1. O pondola oku pamisa ndati ukamba lomunu umue?

OLONJANJA vialua, oco ukamba umue u pamisiwe, ci sukila oku kũlĩha ciwa omunu waco kuenda oku kala laye olonjanja viosi. Osimbu vu sapela, vu situlula ovisimĩlo viene, lovolandu amuamue kuenje ukamba wene u pama. Oku kuata ukamba wa pama la Yesu, olonjanja vimue ka ci leluka. Momo lie?

2. Cipi ocina catete ci koka okuti ci tĩla oku kuata ukamba la Yesu?

² Ocina catete ci koka okuti ci tĩla oku kuata ukamba la Yesu ceci okuti, ka tua la mola Yesu. Akristão valua va kala kotembo yovapostolo, ka va muilevo Yesu. Uposotolo Petulu wa popia hati: “Ene vu sole Kristu, ndaño ka wa lo moli. Ndaño ene ka vu leti cilo, lopo wa koleli kokuaye.” (1 Pet. 1:8) Omo liaco, citava oku kala ekamba lia Yesu ndaño okuti ka tua lo mola.

3. Cipi ocina cavali ci koka okuti ci tĩla oku kuata ukamba la Yesu?

³ Ocina cavali ci koka okuti ci tĩla oku kuata ukamba la Yesu, ceci okuti, ka tu pondola oku vangula la Yesu. Poku likutilila tu vangula lika la Yehova. Ocili okuti, tu likutilila vonduko ya Yesu pole, ka tu pondola oku vangula laye. Handi vali, Yesu ka yongola okuti tu likutilila kokuaye. Momo  lie? Momo ohutililo yi panga onepa kefendelo lietu kuenda Yehova eye lika o sesamẽla oku fendeliwa. (Mat. 4:10) Ndaño ndoco, tu sukila oku lekisa ocisola cetu ku Yesu.

4. Cipi ocina catatu ci koka okuti ci tĩla oku kuata ukamba la Yesu kuenda nye tu konomuisa vocipama cilo?

⁴ Ocina catatu ci koka okuti ci tĩla oku kuata ukamba la Yesu ceci okuti, Yesu o kasi kilu kuenje ka tu pondola oku kala laye. Pole, tu pondola oku lilongisa ovina vialua via tiamẽla kokuaye, ndaño ka tu pondola oku kala ocipepi laye. Vocipama cilo, tu konomuisa ovina vikuãla tu pondola oku linga oco tu pamise ukamba wetu la Yesu. Tete, tu konomuisa esunga lieci ci kuetele esilivilo oku pamisa ukamba wetu la Kristu.

5. Momo lie tu sukilila oku kuata ukamba la Yesu? (Tala otulokasia losapi hati: “ Oku Kala Ekamba Lia Yesu ci tu Kuatisa Oku Kala Ekamba Lia Yehova” kuenda “ Kuata Ovisimĩlo Via Sunguluka Viatiamẽla Kocikele ca Yesu.”)

⁵ Tu sukila oku kala akamba va Yesu, nda tu yongola oku kuata ukamba uwa la Yehova. Momo lie? Kũlĩhĩsa asunga a vali. Esunga liatete, lieli okuti Yesu wa sapuila olondonge viaye hati: “Isia o vu sole, momo ene vu ndi sole.” (Yoa. 16:27) Eye wa popia vali hati: “Lomue iya ku Isia, te lame.” (Yoa. 14:6) Nda tu kuata lika ukamba la Yehova okuti ka tu kuata ukamba la Yesu, ci sokisiwa loku iñila vonjo yimue okuti ka tu piti puvelo. Yesu wa tukulavo olusapo lumuamue eci eye a lisokisa “nduvelo wolomeme.” (Yoa. 10:7) Esunga liavali, lieli okuti Yesu wa setukula ciwa ovituwa via Isiaye. Eye wa sapuila olondonge viaye hati: “Wosi o mola ame, o molavo Isia.” (Yoa. 14:9) Onjila ya velapo yoku kũlĩha Yehova, oku lilongisa eci catiamẽla ku Yesu. Osimbu tu lilongisa catiamẽla ku  Yesu, ocisola cetu kokuaye ci livokiya. Handi vali, osimbu ukamba wetu la Yesu u livokiya, ocisola tu kuetele Isiaye ci pama.

