Vamue va kũlĩhĩsa ale ulandu waco, va siata oku linga epulilo eli. Pole, ovinimbu evi, via tukula alume vavali va kuata onduko ya Mefivosiete kuenda tu pondola oku lilongisilako cimue kueci ca pita.

Soma Saulu wo ko Isareli, wa kuatele omãla epanduvali valume kuenda vavali vakãi. Omõla uveli wa Saulu nduko yaye Yonatão. Noke soma weya oku kuata omõla umue o tukuiwa Mefivosiete una eye a cita lekama liaye li tukuiwa okuti Risipa. Handivo Yonatão weya oku kuatavo omõla umue o tukuiwa okuti Mefivosiete. Kuenje Soma Saulu wa kuata omõla o tukuiwa hati Mefivosiete kuenda onekulu yimue londuko yimuamue.

Vepuluvi limue Soma Saulu wa ñualilapo va Giveone vana va kala pokati ka va Isareli kuenje wa yonguile oku va ponda. Pole, elinga liaco ka lia sungulukile. Momo lie? Koloneke via Yehosua, asongui va Isareli va lingile ocisila combembua la va Giveone.—Yeh. 9:3-27.

Ocisila caco ca amamako toke kotembo ya Soma Saulu. Ca litepa locisila ca lingiwile ceci okuti, soma wa yonguile oku ponda vosi. Elinga liaco lia kokela ‘Saulu kuenda onjo yaye oku kuata eko liosonde.’ (2 Sam. 21:1) Oku sulako Daviti wa linga osoma. vana va puluka kolofa va sapuila Daviti catiamẽla kelinga lĩvi lia lingiwa kokuavo. Daviti wa va pula eci eye a ponduile oku linga kovina vĩvi Saulu a lingile kokuavo kuenda oku eca epuluvi oco Yehova a sumuluise ofeka. Ovo ka va pingile olombongo, pole, va pinga omãla epanduvali valume va Saulu oco va va ‘kundule’ loku va pisila olofa. Daviti wa tava epingilo liavo.—2 Sam. 21:2-6.

Saulu la Yonatão va fila kuyaki, pole, Mefivosiete omõla a Yonatão wa supulukapo. Eye wa kala ocilema eci a kupukile kuenda eye ka pangele onepa kuyaki sekulu yaye Saulu a lingile la va Giveone. Daviti wa lingile ocisila cimue cukamba la Yonatão, okuti ocisila caco nda ca kuatisavo ocitumbulukila ca Yonatão oku kongelamo omõlaye Mefivosiete. (1 Sam. 18:1; 20:42) Ulandu u popia hati: “Soma [Daviti] wa lekisa ohenda ku Mefivosiete omõla a Yonatão omõla a Saulu, omo liohuminyo Daviti la Yonatão omõla a Saulu va lingile kovaso a Yehova.”—2 Sam. 21:7.

Kuenje Daviti wa tava epingilo lia va Giveone. Eye wa eca omãla vavali va Saulu okuti umue pokati komãla vaco Mefivosiete kuenda olonekulu vitãlo via Saulu. (2 Sam. 21:8, 9) Eci Daviti a linga ca imũla ovitangi via kala vofeka.

Owu ka wa kaile ulandu waño. Ocihandeleko ca Suku ca sungulukile. Oco ca popele hati: “Omãla ka citava okuti va fa omo lieci olonjali viavo via linga.” (Esin. 24:16) Yehova ka ponduile oku tava eci ca lingiwa lomãla vavali va Saulu kuenda lolonekulu viaye vitãlo nda ovo ka va kuatele eko. Ocihandeleko ca amisako hati: “Omunu lomunu a pondiwe omo liekandu liaye muẽle.” Eci ci lekisa okuti ovitumbulukila epanduvali via Saulu vina via fa citava okuti va pangelevo onepa kuyaki Saulu a lingile la va Giveone. Omo liaco, ovo va tala ohali omo liakulueya avo muẽle.

Ulandu owu, u lekisa okuti ka ci tava okuti omunu o lisandela esunga kocina cimue cĩvi a linga poku sima, ale oku popia okuti wa kala lika oku kuama onumbi yimue. Olusapo lumue lua popia hati: “Upa ovilondokua vonjila yove, kuenje olonjila viove viosi vi ka kolapo.”—Olosap. 4:24-27; Va Efe. 5:15.