1. Nye Daviti a popia catiamẽla koku omboka kua Yehova?

ANGA hẽ tu pondola oku popia okuti Yehova o lekisa umbombe? Oco, tu pondola. Daviti wa popele hati: “Wa nyiha otevele yeyovo liove kuenda okuomboka kuove kua nyiha unene.” (2 Sam. 22:36; Osa. 18:35) Daviti poku popia olondaka evi, citava okuti wa kala oku sokolola keteke eci uprofeto Samuele eyile konjo ya isiaye, oco a waveke una wa laikele oku kala osoma ya va Isareli. Daviti wa kala umalẽhe pokati ka vamanjaye ecelãla, pole, ndaño ndoco, Yehova eye a nõla oco a piñale Soma Saulu.—1 Sam. 16:1, 10-13.

2. Nye tu ka konomuisa vocipama cilo?

² Daviti wa kuata ovisimĩlo vimuamue viusonehi Wosamo 113 wa popia catiamẽla ku Yehova hati: ‘Eye o petamela oku vanja evi vi kasi kilu, levi vi kasi posi. O pindula omumbe ha yi tumalisa lolosoma.’ (Osa. 113:6-8) Vocipama cilo, tu ka konomuisa ovolandu amue Yehova a lekisa umbombe kuenda eci tu pondola oku lilongisa kongangu yaye. Noke tu ka konomuisa eci tu pondola oku lilongisila ku Soma Saulu, kuprofeto Daniele kuenda ku Yesu catiamẽla koku liketisa.

3. Yehova o tu tenda ndati kuenda eci ci lekisa nye?

³ Tu pondola oku lilongisa ovina vialua poku mola ndomo Yehova a tata afendeli vaye ka va lipuile. Eye ka tu tava lika ndafendeli vaye, pole, o tu tavavo ndakamba vaye. (Osa. 25:14) Oco tu kuate ukamba waco, Yehova wa nõlapo oku eca omõlaye ndocilumba oco akandu etu a eceliwe. Ocili okuti Yehova ukuahenda kuenda ukuacikembe! Cosi eci ci lekisa okuti, eye Osuku yimue yi lekisa umbombe.

4. Yehova wa tu lulika lelianjo lioku linga nye kuenda momo lie?

 ⁴ Sokolola konjila yikuavo ndomo Yehova a lekisa umbombe. Yehova omo okuti eye Ululiki, nda wa kuata omoko yoku nõla ndomo omunu lomunu ambata omuenyo waye. Pole eye ka ci lingile. Eye wa tu lulika lesetahãlo liaye kuenda wa tu ĩha elianjo lioku nõla, eci tu yongola oku linga ndaño wa kũlĩha okuti etu tu sule, eye wa velapo. Momo Yehova ka yongola okuti tu u vumba lekisika, pole, o yongola okuti tu ci linga omo liocisola tu u kuetele kuenda omo lioku limbuka asumũlũho a tunda koku pokola kokuaye. (Esin. 10:12; Isa. 48:17, 18) Tu kuete esumũlũho lialua lioku vumba Suku una okuti o lekisa umbombe!

5. Yehova o tu longisa ndati oku kala ambombe? (Tala ociluvialuvia koñoño.)

⁵ Onjila ndomo Yehova a tata omanu, ci tu vetiya oku lekisa umbombe. Ka kuli omunu laumue voluali okuti wa velapo Yehova kolondunge. Ndaño ndoco, eye o tava kovisimĩlo viomanu. Ndeci, Yehova wa tava okuti Omõlaye u kuatisa koku lulika ovina viosi. (Olosap. 8:27-30; Va Kol. 1:15, 16) Ndaño okuti Yehova wa velapo, eye ecelela okuti omanu vakuavo vo kuatisa. Ndeci, eye wa nõla Yesu oco a kale Osoma Yusoma wa Suku kuenda wa ecavo ocikele cimue kueci ci soka 144.000 komanu va ka viala la Yesu. (Luka 12:32) Ocili okuti, Yehova wa eca epindiso ku Yesu oco a kale Osoma kuenda Ocitunda Cinene. (Va Hev. 5:8, 9) Eye o pindisavo vana va ka viala la Yesu. Pole, Yehova ka lavulula ovina viosi va linga osimbu va tẽlisa ocikele cavo. Yehova wa kolela okuti ovo va ka tẽlisa ocipango caye.—Esit. 5:10.

