1. Ongangu yipi Yesu a sia kolondonge viaye kuenda nye ovo va linga? (Tala ociluvialuvia koñoño.)

VOKUENDA kuotembo Yesu a kala palo posi, eye wamamako oku kundila omanu lelavoko liokuti ovo vo ko yevelela kuenda wa yonguilevo okuti olondonge viaye vi linga ocina cimuamue. (Yoa. 4:35, 36) Osimbu Yesu a kala lolondonge viaye, ovo va lekisa ombili kupange woku kunda. (Luka 10:1, 5-11, 17) Eci Yesu a kuatiwa loku pondiwa, olondonge vokatembo katito ombili yavo kupange woku kunda ya tepuluka. (Yoa. 16:32) Kuenje eci Yesu a pinduka, wa va vetiya oku tiamisila utima kupange woku kunda. Noke lia Yesu oku enda kilu, olondonge via lekisa ombili yalua kupange woku kunda okuti o vanyãli vavo va popia okuti: “Tala! wa yukisi o Yerusalãi lalongiso ene.”—Ovil. 5:28.

2. Ndamupi Yehova a sumũlũisa upange woku kunda?

² Yesu wa songuila Akristão vatete kupange woku kunda kuenda Yehova wa va sumũlũisa, kuenje omanu valua veya oku tava kesapulo va kala oku kunda. Ndeci, Kopendekoste yunyamo 33 K.K. ci soka 3.000 komanu va papatisiwa. (Ovil. 2:41) Kuenda etendelo liolondonge liamamako oku livokiya calua. (Ovil. 6:7) Yesu wa popele ale okuti omanu valua va ka tava olondaka viwa koloneke via sulako.—Yoa. 14:12; Ovil. 1:8.

3-4. Momo lie kovitumãlo vikuavo upange woku kunda ka wa lelukilile kuenda nye tu konomuisa vocipama cilo?

³ Vosi yetu tu sukila oku kuata ocituwa ca sunguluka kupange woku kunda. Kolofeka vimue, ca leluka oku ci linga.  Momo lie? Momo valua va lekisa onjongole yoku lilongisa Embimbiliya okuti vamue pokati kavo va kevelela toke eci kumoleha Ombangi yimue ya Yehova! Pole, kolofeka vimue, akundi va liyaka lovitangi vialua kupange woku kunda; ndeci omanu ka va sangiwa kolonjo kuenda vana va sangiwa kolonjo pamue ka va lekisa onjongole Kembimbiliya.

⁴ Nda okuti ove o kasi kocitumãlo cina okuti upange woku kunda ka wa lelukile, olonumbi vi sangiwa vocipama cilo, vi ku kuatisa. Tu konomuisa ovina vimue vamue va siata oku linga, oco va sapele lomanu valua kupange woku kunda. Tu konomuisavo esunga lieci tu sukilila oku lekisa ocituwa ca sunguluka ndaño omanu ka va yevelela esapulo tu kunda.

5. Ovitangi vipi Olombangi vialua Via Yehova via siata oku liyaka lavio?

⁵ Olombangi vialua Via Yehova via siata oku sanga ovitangi vialua vioku sapela lomanu kolonjo viavo. Akundi vamue va kasi kovitumãlo vina okuti olonjo viaco vi kuete eteyuilo lialua, ale olosapalalo via yikiwa. Kolonjo viaco, pamue kuli olondavululi okuti ka va ecelela omunu umue oku iñila nda ka tambuile elaleko liomunu o kasi konjo yaco. Kovitumãlo vikuavo, akundi va enda konjo lanjo okuti ka va tatekiwa pole, omanu valua ka va sangiwa kolonjo. Akundi vamue va kundila kovikanjo vina okuti kuli lika omanu vatito. Akundi pamue va sukila oku linga ungende walua oco va sange omunu umue okuti pamue ka sangiwa konjo! Nda tu kasi vocikanjo cimue ndeci, ka tu ka liwekipo. Nye tu sukila oku linga oco tu yule ovitangi viaco loku kuata onima yiwa kupange woku kunda?

6. Akundi va sokisiwa ndati la vakuakupipa?

⁶ Yesu wa sokisa upange woku kunda la vakuakupipa olõsi. (Mar. 1:17) Vamue vakuakupipa va pita muẽle ateke alua okuti ka va kuata olũsi laumue. Pole, ovo ka va liwekapo; va pongolola onjila yikuavo yoku pipa. Ovo va pongolola otembo, ocitumãlo, ale onjila yikuavo. Tu pondolavo oku linga apongoloko amuamue kupange woku kunda. Tu konomuisi amue pokati kapongoloko aco.

