Yeremiya 51:1-64
51 Ca popia Yehova ceci hati:
“Ñasi oku katula ofela yimue yi nyõla
Oco yi katukile o Bavulono+ kuenda olonungi vio Leve-kamai.*
2 Ndi ka tuma omanu ko Bavulono oco va yi sandole ndeci ofela yi sandola inene,Kuenje va ka yi sandola loku sia ofeka yaco upolokoso;Ovo va ka yi katukila kolonele vialio viosi keteke liohali.+
3 Ukualohonji ka ka tieñe* ohonji yaye.
Kuenda lomue ka ka katuke locikutu caye covivela.
Ko ka lekisi ohenda kalume amalẽhe+ vo vofeka yaco.
Olohoka viavo viosi vi kunduli.
4 Ovo va ka pondiwila vofeka ya va Kaldea,Va ka lemẽhiwa calua volokololo vialio.+
5 Momo Yehova ukualohoka+ ka yandulukile Isareli la Yuda. Ovo ka va lingile ndovimbumba.
Pole, ofeka* yavo yeyuka leko kovaso ya Una o Kola wa Isareli.
6 Tili pokati ka va Bavulono,Kuenda popeli omuenyo wene.+
Ko ka pondiwi omo lieko liayo.
Momo eyi oyo otembo yefetuluinyo lia Yehova.
Eye o kasi oku yi fetuluinya omo lieci ya linga.+
7 O Bavulono ya siata oku kala okopo yimue yulu peka lia Yehova;Oyo ya koluisa ilu lieve liosi.
Olofeka via kolua lovinyu yalio;+Eli olio esunga lieci olofeka via lingila ayui.+
8 Vocipikipiki o Bavulono ya kupuka kuenda ya nyõliwa.+
Yi lisiõsuĩli!+
Tikuli onguendu omo lievalo liayo; pamue oyo yi ka sakuiwa.”
9 “Tua seteka oku sakula o Bavulono, pole, oyo ka ya kayele.
Yi yanduluki kuenda tuendi omunu lomunu kofeka yaye.+
Momo ovilinga vialio vina vi sesamẽla esombiso, via pitĩla toke kovailu.
Ovio via lepa calua ndalende.+
10 Yehova wa tu nenela esunga.+
Enjui, tu lomboluili ko Siono upange wa Yehova Suku yetu.”+
11 “Lepiki ovisongo viene;+ tikuli oviyepelo viene vi kasi ndolumbala.*
Yehova wa vetiya utima wolosoma via va Media,Momo eye o yongola oku kundula o Bavulono.
Momo eli olio efetuluinyo lia Yehova, efetuluinyo omo lionembele yaye.
12 Tuliki ondimbukiso*+ yimue yoku katukila ovimbaka vio Bavulono.
Vokiyi olondavululi, kapi alume vakuakulavulula.
Pongiyi vana va lavekela vonutula.
Momo Yehova wa linga esokiyo,Kuenda o ka tẽlisa eci a likuminya okuti, oku katukila olonungi vio Bavulono.”+
13 “Okãi o kasi pokati kovava alua,+Lovokuasi alua,+Ove kuenda onganyu yove wa pitĩli kesulilo.+
14 Yehova ukualohoka wa lisila eye muẽle hati:
‘Ndi ka ku yukisa lomanu okuti, va ka lua calua ndolohuma,Kuenje ovo va ka kalukila leyulo kokuove.’+
15 Eye Una wa panga ongongo lunene waye,Una wa tumbika ofeka yima ciwa lolondunge viaye+Kuenda wa yala ovailu luloño waye.+
16 Eci eye a yevalisa ondaka yaye,Ovava o kovailu a tumõha,Kuenda eye o kokisa okuti, alende* a londa oku upisa kasulilo o kilu lieve
Eye o tuma oviliakulo kumue lombela,Kuenda eye o tundisa ofela volosila viaye.+
17 Omanu vosi va tuwa ndaveke kuenda ka va kuete ukũlĩhĩso.
Omunu wosi ukuakutela utale o ka kutisiwa osõi omo liociñumañuma ca songiwa;+Momo ociñumañuma caye cutale cuhembi,Kuenda voviñumañuma viaco, ka muli unene womuenyo.*+
18 Ovio viesanda,*+ upange woku yoliwa epembe.
Eci eteke liavio liesombiso li pitĩla, ovio vi ka nyõleha.