6-7. Ongangu yipi Yehova a eca catiamẽla koku eca ovikele ku vakuetu?

⁶ Nda Yehova, okuti ka sukila ekuatiso liomunu umue ecelela okuti omanu vakuavo vo  kuatisa, etu tu sukilavo oku ci linga! Ove hẽ usongui umue wepata, ale wukulu umue wekongelo? Nda oco, setukula Yehova: Eca ovikele komanu vakuavo kuenda yuvula oku lavulula ndomo va linga ovopange aco. Nda wa setukula Yehova, ku ka kuata lika esanju lioku mola upange oku tẽlisiwa, pole, o ka pindisavo vakuene kuenda o ka va kuatisa okuti ka va kuata ohele yoku linga upange. (Isa. 41:10) Vana va kuete ovikele, nye vali va pondola oku lilongisa ku Yehova?

⁷ Embimbiliya li lekisa okuti Yehova wa kapako ovisimĩlo, viovangelo. (1 Olos. 22:19-22) Ene alonjali, vu pondola oku setukula ndati ongangu ya Yehova? Nda ci sukiliwa, pulisi komãla vene ndomo ovina vimue vi pondola oku lingiwa. Kuenda nda ovisimĩlo viavo via sunguluka, linga ndomo va ku sapuila.

8. Yehova wa lekisa ndati epandi ku Avirahama la Sara?

⁸ Yehova o lekisavo umbombe poku kala ukuepandi. Ndeci, Yehova o lekisa epandi kafendeli vaye eci va linga kokuaye apulilo amue lesumbilo atiamẽla konjila yimue eye a nõla. Eye wa yevelela Avirahama osimbu a kala oku situlula asakalalo aye atiamẽla konjila ya Yehova yoku nyõla o Sodoma lo Gomora. (Efet. 18:22-33) Sara wa yola eci Yehova o likuminya okuti o ka mina ndaño okuti wa kukile ale, pole, Yehova ka sumuile, ale oku tema. (Efet. 18:10-14) Yehova wa tata Sara lesumbilo.

9. Ndamupi olonjali kuenda akulu vekongelo, va pondola oku setukula ongangu ya Yehova?

⁹ Ove hẽ u isia, ale ukulu wekongelo? O pondola oku setukula ndati Yehova? Likũlĩhĩsa handi ndomo o liyeva eci omãla vove, ale vamanji vekongelo va situlula ovisimĩlo viavo viatiamẽla konjila yimue wa nõla. Anga hẽ vepuluvi liaco, o pisa ovisimĩlo viavo? Ale o tava kovisimĩlo viavo? Vana va kuete ocikele coku songola nda va setukula Yehova koku lekisa umbombe, apata kuenda akongelo a kuatisiwa. Toke palo, tua lilongisa ndomo tu setukula umbombe wa Yehova. Cilo, tu lilongisa ndomo tu lekisa esuluviko poku konomuisa ovolandu amue Embimbiliya.

10. Volonjila vipi Yehova a tu longisa?

¹⁰ Yehova, ‘Ulongisi wetu wa Velapo,’ wa tuma oku soneha Vembimbiliya ovolandu a pondola oku tu kuatisa. (Isa. 30:20, 21) Vembimbiliya tu sangamo ovolandu omanu vana va lekisa ocituwa Suku a tava ndeci, esuluviko. Pole Vembimbiliya tu sangamovo ovolandu omanu vana ka va lekisile ocituwa caco kuenda eci ca pita lavo. Eci tu konomuisa ovolandu aco loku a sokolola tu kuatisiwa calua.—Osa. 37:37; 1 Va Kor. 10:11.

