Yovi 6:1-30
6 Kuenje Yovi wa tambulula hati:
2 “Nda ca tavele oku pesalisa esumuo liange,+Kuenda nda olio lia kapiwile kombalãsa kumue lohali yange, nda hĩse!
3 Momo cilo, ovio via lemapo vali okuti eseke lio vokalunga li sule.
Eli olio esunga lieci olondaka viange via lingila viumamõhe.*+
4 Ovisongo Viukuonene Wosi via ñuata,Kuenda ndi liyevite okuti, owule wavio u kasi oku iñila kosi yetimba liange;+Suku o kasi oku ndi katukila kuenje ñasi lusumba walua.
5 Anga hẽ ocimbulu covusenge+ ci koma osimbu ci kuete owangu,Ale ongombe yi koma eci oyo yi kuete owangu?
6 Anga hẽ okulia ka ku pepi ku liwa okuti, ka ku kapiwa omongua,Ale anga hẽ ondunga yi yela yesaila yi pepa?
7 Nda likala oku lamba kovina viaco.
Ovio vi kasi ndokulia kua vĩhisua.
8 Nda epingilo liange lia tẽlisiwile,Kuenda nda Suku wa tẽlisile onjongole yange, nda hĩse!
9 Nda Suku wa yonguile oku ndi nyanyõla,
Kuenda nda eye wa ponduile oku olõla eka liaye loku ndi kundula, nda hĩse!+
10 Momo ndaño muẽle ocina caco nda ca ndi nenela elembeleko;Nda nda tẽha tẽha lesanju ndaño levalo ka li pui,Momo sia likalele olondaka via Una o Kola.+
11 Anga hẽ ñuete ongusu yoku amamako oku talamẽla?+
Nye ndi lavoka vali oco ndi amameko oku kala lomuenyo?*
12 Anga hẽ ongusu yange yi kasi ndeyi yesenje?
Ale etimba liange hẽ lia pangiwa losipi?
13 Anga hẽ kuli onjila yimue yoku likuatisa ame muẽle,Osimbu okuti, ovina viosi via ndi kuatasaile via njupiwa?
14 Omunu wosi o likala ocisola ka ci pongoloka komunu a lisungue laye,+O ka siapo esumbilo Liukuonene Wosi.+
15 Vamanjange muẽle va ndingila usuanji+ ndolui luokuenye,Ndovava o volui okuenye okuti a kukuta.
16 Ovio vi tekãvisiwa locikokoto,Kuenda vokuavio oko ocikokoto ca yenguluiwa ci solamisua.
17 Pole, votembo ya sesamẽla ovio ka vi kala lovava kuenje vi sulila;Eci kuiya owuya ovio vi kukuta.
18 Onjila yavio yi yapuka;Vi pesekela vekalasoko kuenje vi takata.
19 Ovimunga via vakuakulinga ungende vio ko Tema+ va vi sandiliya;Vakuakulinga ungende vo ko Sieva*+ va vi kevelela.
20 Ovo va kutisiwa osõi omo ekolelo liavo lia kala lielivova;Ovo va pitĩlako lika oco va sumuisiwe.
21 Momo eci oco vu kasi kokuange;+Ene wa siati oku mola ocinjoko cohali yange kuenje vu kasi lusumba.+
22 Anga hẽ nda ku pingi oco vu nyĩhi cimue?
Ale nda pinga oco vu nyĩhi ombanjaile yimue kukuasi wene?
23 Anga hẽ nda pinga oco ndi yovuiwe peka liunyãli umue,Ale oco ndi popeliwe* ku vakuakutalisa ohali?
24 Ndongise kuenda ame ndi kõha;+Ñuatise oku kuata elomboloko lioku lueya kuange.
25 Ocili ka ci koki evalo!+
Pole, esilivilo lie li kuete elungulo liene?+
26 Anga hẽ vu kasi oku sokiya oku pisa olondaka viange,Olondaka viomunu umue wa sumua+ vina viambatiwa lofela?
27 Ene wa ponduilivo oku imba ocela kosiwe,+Kuenda oku landisa* ekamba liene muẽle!+
28 Omo liaco, kaliye tiuki kuenda vanji kokuange,Momo ame si ka vu kembi.
29 Lingi ohenda sokololi vali, ko ka ndi sombisili ũvi,Ocili, sokololi vali, momo esunga liange handi li tãhi.
30 Anga hẽ elimi liange li kasi oku vangula eci hacesungako?
Anga hẽ si tẽla oku limbuka okuti ocina cimue ka ci kasi ciwa?
Atosi Pombuelo
^ Ale “viuveke.”
^ Ale “oco ndi amiseko omuenyo wange.”
^ Ale “Ocimunga ca vakuakulinga ungende ca va Savea.”
^ Lit., “oku yovuiwa.”
^ Ale “wa lingi omĩlu.”
