Onumbi Yembimbiliya: “Yuvuli ocisola coku sola olombongo, osimbu vu sanjukila ovina vu kuete cilo.”—Va Heveru 13:5.

Koloneke vilo, kua siata oku eciwa asapulo alua atiamẽla kovina vi landisiwa kuenda kovopange. Pole, Embimbiliya li popia okuti tu pondola oku “sanjukila ovina tu kuete.” Ndamupi?

Yuvula “ocisola coku sola olombongo.” Omanu va siata oku linga ovina vi kapa kohele uhayele, epata, akamba, ovituwa kuenda ka va lisumbile ovo muẽle omo lioku “sola olombongo.” (1 Timoteo 6:10) Ocili okuti oku linga ovina viaco, ci nena ovitangi vialua! Momo omunu ukuakusola ovokuasi “kekuta olombongo.”—Ukundi 5:10.

Velisapo omanu okuti ovokuasi havioko. Ovokuasi vi kuete ovitumãlo viayo. Pole, ovina viaco ka vi pondola oku lekisa ocisola kokuetu; omanu ovo lika va pondola oku ci linga. Oku kuata ‘ekamba liocili,’ ci pondola oku tu kuatisa oku kuata esanju komuenyo.—Olosapo 17:17.

Onumbi Yembimbiliya: “Utima wa sanjuka ovihemba viwa.”—Olosapo 17:22.

Ndeci “ovihemba viwa,” esanju li pondola oku tu kuatisa oku pandikisa eci tu liyaka luveyi umue. Pole, tu kuata ndati esanju ndaño loku vela?

Lekisa olopandu. Nda tua tiamisila lika utima kovitangi vietu, “oloneke viosi” tu ka sumua. (Olosapo 15:15) Omo liaco, Embimbiliya li popia hati: “Eci olopandu.” (Va Kolosai 3:15) Sanjukila ovina o kuete ndaño okuti vitito. Eci tu mola oku iñila kuekumbi, oku sika kuofela kuenda esanju liomunu umue tu sole, ci pondola oku tu nenela esanju komuenyo.

Lingila vakuene ovina viwa. Ndaño okuti ka tu kuete uhayele wa suapo, “Esanju li tunda koku eca olio lia velapo, li tunda koku tambula li sule.” (Ovilinga 20:35) Eci vakuetu va tu pandiya omo liocina cimue tua linga, tu yeva esanju kuenda tu yuvula oku sokolola calua kovitangi vietu. Tu pondola oku kuata esanju komuenyo eci tu kuatisa vakuetu oku kuata esanju komuenyo wavo.

Onumbi Yembimbiliya: “Kuenje vu kũlĩha ovina via velapo.”—Va Filipoi 1:10.

Olohueli vina via siata oku pita otembo yitito pamosi, vi kapa kohele olohuela viavo. Alume lakãi va kuele, va sukila oku tenda olohuela viaco ndocina ca velapo komuenyo wavo.

Lingili ovina kumosi. Momo lie ka vu sokiya oku lingila ovina kumosi? Embimbiliya li popia hati: “Vavali kumuamue va velapo, umosi lika liaye o sule.” (Ukundi 4:9) Vu pondola oku pongiyila kumosi oku lia, oku pindisa kumosi etimba, oku lila kumosi ale oku lingila kumosi olomapalo.

Lekisa ocisola kohueli yove. Embimbiliya li vetiya olohueli oku likuatela ocisola kuenda oku lisumbila pokati. (Va Efeso 5:28, 33) Ocinjola cimue, oku li kuata kapepe, ale oku eca ombanjaile yimue, ci pondola oku kuatisa koku pamisa olohuela. Handi vali, olohueli vi sukila lika oku lekisa onjongole yoku lipekela pokati okuti lomunu ukuavo.—Va Heveru 13:4.