Otembo Eci Ovituwa Viwa Via Pongoloka

OTEMBO yipi o sima okuti oco ovituwa viwa via fetika oku pongoloka vocipikipiki? Vokuenda kuocitumbulukila cove, ale pamue ca vakuepata liove akulu, ale cakamba vove akulu? Vamue va popia okuti Uyaki Watete Wa Pita Voluali okuti, wa fetika kunyamo wo 1914, owo wa pongolola ovituwa viwa. Ulongisi wovolandu o tukuiwa okuti, Robert Wohl velivulu liaye The Generation of 1914 (Ocitumbulukila co 1914) wa soneha ndoco: “Vana va puluka kuyaki, lalimue eteke va ponduile oku liwekapo oku tava okuti oluali lumue lua takata kuenje oluali lukuavo lua fetika kosãi Yenyenye wo 1914.”

Ulume umue ukuavolandu o tukuiwa okuti Norman Cantor wa popia hati: “Kovitumãlo viosi olonumbi viatiamẽla kovituwa viomanu okuti, vi kasi ale oku pongoloka, via nyõliwa. Nda vakuapulitika kuenda asongui vasualali va enda oku tata olohuluwa viomanu ndovinyama via loña kepondelo, olonumbi vipi vietavo ale vikuavo via kũlĩhĩwa via ponduile oku tateka omanu oku litata ndovinyama viovusenge via tema? . . . Oku pondiwa lungangala kuolohuluwa viomanu Kuyaki Watete wa Pita Voluali, [1914-18] kua pembula esilivilo liomuenyo womanu.”

Ulume umue Ongelesi ukuavolandu o tukuiwa okuti, H. G. Wells, velivulu liaye li tukuiwa okuti, Ovolandu a Kũlĩhĩwa Voluali Luosi, wa lombolola okuti, noke yomanu oku tava okuti ovina via tukuluka ño, “oco ovituwa viwa via pongoloka calua.” Momo lie? Vamue va enda oku sima okuti, omunu ociluvo cimue ca velapo ca tunda kovinyama. Wells okuti wa kolelele okuti ovina via tukuluka ño, kunyamo 1920 wa soneha ndoco: “Ovo va nõlapo okuti, ulume ocinyama cimue ca liongotiya ndeci ombua yoku yeva [yo ko Índia] . . . , omo liaco, ca sungulukile kokuavo okuti, olombua vinene viocimunga comanu vi pokuisa loku saluisa vikuavo.”

Ocili okuti, ndeci Cantor a popia, Uyaki Watete wa Pita Voluali wa pongolola calua ovituwa viomanu viatiamẽla kueci ciwa leci cĩvi. Eye wa lombolola hati: “Ocitumbulukila cosimbu ka ca kapiwileko vali kovina viosi, ndeci kopulitika, konjila yavo yoku wala, lovituwa viavo viatiamẽla koku lipekela.” Atavo ana a vĩhisa alongiso Akristão poku tava kelongiso liokuti, ovina via tukuluka ño kuenda oku vetiya asualali oku enda kuyaki, a kokisa calua oku pongoloka kuovituwa. Usongui Wocimunga cimue casualali coko Grã Bretanya o tukuiwa okuti, Frank Crozier wa soneha ndoco: “Atavo Akristão, o-o a velapo koku vetiya onjongole tu kuete yoku ponda kuenda yoku linga ungangala kuenda tua siata oku panga onepa katavo Akristão lelianjo oco tu li kuatise etu muẽle.”

Olonumbi Viatiamẽla Kovituwa Via Pembuiwa

Vokuenda kuotembo noke Liuyaki Watete wa Pita Voluali, anyamo a tukuiwa 20 kanyamo Ombembua, ekalo liwa kuenda ovituwa viosimbu via yuvuiwa kuenje via piñainyiwa locisimĩlo cokuti cosi ci taviwa. Ukuavolandu Frederick Lewis Allen wa lombolola hati: “Noke liuyaki, anyamo ekũi a kuamamo a ponduile oku tukuiwa okuti Anyamo Ekũi Ovituwa Vĩvi. . . . Eci olonumbi violuali luosimbu ka via kaileko vali kuenda ovituwa vina via enda oku eca ukuasi lelomboloko komuenyo via imũha, ka ca lelukile oku sanga ovituwa vi piñainyiwapo omo lioku siapo ovituwa viosimbu.”

Esakalalo Lialua lia kala voluali kunyamo wo 1930, lia koka okuti omanu valua va kala olohukũi kuenda via lingisa okuti, vambata omuenyo lonjila yi lekisa olondunge. Kesulilo liunyamo wo 1930, oluali lua iñila vuyaki ukuavo okuti, wa nena epese lialuapo vali u tukuiwa okuti, Uyaki Wavali wa Pita Voluali. Ka pa pitile otembo yalua, olofeka via fetika oku panga ovota anene hao a nyõla calua. Lonjila eyi, oluali lua tunda vesakalalo, pole, lua iñila vohali kuenda vungangala ka u sokisiwa. Eci uyaki wa pua, alupale alua a linga ovingululu, alupale avali o ko Japão a nyõliwa okuti, olupale lolupale lua nyõliwa letenda limosi linene li tukuiwa hati bomba atômica. Olohuluwa viomanu va fa kovilombo vioku talisiwa ohali. Vocosi, uyaki wopa omuenyo weci ci soka 50 kolohuluwa viomanu, alume lakãi kuenda omãla.

