1-2. (a) Momo lie omanu vamue tu longisa Embimbiliya va kuetele ohele yoku kala Olombangi Via Yehova? (b) Nye tu konomuisa vocipama cilo?

 ANGA hẽ kua kala ovina vimue via ku sakalaisa osimbu kua lingile Ombangi ya Yehova? Pamue ove wa kala lohele yokuti, vana vu talavayela kumosi, akamba ale epata liove, nda va ku ñualelapo nda wa nõlelepo oku linga Ombangi ya Yehova. Ale pamue wa simĩle okuti lalimue eteke nda wa tẽla oku ambata omuenyo umue u litava lolonumbi via Yehova. Nda oco wa liyeva, wa kũlĩha ciwa ndomo ondonge yimue Yembimbiliya yi pondola oku liyeva kuenda ndomo ka ca lelukile kokuaye oku nõlapo oku kala Ombangi Yimue ya Yehova.

² Yesu wa kũlĩhĩle okuti ovina viaco, via ponduile oku tateka omunu umue oku vumba Yehova. (Mat. 13:​20-22) Pole, eye ka liwekelepo oku kuatisa vana va kala lohele yoku linga olondonge viaye. Eye wa ci linga poku kuatisa olondonge viaye (1)  oku limbuka ovina vi va tateka oku nõlapo oku vumba Yehova, (2) oku vokiya ocisola va kuetele Yehova, (3) oku pitisa kovaso upange wa Yehova komuenyo wavo kuenda (4) oku va longisa ovina va ponduile oku linga poku liyaka lelambalalo. Tu setukula ndati onjila ndomo Yesu a longisa olondonge viaye eci tu talavaya lelivulu Sanjukili Omuenyo Otembo ka yi Pui! oco tu kuatise omunu tu longisa Embimbiliya oku nõlapo oku kala Ombangi ya Yehova?

KUATISA OMUNU O LONGISA EMBIMBILIYA OKU LIMBUKA OVINA VI U TATEKA OKU NÕLAPO OKU VUMBA YEHOVA

3. Nye pamue ca tateka Nikodemo oku kala ondonge yimue ya Yesu?

³ Nikodemo okuti wa kala usongui umue wa va Yudea, wa liyaka locitangi cimue co tateka oku linga ondonge ya Yesu. Noke yolosãi epandu tunde eci Yesu a fetika upange waye woku kunda, oco lika Nikodemo a limbuka okuti, Yesu wa kala Mesiya. (Yoa. 3:​1, 2) Pole, Nikodemo wa nõlapo oku lisanga la Yesu vuyombeki omo “liusumba wa va Yudea.” (Yoa. 7:13; 12:42) Pamue eye wa kala lusumba woku  pumba ocikele caye cusongui kuenda onepa yimue yukuasi waye, nda wa nõlelepo oku kala ondonge ya Yesu. a

4. Yesu wa kuatisa ndati Nikodemo oku kuata elomboloko liovina Suku o yonguilile?

⁴ Nikodemo wa kũlĩhĩle ciwa ocihandeleko ca eciwile ku Mose, pole, wa sukilile ekuatiso oco a kuate elomboloko liovina Yehova o yonguilile. Yesu wo kuatisa ndati? Yesu wa sanda otembo yoku kala la Nikodemo, loku sapela laye ndaño muẽle luteke. Yesu wa sapuila ku Nikodemo okuti, oco a kale ondonge yaye, wa sukilile oku likekembela akandu aye, oku papatisiwa vovava kuenda oku lekisa ekolelo Komõla a Suku.—Yoa. 3:​5, 14-21.