11. Nye tu pondola oku lilongisila kongangu yĩvi ya Saulu?

¹¹ Sokolola eci ca pita la Soma Saulu. Kefetikilo wa lekisa esuluviko. Eye wa limbukile okuti ka tẽla oku linga ovina viosi kuenda wa kuata ohele yoku tava ovikele vikuavo. (1 Sam. 9:21; 10:20-22) Pole, vokuenda kuotembo Saulu wa lekisa epela. Eye wa lekisa ocituwa caco noke yoku kala osoma. Onjanja yimue, eye ka lekisile epandi kuenda ka yonguile oku talamẽla soma Samuele. Eye ka lekisile esuluviko loku kolela Yehova una wa ponduile oku teyuila omanu kuenje Saulu wa eca ocilumba ku Yehova, cina okuti ka kuatele omoko yoku ci linga. Nye ceyililako? Saulu ka kuatele vali ekuatiso lia Yehova kuenda ka taviwile vali oco a kale osoma. (1 Sam. 13:8-14) Omo liaco, eli elungulo kokuetu kuenda lalimue eteke ka tu yongola oku lekisa epela ndeci Saulu a linga.

12. Ndamupi Daniele a lekisa esuluviko?

 ¹² Kaliye kũlĩhĩsa ulandu ukuavo wuprofeto Daniele okuti wa litepa lowu wa Saulu. Daniele vokuenda kuomuenyo waye wosi, wa kala ufendeli umue wa Suku, okuti wa lekisa umbombe kuenda esuluviko, poku sanda ekuatiso lia Yehova olonjanja viosi. Eci Yehova a kuatisa Daniele oku situlula onjoi soma Nevukandesa a kuata, Daniele ka li sivayele eye muẽle, pole, wa eca esivayo liosi ku Yehova. (Dan. 2:26-28) Nye tu lilongisilako? Nda vamanji va tu pandiya omo liohundo tua linga, ale tua litunda ciwa kupange woku kunda, tu sukila oku eca esivayo liosi ku Yehova. Tu sukila oku lekisa esuluviko loku limbuka okuti tua tẽla oku litunda ciwa omo liekuatiso lia Yehova. (Va Fil. 4:13) Nda tua linga ndoco, ka tu setukula lika Daniele, pole, tu setukulavo ongangu yiwa ya Yesu. Ndamupi?

13. Nye tu lilongisa ku Yesu ndomo ca tangiwa ku Yoano 5:19, 30?

¹³ Ndaño okuti Yesu Omõla wa lipua wa Suku, olonjanja viosi wa kolelele ku Yehova. (Tanga Yoano 5:19, 30.) Eye lalimue eteke a setekele oku tambula ocikele ca Isiaye wo kilu. Ku Va Filipoi 2:6, ku tu sapuila okuti, Yesu “ka sokoluile oku lisokisa la Suku.” Omo okuti Yesu Omõla umue ukuepokolo, eye wa kũlĩhĩle olongave viaye kuenda wa sumbilile omoko ya Isiaye yoku songola.

14. Eci Yesu vo pinga oco a linge cina okuti ka kuatele omoko yoku ci linga, wa tambulula ndati?

¹⁴ Sokolola ndomo Yesu a liyeva eci olondonge viaye Tiago la Yoano kumue la ina yavo vo pinga cimue okuti eye ka kuete omoko yoku ceca. Yesu vepuluvi liaco, wa va sapuila okuti Isiaye wo kilu, eye lika o kuete omoko yoku nõla u o tumala kondio lo kepĩli lia Yesu Vusoma waye. (Mat. 20:20-23) Yesu wa kũlĩhĩle apa pa sulila olongave viaye. Eye wa lekisa esuluviko. Lalimue eteke a lingile ovina Yehova ko tumile oku linga. (Yoa. 12:49) Tu pondola oku setukula ndati ongangu yaye yiwa?

15-16. Tu kapako ndati elungulo li sangiwa ku 1 Va Korindo 4:6?

¹⁵ Etu tu setukula ocituwa ca Yesu coku lekisa esuluviko poku kapako elungulo li sanguiwa kukanda 1 Va Korindo 4:6 liokuti: “Pokoli kovina via sonehiwa.” Kuenje nda va tu pinga elungulo limue, ka tu yongola oku tukula ovisimĩlo vietu muẽle, ale oku vangula ocina catete ciya vutima wetu. Pole, tu sukila oku  eca elungulo lia kunamẽla Vembimbiliya kuenda valivulu etu. Lonjila eyi, tu lekisa okuti tua kũlĩha apa pa sulila ongave yetu. Esuluviko, li tu kuatisa oku limbuka okuti Suku Ukuonene Wosi olonjanja viosi oku ‘tetulula kuaye kuesunga.’—Esit. 15:3, 4.

