1. Tu tenda ndati epuluvi tu kuete lioku likutilila ku Yehova?

 TUA siata oku kuata esumũlũho linene lioku amẽla Kululiki wilu, losi pocakati cohutililo. Sokolola ño handi: Tu pondola oku likutilila ku Yehova kapuluvi osi kuenda kelimi tu vangula, okuti ka tu sukila oku u sapuila epuluvi tu yongola oku ci linga. Tu pondola oku likutilila kokuaye eci tu kasi kosipitali oku vela, ale ceci tu kasi vokaike, lekolelo liokuti Isietu ukuacisola wokilu o tu yeva. Tu eca olopandu omo liesumũlũho liaco.

2. Soma Daviti wa lekisa ndati okuti wa velisilepo esumũlũho liohutililo?

² Soma Daviti wa velisilepo esumũlũho lioku likutilila. Eye wa imbila ku Yehova hati: “Ohutililo yange yi kale ndinsensu via pongiyiwa kovaso ove.” (Osa. 141:1, 2) Koloneke via Daviti, insensu via kala ocina cimue ci kola okuti, ovitunda via enda oku talavaya lavio kefendelo liocili kuenje va enda oku vi pongiya ciwa. (Etu. 30:34, 35) Daviti poku tukula insensu, wa yonguile oku sokolola lutate kovina a yonguile oku sapuila Isiaye wokilu. Tu sukilavo oku kuata ocimãho caco. Etu tu yongola okuti, olohutililo vietu vi sanjuisa Yehova.

3. Ocituwa cipi tu sukila oku lekisa eci tu likutilila ku Yehova kuenda momo lie?

³ Eci tu likutilila ku Yehova, tu sukila oku yuvula oku pitulula olondaka vimuamue. Pole poku likutilila tu sukila oku ci linga lesumbilo. Sokolola kocinjonde cimue ci komõhisa ca muiwa la Esekiele, Daniele kuenda Yoano. Ndaño okuti ovinjonde viaco via litepa, pole, ovio vi kuete elitokeko. Ovinjonde viaco viosi, vi situlula Yehova Ndosoma ya velapo.  Isaya wa “mola Yehova okuti, wa tumãla kocalo ca kemãla haico ca lepa.” (Isa. 6:1-3) Esekiele wa mola ocinjonde cekãlu lia Yehova kilu “kua kala ocinyi cimue. . . ndeci colukongolo.” (Esek. 1:26-28) Daniele wa mola “umue Ukuasimbu” okuti uwalo waye wa yelele ndocikokoto kuenda ulienge wondalu wa kala oku tunda kocalo Caye. (Dan. 7:9, 10) Kuenje Yoano wa mola Yehova wa tumãla kocalo ca ñualiwa lolukongolo lua setahãla o emeralda. (Esit. 4:2-4) Eci tu sokolola kulamba wa Yehova ka u sokisiwa, tu ivaluka esumũlũho li komõhisa lioku amẽla kokuaye pocakati cohutililo kuenda esilivilo lioku ci linga lesumbilo. Pole, nye tu sukila oku tukula vohutililo?

4. Nye tu lilongisa kolondaka viohutililoYesu a longisa vi sangiwa ku Mateo 6:9, 10?

⁴ Tanga Mateo 6:9, 10. Kohundo Yesu a lingila Komunda, wa longisa olondonge viaye ndomo va likutilila lonjila yimue yi sanjuisa Suku. Noke lioku popia okuti, “vu sukila oku likutilila ndoco,” Yesu tete wa lombolola ocina cimue ci kuete esilivilo eci a likutilila, eye wa likutilila oco onduku ya Yehova yi sumbiwe; oku iya Kusoma una u ka kundula ovanyãli vosi va Suku kuenda ovina viwa Eye a laikele oku lingila omanu palo posi kovaso yoloneke. Poku kongela olondaka evi volohutililo vietu, tu lekisa okuti tua velisapo ocipango ca Suku.