5. Tu kuatisa ndati omunu tu longisa Embimbiliya oku limbuka ovina vi kasi oku u tateka oku vumba Yehova?

⁵ Ndaño okuti omunu umue tu longisa Embimbiliya o kuete ale elomboloko liwa Liovisonehua, pamue eye o sukila ekuatiso oco a limbuke ovina vi kasi oku u tateka oku vumba Yehova. Ndeci, pamue eye ka kuete otembo yalua omo liupange waye woku sanda eteku, ale epata liaye ka li yongola okuti eye o kala Ombangi Yimue ya Yehova. Ndeci Yesu a linga, sanda otembo yoku u kuatisa. O pondola oku u laleka konjo yove oco o lie laye loku sapela. Eci vu linga ovina viaco kumuamue, citava okuti eye o ka lianja loku ku lomboluila ovina viatiamẽla komuenyo waye kuenje o ka limbuka ovina vi kasi oku u tateka. Vetiya omunu o longisa Embimbiliya oku linga apongoloko a sukiliwa okuti, ka ci lingi oco a ku sanjuise, pole, o ci lingila omo liocisola a kuetele Yehova.

6. O pondola oku kuatisa ndati omunu una o longisa Embimbiliya oku kuata utõi woku kapako ovina a kasi oku lilongisa? (1 Va Korindo 16:13)

⁶ Eci omunu o longisa Embimbiliya a kolela okuti Yehova o ko kuatisa oku kapako olonumbi Viembimbiliya komuenyo waye, eye o ka kuata utõi woku kapako ovina a kasi oku lilongisa. (Tanga 1 Va Korindo 16:13.) Omunu umue o longisa Embimbiliya o pondola oku sokisiwa lulongisi umue wo kosikola. Kokuove, ulongisi upi nda wa sola vali oku kuata? Citava okuti, nda wa sola ulongisi una okuti lepandi, ka ku longisa lika oku linga ovina, pole, o ku kuatisavo oku liyeva okuti o pondola oku linga ovina viaco. Cimuamue haico okuti, ulongisi uwa Wembimbiliya ka longisa lika komunu una a longisa Embimbiliya ovina Yehova a yongola okuti oco a sukila oku linga, pole, u kuatisavo oku kũlĩha okuti lekuatiso lia Yehova, eye o pondola oku linga apongoloko a sukiliwa komuenyo waye. Oco hẽ nye o sukila oku linga, oco o kalevo ulongisi uwa Wembimbiliya?

KUATISA OMUNU O LONGISA EMBIMBILIYA OKU VOKIYA OCISOLA A KUETELE YEHOVA

7. Yesu wa kuatisa ndati olonjeveleli viaye oku vokiya ocisola va kuatelele Yehova?

⁷ Yesu wa kũlĩhĩle okuti, nda omunu umue o sole Yehova, o ka vetiyiwa oku kapako ovina a lilongisa. Eye olonjanja vimue wa enda oku longisa ovina via ponduile oku kuatisa olondonge viaye, oku vokiya ocisola va kuetele Isiavo wokilu. Ndeci, Yesu wa sokisa Yehova nda isia umue eca komãla vaye ovina viwa. (Mat. 7:​9-11) Citava okuti vamue pokati kolonjeveleli viaye, ka via kuatele isia umue ukuacisola. Sokolola ndomo ovo va liyeva eci Yesu a ta olusapo lua isia umue ukuahenda, wa tambula vali omõlaye wa lingile ovina vialua vĩvi. Yesu wa va kuatisa oku limbuka okuti, Yehova o va sole calua kuenda o yongola oku va kuatisa.—Luka 15:​20-24.

8. O kuatisa ndati omunu o longisa Embimbiliya oku vokiya ocisola a kuetele Yehova?

⁸ Ove o pondolavo oku kuatisa omunu o longisa Embimbiliya oku vokiya ocisola a kuetele Yehova, poku u longisa catiamẽla kovituwa viwa via Yehova. Vokuenda kuelilongiso limue, kuatisa omunu o longisa Embimbiliya oku kuata elomboloko ndomo ovina a lilongisa, vi situlula ocisola Yehova a tu kuetele. Poku konomuisa catiamẽla Kocisembi, kuatisa omunu o longisa Embimbiliya oku kuata elomboloko liokuti, Yehova ka ecele lika ocisembi omo a sole omanu vosi pole, wa ci lingilavo omo liocisola o kuetele. (Va Rom. 5:8; 1 Yoa. 4:10) Eci  omunu tu longisa Embimbiliya a kuata elomboloko liokuti Yehova u sole, ci ko kuatisa oku sola vali calua Yehova.—Va Gal. 2:20.

