1-2. (a) Momo lie upostolo Paulu a popela okuti ocisola oco ocituwa “ca velapo?” (b) Apulilo api tu konomuisa?

 ECI upostolo Paulu a kala oku popia catiamẽla kekolelo, kelavoko kuenda kocisola wa malusula lolondaka viokuti: “Puãi pokati kavio ocisola oco [ocituwa] ca velapo.” (1 Va Kor. 13:13) Momo lie Paulu a ci popela? Momo kovaso yoloneke ka tu ka sukila vali oku kolela kolohuminyo via Suku viatiamẽla koluali luokaliye, ale oku lavoka okuti ovio vi tẽlisiwa. Pole, otembo yosi tu ka sukila oku kuatela ocisola Yehova kuenda omanu. Ocili okuti ocisola cetu kokuavo ci ka amamako oku livokiya.

² Olonjanja viosi tu ka sukila oku amamako oku lekisa ocisola, eli olio esunga lieci tu konomuisila apulilo atatu. Liatate, momo lie tu sukilila oku lisola pokati? Liavali, tu lekisa ndati ocisola komunu lukuavo? Liatatu, tu amamako ndati oku likuatela ocisola ca pama omunu lukuavo?

3. Asunga api tu kuete oku lisola pokati?

³ Momo lie ci kuetele esilivilo kokuetu oku lisola pokati? Momo eci tu lekisa ocisola ku vamanjetu tu eca uvangi wokuti Tuakristão vocili. Yesu wa sapuila kovapostolo vaye hati:  “Poku ci linga, vosi va ka limbuka okuti vulondonge viange, nda wa lisoli pokati.” (Yoa. 13:35) Handi vali, oku lisola pokati ci tu kuatisa oku amamako oku likuata omunga. Paulu wa tukula ocisola okuti, “ci tokeka omanu vomunga yimuamue.” (Va Kol. 3:14) Pole, kuli esunga likuavo lia velapo lieci tu sukilila oku likuatela ocisola pokati. Upostolo Yoano wa sonehela vamanji hati: “Wosi o sole Suku, o sukilavo oku sola manjaye.” (1 Yoa. 4:21) Eci tu lekisa ocisola komunu lukuavo, tu lekisavo ocisola cetu ku Suku.

4-5. Tukula ocindekaise cimue ci lekisa ndomo ocisola tu kuetele Suku ci kuete elitokeko locisola tu likuetele pokati.

⁴ Lonjila yipi ocisola tu kuetele Suku ci kuete elitokeko locisola tu kuetele vamanjetu? Oco tu ci sokise, kũlĩhĩsa elitokeko li kasi pokati kutima wetu kuenda olonepa vikuavo vietimba lietu. Eci ondotolo yimue yi kũlĩhĩsa utima wetu oco yi limbuke nda owo wa pama ale wa hongua, eye o pondola oku kũlĩha ovina vimue vi situlula uhayele wutima wetu. Nye tu lilongisila kocindekaise eci?

⁵ Ondotolo yimue yi pondola oku limbuka ovina viatiamẽla kuhayele wutima wetu poku kũlĩhĩsa ndomo owo u kasi oku talavaya. Cimuamue haico okuti, tu pondola oku limbuka nda ocisola tu kuetele Suku ca pama poku kũlĩhĩsa lutate oku pama kuocisola tu kuetele vakuetu. Nda tua limbuka okuti ocisola tu kuetele vamanji ca hongua, ci lekisa okuti ocisola cetu ku Suku ci kasivo oku hongua. Pole, nda olonjanja viosi tu lekisa ocisola ku vamanjetu, uvangi wokuti ocisola tu kuetele Suku ca pama.

6. Momo lie tu sukilila oku li sakalaisa nda ocisola tu kuetele vamanji ci kasi oku hongua? (1 Yoano 4:7-9, 11)

⁶ Tu sukila oku li sakalaisa nda ocisola tu kuetele vamanji ci kasi oku hongua. Momo lie? Momo ci lekisa okuti ukamba wetu la Yehova u kasivo oku hongua. Upostolo Yoano wa ci situlula ciwa eci a tu ivaluisa hati: Una ka sole manjaye a lete, ka pondola oku sola Suku una ka lete.” (1 Yoa. 4:20) Eci ci tu longisa nye? Yehova o tu sanjuka lika nda tu “li sola pokati.”—Tanga 1 Yoano 4:7-9, 11.