7. Onima yipi tu kuata nda tua kunda valivala a litepa?

⁷ Sandiliya omanu valivala a litepa. Tu ka sapela vali lomanu valua nda tu kunda velivala lina ovo va sangiwa konjo. Momo, velivala liaco vosi va kala kolonjo! Vamanji valua va siata oku kunda kekumbi, ale koñolosi momo va sanga omanu valua. Handi vali pamue, velivala liaco oco omanu va kasi oku puyukapo kuenda va lekisa vali onjongole yoku sapela. Ale, o ka kuatisiwa poku kuama eci manji umue ukulu wekongelo o tukuiwa David a linga. Eye wa popia okuti, noke lioku kundila vocikanjo cimue otembo yimue, eye kumue la manji va kundila kumosi, va tiukila oku ka sanda vana ka va sangele onjanja yatete. Eye hati, “Nda komõha calua omo liomanu tua sanga kolonjo eci tua tiukilako onjanja yavali.” *

8. Tu kapako ndati elivulu Liukundi 11:6, kupange woku kunda?

⁸ Ka tu ka liwekipo. Ocisonehua cocipama cetu ci tu ivaluisa ocituwa tu sukila oku kuata. (Tanga Ukundi 11:6.) Manji David wa tukuiwa ale, ka liwekelepo. Vonjo yimue, eye wa sanga muelianjo noke lioku tutula kolonjo vialua. Ulume wa lekisa onjongole yoku sapela catiamẽla Kembimbiliya kuenda wa popia  hati, “Ame ñasi kulo ci soka ecelãla kanyamo, siala mola la yimue Ombangi ya Yehova pepito liange.” Manji David wa popia hati, “Nda limbuka okuti eci o sanda omanu kolonjo viavo, olonjanja vimue ovo va yevelela kesapulo tu kasi oku kunda.”

9. Nye akundi vamue va siata oku linga oco va sapele lomanu vana ka va sangiwa kolonjo?

⁹ Kuende pocitumãlo cikuavo. Akundi vamue oco va sapele lomanu vana okuti ka va sangiwa kolonjo, ovo va siata oku pongolola ocitumãlo coku kundila. Ndeci, oku kundila volokololo kuenda oku talavaya lokakãlu kalivulu, ca siata oku kuatisa oku kundila omanu vana va kasi kolonjo vina okuti ka va ecelela oku ka kundilako. Eci cecelela okuti Olombangi Via Yehova vi sapela lomanu va kasi kolonjo viaco. Handi vali, akundi valua va limbuka okuti omanu va sapela vali ale va tava alivulu etu povitumãlo papita omanu valua kuenda povitanda. Manji Floiran ukuakunyula akongelo ko Bolivia wa popia hati: “Etu tu enda povitumãlo violovenda kalivala 13 kuenda 15 omo okuti velivala liaco vakuakulandisa ka va tatekiwa ño enene. Tua siata oku kuata ombangulo yiwa lavo loku fetika elilongiso Liembimbiliya.”

10. Olonjila vipi o pondola oku kuama oco o kundile omanu?

¹⁰ Seteka onjila yikuavo. Sokolola okuti olonjanja viosi, o sapela lomunu umuamue. Ove u ko nyula valivala akuavo pole, ku sangi konjo. Kuli hẽ olonjila vikuavo vioku sanga omunu waco? Manji Katarína, wa popia hati, “Ame ndi sonehela yikanda komanu vana sia la sanga konjo, loku lombolola okuti njongola oku sapela lavo.” Nye tua lilongisa kulandu  owu? Likolisilako oku sapela lomanu vocikanjo cove volonjila via li tepa eci o kasi kupange woku kunda.

11. Momo lie omanu vamue ka va lekisila onjongole kesapulo tu kunda?

¹¹ Omanu vamue ka va lekisa onjongole kesapulo tu kunda. Ovo va sima okuti ka va sukila oku kũlĩha eci catiamẽla ku Suku, ale Kembimbiliya. Ovo ka va tava ku Suku momo va siata oku mola ohali yalua voluali. Ovo ka va tava Kembimbiliya momo va siata oku mola ombambe yasongui vatavo oku popia okuti va pokola Kembimbiliya pole, va linga ovina vialua vĩvi. Handi vamue, va sakalala calua lupange wavo, lepata, ale lovitangi va siata oku liyaka lavio olonjanja viosi kuenje va sima okuti Embimbiliya ka li pondola oku va kuatisa. Tu amamako ndati lesanju lietu ndaño okuti vana tu kundila ka va kapiko esapulo tu kunda?