Vokuenda kuekalo liaco lĩvi Liuyaki Wavali wa Pita Voluali, omanu ka va kuamele vali ovituwa viwa viosimbi , pole, va nõla olonjila viavo muẽle vioku kala. Elivulu li tukuiwa okuti, Love, Sex and War—Changing Values, 1939-45 (Ocisola, Oku lipekela kuenda Uyaki—<u202F>Epongoloko Liovituwa 1939-45) lia popia hati: “Ca molẽhele ndu okuti oku lipekela kua tatekiwile vokuenda kuyaki kuenda ovituwa viocilombo cuyaki via kala oku iñila volonjo. . . Onjanga kuenda esakalalo liuyaki via tateka ovituwa viwa loku koka okuti omuenyo vokati kocilombo cuyaki ka u kuata esilivilo loku kala umbumbulu.”

Omo okuti omuenyo wa kala kohele, eci ca vokiya onjongole yomanu yoku likuela ndaño okuti olohuela viaco ka vi kala otembo yalua. Ukãi umue wo ko Grâbretanya okuti ohueli, poku lombolola esunga lieci ocituwa coku lipekela ca enda oku eceliwa vokuenda kuanyamo aco ãvi, wa popia hati: “Ka citava oku popia okuti tua kala vakuevĩho liukahonga momo tua kala vuyaki.” Esualali limue lio ko Amerika lia popia hati: “Komanu valua tua kala vekuevĩho liukahonga ndomo ci likuata livituwa viavo, pole, tua kala amalẽhe kuenda tua ponduile oku fa keteke likuavo.”

Valua pokati komanu va supuluka kuyaki, va tala ohali yalua omo liovina va mola. Toke cilo, vamue pokati kavo, oku kongelamo vana va kala omãla kotembo yaco, va siatavo oku tala ohali poku ivaluka ovina vĩvi via pita kosimbu momo eci va ci sokolola, ci kala ndu okuti va kasi vali oku pita lovitangi viaco ka via sungulukile. Valua va pumba ekolelo kuenda ovituwa viwa. Omo liekambo lioku sumbila ombiali yi tumbika olonumbi vieci ciwa ale vieci cĩvi, omanu va fetika oku tenda ovina viaco okuti vi taviwa.

Olonumbi Viokaliye Vioku Tuwa

Noke Liuyaki Wavali wa Pita Voluali, kua sandekiwa alongiso atiamẽla kovituwa viomanu vioku lipekela. Limue pokati kalongiso aco okuti, lia lingiwa ko Estados Unidos kunyamo wo 1940, lia kala Ulandu Kinsey una wa kuata eci ci pitahãla 800 kamẽla. Onima yeyililako yeyi okuti, omanu valua va fetika oku vangula lelianjo catiamẽla koku lipekela okuti, kosimbu ondaka yaco ka ya endaele oku vanguiwa. Ndaño okuti ekonomuiso lia lekisiwa vulandu waco lina liatiamẽla komanu va enda oku lipekela la vakuavimatamata vimuamue kuenda ovituwa vikuavo vioku lipekela lieya oku tendiwa okuti lia ci piãlisapo calua, elilongiso lia situlula epongolo liovituwa noke liuyaki.

Vokuenda kuotembo yimue, kua lingiwa alikolisilo oco ku teyuiwe ovituwa via sunguluka. Ndeci, ovolandu evĩho liukahonga a enda oku yuvuiwa oku vanguiwa vovingungu, volosinema kuenda votelevisão. Pole, ka ca tumalẽle otembo yalua. William Bennett wa kala usonehi welilongiso ko EUA, wa lombolola ndoco: “Kunyamo wo 1960 ko Amerika kua fetika ocituwa cimue ka ca sungulukile ci pondola oku tukuiwa okuti ekambo liovituwa viwa.” Kuenje ovina viaco via situluiwavo kolofeka vialua vikuavo. Momo lie epongoloko liovituwa lia livokiyila kunyamo wo 1960?

Momo vunyamo waco, kua lipita ovina vialua votembo yimuamue ndeci, ocisoko coku yovuiwa kuakãi kuenda epongoloko liocipikipiki liatiamẽla kocituwa coku lipekela ndomo va ci tukuile okuti onjila yokaliye yoku kala. Handi vali, kua fetikiwavo oku pangiwa kuovihemba vi tateka oku mina. Eci ohele yoku mina omo lioku lipekela ya imũha, “ocisola lelianjo” ale onjila “yoku lipekela okuti ka mu kongela ohuminyo yoku kuela,” ya fetika oku kuamiwa lomanu valua.