7-8. Volonjila vipi tu pondola oku lekisa ocisola tu likuetele pokati?

⁷ Vondaka ya Suku, tu sangamo olonjanja vialua ocihandeleko cokuti: “Lisoli pokati.” (Yoa. 15:12, 17; Va Rom. 13:8; 1 Va Tes. 4:9; 1 Pet. 1:22; 1 Yoa. 4:11) Omo liaco, ocisola ocituwa cimue co vutima kuenda lomue omunu o pondola oku ci mola vutima wetu. Oco hẽ, vakuetu va ka limbuka ndati okuti tu va sole? Kolondaka vietu kuenda kovilinga.

⁸ Kuli olonjila vialua vioku lekisa okuti tu sole vamanjetu. Kũlĩhĩsa olonjila vimue: “Vanguli ocili omunu lukuene.” (Sak. 8:16) ‘Amamiko oku likuatela ombembua omunu lukuavo.’ (Mar. 9:50) “Eci enanga liatete koku lekisa esumbilo ku vakuene.” (Va Rom. 12:10) “Litambuli pokati.” (Va Rom. 15:7) “Amamiko . . . oku liecela pokati.” (Va Kol. 3:13) “Li ambatisiko ovilemo viene.” (Va Gal. 6:2) “Amamiko oku li lembeleka pokati.” (1 Va Tes. 4:18) “Amamiko oku . . . li pamisa pokati.” (1 Va Tes. 5:11) ‘Lilikutililiko pokati.’—Tia. 5:16.

9. Momo lie oku lembeleka vakuetu onjila yimue yoku lekisa ocisola cetu kokuavo? (Talavo ociluvialuvia.)

⁹ Tu konomuisi onjila yimue tu pondola oku lekisa ocisola komunu lukuavo. Paulu wa popia hati: “Amamiko oku li lembeleka pokati.” Momo lie oku lembeleka vakuetu  onjila yimue yi kuete esilivilo yoku lekisa ocisola? Ndomo ca lekisiwa velivulu limue liatiamẽla Kembimbiliya, ondaka Paulu a tukula okuti oku “lembeleka” yi lomboloka “oku kala konele yomunu umue oco tu u pamise eci a kasi oku tala ohali omo liocitangi cimue.” Eci tu lembeleka manji umue o kasi oku liyaka lovitangi, tu u kuatisa oco eye amameko oku vumba Yehova lekolelo. Olonjanja viosi tu lembeleka manji umue tu lekisa kokuaye okuti tu u sole.—2 Va Kor. 7:6, 7, 13.

10. Elitokeko lipi li kasi pokati kocikembe kuenda oku lembeleka?

¹⁰ Oku lekisa ocikembe kuenda oku lembeleka ci kuete elitokeko. Lonjila yipi? Eci tu lekisa ocikembe komunu umue o kasi oku tala ohali, tu lekisa kokuaye okuti tu yongola oku u lembeleka kuenda oku u kuatisa. Catete, tu lekisa ohenda, noke tu vetiyiwa oku lekisa ocikembe. Paulu wa popia hati, ohenda Yehova a kuetele omanu yu vetiya oku va lembeleka. Poku popia catiamẽla ku Yehova Paulu wa lombolola okuti, “Isia yohenda kuenda Suku yelembeleko liosi.” (2 Va Kor. 1:3) Ndomo ca lekisiwa ketosi lielilongiso kocinimbu eci, Paulu wa tukula ondaka yokuti, “ohenda” poku situlula ocikembe omunu umue a kuetele ukuavo. Eli olio esunga lieci “Suku a tukuiwila Isia ale ono yohenda momo kokuaye ku tunda elembeleko liosi.” Kuenje ohenda yaco, yi tu vetiya oku li lembeleka pokati “kohali yetu yosi.” (2 Va Kor. 1:4) Ndeci ovava a tunda pono yimue a talaleka vana va kasi lenyona, Yehova o talalekavo kuenda o lembeleka vana va kasi oku tala ohali. Tu setukula ndati Yehova poku kuatela ocikembe vakuetu loku va lembeleka? Onjila yimue yoku ci linga, oku lekisa ovituwa vi tu kuatisa oku kuata ocikembe kuenda oku lembekeka vakuetu. Vipi vimue pokati kovituwa viaco?