¹⁶ Eci tu lekisa esuluviko tu eca esivayo ku Yehova. Pole, kuli asunga akuavo eci tu sukilila oku lekisa ocituwa caco. Kaliye, tu kũlĩhĩsa ndomo umbombe kuenda esuluviko vi pondola oku tu nenela esanju, loku tu kuatisa oku kuata ukamba uwa la vakuetu.

17. Momo lie omanu vana okuti ambombe haivo va lekisa esuluviko va kuetele esanju?

¹⁷ Eci tu lekisa umbombe kuenda esuluviko, tu kuata esanju lialua. Momo lie? Momo nda tu limbuka okuti ka tu tẽla oku linga ovina viosi, tu kala vakualopandu kuenda tu sanjukila ekuatiso liosi tu tambula ku vakuetu. Ndeci, ivaluka hẽ eci Yesu a sakula vakuavilundu ekũi? Umosi lika pokati kavo wa tiuka oku eca olopandu ku Yesu omo lioku sakula uvei waye. Eye lalimue eteke nda a tẽla oku li sakula eye muẽle. Umbombe kuenda esuluviko ulume a lekisa vio vetiya oku sivaya Suku omo liekuatiso a tambula.—Luka 17:11-19.

18. Umbombe kuenda esuluviko vi tu kuatisa ndati oku kuata ukamba la vakuetu? (Va Roma 12:10)

¹⁸ Omunu una o lekisa umbombe lesuluviko, ci leluka kokuaye oku lika la vakuavo kuenda oku linga akamba. Momo lie? Momo omunu wa tuwa ndoco, o limbuka lonjanga ovituwa viwa via vakuavo kuenda o kolela kokuavo. Omunu vaco, o lekisa esanju eci a limbuka okuti vakuavo va litunda ciwa kovikele viavo. Handi vali, ka kuete ohele yoku pandiya vakuavo, ale oku va sumbila.—Tanga Va Roma 12:10.

19. Momo tu sukilila oku amamako oku yuvula epela?

 ¹⁹ Omunu ukuepela ka sanjuka eci vakuavo va litunda ciwa. Omanu ndava ci va tĩlila oku eca epandiyo ku vakuavo, pole, va yongola okuti ovo lika va pandiyiwa. Ovo va sanda oku lisokisa la vakuavo kuenda va vetiya oku lekisa ocituwa coku li velisapo. Omanu vaco, ka va pindisa kuenda ka va eci ovikele ku vakuavo, pole, ovo va sima ndoco: “Nda ove o yongola okuti cimue ci lingiwa ciwa” ndomo o yongola, “o sukila oku ci linga ove muẽle.” Omanu vaco, va tenda lika okuti ocina cimue ca lingiwa ciwa, nda ca lingiwa ndomo va yongola. Handi vali omanu vakuepela olonjanja vialua vakuacipululu kuenda vakuanya. (Va Gal. 5:26) Ovo, ca tĩla calua oku kuata akamba va kala otembo yalua. Nda tua limbuka okuti tu kasi oku kuata epela, tu sukila oku likutilila loku situlula ovisimĩlo vietu ku Yehova kuenda oku pinga oco a tu kuatise oku ‘pongolola ovisimĩlo.’—Va Rom. 12:2.

20. Momo lie tu sukilila oku lekisa umbombe lesuluviko?

²⁰ Tu pandula calua omo liongangu yiwa ya Yehova! Tu lete ndomo a lekisa umbombe konjila ndomo a tata afendeli vaye kuenje tu yongola oku u setukula. Tu sukilavo oku setukula ongangu yomanu vana va tukuiwa Vembimbiliya okuti va lekisa esuluviko okuti va endaenda la Yehova. Nda tua ci linga, tu ka eca esivayo lulamba ku Yehova, okuti eye lika o sesamẽla. (Esit. 4:11) Handi vali, tu kamamako oku endaenda otembo yosi la Isietu wo kilu, una o sole ambombe kuenda haivo va lekisa esuluviko.