Ulume o popia hati: “Eci tua kuela, ame lukãi wange ka tua kuatele ocisimĩlo cimuamue catiamẽla kesumbilo. Ka ci lekisa okuti ame nda kuatele ocisimĩlo ca sunguluka okuti eye sio. Olonjana vimue nda simãile okuti ukãi wange o sukila oku lekisa esumbilo lialua poku vangula lame.”

Ukãi o popia hati: “Kepata lietu, omanu va lianja poku vangula. Vepata lietu, ca siata oku vangula lolukandi kuenda oku teta kondaka vakuetu eci va vangula. Kokuetu ka ci lekisa ekambo liesumbilo. Pole ca litepa calua lovituwa vilekisiwa vepata ulume wange a kulila.”

Esumbilo ocina cimue ci sukiliwa volowela. Ove o lekisa ndati okuti wa sumbila ulume wove ale ukãi wove?

Alume va sole calua oku sumbiwa. Embimbiliya li sapuila alume hati: “Omunu lomunu pokati kene a sole ukãi waye.” Pole noke li popia ndoco: “Ukãi o sukila oku lekisa esumbilo liocili kulume waye.” (Va Efeso 5:33) Cikale ukãi ale ulume, vosi yavo va sukila oku lisola kuenda oku lisumbila pokati. Pole capiãla enene alume, va sanjuka calua eci va limbuka okuti va sumbiwa. Ulume umue o tukuiwa hati, Carlos * wa popia hati: “Alume va sukila oku limbuka okuti va tẽla oku liyaka lovitangi via litepa, oku tetulula ovitangi kuenda oku tata epata. “ Ulume hayeko lika o kuatisiwa eci ukãi a lekisa esumbilo kokuaye. Ukãi umue o tukuiwa hati Corrine, wa popia ndoco: “Ocili ceci okuti, eci ndi lekisa esumbilo kulume wange, eye o vokiyako ocisola a ñuetele.”

Ocili okuti ukãi o sukilavo oku sumbiwa. Eci ocili, momo ka citava okuti ulume umue o lekisa ocisola kukãi waye nda eye ko sumbile. Daniel wa popia hati: “Ndi sukila oku kapako ovisimĩlo viukãi wange. Ndi sukilavo oku kapako olonjongole viaye. Citava okuti si kuata elomboloko liesunga lieci a kuetele ovisimĩlo vimue, pole, ndi sukila oku kapako ovisimĩlo viaye.”

Kapako ovisimĩlo viohueli yove. Velisapo ovisimĩlo viohueli yove okuti viove muẽle vi sule. Anga hẽ, eye wa limbuka okuti wa sumbiwa? Ukãi wa tukuiwa kosapi yokuti, “Ocitangi,” wa lilongisa ulandu umue. Eye wa popia hati: “Olonjanja vimue sia simãile okuti sia lekisille esumbilo, pole, ulume wange oco a enda oku sima. Omo liaco, ame nda sukilile oku linga apongoloko.”

• Soneha ovituwa vitatu viohueli yove okuti vi ku komõhisa. Oku sokolola ovituwa viaco ci ka ku kuatisa oku lekisa esumbilo.

• Vokuenda kuosemana yimosi, kũlĩhisa ocituwa o lekisa okuti (kovituwa viohueli yove hakoko) kovina ndeci:

Olondaka viove. Ekonomuiso limue lia lingiwa liatiamẽla kolohueli lia lekisa ndoco: “Volohuela vina okuti viapama kuenda muli esanju, eci ulume lukãi va vangula catiamẽla kocitangi cimue, ovo va vangula ovina vitãlo via sunguluka oco vi piñala ocina ka ca sungulukile. Ocina cimue ca litepa ceci okuti, olohueli vina okuti ndopo vi linyala, kocina cimosi ka ca sungulukile, ovo ka va vangula lacimue ca sunguluka (0,8).” *—Onumbi Yembimbiliya Olosapo 12:18.

Lipula ndoco: ‘Eci ndi sapela lohueli yange, ndi lekisa hẽ esumbilo? Ocituwa cipi nda siata oku lekisa: Oku u vetela evelo ale oku u pandiya? Anga hẽ ndi vangula lukãlu poku eca ocisimĩlo cimue ale poku tukula ocina cimue ca ndi sumuisa?’ Anga hẽ ohueli yove yi tava katambululo ove?—Onumbi Yembimbiliya: Va Kolosai 3:13.

Seteka ndoco: Kuata ocimãho coku pandiya ohueli yove ndaño onjanja yimosi veteke. Ocisimĩlo: Kũlĩhisa ovituwa ove wa soneha. Seteka oku kuata ocituwa coku sapuila kohueli yove ocina ci ku komõhisa kokuaye.—Onumbi Yembimbiliya: 1 Va Korindo 8:1.

Ovilinga viove. Ukãi umue o tukuiwa hati Alicia wa popia hati: “Ndi pita otembo yalua oku linga ovopange okonjo. Eci ulume wange ongotiya ovina viaye ale o sukula alonga a silĩsa, ndi limbuka okuti wa sumbila ovina ndi linga. Omo liaco, ndi limbuka okuti nda kapiwako kuenda alikolisilo ange a kuete esilivilo.”

Lipula ndoco: ‘Anga hẽ, onjila ndomo ndi tata ohueli yange yi lekisa ciwa okuti ndo sumbila? Nda siata hẽ oku sanda otembo yoku kala laye ale oku u kapako?’ Anga hẽ ohueli yove yi tava katambululo ove?

Seteka ndoco: Soneha ovitangi vitatu o tenda okuti ohueli yove yi sukila oku lekisa esumbilo. Pinga kohueli yove oco yi ci lingevo. Noke, omunu lomunu a tambule opapelo yukuavo oco a tale ndomo a pondola oku lekisa esumbilo kukuavo. Tiamisila utima kovina o sukila oku linga oco o mioñolohe. Eci omunu umue a likolisilako oku lekisa esumbilo, ci ka vetiya ukuavo oku ci lingavo.