Eci oco ocisimĩlo catiamẽla kepongoloko liotembo ocimunga ca vakuakukonomuisa voluali luosi va kuata. Nda ove o tava okuti kuli Ululiki umue wa siata oku tata omanu, ocisimĩlo eci culoño, ci pondola oku ku ivaluisa olonjila vialua viesunga lieci Suku a lulikila ongongo yetu oco yi li tumbulule oyo muẽle.

Omo okuti omanu va nyõla calua ongongo, ka yi pondola oku li tumbulula oyo muẽle. Momo lie tu kolelela okuti Suku o ka linga cimue oco a yi tumbulule?

Kũlĩhĩsa ovisonehua vi kasi pokakasia vi tu kuatisa oku kolela okuti, ongongo yi ka puluka kuenda yi ka kala otembo ka yi pui.

• Ongongo yetu ya lulikiwa la Suku. “Kefetikilo Suku wa lulika ovailu kuenda ongongo.”—Efetikilo 1:1

• Suku eye o tumila ongongo. “Ongongo kuenda ovina viosi vi kasimo, via tiamẽla ku Yehova a—Olosamo 24:1

• Suku wa lulika ongongo yetu oco yamameko. “Eye wa tumbika ilu lieve voviseveto vialio; olio ka li ka sengiwa pocitumãlo calio otembo ka yi pui.”—Olosamo 104:5

• Suku wa likuminya okuti, tu ka kuata ekalo liwa vongongo otembo ka yi pui. “Suku yocili, Una wa panga ongongo, . . . okuti ka yi lulikile oco yi kale upolokoso, pole, wa yi sovola oco mu tungiwe.”—Isaya 45:18

• Suku wa likuminya komanu okuti, va ka kala vongongo otembo ka yi pui. “Vakuesunga va ka piñala ilu lieve, kuenda va ka kalamo otembo ka yi pui.”—Olosamo 37:29

Suku wa lulika ongongo oco omanu va kalemo lesanju okuti, ka va yi nyõli. Embimbiliya li likuminya okuti Suku votembo yaye ya sokiyiwa, o ka malako ocipululu cosi.—Esituluilo 11:18

Embimbiliya lia likuminyavo okuti, Suku o ka pongolola ongongo yetu oco yi kale ocitumãlo cimue ciwa, haico ca posoka, kuenje o ka ‘yulula eka liaye, kuenda o tẽlisa olonjongole viovina viosi vi kasi lomuenyo.’—Olosamo 145:16