5. Eci tu likutilila kovina vi tu sakalaisa anga hẽ Yehova o tu yeva?

⁵ Yesu poku popia catiamẽla koku likutilila, eye wamisako hati, ci kuete esilivilo oku likutilila catiamẽla kasakalalo etu. Tu pondola oku pinga ku Yehova oco a tu ĩhe okulia tu sukila etaili, oku ecela akandu etu, oco ka ka ecelele okuti tu yonjiwa kuenda oku tu popela kondingaĩvi. (Mat. 6:11-13) Poku pinga ku Yehova ovina viaco, tu lekisa okuti tu sukila ekuatiso liaye kuenda tu yongola oku u sanjuisa.

6. Anga hẽ tu likutilila lika kovina via tukuiwa vohutililo Yesu a longisa? Ci lombolola.

⁶ Yesu ka yongola okuti olondonge viaye poku likutilila va tukula lika ohutililo eye a longisa. Yesu poku likutilila wa enda oku  tukula ovina via litepa haivio via enda oku u sakalaisa vepuluvi liaco. (Mat. 26:39, 42; Yoa. 17:1-26) Cimuamue haico tu pondola oku linga okuti, tu likutilila kovina viosi vi tu sakalaisa. Eci tu sukila oku nõla onjila yimue, tu pondola oku likutilila oku pinga olondunge kuenda elomboloko. (Osa. 119:33, 34) Eci tu tambula ocikele cimue ca tĩla calua, tu sukila oku likutilila oco tu kuate elomboloko ndomo tu ci tẽlisa. (Olosap. 2:6) Olonjali vi pondola oku likutililako omãla vavo, omãla va pondola oku likutililako olonjali viavo kuenda vosi yetu tu sukila oku likutililako omanu vana tu longisa Embimbiliya kuenda vana tu kundila. Pole, kuli ovina vikuavo tu sukila oku tukula vohutililo.

7. Momo lie tu sukilila oku sivaya Yehova pocakati cohutililo?

⁷ Tu sukila oku ivaluka okuti tu pondola oku sivaya Yehova lolohutililo vietu. Ka kuli omunu ukuavo o sesamẽla esivayo okuti Suku yetu ci sule. Eye ‘uwa kuenda olonjanja viosi wa likapelako oku ecela.’ Handi vali, eye ‘ukuahenda kuenda ukuacikembe, o livala konyeño kuenda ukuacisola calua haico ka ci pongoloka haeye wa koleliwa.’ (Osa. 86:5, 15) Tu kuete esunga lialua lioku sivaya Yehova omo liovituwa viaye kuenda kovina a linga.

8. Kovina vipi tu sukila oku eca olopandu ku Yehova? (Olosamo 104:12-15, 24)

⁸ Poku sivaya Yehova pocakati colohutililo vietu, tu vetiyiwa oku eca olopandu kokuaye omo liovina viwa a siata oku tu lingila. Ndeci, tu pondola oku eca olopandu kokuaye eci tu vanja kavala afina oloneleho, okulia kualua kua litepa kuenda esanju lioku kala pokati kakamba. Isietu ukuacisola o tu ĩha ovina evi kuenda ovina vikuavo oco tu kuate esanju. (Tanga Olosamo 104:12-15, 24.) Ca velapo ceci okuti, tu eca olopandu ku Yehova omo liokulia kualua kuespiritu a siata oku tu ĩha kuenda elavoko likomohĩsa tu kuete kovaso yoloneke.

9. Nye ci pondola oku tu kuatisa oku ivaluka oku eca olopandu ku Yehova? (1 Va Tesalonike 5:17, 18)

⁹ Ci leluka oku ivalako oku eca olopandu  ku Yehova kovina viosi a siata oku tu lingilia. Nye ci pondola oku tu kuatisa oku ivaluka oku eca olopandu? O pondola oku soneha ovina wa siata oku pinga kuenda oku sokolola ndomo Yehova a siata oku tambulula olohutililo viove. Omo liaco, linga ohutililo yimue yolopandu omo liekuatiso wa siata oku tambula kokuaye. (Tanga 1 Va Tesalonike 5:17, 18.) Sokolola okuti: Tu yeva esanju eci vakuetu va lekisa olopandu kokuetu. Cimuamue haico okuti, eci tu ivaluka oku eca olopandu ku Yehova omo lioku tambulula olohutililo vietu, eci ci sanjuisa utima waye. (Va Kol. 3:15) Esunga lipi likuavo li kuete esilivilo lioku eca olopandu ku Suku yetu?