9. Nye ca kuatisa manji Michael oku nõlapo oku vumba Yehova?

⁹ Kũlĩhĩsa ulandu wa manji Michael wo kofeka yo Indonesia. Eye wa kulila vocili pole, ka papatisiwile. Eci a tẽlisa 18 kanyamo, wa enda kofeka yikuavo oco a ka talavaye ndongendisi yekãlu. Noke wa kuela, pole, wa siapo epata liaye oco amameko oku ka talavaya kofeka yikuavo. Vokuenda kuotembo yaco, ukãi waye lomõlaye ufeko va fetika oku lilongisa Embimbiliya, loku kapako ovina va kala oku lilongisa. Eci ina yaye a fa, manji Michael wa nõlapo oku tiukila kofeka yaye oco a ka tate isiaye kuenje wa tava oku lilongisa Embimbiliya. Eci va konomuisa onepa yokuti, “Lilongisa Ondongosi” yocipama 27 celivulu Sanjukili Omuenyo Otembo ka yi Pui! co vetiya calua. Poku sokolola ndomo Yehova a liyeva eci a mola Omõlaye oku tala ohali, manji Michael wa fetika oku lila. Eye wa limbuka ocisola Yehova la Yesu vo kuetele kuenje wa linga apongoloko komuenyo waye kuenda wa papatisiwa.

KUATISA OMUNU O LONGISA EMBIMBILIYA OKU PITISA KOVASO UPANGE WA YEHOVA KOMUENYO WAYE

10. Nye Yesu a linga oco a kuatise olondonge viaye oku pitisa kovaso upange wa Yehova komuenyo wavo? (Luka 5:​5-11) (Talavo ociluvialuvia.)

¹⁰ Olondonge viatete via Yesu via limbuka lonjanga okuti Yesu eye wa kala Mesiya wa likuminyiwile, pole, ovo va sukilile ekuatiso, oco va pitise kovaso upange woku kunda komuenyo wavo. Petulu la Andereu va kala ale olondonge via Yesu vokuenda kuotembo yimue, eci eye a va laleka oco vo kuame vokuenda kuotembo yosi. (Mat. 4:​18, 19) Ovo kumue la Tiago kuenda Yoano, va kala anyanga volõsi okuti omĩlu yimue ya enda oku va ĩha olombongo vialua. (Mar. 1:​16-20) Eci Petulu la Andereu “va sia awanda avo,” citava okuti va linga esokiyo ndomo va laikele oku tekula apata avo osimbu va kala oku kuama Yesu. Nye ca va kuatisa oku pitisa kovaso upange wa Yehova komuenyo wavo okuti, oku nganyala olombongo vialua ci sule? Yesu wa linga ocikomo cimue oco a lekise kokuavo okuti, Yehova wa ponduile oku va ĩha ovina  va sukilile. Eci ca va kuatisa oku kolela okuti, nda ovo va pitisile kovaso upange wa Yehova, eye wa laikele o ku va ĩha ovina va sukilile.—Tanga Luka 5:​5-11.

11. Nye tu pondola oku sapuila komunu umue tu longisa Embimbiliya oco a pamise ekolelo liaye?

¹¹ Etu ka tu pondola oku linga ovikomo ndeci Yesu a linga, pole, tu pondola oku lombolola ovolandu a lekisa ndomo Yehova a siata oku kuatisa omanu vana va pitisa kovaso upange waye komuenyo wavo. Ndeci, ivaluka hẽ ndomo Yehova a ku kuatisa eci ove wa fetika oku enda enda kolohongele? Pamue wa sukilile oku sapela la cime cove cupange, loku u lomboluila esunga lieci ku ponduila vali oku talavaya olowola vialua kupange, omo okuti ca kala oku ku tateka oku enda enda kolohongele. Poku lombolola ovolandu ove komunu o longisa Embimbiliya, lekisa kokuaye ndomo ekolelo liove lia pamisiwa, poku mola ndomo Yehova a ku kuatisa konjila wa nõla, yoku pitisa kovaso upange waye komuenyo wove.