19 Onepa ya Yakoba ka yi sokisiwa lovina evi,Momo eye Una wa sovola ovina viosi,Ndaño muẽle ombueti yocipiñalo caye.+
Yehova ukualohoka, oyo onduko yaye.”+
20 “Ove wucimãleho cimue cuyaki kokuange, uta umue wuyaki,Momo, love ndi ka nyanyõla olofeka.
Love ndi ka nyõla ovosoma.
21 Love ndi ka nyanyõla okavalu kuenda una endelako.
Love ndi ka nyanyõla ekãlu liuyaki kuenda una endelamo.
22 Love ndi ka nyanyõla ulume kuenda ukãi.
Love ndi ka nyanyõla ulume wa kuka kuenda ukuenje.
Love ndi ka nyanyõla umalẽhe ulume kuenda umalẽhe ukãi.
23 Love ndi ka nyanyõla ungombo kuenda ocunda caye.
Love ndi ka nyanyõla ongunja kuenda ovinyama viaye vioku lima.
Love ndi ka nyanyõla olonguluvulu kuenda va kalei kolombiali.
24 Ndi ka fetuluinya o Bavulono kuenda olonungi viosi vio ko KaldeaOmo lievĩho va lingila ko Siono komanu vo ko Yuda,”+ oco Yehova a popia.
25 “Ame ñasi oku ku katukila,+ Amunda ukuakunyõla,” oco Yehova a popia,“Ove ukuakunyõla ongongo yosi.+
Ndi koluĩla okuokuo kuange kokuove kuenda ndi ka ku tiñuluila asenje
Kuenje ndi ka ku pongolola omunda yimue ya pia.”
26 “Omanu ka va kopa kokuove ewe limue lievindi ale ewe liociseveto,Momo ove o ka siala upolokoso otembo ka yi pui,”+ oco Yehova a popia.
27 “Tuliki ondimbukiso* yimue vofeka.+
Siki ombinga pokati kolofeka.
Nõli* olofeka oco vi yi katukile.
Yi kovongeli ovosoma o ko Ararate,+ o ko Mimi kuenda o ko Asikinasi.+
Yi nõleli kesongo umue wolohoka.
Eceleli okuti, olokavalu vi votoka ndolohuma viamalẽhe.
28 Nõli* olofeka oco vi yi katukile,Okuti olosoma vio Media,+ olonguluvulu vialio kuenda va kalei valio vosi kolombiali
Kuenda olofeka viosi ovo va viala.
29 Kuenje ilu lieve li ka lisenga kuenda oku luluma,Momo ovisimĩlo via Yehova vioku katukila o Bavulono vi ka tẽlisiwa
Oco ofeka yo Bavulono yi linge ocikuata cimue cocinjoko okuti, ka mu kala onungi.+
30 Asualali vo ko Bavulono va liwekapo oku yaka.
Ovo va tumãla voviteyuilo viavo.
Ongusu yavo ya pua.+
Ovo va linga ndakãi.+
Olonjo vialio via timĩhiwa.
Ovikundiko vialio via teyiwa.+
31 Omunga yimue yi lupuka oco yi lisange lomunga yikuavo,Kuenda onumiwa yimue yi lisanga lonumiwa yikuavo,Oco yi sapule ku soma yo Bavulono okuti, olupale luaye lua tambuiwa kolonele viosi,+
32 Olonepa vioku yoka via tambuiwa,+Awato a pangiwa loloneva a timĩhiwa londalu,Kuenda asualali va yokoka.”
33 Momo ca popia Yehova ukualohoka Suku ya Isareli ceci hati:
“Omõla ufeko wo Bavulono o kasi ndocimbandi.
Eyi oyo otembo yoku u sasa.
Ndopo otembo yoku ungula yi ka pitĩla kokuaye.”
34 “Soma Nevukandesa wo ko Bavulono wa ndi lia;+Eye wa njimba vonjuela.
