Koloneke vilo, omuenyo ka u kasi ndomo Suku a yonguile okuti oco u kala. Ongongo nda yeyuka lomanu va sumbila onjila ya Suku yoku viala, oku setukula ocisola caye kuenda ovituwa viaye vikuavo vi komõhisa. Suku wa yonguile okuti va kuata esanju, va kala kumue lapata avo, oku limbuka ovina viokaliye kuenda oku pongolola ongongo oco yi linge ocumbo cokaliye.

• “Imola ovita toke kesukiyo liongongo.”— Osamo 46:9.

• “Ya pitĩlapo otembo yoku . . . kundula vana va vĩhisa ilu lieve.”—Esituluilo 11:18.

• “Layimue onungi yi popia yiti, ‘Ndi vela.’”—Isaya 33:24.

• “Lava va nõlĩwa lame va lialia ño-o kupange wovaka avo.”—Isaya 65:22.

Ovitumasuku evi vi ka tẽlisiwa ndati? Suku wa nõla Omõlaye Yesu, oco a kale Osoma loku viala ongongo oku upisa kilu. Embimbiliya li tukula uviali waco okuti, Usoma wa Suku. (Daniele 2:44) Catiamẽla ku Yesu, Embimbiliya li popia hati: “Suku o ko wĩha ocalo . . . kuenje o ka viala Ndosoma.”—Luka 1:32, 33.

Yesu eci a kala palo posi, wa linga ovikomo vialua oco a lekise okuti eci a ka viala Ndosoma o ka nena ekalo liwa komanu.

• Eye wa sakula ovovei aiñi aiñi oco a lekise ndomo a ka malako ovoveyi omanu.—Mateo 9:35.

• Eye wa tulumula ofela yokalunga, oco a lekise ndomo a ka teyuila omanu poku malako ovilunga.—Marko 4:36-39.

• Eye wa tekula omanu valua, oco a lekise okuti o ka eca komanu ovina viosi va sukila.—Marko 6:41-44.

• Eye wa pongolola ovava oco a linge ovinyu oco a lekise okuti, o ka kuatisa omanu oku kuata esanju komuenyo.—Yoano 2:7-11.

O pondola oku kuata ndati omuenyo una Suku a yonguile okuti owo omanu va kuata? Kuli “onjila” yimue o sukila oku endela. Embimbiliya li tukula onjila yaco okuti “onjila yi tuala komuenyo kuenje vañami ñami va yi sanga.”—Mateo 7:14.

Onjila yipi yi tuala komuenyo? Suku wa popia hati: “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.” (Isaya 48:17) Nda wa kapako onumbi yaco, omuenyo wove u kala ciwa.

Yesu wa popia hati: “Ame ndinjila, haime ndicili, haime ndimuenyo.” (Yoano 14:6) Nda tua linga eci Yesu a popia kuenda oku kuama ongangu yaye,  tu ka kuata ukamba uwa la Suku kuenda esanju komuenyo.

O pondola oku sanga ndati onjila yi tuala komuenyo? Kuli atavo alua, pole, Yesu wa lungula hati: “Havosiko va nukula vati, a ‘Ñala, a Ñala,’ va iñila Vusoma wo kilu, te lika una o linga ocipango ca Isiange o kasi kilu.” (Mateo 7:21) Eye wa popiavo hati: “Vu va limbukila kapako avo.” (Mateo 7:16) Embimbiliya li pondola oku ku kuatisa oku limbuka etavo liocili.—Yoano 17:17.

O pondola oku kuama ndati onjila yi tuala komuenyo? Vovina viaco mua kongela oku kũlĩha Ono yomuenyo: Omunu waco elie? Onduko yaye elie? Wa tuwa ndati? Nye a kasi oku tu lingila? Nye a yongola okuti oco tu linga? *

Suku o yongola okuti omanu va linga ovina vialua okuti oku talavaya, okulia, oku licita kuenda oku kuata epata limue, ci sule. Tu pondola oku kũlĩha Ululiki wetu kuenda oku kala ekamba liaye. Tu pondola oku lekisa okuti tu u sole, poku linga ocipango caye. Yesu wa popia hati: “Omuenyo ko pui u lomboloka okuti ovo va ku kũlĩha okuti ove lika wu Suku yocili.”—Yoano 17:3.

Eci tu kũlĩha ovina Suku a yongola okuti oco tu linga, tu ka sukila oku linga apongoloko amue. Oku ci linga, ka ca lelukile. Eci ci lomboloka okuti, tu ka kuata ekalo liwa eci tu fetika oku endela vonjila yomuenyo. Oco ci ku kuatise oku sanga atambululo apulilo amue atiamẽla ku Suku, Olombangi Via Yehova vi pondola oku ku longisa Embimbiliya ocali velivala kuenda ocitumãlo ca ku sungulukila. O pondolavo oku tu sandiliya poku iñila vonumbi yetu yo intenet www.jw.org.