12. (a) Momo lie tu sukilila oku enda la vamanji va litepa kelilongiso lietu Liembimbiliya? (b) Nye vali tu pondola oku talavaya laco oco tu kuatise omunu tu longisa Embimbiliya oku pitisa kovaso upange wa Yehova?

¹² Ci kuetevo esilivilo eci vamanji vakuavo va lombolola ovolandu avo komunu tu longisa Embimbiliya, catiamẽla konjila ndomo va kuatisiwa, poku pitisa kovaso upange wa Yehova komuenyo wavo. Omo liaco, laleka vamanji va litepa, oco wendeli kumosi kelilongiso liove Liembimbiliya. Pinga kokuavo oco va lombolole ndomo va tava kocili kuenda ovina ovo va linga, oco va pitise kovaso upange wa Yehova komuenyo wavo. Handi vali, sokiya otembo lomunu o longisa Embimbiliya oco vu tali olovideo ponepa losapi hati: “Lilongisa Ondongosi” ale ponepa “Oco o Kũlĩhe Ovina Vikuavo” velivulu Sanjukili Omuenyo Otembo ka yi pui. Ndeci, poku lilongisa ocipama 37 loku tala ovideo losapi hati, Yehova o Kamamako Oku tu Tata, sapeli eci catiamẽla kovideo yaco kuenda kuatisa omanu o longisa Embimbiliya oku limbuka okuti, Yehova o ko kuatisa nda wa pitisa kovaso upange wa Yehova komuenyo waye.

KUATISA OMUNU O LONGISA EMBIMBILIYA NDOMO A PONDOLA OKU LIYAKA LELAMBALALO

13. Yesu wa pongiya ndati olondonge viaye oco vi liyake lelambalalo?

¹³ Yesu olonjanja vialua wa sapuila olondonge viaye okuti, via laikele oku liyaka lelambalalo li tunda komanu vakuavo, oku kongelamo vakuepata liavo. (Mat. 5:11; 10:​22, 36) Yesu eci handi ka file wa sapuila olondonge viaye okuti, via laikele oku pondiwa omo lioku vumba Yehova. (Mat. 24:9; Yoa. 15:20; 16:2) Omo liaco, wa vi vetiya oco vi lekise utate kupange wavo woku kunda. Ndeci, Yesu wa vi sapuila oco ka vi ka lihoye lomanu vana va suvuka alongiso avo. Wa vi sapuilavo oco vi kuate utate lovina va popia levi va linga, oco vi amameko oku kunda.

14. Tu kuatisa ndati omunu tu longisa Embimbiliya oku lipongiyila elambalalo? (2 Timoteo 3:12)

¹⁴ Ndeci Yesu a linga, tu pondola oku kuatisa omunu tu longisa Embimbiliya oku lipongiyila elambalalo, poku u lomboluila ovina omanu vana va talavayela kumosi, akamba ale vakuepata liaye va pondola oku popia loku linga, omo lioku lilongisa Embimbiliya. (Tanga 2 Timoteo 3:12.) Omanu vamue va talavayela kumosi va pondola oku u sepula omo okuti eye o kasi oku ambata omuenyo umue u litava lolonumbi Viembimbiliya. Vakuavo oku kongelamo vakuepata liaye, va pondola oku pisa ovina a kasi oku lilongisa Vembimbiliya. Eci tu sapuila selo komunu tu longisa Embimbiliya ndomo a pondola oku liyaka lelambalalo, eye o ka tẽla oku liteyuila eci omanu vakuavo va ko lambalala.