Votembo yimuamue, olonjo viasapulo, olofilme kuenda o televisão via tepulula ekalo liovituwa viwa. Pole, noke, Zbigniew Brzezinski una wa kala usongui Wocimunga Colondunguli Vieteyuilo Liofeka ko Estados Unidos, wa popia ndoco catiamẽla kovituwa vi lekisiwa vo televisão: “Ovo va velisapo oku lipandula ovo muẽle, va lingisa okuti ungangala walua kuenda unjaki u tendiwa okuti wa sunguluka kuenda va vetiya oku litumbika kelinga lioku lipekela okuti, omunu ka ci lingi lika lomunu umosi.”

Kunyamo wo 1970 olovideokasete vieya oku kũlĩhĩwa calua. Omanu kolonjo viavo pokolika, va ponduile oku tala ovina via vĩha viukahonga, vina okuti lalimue eteke va vi talele powiñi, vonjo yoku tala olofilme omo liusumba woku muiwa. Koloneke vilo o Internet ya ecelela okuti koluali luosi, omunu wosi o kuete o komputadore o pondola oku tala ovina via vĩha ndeci omanu va kasi epolõla haivo va linga ukahonga.

Kua siata oku iyilila ovitangi vialua volonjila via litepa. Usongui wonjo yimue yolomandekua ko Estados Unidos wa popia hati: “Vanyamo ekũi a pita, eci amalẽhe va enda oku iñila vokayike, nda tẽlele oku sapela lavo catiamẽla kueci ciwa leci cĩvi. Pole, koloneke vilo, amalẽhe vana va siata oku iñila vokayike ka va kũlĩhĩle lacimue catiamẽla kondaka yaco.”

Pi ku Sangiwa Olonumbi?

Ka tu pondola oku kevelela katavo oluali oco tu tambule olonumbi viatiamẽla kovituwa viwa. O-o ka a kapeleko olonumbi viesunga ndeci Yesu lovapostolo va linga kocita catete, pole, ovo muẽle va panga onepa koluali kuenda kevĩho lialuo. Usonehi umue wa pula ndoco: “Uyaki upi wa lingiwa ale okuti, omanu ka va popele okuti Suku o kasi oku va teyuila?” Poku vangula catiamẽla koku teyuila olonumbi viwa via Suku, ocitunda cimue volupale luo Nova Yorke vanyamo amue wa popia hati: “Onembele oyo lika ocisoko voluali okuti, olonumbi vi kisikiwa oco omunu a iñilemo, ka via tĩlile calua ndolonumbi vi kisikiwa poku iñila vokalela kamue.”

Ka kuli atatahãi okuti, oku pongoloka kuovituwa viwa violuali lulo vocipikipiki, vi situlula ciwa esukila lionjanga liepongoloko limue. Pole, epongoloko lipi? Nye ci sukila oku pongoluiwa? Helie o pondola oku ci linga kuenda ndamupi ci ka lingiwa?

 [Etosi a Velapo kemẽla 5]

“Oku pondiwa lungangala kuolohuluwa viomanu Kuyaki Watete wa Pita Voluali, [1914-18] kua pembula esilivilo liomuenyo womanu.”

 [Okakasia kemẽla 6]

OKU LITEPA KU KASI POKATI KUNU KUENDA KUOVITUWA

Kosimbu ondaka unu ya kuatele elomboloko lia suapo. Ci kaile okuti, omunu waco ukuacili, wa koleliwa, wa pua eko kuenda wa sumbiwa ale sio. Cilo, ondaka “unu” ya piñainyiwa londaka “ovituwa.” Pole, kuli ocitangi cimue catiamẽla kondaka yaco, ndomo ca lomboluiwa lukãi umue ukuavolandu o tukuiwa okuti, Gertrude Himmelfarb, velivulu liaye The De-Moralization of Society (Oku Nyelisiwa Kuovituwa Viomanu) Eye wa popia hati: “Ka citava oku popia catiamẽla kunu ndeci ci popiwa catiamẽla kovituwa, . . .okuti, omunu lomunu o kuete elianjo lioku nõla unu waye.”

Eye wa popiavo okuti vovituwa “mu pondola oku kongela oku tava, ovisimĩlo, ekalo, ocikembe, ovisila, olonjongole, ocame kuenda utuwa okuti, ocina cosi omunu umue, ocimunga cimue ale owiñi womanu va kapako otembo yosi, omo liasunga a litepa.” Vekalo tu sangiwa koloneke vilo okuti, lielianjo lialua, omanu va sima okuti va kuete asunga oku nõla ovituwa viavo muẽle, ndeci va pondola oku nõla ovina va ka landa pocitanda. Pole, eci ku lingiwa ovina viaco, nye ci lipita lunu wocili kuenda ovituwa?

Ca siata oku leluka calua oku sanga olomapalo ka via sungulukile