Eye wa ndi tepulula ndesanga limue li kasi upolokoso.
Eye wa ndi ina ndonyõha yimue yinene;+Eye wa yukisa imo liaye lovina viange viwa.
Eye wa njimba kosamua.
35 ‘Ungangala wa lingiwa kokuange kuenda ketimba liange, u wile ko Bavulono!’ oco onungi yo Siono ya popia.+
‘Kuenda eko liosonde yange li wile kolonungi vio Kaldea!’ oco ca popia o Yerusalãi.”
36 Omo liaco, ca popia Yehova ceci hati:
“Ndi kasi oku eca esunga kokuove,+Kuenda ndi ka ku fetuluinyilako.+
Ndi ka kukutisa okalunga kumue lovisimo vialio.+
37 Kuenje o Bavulono yi ka linga ondunda yovawe,+Ocivundilo cimue colombua viovusenge,*+Ocikuata cimue coku yokoka kuenda ocina cimue coku sika ovilua,Okuti, ka mu ka kala onungi.+
38 Vosi yavo va ka koma ndolohosi viamalẽhe.*
Ovo va ka koma ndomãla volohosi.”
39 “Eci olonjongole viavo vi livokiya, ndi ka pongiya ocipito cimue loku va koluisa,Oco va sanjuke;+
Noke va ka pekela otulo ka tu pui,Okuti ka va ka pasuka,”+ oco Yehova a popia.
40 “Ame ndi ka va nena ndotulomeme tua loña kepondelo,Ndovitupi violomeme kumue lovitupi violohombo.”
41 “Ndomo o Sesake* ya kuatiwa,+Tali ndomo ovo va tambula olupale luna lua sivayiwa lomanu vosi!+
Ndomo o Bavulono ya linga ocikuata cimue coku yokoka pokati kolofeka!
42 Okalunga ka lamana toke ko Bavulono.
Oyo ya sitikiwa lakimba alio alua.
43 Alupale ayo, a linga ocikuata cimue coku yokoka, ofeka yimue ka yi kuete ovava haiyo yekango.
Ofeka yimue okuti, lomue o ka kalamo kuenda lomue omunu o ka pitamo.+
44 Ndi ka yambuila o Bele+ ko Bavulono,Kuenje ndi kopa komẽla wayo eci oyo ya ina.+
Kokuayo olofeka ka vi ka endako vali,Kuenda ocimbaka co Bavulono ci ka kupuka.+
45 Tundi pokati kayo, amanu vange!+
Popeli ovimuenyo viene+ konyeño ya piãla ya Yehova!+
46 Ko ka sumui ale oku kuata usumba omo liesapulo li ka yeviwa vofeka.
Vunyamo umue ku keya esapulo limue,Kuenda vunyamo u kuamamo ku iya esapulo likuavo,Liungangala vofeka kuenda liombiali yi katukila ombiali.
47 Omo liaco, tali! Oloneke vi kasi oku iya
Eci ame ndi ka yambula oviñumañuma via songiwa vio Bavulono.
Ofeka yalio yosi yi ka kutisiwa osõi,Kuenje ovivimbi vialio viosi vi ka kupukila pokati kalio.+
48 Ovailu kuenda ongongo lovina viosi vi kasimo
Vi ka kaluka lonjolela omo lio Bavulono,+Momo vakuakunyõla va keya kokualio oku tunda konano,”+ oco Yehova a popia.
49 “O Bavulono ka ya kupuile lika ovivimbi vio Isareli+Pole, ko Bavulono kua kupukavo ovivimbi vio kilu lieve liosi.
50 Ene wa puluki kosipata, amamiko oku enda, ko ka talami!+
Ene vu kasi kupãla, ivaluki Yehova,Kuenda sokololi eci catiamẽla ko Yerusalãi.”+
51 “Tua kutisiwa osõi, momo tua yeva olondaka vioku sanumũla.
