Momo Lie Omanu ka va Sumbilile Vali Omuenyo?

SIKA

ESUNGA LIECI CI KUETELE ESILIVILO OKU SUMBILA OMUENYO

Eci o linga ovina vĩvi okuti vi kapa kohele uhayele wove ale wa vakuene, ci lekisa okuti ove kua kapeleko omuenyo wove ale womanu vakuavo.

Oku sipa ka ci koki lika uvei wo kanser pole, ci tatekavo etimba oku li teyuila kuvei waco. Pokati komanu va fa luvei wo kanser, 90 kolopulusendu va fa omo va enda oku sipa ale va kala la vana va sipa.
Anyamo osi oku loya kua siata oku koka esumuo komanu valua. Ulandu wo kosikola yimue ya velapo ko Estadus Unidus wa popia hati: “Akonomuiso a lekisa okuti ndaño muẽle vana va puluka koku [loyiwa kosikola] va siata oku liyaka lovitangi vi kokiwa lekalo liaco vokuenda kuayamo alua.”
Omanu vana okuti poku endisa vanyua ovinyua vikoluisa ale olodroga, va kapa kohele omuenyo wolongendisi vikuavo kuenda womanu vakuavo. Nda omanu ka va lekisa okuti va sumbila omuenyo, va kapa kohele omuenyo womanu vana ka va kuete eko.

CECI O PONDOLA OKU LINGA

Teyuila uhayele wove. Ove handi o pondola oku siapo ovituwa vi nyõla uhayele wove ndeci, oku sipa, oku nyua calua ovinyua vikoluisa ale oku fenya olodroga. Ovituwa viaco, vi nyõla uhayele wove kuenda vi lekisa okuti kua sumbilile omuenyo wa vana o kasi lavo oku kongelamo vakuepata liove.

“Tu liyelisi kevĩho liosi lio ketimba.” —2 Va Korindo 7:1.

Sokolola keteyuilo liove kuenda liomanu vakuavo. Oco o yuvule ovilunga tata onjo yove, endisa ciwa kuenda olonjanja viosi kũlĩhĩsa ocendelo cove. Yuvula oku kuama omanu poku linga ovina vi pondola oku ku lemẽha ale oku ku kokela olofa.

“Nda wa tunga onjo yokaliye, o sukila oku ñualisako evindikiyo volusoka luaco, oco ku ka nene eko liosonde vonjo yove, nda umue wa kupukako.”—Esinumuĩlo 22:8. a

Lekisa ohenda komanu vakuavo. Lekisa esumbilo komuenyo poku tata lohenda omanu vakuavo ndaño okuti vakuepata lia litepa, ofeka, olokuasi, olohũkũi ale va tanga calua okuti ove ci sule. Ci kuete esilivilo momo oku litepa kuakova kuenda esuvu oco ca siata oku nena ungangala luyaki voluali.

“Imbipo ocikumbiti cosi, onyeño, oku tema, onjuela, olondaka vioku pembula kuenda ovina viosi ka via sungulukile. Pole, likuateli ocisola pokati, lingi vakuahenda.” —Va Efeso 4:31, 32.

OLOMBANGI VIA YEHOVA VIA SIATA OKU LEKISA NDATI ESUMBILO?

Olombangi Via Yehova vi vetiya oku kuata omuenyo umue wa sunguluka hawo u koka uhayele uwa. Esokiyo lietu lioku longisa Embimbiliya lia kuatisa ale omanu oku yula ovituwa vi nyõla uhayele.

Etu tua siata oku kapako olonumbi vioku liteyuila kovopange etu woku tunga. Omanu vana va lieca olumue koku tunga ovitumãlo vietu viefendelo ale olosapalalo vioku linga ovopange atiamẽla koku longisa Embimbiliya, va pindisiwa oco ka va ka li lemẽhe. Olosapalalo viaco, via siata oku konomuisiwa olonjanja vialua oco vi likuate liovihandeko viopocitumãlo viatiamẽla koku liteyuila.

Tua siata oku linga esokiyo lioku eca ekuatiso komanu vana va lipita lovilunga. Vokuenda kunyamo 2022, voluali luosi mua pita ovilunga vialua via kapa kohele omuenyo womanu. Etu tua linga esokiyo lioku kuatisa omanu va lipita leci ci soka 200 kovilunga okuti, tua pesela eci ci panda 12 kolohulua violondolale violombanjaile tua tambula.

Eci uvei wo ebola wa fetika oku ponda omanu Kutakelo wo Afrika kunyamo (2014) kuenda ko Republika Demokratika yo Kongo kunyamo (2018), tua lomboluila komanu ndomo va pondola oku yuvula oku lisandula kuvei waco. Tua tumako vamanji oco va linge ohundo losapi, “Oku Pokola ku Teyuila Omuenyo.” Poku iñila kovitumãlo vietu violohongele tua kapoko olombaliti oco omanu va puse peka. Handi vali, tua tukula esilivilo lioku pusa peka kuenda tua lekisa ovina vikuavo va ponduile oku linga oco va yuvule oku lisandola kuvei waco.

Ko Serra Leoa, esapulo limue lia lingiwa voradio lia pandiya Olombangi Via Yehova omo lioku kuatisa omanu oku yuvula uvei wo ebola ci kaile nda omanu vatiamẽla ketavo liavo ale sio.

Ombaliti yimue yoku pusa peka Vonjango Yusoma ko Liberia vokuenda kuvei wo ebola 2014

a Ko Oriente Médio yosimbu kuna ocihandeleko caco ca sonehiwile, olusoka luonjo lua sanjavalele kuenda oko omanu va enda oku linga ovopange eteke leteke. Ocihandeleko caco colondunge, ca lekisile okuti oku teyuila epata kuenda omanu vakuavo ca kuatele esilivilo.

OMASULI!