Eci Yehova a handeleka omanu oco va ‘yukise ilu lieve loku lu viala,’ eye wa lekisa okuti ongongo yosi ya ponduile oku kala ocumbo celau. (Efet. 1:28) Vana va ka kalamo otembo ka yi pui, va sukilavo oku pokola ocihandeleko cimuamue. Kefetikilo ilu lieve ka li ka kala ocumbo celau ndeci ca pita locumbo Cedene. Noke lio Harmagedom tu ka kuata upange walua woku yelisa ilu lieve kolonepa viosi vina via siata oku vĩhisiwa. Ocili okuti eci ci ka kala upange walua!

Eci ci tu ivaluisa upange va Isareli va kuata noke lioku tiuka ko Bavulono. Ofeka yavo ya kala upolokoso vokuenda kueci ci soka 70 kanyamo. Pole, Isaya wa popele okuti lekuatiso lia Yehova va ponduile oku tumbulula vali ofeka yaco. Ocitumasuku caco ca popia hati: “Ekalasoko liayo o ka li lingisa ndo Edene kuenda etapi liayo liekalasoko li ka kala ndocumbo ca Yehova.” (Isa. 51:3) Yehova wa kuatisa va Isareli oku posuisa vali ofeka yavo. Cimuamue haico okuti, lasumũlũho a Yehova, vana va ka piñala ilu lieve va ka yi tumbulula oco yi linge ocumbo celau. Kuli ovina o pondola oku linga cilo,  vi lekisa okuti ove o yongola oku ka kuatisavo kupange waco.

Onjila yimue yoku ci linga, poku amamako oku yelisa loku ongotiya onjo yove kuenda kovitumãlo vikuavo. Ove o pondola oku ci linga ndaño omanu vana va lisungue love ka va yongola oku ci linga. O pondolavo oku kuatisa koku yelisa Onjango Yusoma kuenda Onjango Violohongele Vinene. Nda ekalo liove liuku ecelela, citava okuti o liecavo olumue oco o kuatise vana va pita lovilunga. Poku ci linga, ci lekisa okuti wa lipongoyila oku kuatisa vamanjove nda kuli esukila limue. Lipula ndoco, ‘Ndi pondola hẽ oku lilongisa uloño umue oco ndi ka kuatise lawo nda nda kuata esumũlũho lioku piñala ilu lieve?’

Yesu noke yoku pindula omõla a Yairo, vonjanja yaco wa popia oco va ece cimue cokulia komõla. (Mar. 5:42, 43) Citava okuti ka ca tĩlile oku tekula ufeko umue ukuanyamo 12. Pole, sokolola kupange walua tu ka kuata eci ohuminyo ya Yesu yi ka tẽlisiwa yokuti “vosi va kasi vayambo va ka yeva ondaka yaye, kuenje va ka tundamo.” (Yoa. 5:28, 29) Ndaño Embimbiliya ka li lombolola ovina vialua viatiamẽla ku vana va ka pinduiwa, tu pondola oku sokolola okuti vana va ka pinduiwa va ka sukila ekuatiso oco va kuate okulia, ocitumãlo coku kala kuenda uwalo. Cilo, o pondola hẽ oku lekisa okuti wa lipongoyila oku kuatisa? Kuli apulilo amue a sukila oku konomuisiwa.

Nda ku lingiwa esapulo liatiamela kumanji onyula ekongelo, ove hẽ wa siata oku u laleka oco a ka lie konjo yove? Eci vana va kasi ko Betele va tumiwa kupange wakundi votembo yosi, ale vana vakuakunyula va siapo upange waco, ove o pondola hẽ oku va kuatisa oku sanga ocitumãlo cimue coku kala? Nda posongo o kasi ku lingiwa ohongele yilikasi yofeka, ci tava hẽ okuti o lieca olumue oco o kuatise kupange woku yelisa ocitumãlo caco cohongele, ale oku yolela vana veya kohongele?

Omo lieci ci sangiwa kelivulu Liovilinga 24:15, tu lavoka okuti olohuluwa vialua viomanu vi ka pinduiwa. Valua pokati kavo vana okuti, ka va kuatele epuluvi lioku kũlĩha Yehova osimbu ka va file. Ovo va ka kuata epuluvi liaco noke lioku pinduiwa. a Afendeli va Suku vakuekolelo va ka kuatisa kupange waco woku longisa. (Isa. 11:9) Manji Charlotte okuti wa kundila ale ko Europa, ko Amerika do Sul kuenda vo Afrika, o kasi oku ci lavoka. Eye wa popia hati: “Ndi kasi oku lavoka oku longisa omanu va ka pinduiwa. Eci ndi tanga catiamẽla komunu umue wo kosimbu, nda siata oku sokolola ndoco: ‘Nda omunu waco wa kuatele ukũlĩhĩso watiamẽla ku Yehova, nda wa kuata ekalo liwa komuenyo.’ Ndi lavoka calua oku sapuila ku vana va ka pinduiwa catiamẽla ku Yehova kuenda ndomo ekalo liomuenyo wavo li ka kala ciwa nda vo vumba.”

Ndaño muẽle afendeli vakuekolelo va Yehova va kala komuenyo osimbu Yesu keyile palo posi, va ka kuata ovina vialua vioku lilongisa. Sokolola esanju lialua tu ka kuata kuenda esumũlũho oku ka lomboluila Daniele oku tẽlisiwa kuovitumasuku eye a soneha pole, ka kuatele elomboloko liavio. (Dan. 12:8) Ale nye ci popiwa catiamẽla koku kuatisa Ruti la Naomi oku kũlĩha ndomo epata liavo lia pangele onepa kulala wocikoti kua laikele oku yilila Mesiya? Tu ka kuata esanju lialua lioku longisa omanu vosi kilu lieve okuti ka ku ka kala vali cimue ci tu sakalaisa kuenda ovina vi tu taluisa violuali lulo lua vĩha!

Nye o pondola oku linga cilo, oco o lekise okuti wa lipongiyila oku longisa vana va ka pinduiwa? Onjila yimue yoku ci linga, oku likolisilako oku mioñolola uloño wove woku longisa kuenda oku lekisa ombili kupange woku kunda u kasi oku lingiwa koloneke vilo voluali luosi. (Mat. 24:14) Ndaño okuti ekalo liove ale ovitangi vikuavo ka viu ku ecelela oku linga calua kupange woku kunda, alikolisilo ove a lekisa okuti wa lipongiyila oku longisa vana va ka pinduiwa.

Ciwa oku sokolola kapulilo akuete esilivilo lialua akuãimo ndeci: Ove hẽ o kasi oku lavoka muẽle oku piñala ilu lieve? Wa sanjukila hẽ elavoko lioku tumbulula ilu lieve, oku kũlĩhĩsa nda okuti vana va ka pinduiwa va kuete cosi va sukila kuenda oku va longisa? Ove o pondola oku lekisa okuti wa lipongiyila oku kala komuenyo otembo ka yi pui kilu lieve, poku panga onepa kovopange o koloneke vilo okuti a lisoka la ana o ka linga eci o ka piñala ilu lieve!