15. Nye ci pondola oku kuatisa omunu tu longisa Embimbiliya oku liyaka lelambalalo li tunda kepata?

¹⁵ Nda omunu o longisa Embimbiliya o kasi oku lambalaliwa lepata, u kuatisa oku sokolola esunga lieci epata liaye lia temela omo eye a kasi oku lilongisa Embimbiliya Lolombangi Via Yehova. Pamue epata liaye li sima okuti eye wa yapuisiwa, ale ovo va kuete ovisimĩlo ka via sungulukile viatiamẽla Kolombangi Via Yehova. Toke muẽle Yesu, wa liyakavo lelambalalo lia vakuepata liaye. (Mar. 3:21; Yoa. 7:5) Omo liaco, kuatisa omunu o longisa Embimbiliya oku lekisa epandi kuenda utate  poku vangula lomanu vakuavo oku kongelamo vakuepata liaye.

16. Tu kuatisa ndati omunu tu longisa Embimbiliya oku lekisa utate poku lombolola ovina a kasi oku lilongisa?

¹⁶ Eci vakuepata liomunu tu longisa Embimbiliya, va lekisa onjongole kovina a kasi oku lilongisa, eye o pondola oku lekisa olondunge poku yuvula oku lombolola ovina vialua vonjanja yimuamue. Momo nda wa lombolola ovina vialua, ovo va ka kuata elomboloko kuenje va ka likala oku u yevelela onjanja yikuavo. Omo liaco, vetiya omunu o longisa Embimbiliya, oku lombolola ovina eye a kasi oku lilongisa lonjila yimue yecelela okuti, omanu va kuata vali onjongole yoku yevelela onjanja yikuavo. (Va Kol. 4:6) Pamue eye o pondola oku sapuila vakuepata liaye oco va iñile vonumbi yo jw.org. Eci ci ka ecelela okuti, ovo va lilongisa ovina vikuavo viatiamẽla Kolombangi Via Yehova olonjanja viosi va yongola.

17. O pindisa ndati omunu o longisa Embimbiliya oku tambulula apulilo amue, omanu va linga atiamẽla Kolombangi Via Yehova? (Talavo ociluvialuvia.)

¹⁷ Ove o pondola oku talavaya lonepa yokuti, “Apulilo a Siata” yi sangiwa vo jw.org, oco o kuatise omunu o longisa Embimbiliya oku pongiya atambululo a leluka nda okuti, vakuepata ale vana va talavayela kumosi va linga apulilo kokuaye. (2 Tim. 2:​24, 25) Kesulilo liocipama locipama, konomuisi onepa yokuti “Omanu Vamue va Popia Vati,” yelivulu Sanjukili Omuenyo Otembo ka yi pui! Vetiya omunu o longisa Embimbiliya, oku pongiya ndomo a pondola oku lomboluila komanu ovina eye a tava. Nda ci sukiliwa, u kuatisa oku sanga onjila ya leluka yoku lombolola ovina eye a kasi oku lilongisa. Oku ci linga ci ko kuatisa oku teyuila lutõi ekolelo liaye.

18. O vetiya ndati omunu o longisa Embimbiliya oku kala ukundi? (Mateo 10:27)

¹⁸ Yesu wa handeleka olondonge viaye oku kunda olondaka viwa komanu. (Tanga Mateo 10:27.) Eci omunu tu longisa Embimbiliya a fetika oku kunda kumue la vamanji, eye o ka limbuka ekuatiso lia Yehova kuenda ekolelo liaye kokuaye li ka livokiya. O kuatisa ndati omunu o longisa Embimbiliya oku tumbika ocimãho caco? Eci vekongelo ku eciwa esapulo liupange ulikasi woku kunda, vetiya omunu o longisa Embimbiliya oku sokolola ovina a sukila oku linga oco a kale ukundi. U lomboluila esunga lieci ca lelukila komanu vamue oku fetika oku kunda vapuluvi aco. Ocimãho cikuavo a pondola oku litumbikila, oku li sonehisa oco a linge olonepa kohongele yo vokati kosemana. Osimbu eye a likolisilako oku tẽlisa ocimãho caco, ci ka leluka kokuaye oku lombolola lutõi ovina eye a kasi oku lilongisa.

