Voku li kũlĩha mua kongela ovina vialua okuti onduko lika lemolẽho, ci sule. Mua kongela ovituwa viove, ovina o tava kuenda ekalo liove. Voku li kũlĩha mua kongela cosi ci ku situlula, eci wa tuwa vokati kuenda kilu.

Nda wa li kũlĩha ciwa, ku yanduluka ovina o tava kuenda ku ecelela okuti, akamba vove va ku tuma oku linga eci ovo va sima.

“Omanu valua va kasi ndoviñumañuma vio volovenda. Ovio ka vi nõla ovowalo vi wala; pole, omanu vakuavo ovo va vi nõlelako.”—Adrian.

“Nda lilongisa oku teyuila eci ca sunguluka ndaño ka ca lelukile. Nda kũlĩha akamba vange vocili pocakati covituwa viavo kuenda ovituwa ndi lekisa eci ndi kasi lavo.”—Courtney.

CECI EMBIMBILIYA LI POPIA: “Ko ka eceleli okuti oluali lulo lu pongololi, pole, pongololi ovisimĩlo viene.”—Va Roma 12:2.

Oku kũlĩha ciwa ahonguo ove, kolonepa wa pama kuenda kovina o tava, ci ka ku kuatisa oku li kũlĩha ove muẽle cilo kuenda omunu o yongola oku kala kovaso yoloneke. Oku tambulula apulilo a kuãimo, ci ka ku kuatisa oku ci limbuka.

Kolonepa wa pama. Ovina vipi viwa ndi lingainga? Api ovoloño ange? Ndeci, oco o limbuke nda kolonepa vipi wa pama, o sukila oku lipula ndoco: ‘Ndi tẽla hẽ oku likandangiya? Ndinalavãyi? Ndi sole hẽ oku tepelako vakuetu ovina viange? Nda ndi kuete esokiyo limue nda siata hẽ oku pitĩla vepuluvi lia sokiyiwa?’

Onumbi: Ca tĩla hẽ kokuove oku sokolola kocina cimue ciwa wa siata oku linga? Omo liaco, pinga kolonjali viove ale kekamba limue oco va ku sapuile ovina viwa va limbuka kokuove kuenda esunga liaco.

CECI EMBIMBILIYA LI POPIA: “Omunu lomunu a kũlĩhĩse ovilinga viaye muẽle kuenje o ka kuata esunga lioku sanjukila upange waye kuenda hamomoko lioku li sokisa lomunu ukuavo.”—Va Galatia 6:4.

Ahonguo: Ovina vipi ndi sukila oku mioñolola kekalo liange? Kovina vipi ca tĩla oku tamalãla keyonjo limue? Kolonepa vipi ndi sukila vali oku likandangiya?

CECI EMBIMBILIYA LI POPIA: “Nda tu popia hati: “Ka tu kuete ekandu,” tu kasi oku likemba etu muẽle.”—1 Yoano 1:8.

Kovina ndi tava: Kokuange, ocina cipi ca sunguluka leci ka ca sungulukile? Momo lie ndi simĩla ndoco? Ndi tava hẽ okuti kuli Suku? Nye ci nyĩha uvangi wokuti eye o kasiko muẽle? Nye ndi sima okuti ekambo liesunga kuenda momo lie? Nye ndi tava okuti ci ka pita kovaso yoloneke?

CECI EMBIMBILIYA LI POPIA: “Ukũlĩhĩso u kamamako oku ku lava, Kuenda uloño u ka ku teyuila.”—Olosapo 2:11.