10. Ndomo ca tangiwa 1 Petulu 2:21, momo lie tu kuetele esunga lioku eca olopandu ku Yehova poku tuma Yesu palo posi?

¹⁰ Tanga 1 Petulu 2:21. Tu sukila oku eca olopandu ku Yehova omo lioku tuma Omõlaye o soliwe oco a tu longise. Tu kasi oku lilongisa calua catiamẽla ku Yehova kuenda ndomo tu u sanjuisa poku lilongisa ulandu womuenyo wa Yesu. Nda tua lekisa ekolelo kocilumba ca Kristu, tu pondola oku kuata ukamba wa pama la Yehova Suku kuenda oku kuata ombembua Laye.—Va Rom. 5:1.

11. Momo lie tu sukilila oku likutilila vonduko ya Yesu?

¹¹ Tu eca olopandu ku Yehova omo lioku likutilila kokuaye pocakati Comõlaye. Yesu eye ono yovina viosi tua siata oku pinga ku Yehova. Yehova o yevelela kuenda o tambulula olohutililo vina via siata oku lingiwa vonduko ya Yesu. Yesu hati: “Cosi vu pinga vonduko yange, ndu ci lingili oco okuti, Isia o muisua ulamba mekonda lia Mõla.”—Yoa. 14:13, 14.

12. Esunga lipi likuavo lioku eca olopandu ku Yehova omo Liomõlaye?

¹² Yehova wa ecela akandu etu, omo liocilumba cocisembi ca Yesu. Ovisonehua vi tukula Yesu ‘ndocitunda cinene [ca tumãla] kondio yocalo ca Suku kovailu.’ (Va Hev. 8:1) Yesu eye ‘oñuatisi yetu yi kasi kumue la Isia.’ (1 Yoa. 2:1) Tu eca olopandu vialua ku Yehova, omo lioku tu ĩha Ocitunda cimue Cinene okuti ci kuete elomboloko liekambo lietu lioku lipua kuenda ci tu “livondelelako”! (Va Rom. 8:34; Va Hev. 4:15) Etu ka tua lipuile, kuenje nda ka ca kaile ocilumba ca Yesu, nda ka tua tẽlele oku amẽla ku Yehova pocakati cohutililo. Kakuli atatahãi, ove o tava okuti nda ka tua tẽlele ndomo tu eca olopandu ku Yehova omo liombanjaile ya velapo eye a tu ĩha okuti, Omõlaye o soliwe!

13. Vuteke osimbu handi Yesu ka file, wa lekisa ndati okuti wa solele olondonge viaye?

¹³ Vuteke osimbu handi Yesu ka file, wa likutililako olondonge viaye votembo yimue yalua, wa pinga ku Isiaye oco a ‘va lave omo liondingaĩvi.’ (Yoa. 17:15) Yesu wa va solele calua! Ndaño okuti eye wa kũlĩhĩle okuti wa laikele oku talisiwa ohali yalua, pole, handi wa sakalalele lovapostolo vaye.

14. Tu lekisa ndati okuti tu sole vamanjetu?

¹⁴ oku setukula Yesu, ka tu tiamisila lika utima ka sukila etu muẽle. Pole, olonjanja viosi tu sukila oku likutililako vamanjetu. Poku ci linga, tu kasi oku pokola kocihandeleko ca Yesu coku lisola pokati kuenda tu lekisa ku Yehova okuti tu sole calua vamanjetu. (Yoa. 13:34) Poku likutililako vamanjetu ci pondola oku va kuatisa. Ondaka ya Suku yi tu sapuila okuti, “elombelo liukuesunga li kuete unene.”—Tia. 5:16.