11. Ndomo ca lekisiwa kukanda ku Va Kolosai 3:12 kuenda 1 Petulu 3:8, ovituwa vipi vikuavo tu sukila oku kuata vi tu kuatisa oku sola vamanjetu kuenda oku va lembeleka?

¹¹ Nye ci ka tu kuatisa oku lekisa ocisola kuenda oku “amamako oku li lembeleka pokati?” Tu sukila oku sola vakuetu, oku linga vakuacikembe kuenda vakuahenda. (Tanga Va Kolosai 3:12; 1 Petulu 3:8.) Ovituwa viaco vi ka tu kuatisa ndati? Eci tu kuatela ocikembe vamanjetu kuenda oku li sakalaisa lavo, tu kuata onjongole yalua yoku va lembeleka eci va kasi oku tala ohali. Yesu wa popia hati: “Momo eci ci kasi vutima, oco omẽla u popia. Omunu uwa, o vangula ovina viwa momo vutima waye muli ovina viwa.” (Mat. 12:34, 35) Oku eca elembeleko ku vamanjetu lutima wosi, onjila yimue yi kuete esilivilo yoku lekisa ocisola cetu kokuavo.

12. (a) Momo lie tu sukilila oku kuata utate oco ka tu ka pumbe ocisola tu likuetele pokati? (b) Epulilo lipi tu konomuisa cilo?

¹² Vosi yetu tu yongola oku ‘amamako oku li sola pokati.’ (1 Yoa. 4:7) Omo liaco, ci kuete esilivilo oku ivaluka olondaka via Yesu viokuti, ‘ocisola comanu valua [ca laikele] oku pola.’ (Mat. 24:12) Yesu ka kaile oku popia okuti, onepa yalua yolondonge ya laikele oku siapo oku lisola pokati. Eli olio esunga lieci tu sukilila oku kuata utate oco ka tu ka yapuisiwe lovituwa viomanu ka va lekisa ocisola voluali lulo. Oku kũlĩha ovina viaco ci ka tu kuatisa ndati oku limbuka nda ocisola cetu ku vamanji ca pama?

13. Nye ci ka tu kuatisa oku limbuka nda ocisola tu kuetele vamanjetu ca pama?

¹³ Onjila yimue yoku limbuka nda ocisola  cetu ca pama, oku kũlĩhĩsa ocituwa tu lekisa kovina vimue tu pita lavio komuenyo. (2 Va Kor. 8:8) Vimue pokati kovina viaco, via tukuiwa lupostolo Petulu hati: “Ca velapo vali kovina viosi, lisoli pokati, momo ocisola ci tuvika akandu alua.” (1 Pet. 4:8) Kuenje eci vamanjetu va tu lueyela ale va linga ovina vimue okuti vi tu sumuisa, ci ka tu kuatisa oku limbuka nda ocisola cetu kokuavo ca pama.

14. Ndomo ca lekisiwa kukanda 1 Petulu 4:8, ocisola cipi tu sukila oku kuata? Tukula ocindekaise cimue.

¹⁴ Tu sukila oku sokolola lutate olondaka via Petulu. Onepa yatete yocinimbu cecelãla yi lekisa ocisola tu sukila oku kuata okuti ‘ocisola ca pama.’ Ondaka ‘ca pama’ vupopi uteta onimbu, yi lomboloka “oku nyanyumula.” Onepa yavali yocinimbu yi lekisa onima yi tunda koku lekisa ocisola ca pama. Oyo hati, ocisola ci tuvika akandu a vamanjetu. Tu pondola oku ci sokisa ndoco: Sokolola okuti omesa yimue yi kuete atime alua. Citava okuti o kuata onanga yimue kuenje o yi yala komesa yosi oco o sitike atime aco. Cimuamue haico, nda tu kuetele ocisola ca pama vamanjetu, ka tu ka ecela lika akulueya amue, pole, tu ka tuvika “akandu alua.”

