo ndocikoko, li teyuila ovisimĩlo vietu oco tu yuvule oku linga eci cĩvi, pole, tu linga eci ca sunguluka. Elavoko lietu lia kunamẽla Vembimbiliya, li tu kuatisa oku pamisa ukamba wetu la Suku kuenda li situlula ocisola calua a tu kuetele. Tu kuatisiwa calua poku amamako oku pamisa elavoko lietu.

17. Momo lie elavoko lietu li tu sanjuisila?

¹⁷ Upostolo Paulu vukanda a sonehela ku va Roma, wa va vetiya hati: “Sanjuki omo lielavoko.” (Va Rom. 12:12) Paulu wa sanjukile omo a kolelele okuti, nda wamamako oku lekisa ekolelo, wa laikele oku kuata omuenyo ko pui kilu. Etu tu pondolavo oku sanjukila elavoko lietu, momo tua kolela okuti Yehova o ka tẽlisa olohuminyo viaye. Ukualosamo wa soneha ndoco: “Wa sumũlũha omunu . . . o kapa elavoko liaye ku Yehova Suku yaye, . . . Una okuti, ukuacili otembo yosi.”—Osa. 146:5, 6.