15. Momo lie vamanjetu va sukilila olohutililo vietu?

 ¹⁵ Vamanjetu va sukila olohutililo vietu, momo ovo va siata oku pandikisa kovitangi vialua. Tu pondola oku pinga ku Yehova oco a va kuatise oku pandikisa kovovei, kovilunga, kuyaki, kelambalolo, ale kovitangi vikuavo. Tu likutililavo ka likolisilo vamanji va siata oku linga oco va kuatise vana va sukila ekuatiso. Ove pamue wa kũlĩha omunu umue o kasi oku liyaka lovitangi ndevi. Momo lie ku va tukuila kolonduko eci o likutilila? Tu lekisa ocisola cocili ku vamanji eci tu pinga ku Yehova oco a va kuatise oku pandikisa.

16. Momo lie tu sukilila oku likutilililako vana va tu songuila?

¹⁶ Vana va kuete ocikele coku songuila ekongelo, va sanjuka calua eci vakuavo va va likutililako. Eci oco upostolo Paulu a limbuka. Eye wa soneha hati: “Ndi likutililikovo oco olondaka vi eciwe kokuange eci ndi yulula omẽla wange okuti, ndi tẽla oku vangula lutõi poku sapula elumbu li kola liolondaka viwa.” (Va Efe. 6:19) Koloneke vilo, tu kuetevo vamanji va likolisilako calua okuti va kuete ocikele coku tu songuila. Tu lekisa ocisola cetu kokuavo, poku pinga ku Yehova oco asumũlũise upange wavo.

17-18. Kapuluvi api okuti pamue va tu pinga oku likutilila kuenda nye tu sukila oku ivaluka?

¹⁷ Olonjanja vimue tu lalekiwa oku linga ohutililo. Ndeci, manji umue ukãi poku songola elilongiso Liembimbiliya, citava okuti pamue o pinga ku manjii ukuavo ukãi a kasi oku enda laye oco a likutilile. Omo okuti pamue manji yaco ka kũlĩhĩle ciwa ondonge, citava okuti eye o likutilila kesulilo lielilongiso. Lonjila ndeyi, o ka kũlĩha olondaka a ka sukila oku tukula vohutililo.

¹⁸ Manji umue ulume pamue o nõliwa oco a linge ohutililo kohongele yupange woku kunda, ale kohongele yimue yekongelo. Vamanji alume vakuete ocikele caco, va sukila oku ivaluka ocimãho cohongele. Ohutililo epuluviko lioku lungula, ale yoku eca esapulo limue. Kolohongele vi lingiwa vakongelo, vakukutu atãlo, mua kongela ocisungo kuenda ohutililo, omo liaco, manji wa  nõliwa oco a linge ohutililo, ka sukila oku tukula “olondaka vialua” ca piãla enene koku fetika kuohongele.—Mat. 6:7.

19. Nye ci ka tu kuatisa oku lipongiyila eteke liesombiso lia Yehova?

¹⁹ Tu sukila oku velisapo ohutililo komuenyo wetu, momo eteke liesombiso lia Yehova li kasi ocipepi. Eli olio esunga lieci Yesu a popela hati: “Amamiko oku Lavulula, likutilili olonjanja viosi okuti, vu puluka kovina evi viosi vi laika oku iya.” (Luka 21:36) Nda tua likutilila olonjanja viosi, ekolelo lietu li ka pamisiwa kuenda tu ka lipongiyila oku iya kueteke liesombiso lia Suku.

20. Ndamupi olohutililo vietu vi sokisiwa ndinsensu vielemba liwa?

²⁰ Ovina vipi tua konomuisa? Etu tua velisapo esumũlũho tu kuete lioku likutilila. Ovina vi kuete esilivilo tu sukila oku likutilila, vievi viatiamẽla kocipango ca Yehova. Tu ecavo olopandu Komõla a Suku kuenda Kusoma waye, loku likutililako vamanjetu. Kuenda Yehova o yongolavo okuti tu likutilila oku pinga ovina tu sukila eteke leteke kuenda oku tu kuatisa oku amamako oku pamisa ekolelo lietu. Eci tu sokolola lutate kovina tu tukula vohutililo, tu lekisa okuti tua velisapo esumũlũho liaco. Olondaka vietu vi sokisiwa ndinsensu vielemba liwa ku Yehova okuti, Cu ‘sanjuisa’ calua.—Olosap. 15:8.