12. Olondaka ku Va Filipoi 2:4, vi tu kuatisa ndati kupange woku kunda?

¹² Lekisa okuti wa kapako vakuene. Valua okuti kefetikilo ka va lekisile onjongole, veya oku tava kolondaka viwa eci va limbuka okuti ukundi wa lekisa okuti wa va kapako. (Tanga Va Filipoi 2:4.) Ndeci, manji David, wa tukuiwa ale, wa popia hati, “Nda omunu umue o popia okuti eye ka tava, ka tu ka tukule Embimbiliya, ale alivulu etu, pole tu sukila oku u pulisa ndoco: ‘Njongola oku kũlĩha esunga lieci o simila ndoco.’” Omanu va limbuka eci omunu umue a lekisa okuti wa va kapako. Ovo pamue va ivalako eci tua popia, pole va ivaluka eci tua va lingila. Ndaño okuti omunu tua sanga ka yongola okuti tu sapela laye, ovituwa vietu kuenda ocipala cetu ci lekise okuti tua va kapako.

13. Nye tu sukila oku linga oco esapulo tu kunda li vetiya omunu lomunu tu sanga?

¹³ Tu lekisa okuti tua kapako omanu eci tu pongolola esapulo tu kunda lonjila yimue yi vetiya omunu tua sanga. Ndeci, omunu wa sangiwa o kuete omãla? Pamue olonjali vi lekisa onjongole kolonumbi Viembimbiliya vioku tata omãla, ale ceci catiamẽla koku kuata epata limue liesanju. Tu lete hẽ okuti vepito liaye mue yuka ovikuli vialua? Citava okuti tu vangula eci catiamẽla kungangala kuenda usumba wa piãla u kasi voluali, kuenje pamue omunu wa sangiwa o ka sanjuka poku yeva okuti noke ovina evi vi ka puako. Omo liaco, onjanja yosi o sanga omanu va yongola oku tu yevelela, lekisa kokuavo okuti Embimbiliya li pondola oku va kuatisa. Manji Katarína wa tukuiwa ale, wa popia hati, “Ame ndivaluka ndomo Embimbiliya lia ñuatisa.”  Kuenje manji Katarína poku vangula lomanu o ci linga lekolelo okuti omanu ka va tatãla.

14. Olosapo 27:17, yi lekisa ndati okuti vana va kundila kumosi va likuatisa pokati?

¹⁴ Tava ekuatiso lia vakuene. Kocita catete, Paulu wa longisa Timoteo oku kunda loku longisa kuenda wa vetiya Timoteo oco a kuatisevo vakuavo. (1 Va Kor. 4:17) Ndeci Timoteo, tu kuatisiwavo la vamanji va loñoloha va kasi vekongelo lietu. (Tanga Olosapo 27:17.) Tu konomuisi ulandu wa manji o tukuiwa Shawn. Votembo yimue, eye wa talavaya ndukundi wotembo yosi vocikanjo cimue okuti omanu valua va sanjukilile ale etavo va kuatele. Eye wamamako ndati lesanju liaye? Eye hati: “Olonjanja viosi ci ngecelela, ndaenda oku talavaya lamanji umue. Tu enda oku kundila konjo lanjo oco tu likuatise pokati oku mioñolola uloño wetu woku longisa. Ndeci, tu sapela kondaka omunu wa sangiwa a popia kuenda ndomo tua sukilile oku tambulula. Kuenje tu sapela eci tu sukila oku linga onjanja yikuavo nda tua sanga vali ocitangi caco.”

15. Ohutililo yi kuete esilivilo lie kupange woku kunda?

¹⁵ Likutilila ku Yehova oco a ku kuatise. Pinga ku Yehova oco a ku kuatise olonjanja viosi enda kupange woku kunda. Etu tu sukila espiritu sandu liaye oco li tu kuatise kovina viosi tu linga. (Osa. 127:1; Luka 11:13) Eci o likutilila ku Yehova oku pinga ekuatiso, vangula eci o sukila. Ndeci, pinga kokuaye oco a ku songuile komanu vosi va yongola oku lilongisa catiamẽla kokuaye kuenda oku yevelela. Kuenje likolisilako oku kundila vosi vana o sanga.