6. Esunga lipi likuavo lieci tu sukilila oku kuata ukamba la Yesu? Ci lombolola.

⁶ Tu sukila oku kuata ukamba la Yesu, oco olohutililo vietu vi tambuluiwe. Eci ci lekisa okuti oku tukula lika “onduko ya Yesu” kesulilo liohutililo, ka ci tẽla. Tu sukila oku limbuka ndomo Yehova a tambulula olohutililo vietu pocakati ca Yesu. Yesu wa sapuila ovapostolo vaye hati: “Cosi vu pinga vonduko yange, ndu ci lingili.” (Yoa. 14:13) Ndaño okuti Yehova ukuakuyeva olohutililo vietu kuenda o vi tambulula, eye wa eca ku Yesu unene woku tẽlisa eci Eye a yongola. (Mat. 28:18) Osimbu Suku ka tambuluile ohutililo yetu, eye o kũlĩhĩsa nda tua kapako elungulo lia Yesu liatiamẽla koku ecela. Yesu wa popia hati: “Nda ene weceli akandu omanu va ku lueyeli, Isiene wo kilu ecelavo akandu ene; pole, nda ka weceli akandu omanu, Isiene ka ecelavo akandu ene.” (Mat. 6:14, 15) Omo liaco, ci kuete esilivilo oku tata ciwa vakuetu ndeci Yehova la Yesu va tu tata!

7. Velie va pondola oku kuatisiwa locilumba cocisembi ca Yesu?

⁷ Vana va kuete ukamba la Yesu, ovo lika va pondola oku kuatisiwa locilumba cocisembi caye. Tua ci kũlĩha ndati? Yesu wa popia okuti, eye wa ponduile oku “pesila omuenyo waye akamba vaye.” (Yoa. 15:13) Omanu vana va vumbile Yehova osimbu Yesu keyile palo posi, va ka pinduiwa kuenje va ka lilongisa eci catiamẽla ku Yesu loku u sola. Omanu vaco vava: Avirahama, Sara, Mose kuenda Rahava. Pole, ndaño okuti va kala afendeli vakuesunga va Yehova, va ka sukila oku linga ukamba la Yesu oco va kuate omuenyo ko pui.—Yoa. 17:3; Ovil. 24:15; Va Hev. 11:8-12, 24-26, 31.

8-9. Ndomo ca tangiwa ku Yoano 15:4, 5, nda tu yongola oku kala akamba va Yesu, tu sukila oku linga nye kuenda momo lie ci kuetele esilivilo?

⁸ Tu kuete esanju lioku talavaya la Yesu kupange woku kunda olondaka viwa Viusoma loku longisa. Eci Yesu a kala palo posi, wa kala ulongisi. Kuenje tunde eci a tiukila kilu, Yesu omo okuti utue wekongelo, o kasi oku amamako oku songuila upange woku kunda loku longisa. Eye o lete kuenda wa kapako alikolisilo ove oku kuatisa omanu oku kũlĩha Isiaye. Ocili okuti, tu tẽla lika oku tẽlisa upange waco lekuatiso lia Yehova la Yesu. —Tanga Yoano 15:4, 5.

⁹ Ondaka ya Suku yi lekisa okuti tu sukila oku amamako oku sola Yesu, oco tu sanjuise Yehova. Tu kũlĩhĩsi ovina vikuãla tu sukila oku linga oco tu kale akamba va Yesu.

10. Cipi ocina catete tu sukila oku linga oco tu kale akamba va Yesu?

¹⁰ (1) Kũlĩha Yesu. Tu pondola oku ci linga poku tanga Embimbiliya ndeci, elivulu lia Mateo, Marko, Luka kuenda Yoano. Osimbu tu sokolola kovolandu Embimbiliya atiamẽla komuenyo wa Yesu, tu u sola loku u sumbila omo liocituwa caye coku kapako omanu. Ndeci, ndaño okuti eye wa kala Cime colondonge viaye, ka va tatele ndapika. Pole, wa enda oku sapela lavo kuenda oku va situluila ovisimĩlo viaye. (Yoa. 15:15) Eci olondonge via Yesu via enda oku sumua, eye wa endavo oku sumua. (Yoa. 11:32-36) Ovanyãli vaye va limbukilevo okuti Yesu wa kala ekamba lia vana va enda oku tava kesapulo liaye. (Mat. 11:19) Nda tua  setukula Yesu konjila ndomo a tata olondonge viaye, ukamba la vakuetu u livokiya, tu kuata esanju kuenda ocisola lesumbilo tu kuetele Kristu, ci livokiya.

11. Cipi ocina cavali tu sukila oku linga oco tu kale akamba va Yesu kuenda momo lie ci kuetele esilivilo?

¹¹ (2) Setukula ovisimĩlo via Yesu kuenda ovilinga viaye. Osimbu tu amamako oku kũlĩha ciwa Yesu lovisimĩlo viaye, ukamba tu kuete laye u pama. (1 Va Kor. 2:16) Tu setukula ndati Yesu? Kũlĩhĩsa ño handi. Yesu wa enda oku pitisa calua kovaso oku kuatisa vakuavo, okuti oku lisokolola lika eye muẽle ci sule. (Mat. 20:28; Va Rom. 15:1-3) Omo lioku kuata ocituwa eci, wa enda oku sanjukila oku kuatisa vakuavo kuenda oku va ecela. Eye ka endaile oku sumua omo liovina omanu va enda oku popia viatiamẽla kokuaye. (Yoa. 1:46, 47) Yesu ka ecelele okuti akulueya omunu a linga kosimbu, o kokela oku nyehula omunu waco. (1 Tim. 1:12-14) Yesu wa popia hati: “Vosi va limbuka okuti vulondonge viange—nda wa lisoli pokati.” (Yoa. 13:35) Tu sukila oku lipula ndoco: “Nãsi hẽ oku kuama ongangu ya Yesu poku likolisilako oku linga ombembua la vamanji vosi?”