LEKISA KOMUNU O LONGISA EMBIMBILIYA OKUTI WO KOLELA

19. Yesu wa lekisa ndati okuti wa kolelele kolondonge viaye kuenda tu u setukula ndati?

¹⁹ Osimbu Yesu ka endele kilu, wa sapuila olondonge viaye okuti eteke limue va laikele oku kala  vali kumosi. Ovio ka via kuatele elomboloko liokuti, Yesu wa kala oku vangula catiamẽla kokuenda kuaye kilu. Pole, Yesu wa tiamisila utima kekolelo liavo okuti katatahãi avo hakoko. (Yoa. 14:​1-5, 8) Yesu wa kũlĩhĩle okuti olondonge viaye via sukilile otembo oco vi kuate elomboloko liovina vimue, ndeci elavoko lioku ka kala kilu. (Yoa. 16:12) Ndeci Yesu a linga, tu pondola oku lekisa komanu tu longisa Embimbiliya okuti tua kolela okuti, ovo va yongola oku sanjuisa Yehova.

20. Manji umue wo kofeka yo Malawi wa lekisa ndati okuti wa kolelele komunu a kala oku longisa Embimbiliya?

²⁰ Kolela okuti omunu o longisa Embimbiliya o yongola oku linga eci ca sunguluka. Kũlĩhĩsa ulandu wa manji umue ukãi o tukuiwa Chifundo wo kofeka yo Malawi. Eye wa fetika elilongiso limue Liembimbiliya velivulu Sanjukili Omuenyo Otembo ka yi Pui! lufeko umue ukuetavo lio Katolika o tukuiwa hati Alinafe. Eci ovo va mala oku lilongisa ocipama 14, manji Chifundo wa pula Alinafe ocisimĩlo caye catiamẽla koku fendela oviteka. Alinafe wa tambulula lonyeño hati: “Omunu eye o nõla onjila a yongola oku kuama!” Noke manji Chifundo wa simĩle okuti Alinafe o liwekapo oku lilongisa. Pole, eye lepandi wamamako oku longisa Alinafe Embimbiliya lelavoko liokuti, vokuenda kuotembo eye o ka kuata elomboloko liokuti ka ca sungulukile oku fendela oviteka. Noke yolosãi vimue, manji Chifundo wo linga epulilo li sangiwa kocipama 34 liokuti: “Elilongiso liove Liembimbiliya kuenda ocili catiamẽla ku Yehova Suku, via siata oku ku kuatisa ndati toke cilo?” Manji Chifundo wa lombolola ndomo Alinafe a tambulula. Eye hati: “Alinafe wa tukula atosi alua a komõhisa okuti limue pokati kalio lieli liokuti, Olombangi Via Yehova ka vi lingi lacimue ci pisiwa Lembimbiliya.” Noke liotembo yimue, Alinafe wa liwekapo oku fendela oviteka kuenje wa papatisiwa.

21. Tu kuatisa ndati omunu tu longisa Embimbiliya oku nõlapo oku vumba Yehova?

²¹ Ndaño okuti Yehova eye “o kulisa,”etu tu kuete ocikele coku kuatisa omanu tu longisa Embimbiliya oku kula konepa yespiritu. (1 Va Kor. 3:7) Tu linga ovina vialua okuti, oku u longisa lika ovina Suku a yongola okuti ovio a linga ci sule. Tu u kuatisa oku vokiya ocisola a kuetele Yehova. Tu u vetiya oku lekisa ocisola a kuetele Yehova poku pitisa kovaso upange wa Yehova komuenyo waye. Tu u longisavo oku kolela okuti, Yehova o ko kuatisa eci a liyaka lelambalalo. Omo liaco, eci tu lekisa komunu tu longisa Embimbiliya okuti tuo kolela, tu pamisa utõi waye wokuti, eye o pondola oku kapako olonumbi via Yehova komuenyo waye kuenda oku nõlapo oku u vumba.