16. Momo lie elilongiso liopokolika li tu kuatisila kupange woku kunda?

¹⁶ Sanda otembo yoku linga elilongiso liopokolika. Ondaka ya Suku hati: “Limbuka ndeci ci kasi ocipango ca Suku okuti ciwa, ca sunguluka kuenda ca pua eko.” (Va Rom. 12:2) Eci tu sanda otembo yoku lilongisa, tu ka kũlĩha ciwa Suku, kuenje eci tu sapela lomunu kupange woku kunda catiamẽla kokuaye, ovo va ka limbuka okuti tua kolela kovina tu kasi oku vangula. Manji Katarína, wa tukuiwa ale, wa popia hati: “Konyima, nda limbukile okuti ame nda sukilile oku pamisa ekolelo liange kalongiso amue Embimbiliya. Kuenje nda linga elilongiso limue lutate liokuti kuli Ululiki umue, okuti Embimbiliya Ondaka muẽle ya Suku kuenda Suku o kuete ocisoko cimue koloneke vilo.” Manji Katarína, wa popia okuti elilongiso liaye liopokolika lia pamisa ekolelo liaye kuenda liavokiya vali esanju liaye kupange woku kunda.

17. Momo lie Yesu amamelako locituwa ciwa kupange waye woku kunda?

¹⁷ Yesu wamamako locituwa ca sunguluka kupange woku kunda ndaño omanu vamue ka va lekisile onjongole kesapulo liaye. Momo lie? Eye wa kũlĩhĩle okuti omanu va sukilile oku lilongisa ocili kuenda wa yonguile oku kuatisa omanu valua. Eye wa kũlĩhĩlevo okuti vana okuti kefetikilo ka va lekisile onjongole, va laikele oku tava. Kũlĩhĩsa eci ca pita vepata liaye. Yesu vokuenda kuanyamo atatu lomeyu kupange woku kunda, lomue pokati ka vamanjaye wa linga ondonge yaye. (Yoa. 7:5) Pole, noke liepinduko liaye, ovo va linga Akristão.—Ovil. 1:14.

18. Momo lie tu amamelako oku kunda?

¹⁸ Etu ka tua kũlĩhĩle omunu o ka tava kocili Cembimbiliya tu longisa. Komanu vamue cambata otembo oku tava kesapulo tu kunda. Ndaño okuti vamue ka va yongola oku tu yevelela, eci va mola ovituwa vietu viwa kuenda ocituwa ca sunguluka kupange tu linga,  citava okuti va ka vetiyiwa oku “sivaya Suku.”—1 Pet. 2:12.

19. Ndomo ca tangiwa ku 1 Va Korindo 3:6, 7, ku tu longisa nye catiamẽla kupange woku kunda?

¹⁹ Osimbu tu kunda loku longisa tu ivaluki okuti Suku eye o kulisa. (Tanga 1 Va Korindo 3:6, 7.) Getahun, manji umue wa kundila ko Etiopia wa popia hati: “Vokuenda kueci ci pitahãla 20 kanyamo, nda enda oku kundila lika kocitumãlo nda kala. Pole, cilo kuli 14 kakundi. Ekũi latatu va papatisiwa oku kongelamo ukãi wange kuenda omãla vatatu. Tua siata oku kala 32 komanu kolohongele.” Manji Getahun o kasi oku amamako oku kunda lesanju osimbu a lavoka Yehova oku vetiya omanu va kuete utima wa sunguluka vocisoko Caye!—Yoa. 6:44.

20. Lonjila yipi tu sokisiwa la vakuakupopela?

²⁰ Yehova o tenda omanu vosi okuti va kuete esilivilo. Eye o tu ĩha esumũlũho lioku talavayela kumosi Lomõlaye poku kongela omanu vokolofeka viosi osimbu handi esulilo lioluali lulo ka lueyile. (Hag. 2:7) Upange woku kunda tu linga u sokisiwa lupange woku popela omanu. Etu tu sokisiwa ndocimunga cimue ca tumiwa oku ka popela omanu komina yimue. Ndaño okuti vatito vakuakupopela va sanga umue, pole, vosi yavo va linga upange wa velapo. Cimuamue haico tu linga kupange woku kunda. Etu ka tua kũlĩhĩle etendelo liomanu va ka popeliwa voluali lulo lua Satana. Pole Yehova o pondola oku vetiya umue pokati ketu oco a kuatise omanu vaco. Manji Andreas, o kasi ko Bolivia wa popia hati: “Eci ndi mola omunu umue oku lilongisa ocili Cembimbiliya loku papatisiwa, ci lekisa alikolisilo vamanji vosi vekongelo va linga.” Tu sukilavo oku lekisa ocituwa cimuamue catiamẽla kupange woku kunda. Nda tua ci linga Yehova o ka tu sumũlũisa kuenda upange woku kunda u kala ono yesanju lietu.