Esepu lia sitika ovipala vietu,Momo ovingendeleyi* vieya oku katukila ovitumãlo vi kola vionjo ya Yehova.”+
52 “Omo liaco, oloneke vi kasi oku iya,” oco Yehova a popia,“Eci ndi ka yambula oviñumañuma vialio via songiwa,Kuenje kofeka yalio yosi, vana va lemẽhiwa va ka leña leña.”+
53 “Ndaño o Bavulono yi lamana kovailu,+Ndaño oyo yi pamisa oviteyuilo vialio vinene,Kokualio ku ka pitĩla vakuakunyõla va tunda kokuange,”+ oco Yehova a popia.
54 “Yeveleli! Ko Bavulono+ ku yevala oku kaluka kumue,Ocileñi cocilunga cinene ci tundilila kofeka ya va Kaldea,+
55 Momo Yehova o kasi oku kundula o Bavulono,Eye o ka lingisa okuti, ondaka yalio yinene yũha,Kuenje akimba avo a kõla ndovava alua.
Ocileñi condaka yavo ci ka yeviwa.
56 Momo ukuakunyõla o keya ko Bavulono;+
Asualali valio va ka kuatiwa,+Olohonji viavo vi ka teyiwa,Momo Yehova eye Suku una eca komunu lomunu eyambulo a sesamẽla.+
Eye o ka fetuluinya muẽle.+
57 Ndi ka koluisa olombuale vialio kuenda alume valio vakualondunge,+Olonguluvulu vialio la va kalei kolombiali kuenda asualali valio,Kuenje ovo va ka pekela otulo ka tu pui,Okuti ka va ka pasuka,”+ oco ca popia Soma una okuti, onduko yaye Yehova ukualohoka.
58 Ca popia Yehova ukualohoka ceci hati:
“Ocimbaka co Bavulono, ndaño okuti ca tanda, ci ka nyõliwa pe,+Olombundi vialio, ndaño okuti via lepa, vi ka imbiwa vondalu.
Omanu va ka talavaya calua elivova;Olofeka vi ka likavisa ño ovio muẽle oco vi tekule ondalu.”+
59 Eyi oyo ondaka uprofeto Yeremiya a eca ndocihandeleko ku Seraya omõla a Neriya+ omõla a Maheseiya, eci eye a enda ko Bavulono la Soma Sedekiya wo ko Yuda kunyamo wakuãla wuviali waye; Seraya eye wa kala kesongo kovina via soma.
60 Yeremiya wa soneha velivulu limue ohali yosi ya laikele oku pita ko Bavulono okuti, olondaka viosi evi via sonehiwa viatiamẽla ko Bavulono.
61 Handi vali, Yeremiya wa sapuila Seraya hati: “Eci o pitĩla ko Bavulono loku yi mola, o sukila oku tanga lolukandi olondaka viosi evi.
62 Noke popia hati: ‘A Yehova, ove wa popia eci catiamẽla kocitumãlo eci okuti, ci ka nyõliwa kuenda ka mu ka siala onungi layimue, omunu ale ocinyama kuenje oyo yi ka siala upolokoso otembo ka yi pui.’+
63 Kuenje eci o mala oku tanga elivulu eli, kutilako ewe limue kuenje limba vokati ko Ferati.
64 Noke popia hati: ‘Eyi oyo onjila ndomo o Bavulono yi ka vomba kuenda lalimue eteke yi ka katuka vali,+ omo liohali ndi kasi oku yi nenela; kuenje ovo va ka kava.’”+
Palo, opo pa sulila olondaka via Yeremiya.
Atosi Pombuelo
^ Citava okuti, onjila yikuavo yoku soneha onduko Kaldea.
^ Lit., “oku liata.”
^ Okuti, ofeka ya va Kaldea.
^ Ale pamue, “yukisi ovilalo viovisongo.”
^ Ale “ombueti yondimbukiso.”
^ Ale “ombundu.”
^ Ale “efuimo.”
^ Ale “ka vi kuete esilivilo.”
^ Ale “ombueti yondimbukiso.”
^ Lit., “Oku Kolisa.”
^ Lit., “Oku Kolisa.”
^ Ocinyama cimue covusenge ca setahãla ombulu.
^ Ale “ayove olohosi.”
^ Citava okuti onjila yikuavo yoku soneha onduko Bavele (Bavulono).
^ Ale “omanu vo kofeka yiñi.”