15. Nda ocisola tu kuetele vamanji ca pama, nye tu ka linga? (Va Kolosai 3:13)

 ¹⁵ Ocisola tu kuetele vakuetu ci sukila oku pama, oco tu tẽle oku ecela akulueya a vamanjetu ndaño pamue ka ca lelukile. (Tanga Va Kolosai 3:13.) Eci tu ecela vakuetu tu lekisa okuti ocisola cetu ca pama kuenda tu yongola oku sanjuisa Yehova. Nye vali ci tu kuatisa oku ecela eci vakuetu va tu lueyela kuenda oku yuvula oku tema lonjanga omo liovina va tu lingila?

16-17. Nye ci ka tu kuatisa oku yuvula oku kapako akulueya a vakuetu? Tukula ocindekaise cimue. (Talavo ociluvialuvia.)

¹⁶ Tiamisila utima kovituwa viwa via vamanji okuti, kovina vĩvi hakoko. Kũlĩhĩsa ocindekaise eci. Sokolola okuti o kasi kumosi locimunga cimue ca vamanji. Citava okuti vu kasi oku kuata epuluvi limue li sanjuisa kuenje kesulilo ove upa elitalatu limue. Ocili okuti upa vali alitalatu avali, momo pamue liatete ka lia tundile ciwa. Kaliye o kuete alitalatu atatu. Pole, limue pokati kavio wa limbuka okuti manji umue ka kasi oku yola. Nye o linga lelitalatu liaco? O linyõla, momo o kuete ale alitalatu avali akuavo okuti vosi vocimunga oku kongelamo manji yaco, va kasi oku yola.

¹⁷ Tu pondola oku sokisa alitalatu tua soleka lovolandu awa. Ocili okuti, tu kuete olonjivaluko viwa viotembo tua kala la vamanjetu. Pole, sokolola okuti, pokati kapuluvi aco,  manji umue wa popia cimue ci sumuisa. Nye tu sukila oku linga lonjivaluiso yaco? Tu sukila oku ivalako ovina vĩvi via pita ndeci tu nyõla elitalatu limue ka li kasi ciwa. (Olosap. 19:11; Va Efe. 4:32) Tu pondola oku ivalako ocina cĩvi manji a linga, momo tu kuete ovolandu awa otembo tua kalela kumosi. Evi ovio ovina tu sukila oku amamako oku ivaluka, loku vi soleka.

18. Atosi api a velapo tua konomuisa vocipama cilo?

¹⁸ Momo lie tu sukilila oku pamisa ocisola tu likuetele pokati? Ndomo tua ci konomuisa, eci tu lekisa ocisola ku vamanjetu, tu lekisa okuti tu sole Yehova. Tu situlula ndati ocisola cetu ku vamanji? Onjila yimue yoku ci linga, poku va lembeleka. Tu ka tẽla lika oku ‘amamako oku li lembeleka pokati,’ nda tu kuetele vakuetu ocikembe. Tu amamako ndati oku pamisa ocisola tu likuetele pokati? Poku ecela akulueya a vamanjetu ndaño pamue ka ca lelukile oku ci linga.

19. Momo lie ci kuetele esilivilo koloneke vilo oku likuatela ocisola pokati?

¹⁹ Momo lie ci kuetele esilivilo koloneke vilo oku likuatela ocisola pokati? Kũlĩhĩsa esunga liaco kolondaka Petulu a popia hati: “Esulilo liovina viosi li kasi ocipepi. Omo liaco, . . . lisoli pokati.” (1 Pet. 4:7, 8) Osimbu tu panda kesulilo lioluali lulo lua vĩha nye tu pondola oku lavoka? Yesu poku vangula catiamẽla kolondonge viaye wa popia hati: “Vu ka suvukiwa lolofeka viosi omo lionduko yange.” (Mat. 24:9) Oco tu tẽle oku pandikisa ndaño loku suvukiwa calua, tu sukila oku amamako oku likuata omunga. Nda tua likolisilako oku lisola pokati la vamanji, Satana lalimue eteke a ka tẽla oku tu tepa, momo ocisola “ci tokeka omanu vomunga yimuamue.”—Va Kol. 3:14; Va Fil. 2:1, 2.