12. Cipi ocina catatu tu sukila oku linga, oco tu kale akamba va Yesu kuenda tu ci linga ndati?

¹² (3) Kuatisa vamanji va Kristu. Ekuatiso tu eca ku vamanji olombuavekua, ci kasi ndu okuti tu kasi oku eca ekuatiso liaco ku Yesu. (Mat. 25:34-40) Ekuatiso lia velapo tu eca kolombuavekua, poku likolisilako oku kunda olondaka viwa Viusoma loku longisa omanu, oco va linge olondonge okuti owo upange Yesu a tuma olondonge viaye oku linga. (Mat. 28:19, 20; Ovil. 10:42) Lekuatiso ‘liolomeme vikuavo,’ vamanji va Kristu, va kasi oku linga upange unene woku kunda, voluali luosi. (Yoa. 10:16) Nda o panga onepa kolomene vikuavo, onjanja yosi enda kupange woku kunda, ove ku lekisa lika ocisola cove ku Yesu, pole, o ci lekisavo kolombuavekua.

13. Tu kapako ndati elungulo lia Yesu li sangiwa kelivulu lia Luka 16:9?

¹³ Tu pondola oku kala akamba va Yehova la Yesu poku eca olombanjaile vietu, oco tu kuatise kupange va tu tuma oku linga. (Tanga Luka 16:9.) Ndeci, tu pondola oku eca olombanjaile vietu, oco vi kuatise kupange u lingiwa koluali luosi okuti, upange woku kunda olondaka viwa kovikanjo vi kasi ocipãla, woku tunga loku semulula Olonjango Viusoma kuenda oku kuatisa vana va pita lovilunga. Tu pondolavo oku kuatisa vekongelo tu kasi, poku eca olombanjaile vietu kuenda oku kuatisa vana tua kũlĩha okuti va sukila ekuatiso lietu. (Olosap. 19:17) Evi, olonjila vimue vioku kuatisa vamanji va Kristu.

14. Ndomo ca lekisiwa ku va Efeso 4:15, 16, cipi ocina ca kuãla tu sukila oku linga, oco tu kuate ukamba la Yesu?

¹⁴ (4) Kuatisa kesokiyo liekongelo. Tu pondola oku kala akamba vawa va Yesu utue wekongelo, eci tu kuatisa vana eye a nõla oco va tu songuile. (Tanga Va Efeso 4:15, 16.) Ndeci, tu likolisilako oku liongoluila Volonjango vietu Viusoma. Akongelo amue a kongeliwa lakongelo akuavo kuenda ovikanjo via sokiyiwa ciwa. Esokiyo liaco, lia kuatisa oku tepulula oku pesela olombongo vialua. Kuenje, eci ca ecelela okuti akundi vamue va kuama esokiyo liokaliye lia lingiwa. Akundi vaco vakuekolelo, citava okuti va kala vekongelo limue anyamo alua muna okuti, va pamisa ukamba wavo la vamanji. Pole cilo, va tumiwa oku likongela kekongelo likuavo. Yesu o sanjuka calua eci a limbuka okuti akundi va kasi oku kuama esokiyo liaco!

15. Kovaso yoloneke ukamba wetu la Yesu u ka pamisiwa ndati?

¹⁵ Vana va wavekiwa lespiritu sandu, va lavoka oku viala la Yesu, otembo ka yi pui Vusoma wa Suku. Ovo va ka kala kumue la Kristu, va ka sapela laye kuenda va ka kala akamba. (Yoa. 14:2, 3) Vana va lavoka oku kala palo posi, va kamamako oku soliwa loku kapiwako la Yesu. Ndaño ka va moli Yesu, ukamba wavo u pamisiwa osimbu vamamako lomuenyo una Yehova la Yesu va eca kokuavo.—Isa. 9:6, 7.

16. Asumũlũho api tu ka kuata omo lioku kala akamba va Yesu?

¹⁶ Eci tu tava kelaleko lia Yesu lioku kala akamba vaye, tu tambula asumũlũho alua. Ndeci, koloneke vilo, tu kasi oku kuatisiwa locisola caye kuenda eteyuilo liaye. Handi vali, tu kuete epuluvi lioku kala komuenyo otembo ka yi pui. Ca velapo vali ceci okuti, ukamba wetu la Yesu u ka tu kuatisa oku kuata asumũlũho a velapo ndeci, oku kuata ukamba la Yehova, Isia ya Yesu. Esumũlũho limue linene oku kala akamba va Yesu!